Analisti politik Arbnor Sadiku ka reaguar lidhur me nismën e PDK-së për Gjykatën Speciale, duke deklaruar se Kuvendi i Kosovës ka mundësi të miratojë një rezolutë institucionale kundër vendimeve të kësaj gjykate dhe dënimit të figurave drejtuese të UÇK-së.

Sipas Sadikut, miratimi i një dokumenti të tillë duhet të mbështetet nga të gjitha partitë politike që kanë përfaqësues në Kuvendin e Kosovës.

Ai ka theksuar se, në rast se shfuqizimi i Gjykatës Speciale nuk është i mundur, Kuvendi mund të shprehë në emër të popullit të Kosovës qëndrimin institucional kundërshtues ndaj vendimeve të saj dhe dënimeve të krerëve të UÇK-së.

Sadiku ka vlerësuar se një deklaratë e përbashkët e partive do të përcillte mesazh të qartë institucional, duke ruajtur respektin për pavarësinë e drejtësisë dhe duke kërkuar njëkohësisht drejtësi të barabartë, proces të rregullt dhe respektim të të drejtave të të akuzuarve.

The post Sadiku propozon rezolutë konsensuale të Kuvendit për Gjykatën Speciale appeared first on Albeu.com.

Bashkimi Evropian ka konfirmuar sërish përkrahjen e tij për Dhomat e Specializuara, duke nënvizuar se ky institucion është i pavarur dhe se të dënuarit prej tij kanë të drejtën e ankesës.

Qëndrimi u shpreh nga zëdhënësi Kristijan Vigand, i pyetur për nismën e PDK-së në Prishtinë lidhur me ndryshimin e ligjit për Dhomat e Specializuara. Ai nuk dha koment të drejtpërdrejtë për propozimin, por u ndal te funksioni i kësaj gjykate, transmeton KosovaPress.

Në një konferencë për shtyp nga selia e BE-së në Bruksel, Vigand deklaroi se Dhomat e Specializuara të Kosovës janë institucion gjyqësor i pavarur, i krijuar me vendim të Kuvendit të Kosovës gjatë viteve 2014–2015 dhe që funksionon në kuadër të sistemit juridik të Kosovës.

Sipas tij, puna e këtij institucioni ka rëndësi për garantimin e drejtësisë dhe llogaridhënies ndaj viktimave dhe familjeve të tyre, nga të gjitha komunitetet e Kosovës.

Vigand rikujtoi gjithashtu se të dënuarit me vendim të shkallës së parë mund ta apelojnë aktgjykimin para gjyqtarëve të pavarur të apelit, në një panel të veçantë të Apelit të Dhomave të Specializuara.

Ai shtoi se mbështetja e Bashkimit Evropian për këtë gjykatë mbetet e pandryshuar dhe do të vazhdojë, duke vënë theksin te parimi i përgjegjësisë penale individuale.

The post BE riafirmon mbështetjen për Specialen, pa qëndrim për nismën e PDK-së appeared first on Albeu.com.

Kryetari i PDK-së, Bedri Hamza, bëri të ditur të hënën se grupi parlamentar i kësaj partie ka dorëzuar në Kuvend projektligjin për ndryshimin dhe plotësimin e ligjit që rregullon Dhomat e Specializuara të Kosovës në Hagë.

Sipas Hamzës, iniciativa është ndërmarrë në një periudhë kur debati publik në Kosovë për proceset ndaj ish-krerëve të Ushtrisë Çlirimtare të Kosovës është intensifikuar, veçanërisht pas protestave të zhvilluara kundër aktgjykimit ndaj tyre.

PDK-ja ka deklaruar se synimi i nismës është trajtimi i çështjeve që lidhen me funksionimin e Dhomave të Specializuara dhe zhvillimin e procedurave gjyqësore.

Aleanca e ka mbështetur këtë iniciativë, ndërsa LVV-ja ka njoftuar se do ta analizojë me kujdes propozimin e PDK-së. Sipas LVV-së, duhet të vlerësohet nëse ndryshimet janë në pajtim me kuadrin ligjor dhe çfarë ndikimi do të kishin në proceset që po zhvillohen në Hagë.

LVV-ja ka kërkuar gjithashtu që së pari të pritet vendimi i Gjykatës Kushtetuese për konstituimin e Kuvendit, duke theksuar se çështja kërkon një qasje të koordinuar institucionale dhe shtetërore.

Propozimi i PDK-së pritet të rikthejë në Kuvend diskutimet për mënyrën e funksionimit të Gjykatës Speciale, në një kohë kur zhvillimet gjyqësore në Hagë vazhdojnë të jenë pjesë e debatit politik dhe shoqëror në Kosovë.

