Shefja në detyrë e Zyrës së Bashkimit Evropian në Kosovë, Eva Palatova, zhvilloi një takim lamtumirës me kryeministrin në detyrë të Kosovës, Albin Kurti.

Gjatë këtij takimi, ajo përcolli qëndrimin e BE-së se Kosova duhet të kapërcejë ngërçin politik dhe të vijojë sa më shpejt me formimin e institucioneve të reja.

Palatova nënvizoi gjithashtu rëndësinë e përparimit të reformave dhe të përdorimit të plotë të mundësive që ofron Plani i Rritjes i BE-së.

Sipas saj, ky plan synon të mbështesë zhvillimin e Kosovës si një shtet shumetnik me aspirata për anëtarësim në Bashkimin Evropian.

Gjatë bisedës, Palatova deklaroi se Bashkimi Evropian vazhdon të jetë partneri më i fuqishëm i Kosovës.

The post Palatova kërkon zhbllokimin politik dhe krijimin e shpejtë të institucioneve në Kosovë appeared first on Albeu.com.

Grupi Parlamentar i Partisë Demokratike të Kosovës ka bërë të ditur se të hënën, në orën 11:00, do të paraqitet në sallën e Kuvendit të Kosovës. Ky qëndrim vjen në kuadër të kërkesës për rifillimin e seancës konstituive dhe përfundimin e konstituimit të Kuvendit.

Ndërkohë, institucionet e reja të Kosovës vazhdojnë të mbeten jashtë funksionit për shkak të bllokadës politike. Takimi i fundit ndërmjet LVV-së dhe LDK-së ka krijuar shpresë për një afrim të mundshëm, por deri tani nuk është arritur ndonjë marrëveshje konkrete.

Analistët vlerësojnë se partitë duhet të tejkalojnë interesat dhe llogaritjet e tyre politike, duke vendosur në plan të parë nevojat e qytetarëve dhe krijimin sa më të shpejtë të institucioneve.

LVV-ja dhe LDK-ja po zhvillojnë diskutime brenda strukturave të tyre dhe pritet që së shpejti të zhvillojnë një takim tjetër, ku temë kryesore do të jetë posti i presidentit.

Një marrëveshje mes këtyre dy subjekteve politike shihet si një alternativë për shmangien e zgjedhjeve. Megjithatë, njohësit e politikës theksojnë se zgjidhja duhet të kërkohet nga i gjithë spektri politik.

“Urojmë që marrëveshja mes subjekteve politike, LVV dhe LDK, të konkretizohet sa më parë dhe që t’i ofrojnë vendit një zgjidhje rreth çështjes së presidentit. Do të ishte afirmative që kësaj marrëveshjeje t’i bashkëngjiten edhe subjektet e tjera opozitare, në mënyrë që procesi dhe vetë institucioni i presidentit të kenë një mbështetje sa më të gjerë”, tha Ramadan Baraliu, njohës i politikës.

Sipas ekspertëve, përgjegjësia e subjekteve politike është që të marrin parasysh interesin e qytetarëve dhe të krijojnë sa më shpejt institucionet e reja të vendit.

“Krizën aktuale politike rreth zgjedhjes së presidentit më shumë duhet ta shohim si një problem politik sesa në aspekte të tjera. Është me rëndësi që të gjitha strukturat politike në Kuvendin e Kosovës të ulen dhe të bëjnë konsensus, që vendit t’i ofrojnë një president sa më konsensual dhe në një afat sa më të shpejtë”, deklaroi Baraliu.

Naim Jakaj, hulumtues i lartë në IKD, paralajmëroi se mungesa e një marrëveshjeje mund të sjellë pasoja për qytetarët dhe shoqërinë civile.

“Në rast se nuk bëhet, pra në qoftë se nuk ka marrëveshje politike dhe partitë politike duan të shkojnë në zgjedhje, ne si shoqëri civile dhe si qytetarë do t’i shohim vetëm pasojat që do të vijnë si rezultat i mungesës së institucioneve në Republikën e Kosovës”, tha Jakaj.

Partia Demokratike e Kosovës vijon të këmbëngulë për qëndrimin e saj në opozitë. Ndërkaq, Aleanca ka refuzuar të takohet me kryeministrin në detyrë, Albin Kurti, pa u plotësuar gjashtë kushtet e saj.

Për ditët e ardhshme është njoftuar një tjetër takim mes Kurtit dhe Abdixhikut. Sipas paralajmërimeve, në këtë takim pritet të diskutohen emra konkretë për postin e presidentit.

