Njohësi i çështjeve të sigurisë, Nuredin Ibishi, e ka konsideruar si një zhvillim të jashtëzakonshëm konfirmimin e Brukselit se janë plotësuar kushtet për hapjen e urës kryesore mbi lumin Ibër në Mitrovicë.

Duke folur në emisionin “Ditari”, Ibishi ka deklaruar se hapja e urës mund të ndikojë drejtpërdrejt në procesin e integrimit të veriut të Kosovës.

Ai ka theksuar se krijimi i një klime të përshtatshme sigurie është bërë i mundur falë punës së Policisë së Kosovës, institucioneve të tjera të sigurisë dhe vetëpërmbajtjes së komuniteteve në veri e jug të Mitrovicës.

“Në radhë të parë Policia e Kosovës, inteligjenca dhe të gjitha shërbimet e tjera të Kosovës kanë kontribuar në krijimin e kushteve të favorshme dhe të një klime të përshtatshme sigurie. Natyrisht, edhe komunitetet që jetojnë në veri dhe në jug kanë treguar përmbajtje dhe kontroll, duke shmangur incidentet”, ka deklaruar Ibishi.

Rëndësi në tejkalimin e kësaj situate, sipas tij, kanë pasur edhe KFOR-i, EULEX-i dhe Bashkimi Evropian.

“Për fat të mirë, KFOR-i, EULEX-i dhe Bashkimi Evropian më në fund dhanë dritën e gjelbër që kjo situatë të kapërcehet. Në përgjithësi, mendoj se bëhet fjalë për një arritje të jashtëzakonshme, e cila do të ndikojë edhe në integrimin e veriut”, është shprehur ai.

Lidhur me afatin e hapjes së urës, Ibishi ka thënë se nuk pritet që procedura të zgjasë shumë. Megjithatë, ai ka sqaruar se kompetencat do t’i kalojnë Policisë së Kosovës në mënyrë të shkallëzuar.

“Mendoj se nuk do të zgjasë shumë. Pas kësaj nisme, do të vijojë zbatimi i asaj që është deklaruar nga KFOR-i, EULEX-i dhe Policia e Kosovës, që kompetencat t’i kalojnë gradualisht Policisë së Kosovës. Kjo nuk lidhet vetëm me urat, por edhe me objektet e tjera të Kosovës, përfshirë Manastirin e Deçanit. Pra, nuk besoj se do të marrë shumë kohë, por do të jetë një proces gradual”, ka thënë Ibishi.

Duke iu referuar reagimit të Listës Serbe pas vendimit të Brukselit, ai ka përjashtuar mundësinë e përshkallëzimit të situatës në veri.

Sipas Ibishit, ky reagim përbën një përpjekje të fundit për t’i bërë rezistencë procesit të integrimit.

“Lista Serbe përcjell vetëm kërkesat e Vuçiqit dhe Beogradit, por nuk e ka më fuqinë ekstremiste që ka pasur më herët në terren për të organizuar ndonjë bllokadë apo për të penguar lëvizjen e lirë, deri në ndërmarrjen e masave me pasoja të rënda”, ka deklaruar ai.

Ibishi ka vlerësuar se qëndrimi i Listës Serbe synon të ndalë integrimin e veriut.

“Kjo është vetëm një përpjekje e fundit dhe destruktive për të penguar integrimin e veriut, në vend që ta mbështesin atë. Reagimi i tyre duhet të gjykohet”, ka përfunduar Ibishi.

Bashkimi Europian ka bërë të ditur se kriteret për hapjen e urës kryesore mbi lumin Ibër në Mitrovicë janë përmbushur. Ky njoftim u bë pasi KFOR-i nisi tërheqjen graduale të pranisë së përhershme nga ura.

Të hënën, ish-presidentja e Kosovës, Vjosa Osmani, e ka përshëndetur këtë konfirmim, duke e cilësuar hapjen e urës si një hap historik.

Procesi kishte nisur në fillim të javës së kaluar, kur misioni i NATO-s në Kosovë njoftoi se kishte filluar tranzicioni gradual i pranisë së përhershme të trupave në urën kryesore.

KFOR-i sqaroi se tranzicioni po realizohet mbi bazën e kushteve të sigurisë dhe në bashkërendim me institucionet e Kosovës, EULEX-in dhe aktorë të tjerë ndërkombëtarë.

Po atë ditë, në urë u konstatua edhe prania e Policisë së Kosovës.

Pas njoftimit, Bashkimi Europian deklaroi se ishte informuar nga NATO dhe përsëriti qëndrimin e tij të pandryshuar: ura duhet të hapet pasi të përfundojnë punimet, vlerësimet dhe konsultimet me partnerët e sigurisë.

Ura mbi lumin Ibër prej vitesh konsiderohet një nga zonat më të ndjeshme të Kosovës.

Ajo ndan jugun e Mitrovicës, ku banojnë kryesisht shqiptarë, nga veriu i qytetit, i cili ka shumicë serbe.

Tensionet e vazhdueshme kanë bërë që KFOR-i të ketë prani në urë për shumë vite.

The post Ibishi: Hapja e urës mbi Ibër pas konfirmimit të Brukselit, një sukses i jashtëzakonshëm appeared first on Albeu.com.

Eksperti i sigurisë, Avni Islami, thekson se Kosova duhet të largohet nga pritshmëria për transformime politike në Serbi dhe në vend të kësaj të përqendrohet në forcimin e institucioneve të veta të sigurisë dhe në zhvillimin ekonomik.

Sipas tij, në Serbi mbizotëron ende një frymë politike armiqësore ndaj Kosovës dhe zërat që distancohen nga trashëgimia e Sllobodan Millosheviqit mbeten të izoluar. Islami vë në dukje se, kur bëhet fjalë për Kosovën, si pushteti ashtu edhe opozita në Beograd bashkohen në një vijë të vetme, duke garuar se kush shfaqet më tepër si atdhetar.

Ai argumenton se procesi i demokratizimit të Serbisë nuk duhet parë si parakusht kryesor për njohje dhe se Kosovës i duhet një qasje krejtësisht tjetër, e mbështetur te fuqizimi i brendshëm. “Në vend që të presim, duhet të veprojmë: fuqizimi ekonomik dhe konsolidimi i shtyllave të sigurisë – FSK-së, AKI-së dhe Policisë – janë thelbësore”, është shprehur Islami.

Në vlerësimin e tij, lëvizjet e shpejta në balancat gjeopolitike kanë kthyer investimin në sigurinë kombëtare nga një alternativë e thjeshtë në një kusht ekzistence. Një angazhim i tillë nuk përbën më thjesht një opsion, por një domosdoshmëri për mbijetesë.

The post Avni Islami: Kosova s’duhet të presë ndryshimet në Serbi, por të fuqizojë forcat e sigurisë appeared first on Albeu.com.