Lama: Gjykata Speciale nuk mund të zhbëhet me nismë ligjore

Ish-ambasadorja Alma Lama, në një deklaratë për “Bota sot”, ka thënë se Dhomat e Specializuara nuk mund të shfuqizohen përmes një iniciative për ndryshimin e ligjit.

Ajo ka vlerësuar se energjia duhet të përqendrohet te Gjykata e Apelit, e cila, sipas saj, mund të ndikojë në uljen ose heqjen e dënimeve në rast se ato rezultojnë të pabazuara.

“PDK-ja e di shumë mirë se Gjykata Speciale nuk mund të zhbëhet. Një nismë ligjore nuk do të sjellë rezultat, pasi do të kërkohej ndryshimi i Kushtetutës. Për këtë nevojiten dy të tretat e votave të deputetëve dhe dy të tretat e votave të përfaqësuesve të komuniteteve, pra shumica e dyfishtë.

Për më tepër, Kosova ka edhe detyrime ndërkombëtare. Për këtë arsye, fokusi duhet të jetë te Gjykata e Apelit, e cila mund t’i zvogëlojë ose t’i heqë dënimet nëse ato nuk janë të mbështetura në prova”, ka deklaruar Lama.

Sipas saj, krijimi i Gjykatës Speciale ka qenë kërkesë e bashkësisë ndërkombëtare, në veçanti e Shteteve të Bashkuara të Amerikës dhe Bashkimit Evropian. Lama ka kritikuar njëkohësisht kohën e gjatë të hetimeve dhe rëndesën e dënimeve.

Alma Lama ka thënë se Kosova duhet ta vijojë përballjen në kuadër të drejtësisë ndërkombëtare dhe përmes veprimeve diplomatike.

“Gjykata Speciale nuk ka qenë kurrë një shaka, por një kërkesë vendimtare e bashkësisë ndërkombëtare, konkretisht e SHBA-së dhe BE-së, e cila mbështeti Këshillin e Europës.

Dënimet janë të rënda, ndërsa hetimet kanë zgjatur tepër. Për më tepër, akuza për trafikim organesh nuk ka qenë pjesë e hetimit, pasi që në fillim u kuptua se bëhej fjalë për një shpifje monstruoze të Serbisë dhe Rusisë.

Beteja e Kosovës duhet të vazhdojë, por brenda sistemit të drejtësisë ndërkombëtare dhe në rrafshin diplomatik”, ka deklaruar ajo.

Burjani: Problemi kryesor lidhet me mënyrën e gjykimit

Juristi Blerim Burjani, duke folur për “Bota sot”, ka thënë se mandati i Gjykatës Speciale është i përcaktuar qartë, por ka shprehur shqetësime për mënyrën se si zhvillohen gjykimet.

Sipas tij, çështjet më problematike kanë të bëjnë me paanshmërinë e gjykatës, vlerësimin dhe administrimin e provave, si dhe me nevojën që proceset të bazohen në standarde të drejta gjyqësore.

“Mandati është i qartë, ndërsa shqetësimi lidhet me gjyqtarët. Ligji nuk mund ta ndryshojë mandatin apo kompetencat e saj, pasi ajo mbetet gjykatë. Çështja kryesore është mënyra e gjykimit: sa i drejtë është procesi, si janë vlerësuar dhe administruar provat dhe si janë kualifikuar ato.

Këtu qëndron problemi kryesor. Kjo gjykatë ka shqetësime sa i përket paanshmërisë. Nuk duket se vepron në mënyrë normale dhe mbi bazën e provave materiale apo formale. Ka shumë probleme në mënyrën se si u janë qasur proceseve të katërshes.

Kërkesa është për drejtësi të rregullt dhe vendimmarrje të mbështetur në prova, jo për shmangie apo politizim të procesit gjyqësor”, ka theksuar Burjani.

Juristi ka shprehur dyshime edhe për standardet e ndjekura gjatë gjykimit, duke kërkuar një proces të pavarur dhe të paanshëm.

“Dyshimet lidhen me standardet e gjyqësisë dhe me parimet themelore. Duhet parë nëse kemi të bëjmë me një gjykatë që zhvillon proces të rregullt apo me një institucion të manipuluar dhe të njëanshëm.

Dëmi është shkaktuar në masë të madhe në shkallën e parë, përmes aktgjykimeve drakonike dhe absurde. Tani shpresohet që Gjykata e Apelit të jetë më profesionale dhe më e paanshme.

