Sipas medias italiane ANSA, bëhet me dije se rreth 49 emigrantë që besohet se vijnë nga Egjipti dhe Bangladeshi, ndodhen në bordin e anijes Cassiopea për t’u transferuar në Shqipëri, ku do të nisin procedurat e pritjes, qëndrimit dhe vlerësimit të rasteve individuale.

Emigrantët pritet që të mbërrijnë në kampin e Shëngjinit mëngjesin e 27 janarit, me anijen e Marinës ushtarake italine Cassiopea.

Ndërkaq, sipas prestigjozes italiane Corriere della sera, 53 migrantë të tjerë kanë dorëzuar vullnetarisht pasaportat e tyre për të shmangur transferimin në Shqipëri.

Ky veprim mundëson përshpejtimin e procedurave të verifikimit të statusit të tyre, edhe pa qëndrimin e detyruar, duke rritur mundësitë për riatdhesimin e atyre që nuk kanë të drejtë të qëndrojnë në BE.

Pavarësisht se ende nuk është marrë vendimi nga Gjykata e Drejtësisë e Bashkimit Evropian, i parashikuar për 25 shkurt, rifillimi i operacioneve nxitet nga shtimi i zbarkimeve: 1,264 mbërritje në gjashtë ditët e fundit.

Anija “Cassiopea” po përdoret për transferimin e tretë të azilkërkuesve në Shqipëri, pas dy të parave në tetor dhe nëntor.

Meshkuj, të rritur, me shëndet të mirë dhe që vijnë nga vende të sigurta – do të hipin në Cassiopeia, ku do të bëhet një kontroll fillestar.

Mjeti patrullues do t’i çojë më pas në portin e Shëngjinit, ku është ngritur kampi ‘italian’ dhe do të kryhen procedurat e identifikimit.

Pas kësaj procedure, ata do të qëndrojnë në kampet e italiane të ngritura në Shqipëri, ku do të presin pranimin ose jo të kërkesave të tyre për Azil.

The post Anija “Cassiopea” u nis drejt Shqipërisë me 49 emigrantë në bord, 53 të tjerë refuzojnë transferimin në Gjadër appeared first on Albeu.com.