Njësia A4 është nxjerrë nga operimi në mënyrë të kontrolluar më 11 gusht 2026, në orën 00:00, pasi në gjenerator u konstatua rrjedhje e gazit të hidrogjenit (H₂), pranë kushinetës nr. 7, ka njoftuar Korporata Energjetike e Kosovës (KEK).

KEK-u ka sqaruar se ky veprim u ndërmor për parandalim dhe në përputhje me standardet e sigurisë teknike, në mënyrë që të krijoheshin kushtet për inspektimin e pajisjes dhe kryerjen e ndërhyrjeve të nevojshme.

Menjëherë pas ndaljes, ekipet profesionale nisën verifikimin e gjendjes teknike, përcaktimin e burimit të rrjedhjes dhe punën për zgjidhjen e problemit.

Sipas korporatës, Njësia A4 do të vihet sërish në funksion pasi të përfundojnë kontrollet dhe ndërhyrjet teknike dhe të vërtetohet se janë plotësuar kushtet për operim të sigurt.

Publiku do të njoftohet në kohë për çdo zhvillim të mëtejshëm, përfshirë edhe momentin kur njësia do të rikthehet në operim, ka bërë të ditur KEK-u.

The post KEK-u ndal Njësinë A4 pas konstatimit të rrjedhjes së gazit në gjenerator appeared first on Albeu.com.