Kërkesa bazë është zbatimi i parimeve të drejtësisë së pavarur, pasi besimi në këtë gjykatë mungon. Ligji mund të ndryshojë, por misioni i saj nuk mund të ndryshohet, sepse ai mbetet zbardhja e dyshimeve për krime lufte”, ka thënë ai.

Burjani ka shtuar se monitorimi i Gjykatës Speciale, i përmendur nga PDK-ja, nuk do të sillte ndryshime të rëndësishme. Sipas tij, mbrojtja duhet të përqendrohet te puna e avokatëve dhe sigurimi i fakteve të reja për procedurën në Apel.

“Monitorimi i përmendur nga PDK-ja nuk ka efekt mbi këtë gjykatë. Ligji mund të ndryshojë vetëm në mënyrë kozmetike dhe jo në atë masë që të sjellë ndryshime thelbësore. Vetëm zhbërja e saj do t’i shpëtonte luftëtarët në Hagë, ndërsa pjesa tjetër është kryesisht politike.

Tani nevojitet një mbrojtje efektive nga avokatët dhe mbledhja e sa më shumë fakteve që mund të kenë munguar në shkallën e parë. Procesi duhet të kthehet në favor të palëve që janë dënuar nga shkalla e parë”, ka përfunduar Burjani për “Bota sot”.

The post PDK propozon ndryshime për Dhomat e Specializuara, ekspertët: Mandati nuk preket, fokusi duhet te Apeli appeared first on Albeu.com.

Grupi parlamentar i Partisë Demokratike të Kosovës ka depozituar të hënën në Kuvend një projektligj që synon ndryshimin dhe plotësimin e ligjit për Dhomat e Specializuara në Hagë. Kreu i PDK-së, Bedri Hamza, njoftoi se kjo lëvizje vjen si pasojë e shqetësimeve të ngritura gjatë demonstratave të fundit kundër dënimit të ish-udhëheqësve të Ushtrisë Çlirimtare të Kosovës. Aleanca për Ardhmërinë e Kosovës e ka përkrahur iniciativën, ndërsa Lëvizja Vetëvendosje dhe Lidhja Demokratike e Kosovës nuk kanë dalë ende me një qëndrim formal.

Sipas dokumentit të propozuar që konsultoi Radio Evropa e Lirë, një nga pikat kryesore është vendosja e një kufiri maksimal dënimi prej 15 vitesh burgimi, si dhe hapja e rrugës që personat e dënuar të përfitojnë nga falja e presidentes së vendit.

Në arsyetimin e amendamenteve, theksohet se ndërhyrja në ligj u bë e domosdoshme pas vendimit të 16 shtatorit, i cili e cilësoi UÇK-në si “ndërmarrje të përbashkët kriminale”. Sipas hartuesve, ky klasifikim sjell pasoja të rënda për shtetin, historinë dhe sovranitetin e Kosovës. Ata argumentojnë se Gjykata u ngrit me premisën e gjykimit të përgjegjësisë individuale penale, por vendimi në fjalë bie ndesh me garancitë e mëparshme se procesi nuk do të vinte në dyshim legjitimitetin e UÇK-së dhe synimin për çlirim.

Propozimi parashikon ngushtimin e mandatit të gjykatës ekskluzivisht për veprat e përmendura në raportin e Asamblesë Parlamentare të Këshillit të Evropës të vitit 2011. Qëllimi, siç shpjegohet, është shndërrimi i saj në një mekanizëm të jashtëzakonshëm dhe krijimi i bazës ligjore për transferimin e detyruar të dosjeve dhe të ndaluarve drejt sistemit të rregullt gjyqësor kosovar.

Po ashtu, amendamenti synon që dënimet e shqiptuara të ekzekutohen në burgjet e Kosovës. Dokumenti kërkon që presidenti të ketë kompetencën e faljes për personat e dënuar nga Specialja. Ndonëse Ligji aktual për Faljen përjashton veprat kundër së drejtës ndërkombëtare, ku përfshihen edhe krimet e luftës, nisma synon ta kapërcejë këtë pengesë.

Një tjetër pikë kyçe është fokusimi i juridiksionit vetëm në akuzat për trafikim organesh të detajuara në raportin e Dick Martyt. Propozimi kufizon ndjekjen penale për vepra të tjera, si krimet e përgjithshme të luftës, vetëm nëse ato lidhen drejtpërdrejt me operacionet e marrjes së paligjshme të organeve. Për pasojë, kërkohet heqja e kompetencës së gjykatës për të ndjekur krime lufte apo dhunë politike që nuk kanë këtë lidhje të drejtpërdrejtë.