The post Ngërçi institucional në Kosovë vijon, analistët bëjnë thirrje për marrëveshje politike appeared first on Albeu.com.

Kriza institucionale vijon pa zgjidhje, ndërsa ushtruesja e detyrës së presidentes, Albulena Haxhiu, ka bërë thirrje që partitë të dialogojnë për daljen nga kjo situatë. Sipas saj, bisedimet duhet të nisin me çështjen e zgjedhjes së kreut të shtetit. Në anën tjetër, PDK-ja dhe Aleanca kërkojnë që seanca konstituive të vazhdojë, por Kuvendi thotë se nuk ka marrë njoftim zyrtar për mbajtjen e saj. Avni Dehari këmbëngul se seanca nuk do të thirret pa u arritur marrëveshje politike për presidentin.

Albulena Haxhiu ka shprehur keqardhjen e saj pasi Partia Demokratike e Kosovës dhe Aleanca nuk e pranuan ftesën për një takim konsultativ me drejtuesit e subjekteve politike parlamentare.

Sipas ushtrueses së detyrës së presidentes së Kosovës, takimi synonte arritjen e konsensusit politik të nevojshëm për kapërcimin e ngërçit institucional. Ajo e cilësoi refuzimin si një hap të gabuar e të pamatur, si dhe si dëshmi të mungesës së vullnetit për t’u larguar nga ato që i quajti “pozicionime barrikaduese”. Haxhiu theksoi se qëndrime të tilla nuk i shërbejnë askujt dhe, aq më pak, Republikës.

Haxhiu vlerëson se tri procese zgjedhore, të cilat prodhuan rezultate të përafërta, tregojnë se kriza institucionale nuk mund të zgjidhet pa dialog politik. Edhe pse në aspektin formal zgjedhja e presidentit përbën hapin e tretë, ajo tha se, në kushtet e tanishme, kjo temë duhet të vendoset e para në tryezën e diskutimeve.

Ajo kujtoi se gjatë dimrit dhe pranverës së këtij viti kishte kërkesa dhe ankesa që palët të bisedonin paraprakisht, përpara çdo konstituimi të institucioneve dhe pavarësisht rezultatit. Sipas Haxhiut, tani ekzistojnë momenti, mundësia dhe domosdoshmëria që kjo të zbatohet. Ajo kërkoi që diskutimet të mos fillojnë me atë që mund të realizohet lehtësisht, por me nyjën që, sipas saj, po e çon vendin vazhdimisht në zgjedhje: çështjen e presidentit.

Gjatë paradites, Grupi Parlamentar i Partisë Demokratike të Kosovës u paraqit në Kuvend, pasi më herët i kishte kërkuar Avni Deharit, kryesuesit të seancës konstituive, ta thërriste vazhdimin e saj. Në ambientet e Kuvendit u panë gjithashtu deputetë të Aleancës.

Arian Tahiri, shef i Grupit Parlamentar të PDK-së, deklaroi se bllokada në Kuvendin e Kosovës nuk mund të trajtohet më vetëm si “krizë politike”. Sipas tij, tashmë bëhet fjalë për mbrojtjen e rendit kushtetues, të institucioneve dhe të vetë Republikës.

Besnik Tahiri, i cili drejton Grupin Parlamentar të AAK-së, tha ndërkaq se dera e sallës ku mbahen seancat plenare po mbahet e mbyllur qëllimisht.

Përmes një njoftimi, Administrata e Kuvendit sqaroi se nuk kishte marrë asnjë komunikim zyrtar për organizimin dhe zhvillimin e një seance më 16 gusht.

Në sqarim u theksua se fakti që nuk kishte njoftim nuk përbënte vendim politik dhe as qëndrim ndaj nismave të deputetëve ose grupeve parlamentare.

Administrata bëri të ditur se, sapo të mbërrijë komunikimi zyrtar për zhvillimin e një seance, do të ndërmerren hapat përkatës dhe do të ofrohet mbështetja administrative, teknike dhe logjistike brenda kompetencave të saj.

Deputetët e PDK-së dhe të Aleancës po kërkojnë për herë të tretë vazhdimin e seancës konstituive. Megjithatë, Avni Dehari ka ritheksuar se nuk do ta thërrasë vazhdimin e saj derisa të ketë një dakordim politik për kreun e shtetit.

Për të diskutuar pikërisht këtë temë, Albulena Haxhiu ka njoftuar se do t’i presë partitë politike në një takim të mërkurën.