Ndryshimet prekin edhe harkun kohor nën hetim, duke propozuar periudhën nga 1 korriku 1999 deri më 31 dhjetor 2000, ndryshe nga afati aktual që fillon në janar 1998. Territori i veprave po ashtu do të kufizohej vetëm brenda kufijve të Kosovës, duke përjashtuar hetimet për ngjarje jashtë saj, sikurse ato në veri të Shqipërisë që ka trajtuar Prokuroria e Specializuar deri tani.

Në planin procedural, kërkohen mekanizma të shpejtë për verifikimin e kompetencës dhe u jepet e drejta palëve të ankohen në Gjykatën Supreme në Prishtinë. Në rast se një çështje bie jashtë juridiksionit të ri, ajo së bashku me provat dhe të akuzuarit, do t’i kalonte sistemit vendor të drejtësisë, respektivisht Departamentit Special të Gjykatës Themelore dhe Prokurorisë Speciale të Kosovës.

Një dispozitë e rëndësishme parasheh që çdo person i arrestuar të sillet para një gjykatësi në Kosovë brenda 48 orësh për vlerësimin e masës së sigurisë sipas legjislacionit vendas. Gjithashtu, trupat gjykues do të detyroheshin të rishqyrtonin juridiksionin e çdo lënde brenda një muaji nga hyrja në fuqi e këtij ligji. Dokumenti saktëson se për rastet me akuza të përziera, pjesa që nuk përputhet me mandatin e ri do të anulohet dhe do të veçohet për transferim.

Gjatë paraqitjes para mediave, Hamza u shpreh se qëllimi nuk është as shuarja e Gjykatës, as pengimi i hetimeve për pretendimet serioze si trafikimi i organeve, por qartësimi i kompetencave të saj. Ai shtoi se për rastet që ndodhen tashmë në apel, procesi do të vijojë në strukturën aktuale, por në rast të një rigjykimi të mundshëm, do të zbatohej juridiksioni i kufizuar dhe lënda mund të transferohej në Kosovë.

Ndërkaq, ushtruesja e detyrës së presidentes, Albulena Haxhiu, bëri thirrje për unitet dhe koordinim institucional, duke kërkuar lënien mënjanë të akuza reciproke si tradhti dhe spiunazh për të vendosur një qasje të përbashkët pas këtij vendimi gjyqësor. Ndërkohë, deputeti i LDK-së, Avdullah Hoti, kërkoi një seancë të jashtëzakonshme parlamentare për miratimin e një rezolute të re dhe angazhimin e plotë diplomatik për procesin e apelit.

Nisma përkon me natën e gjashtë të protestave në kryeqytet kundër dënimit të Hashim Thaçit, Kadri Veselit, Jakup Krasniqit dhe Rexhep Selimit më 16 shtator. Ata morën dënime përkatësisht me 25, 18, 25 dhe 13 vjet burgim për krime lufte, ndërsa u liruan nga akuzat për krime kundër njerëzimit. Organizatorët e tubimeve kërkojnë ndër të tjera shkarkimin e ministres Donika Gërvalla dhe sigurimin e fondeve për mbrojtjen e të akuzuarve.

Nga ana ligjore, eksperti Ehat Miftaraj nga Instituti i Kosovës për Drejtësi paralajmëroi se nëse dispozitat e reja penale janë më të buta, ato mund të kërkohet të zbatohen në proceset aktive në Hagë, në bazë të parimit të zbatimit të ligjit më të favorshëm. Ai saktësoi se një kërkesë e tillë do të shqyrtohej nga Dhoma e Specializuar e Gjykatës Kushtetuese në Hagë, e cila mban juridiksion ekskluziv, dhe jo nga ajo në Prishtinë, duke iu referuar një aktgjykimi të vitit 2020. Po ashtu, Miftaraj përmendi mundësinë që Avokati i Popullit në Hagë të ngrejë çështjen e ligjshmërisë.

PDK-ja, duke mos i pasur votat e mjaftueshme vetëm me 22 deputetë, kërkon nënshkrimet e kolegëve të tjerë për të arritur kuorumin e nevojshëm për një seancë të jashtëzakonshme. Hamza konfirmoi se ka pasur diskutime paraprake me subjektet e tjera politike dhe ftoi mbështetjen e tyre, duke përfshirë edhe propozimin që vëzhgues ndërkombëtarë të pavarur të monitorojnë respektimin e standardeve të procesit të rregullt ligjor dhe të drejtave të të akuzuarve në Gjykatën Speciale.

The post Detajet e projektligjit të PDK-së për Gjykatën Speciale: çfarë synohet të ndryshojë? appeared first on Albeu.com.

Aleanca deklaron se do të përkrahë çdo nismë ligjore dhe demokratike që synon garantimin e drejtësisë në procesin gjyqësor ndaj ish-krerëve të Ushtrisë Çlirimtare të Kosovës në Hagë.

Në reagimin e saj publik, Aleanca thekson se pozicioni institucional për këtë çështje nuk ka ndryshuar që prej nisjes së procesit. Ajo vijon të mbrojë bindjen se lufta e popullit të Kosovës për çlirim, e udhëhequr nga UÇK-ja, ishte e drejtë, e pastër dhe e pashmangshme.

Sipas Aleancës, kjo bindje mbetet e palëkundur dhe përbën bazën e qëndrimit të saj ndaj procesit në Hagë.

Aleanca shpreh besimin se procedura gjyqësore do të përfundojë me pafajësinë e Hashim Thaçit, Kadri Veselit, Jakup Krasniqit dhe Rexhep Selimit.

Për këtë arsye, ajo u kërkon Kosovës dhe institucioneve të saj të ndërmarrin çdo veprim të nevojshëm për të mbështetur procesin dhe për të kontribuar në një përfundim me drejtësi të plotë.

The post Aleanca kërkon drejtësi në Hagë dhe mbështet çdo nismë ligjore për ish-krerët e UÇK-së appeared first on Albeu.com.

Organizata e Veteranëve të Luftës së UÇK-së reagoi pas deklaratës së kryetarit të BDI-së, Ali Ahmeti, i cili tha se disponon informacione sipas të cilave Gjykata Kushtetuese ka iniciativa për rihapjen e rasteve të Tribunalit të Hagës, përfshirë edhe aktakuzën ndaj Ushtrisë Çlirimtare Kombëtare (UÇK). Ahmeti theksoi se rikthimi i plagëve të vjetra është më i dhimbshëm se krijimi i një plage të re.

OVL e UÇK-së deklaroi se kundërshton kategorikisht çdo përpjekje për të hapur procese të reja të Hagës kundër Ushtrisë Çlirimtare Kombëtare.

Sipas organizatës, bëhet fjalë për manovra të revizionizmit politik, të cilat synojnë ta paraqesin si kriminale një luftë të drejtë çlirimtare dhe të dëmtojnë bazat e Marrëveshjes së Ohrit.

“Luftëtarët shqiptarë paguan çmimin që solli dinjitet, barazi dhe stabilitet. Plagët e së kaluarës nuk duhet të preken me synimin për të goditur vlerat e luftës ose për të destabilizuar rajonin.

Qarqet shoviniste të Maqedonisë së Veriut nuk duhet të përpiqen ta shtrembërojnë historinë për interesat e tyre politike”, thuhet në reagimin e Organizatës së Veteranëve të Luftës së UÇK-së.

The post OVL e UÇK-së kundërshton çdo nismë për aktakuzë ndaj Ushtrisë Çlirimtare Kombëtare pas deklaratës së Ali Ahmetit appeared first on Albeu.com.

Sibel Halimi, anëtare e kryesisë së Lidhjes Demokratike të Kosovës, deklaroi para mbledhjes së kryesisë se nuk e ka firmosur nismën që kërkon largimin e kryetarit të LDK-së, Lumir Abdixhiku.

Ajo tha se në mbledhje pritet të diskutohet për rezultatin e zgjedhjeve dhe për formimin e institucioneve, ndërsa nuk e përjashtoi që kjo çështje të trajtohet edhe në pikën të ndryshme.

“Nuk e kam nënshkruar. Besoj që përgjegjësia duhet të merret nga të gjitha palët të LDK dhe besoj që nuk është e mjaftueshme vetëm angazhimi i kryetarit të LDK-së.

Ne kemi rëndin e ditës dhe do të diskutojmë për çështjen e rezultati të zgjedhjeve gjithsesi edhe për çështje të cilat lidhen në formimin e institucioneve, si dhe natyrisht do të diskutojmë për shumë çështje të tjera për partin. Në rend dite nuk kemi pika e fundit e rendit të ditës është te ndryshme dhe besoj që aty do ta diskutojmë”, tha ajo.

The post Sibel Halimi mohon nënshkrimin e iniciativës për shkarkimin e Abdixhikut appeared first on Albeu.com.

Rezultati i dobët i Lidhjes Demokratike të Kosovës në zgjedhjet e fundit ka vënë në lëvizje zhvillime të reja brenda partisë, ku po flitet për ndryshime në krye të saj.

Burime nga LDK-ja kanë bërë të ditur se ka nisur mbledhja e nënshkrimeve për thirrjen e një kuvendi të jashtëzakonshëm, në të cilin pritet të vihet në shqyrtim edhe shkarkimi i kryetarit Lumir Abdixhiku.

Sipas informacioneve që qarkullojnë, nisma është ndërmarrë nga kryetari i Komunës së Pejës, Gazmend Muhaxheri.

Këto zhvillime të fundit kanë sjellë komente të ndryshme nga analistë dhe persona të afërt me LDK-në, të cilët po e interpretojnë situatën nga kënde të ndryshme.

Një pjesë e tyre e shohin kërkesën për ndërrim të udhëheqjes si rezultat të pakënaqësive të akumuluara pas humbjeve në zgjedhje dhe si një shans për reformim të partisë. Të tjerë nënvizojnë se çdo hap i tillë duhet të bëhet në pajtim me Statutin e LDK-së dhe se vendimi që del nga Kuvendi duhet të pranohet nga të gjitha palët.

Megjithatë, ende nuk dihet nëse kjo iniciativë do të arrijë të sigurojë përkrahjen e nevojshme apo nëse do të ndikojë në thellimin e përçarjeve të brendshme në partinë më të vjetër politike në Kosovë.

Qarri: Kërkesat e disa degëve për dorëheqjen e Lumir Abdixhikut dhe zgjedhje të brendshme lidhen me pakënaqësitë pas humbjeve zgjedhore

Analisti politik Gani Qarri, në një prononcim për “Bota sot”, është shprehur se pas humbjes së tretë me radhë të LDK-së në zgjedhjet parlamentare brenda 16 muajve, katër degë që ai i konsideron ndër më të suksesshmet dhe më të rëndësishmet e partisë kanë kërkuar publikisht largimin e parevokueshëm të kryetarit Lumir Abdixhiku.

“Menjëherë pas numërimit të votave dhe humbjes së tretë radhazi, degët e Pejës, Lipjanit, Dega e Dytë në Prishtinë dhe Rahoveci kërkuan dorëheqjen e Lumir Abdixhikut, duke e konsideruar atë përgjegjësin kryesor për rezultatin e dobët. Ato kërkuan edhe mbajtjen e zgjedhjeve të përgjithshme të brendshme si mënyrën e vetme për rimëkëmbjen e LDK-së”, u shpreh Qarri për ‘Bota sot’.

Sipas tij, pakënaqësia në parti nuk ka mbetur vetëm te reagimet publike.

“Frika se LDK mund të margjinalizohet nëse nuk ndryshon lidershipi ka bërë që të nisë edhe mbledhja e nënshkrimeve për dorëheqjen e Abdixhikut, thirrjen e një kuvendi të jashtëzakonshëm dhe organizimin e zgjedhjeve të përgjithshme të brendshme, nga niveli i nëndegëve deri te zgjedhja e kryetarit të ri”, tha ai.

Qarri ka kritikuar edhe mënyrën se si Abdixhiku iu përgjigj kërkesave të degëve.

“Në vend që të japë dorëheqje ose të reflektojë, Abdixhiku ka kërkuar dorëheqjen e kryetarëve të degëve në Pejë dhe Lipjan, duke i quajtur sabotatorë vetëm pse kërkuan përgjegjësi pas rezultatit të zgjedhjeve. Kjo dëshmon se LDK po kalon një krizë shumë të thellë të brendshme, e cila mund të rrezikojë të ardhmen politike të partisë”, deklaroi Qarri.

Ai tha po ashtu se nisma për mbledhjen e nënshkrimeve, që sipas tij është nisur nga Gazmend Muhaxheri, mund të marrë përkrahje të gjerë.

“Duke parë pakënaqësinë në rritje ndaj kryetarit aktual, kjo nismë pritet të jetë e suksesshme. Në të kundërtën, ekziston rreziku i krijimit të grupeve kundërshtare brenda partisë, përçarjes së saj dhe madje edhe formimit të fraksioneve të reja politike”, u shpreh ai.

Në përmbyllje, Qarri vlerësoi se ecuria zgjedhore e LDK-së nën drejtimin e Abdixhikut përbën bazë të mjaftueshme për të kërkuar përgjegjësi.

“Është fakt se LDK, edhe në komuna ku dikur qeveriste, ka rënë në renditje. Prandaj, Abdixhikut i kërkohet llogaridhënie dhe shqyrtim serioz i kërkesës së degëve për dorëheqje. Nëse kjo nuk ndodh, ekziston rreziku që partia të përballet me pasoja edhe më të rënda politike”, përfundoi Qarri.

Saim Tahiraj: Çdo nismë për ndryshime në LDK duhet të trajtohet sipas statutit

Nga ana tjetër, ish-veprimtari i LDK-së, Saim Tahiraj, ka thënë se çdo iniciativë e ndërmarrë në përputhje me Statutin e Lidhjes Demokratike të Kosovës duhet parë si legjitime dhe demokratike.

“Nëse kjo nismë është e vërtetë, nuk shoh asgjë për t’u shqetësuar. Çdo iniciativë që respekton normat statutare të LDK-së është plotësisht demokratike. Nëse sigurohen nënshkrimet e nevojshme, atëherë çështja i kalon Kuvendit të LDK-së, i cili vendos nëse kryetari Lumir Abdixhiku duhet të vazhdojë mandatin apo të largohet. Çfarëdo vendimi që merr Kuvendi duhet të respektohet nga të gjithë”, tha Tahiraj për ‘Bota sot’.

Ai shtoi se, në rast se nisma nuk arrin të sigurojë numrin e kërkuar të nënshkrimeve sipas Statutit, atëherë kryetari aktual duhet të vijojë mandatin dhe ky vendim duhet të pranohet nga të gjitha strukturat e partisë.

Duke folur për rezultatin zgjedhor të LDK-së, Tahiraj u shpreh se ai ka qenë më i ulët se pritjet e partisë.

“Nëse bëhet një analizë e mirëfilltë e zgjedhjeve të fundit, rezultati është shumë i dobët krahasuar me ambiciet e LDK-së. Për këtë duhet të ketë përgjegjësi dhe llogaridhënie, duke filluar nga kryetari i partisë e deri te drejtuesit e degëve dhe nëndegëve. Deri më tani nuk është bërë një analizë serioze dhe askush nuk ka dhënë përgjegjësi për këto rezultate”, u shpreh ai.

Sipas Tahirajt, LDK-ja është larguar nga identiteti i saj tradicional.

“E kam thënë vazhdimisht dhe vazhdoj ta them se LDK ka dalë nga shtrati i saj tradicional dhe nuk është më vetvetja. Vetëm duke iu rikthyer identitetit të saj të vërtetë mund ta rifillojë rrugëtimin drejt suksesit“, deklaroi ai.

Ai kërkoi që partia të bëjë një analizë të thelluar të gjendjes dhe më pas, mbi atë bazë, të ndërmarrë reforma.

“Mendoj se zgjidhja më e mirë është një analizë e thellë, e cila do të evidentojë gabimet dhe do t’u japë mundësi përgjegjësve të reflektojnë pa inate. Pas kësaj do të ishte shumë e shëndetshme të mbaheshin zgjedhje në të gjitha nivelet e partisë, në përputhje me traditën dhe parimet mbi të cilat është ndërtuar LDK-ja”, tha Tahiraj.

Mes tjerash, ai theksoi se sipas bindjes së tij, rikthimi i LDK-së në rrugën e suksesit mund të vijë vetëm përmes ruajtjes së identitetit të saj politik.

“Vetëm origjinaliteti i vërtetë i LDK-së është rruga drejt suksesit, e jo improvizimet dhe modelet e huazuara që, sipas meje, e kanë dëmtuar partinë nga brenda”, u shpreh ai.

Saim Tahiraj ka bërë edhe një deklaratë të fortë politike për zhvillimet dhe gjendjen e brendshme në Lidhjen Demokratike të Kosovës, duke pretenduar se partia po përballet me ndikime dhe prirje ideologjike nga jashtë.

“LDK, që nga anëtari më i thjeshtë e deri te kryetari, duhet ta kuptojë mirë se ideologjia komuniste pansllaviste ka vepruar vazhdimisht në hapësirën shqiptare. Sipas meje, kjo ideologji është përcjellë përmes LPK-së dhe sot vazhdon të jetë e shpërndarë në parti si PDK, AAK dhe subjekte të tjera më të vogla, me qëllim shkatërrimin e LDK-së”, ka deklaruar Tahiraj.

“Nuk duhet të harrojmë se disa elementë të tillë janë infiltruar edhe brenda partisë. Ka një vazhdimësi të strukturave ideologjike që kanë funksionuar që nga e kaluara, dhe kjo po reflektohet edhe sot në politikën shqiptare”, ka thënë ai.

Në fund, ai theksoi se LDK mbetet, sipas tij, e vetmja forcë politike origjinale në vend.

“Unë besoj se LDK është e vetmja parti origjinale nacionaliste dhe demokratike në Kosovë. Të gjitha forcat e mirëfillta nacionaliste duhet të rreshtohen pranë saj, sepse pa LDK-në rrezikohet edhe vetë stabiliteti politik i vendit.

Sipas bindjes sime, të gjitha forcat e mirëfillta të djathta nacionaliste duhet të rreshtohen krah LDK-së, sepse e konsideroj atë forcën e vetme politike origjinale të këtij orientimi në Kosovë”, përfundoi Tahiraj për “Bota sot”.

The post Kërkesa për largimin e Abdixhikut ndez debat në LDK, partia përballë një momenti vendimtar? appeared first on Albeu.com.

Deri më tani, 61 votat që kërkohen për këto procese kanë munguar. Megjithatë, një bashkëpunim me partinë NISMA do të ia mundësonte një gjë të tillë Lëvizjes Vetëvendosje.

Të enjten, Haxhi Avdyli, anëtarë i partisë Guxo por që garoi në listën e Lëvizjes Vetëvendosje, tha se kjo parti ka arritur marrëveshje me NISMA-n dhe kanë siguruar 61 vota, por që kërkojnë akoma më shumë, pasi konsiderojnë se kanë siguruar votat e partive pakicë joserbe.

Arritja e një marrëveshje me partinë që ka vetëm tre deputetë është mohuar nga deputetja e zgjedhur e Lëvizjes Vetëvendosje, Arbëreshë Kryeziu Hyseni.

Këto kalkulime politike të Lëvizjes Vetëvendosje, sipas njohësve do ta pengojnë konstituimin e Kuvendit të Kosovës deri në fund të muajit prill.

“Nuk besoj që mund të ketë lëvizje të paktën deri më 26 prill, kur skadon 30 ditëshi që nga dita e certifikimit të zgjedhjeve nacionale që i bie që ne shkojmë në territor të panjohur ligjërisht dhe mandej besoj që do të ketë një ri kyçje edhe të presidentes, sepse është e pamundur që Kosova të mbes pa institucione“, u shpreh Dritëro Arifi-njohës i politikës.

Për t’i ikur këtij ngërçi, njohësit thonë se duhet të përfshihet edhe presidentja Vjosa Osmani. Megjithatë, nga deklarimet politike dhe bllokada në Kuvend, njohësit mendojnë se vendi është drejt zgjedhjeve të jashtëzakonshme.

“Edhe Vetëvendosje edhe partitë tjera shqiptare, janë të interesuara në një farë mënyre që nëse nuk ka një qeveri stabile, janë të interesuar që të shkojnë të gjithë në zgjedhje të jashtëzakonshme”, u shpreh ai.

As të shtunën, në vazhdimin e seancës konstituive të Kuvendit të Kosovës nuk pritet lëvizje që do t’i hapnin rrugë formimit të institucioneve.

Dështimi i konstituimit të Kuvendit të Kosovës më 15 prill erdhi pasi nuk u miratua raporti i Komisionit të përkohshëm për verifikim të mandateve të deputetëve. Të enjten, erdhi dështimi i dytë pasi raporti nuk u hodh në votim. Tentativa e tretë për konstituim të Kuvendit është të shtunën në orën 12:00.

The post LVV drejt marreveshjes me NISMA, pazaret politike po vonojnë institucionet appeared first on Albeu.com.

Kandidati për kryeministër, Ramush Haradinaj, ka premtuar para se ky koalicion do të punojë për Kosovën.

Ai tha se Deçani, është xhevahiri i turizmit malor, është ndër qytetet e rralla që rrethohet me bjeshkë që i kanë terrenet më të përshtatshme për sportet dimërore.

“Do të investojmë dhe do ta shndërrojmë këtë zonë në adresë ballkanike të turizmit. Turizmi dhe bujqësia mund të bëhen shtylla të zhvillimit ekonomik të Komunës, e për realizimin e të cilave do ta ketë edhe dorën e Shtetit. Studentët do të kenë bursa, rinia mbështetje financiare pa kthim nga Shteti për të fillur biznese të vogla, bujqit trefishim të subvencioneve, bizneset partneritet e lehtësira për rritje të biznesit. Rrymën do ta prodhojmë vet dhe nuk do të lejojmë të na e caktojë çmimin mafia energjetike. Energjia nuk do të jetë malli më i shtrenjtë. Do ta ulim çmimin për 20 përqind. Por për tu zhvilluar, së pari duhet të kemi siguri, e kjo arrihet vetëm duke qenë krejt Kosova në NATO”, tha Haradinaj.

Kurse Fatmir Limaj tha se ky qytet ka punuar lirinë e Kosovës dhe ka premtuar se do të punojnë për të mirën e qytetarëve të Kosovës.

The post Koalicioni AAK-NISMA dhe të tjerët prezantojnë ofertën para deçanasve appeared first on Albeu.com.