The post Kriza në Kuvend mbetet e pazgjidhur, dialogu politik fokusohet te zgjedhja e presidentit appeared first on Albeu.com.

Procesi për konstituimin e Kuvendit të Kosovës vijon të mbetet i bllokuar, pasi subjektet politike ende nuk kanë gjetur gjuhë të përbashkët për daljen nga situata e krijuar.

Edhe pse një kompromis vazhdon të mungojë, PDK-ja po kërkon me këmbëngulje që seanca konstituive të vazhdojë.

Ky insistim ka hapur debat nëse synimi i PDK-së është rikthimi i procesit institucional në funksion apo ushtrimi i trysnisë ndaj partive të tjera.

Ndërkohë, mbetet e paqartë nëse subjektet politike duhet t’i shtojnë përpjekjet për arritjen e një marrëveshjeje përpara vazhdimit të seancës, me qëllim që procesi të mos zvarritet më tej.

Pamundësia e partive për të arritur kompromis po e lë Kuvendin në ngërç dhe po shtyn funksionalizimin e institucioneve.

Në këto rrethana ngrihet edhe dilema se me çfarë pasojash mund të përballet Kosova, nëse forcat politike vazhdojnë të mos pajtohen për një rrugëdalje të përbashkët.

Avdimetaj kërkon vazhdimin e seancës dhe përgjegjësi nga partitë për zhbllokimin institucional

Analisti dhe veprimtari Shefqet Avdimetaj, në një prononcim për “Bota sot”, thotë se PDK-ja ka të drejtë të kërkojë vazhdimin e seancës së Kuvendit. Sipas tij, në një sistem demokratik parlamentar, deputetët duhet të jenë brenda institucionit dhe jo jashtë tij.

Ai vlerëson se kërkesa për ta vijuar seancën mund të interpretohet si një përpjekje për ta kthyer procesin në binarët institucionalë dhe për t’i dhënë fund një bllokade që është zgjatur përtej çdo kufiri të arsyeshëm.

Megjithatë, Avdimetaj tërheq vëmendjen se rifillimi i seancës nuk duhet të përfundojë në një përballje të re politike pa asnjë rezultat.

“Nëse nuk ekziston vullneti për të votuar dhe për të marrë përgjegjësinë që ua ka dhënë qytetari, atëherë edhe vazhdimi i seancës mund të kthehet në një formë tjetër të bllokimit”, shprehet ai.

Sipas Avdimetajt, përgjegjësia për daljen nga ngërçi u takon të gjitha forcave politike, përfshirë PDK-në, LDK-në, AAK-në dhe Vetëvendosjen, të cilat duhet të ulen së bashku dhe të gjejnë një zgjidhje institucionale.

Ai nënvizon se kompromisi është element i demokracisë, por nuk mund të përdoret për t’ia imponuar vullnetin e një partie një subjekti tjetër. Në të njëjtën kohë, sipas tij, duhet të respektohet rezultati zgjedhor.

“Nuk mund të kërkojmë demokraci vetëm atëherë kur rezultati na pëlqen”, deklaron Avdimetaj. Ai shton se opozita gëzon të drejtën ta kundërshtojë, kritikojë dhe sfidojë shumicën brenda Kuvendit, por nuk mund ta zëvendësojë vullnetin e qytetarëve përmes bllokadës politike.

Nga ana tjetër, ai thekson se edhe shumica duhet të jetë e vetëdijshme se mandati i marrë në mënyrë demokratike nuk i jep të drejtën të mos dëgjojë askënd.

“Kosova nuk ka nevojë për fitues të përkohshëm të një beteje politike. Ka nevojë për institucione funksionale”, shprehet Avdimetaj.

Ai paralajmëron se vazhdimi i ngërçit politik rrezikon të cenojë besimin e qytetarëve si te politika, ashtu edhe tek institucionet e Republikës së Kosovës.

Në vlerësimin e tij, shqetësimi kryesor nuk lidhet me partinë që mund ta fitojë përplasjen politike, por me mundësinë që “humbësi të jetë qytetari dhe shteti”.

Në përmbyllje, Avdimetaj u kërkon deputetëve të vijojnë seancën, të votojnë dhe të ushtrojnë përgjegjësinë që qytetarët ua kanë besuar.

“Në demokraci pushteti nuk merret me bllokadë. Pushteti fitohet me votë dhe humbet me votë”, përfundon Avdimetaj.

Dashi: Kosova nuk është pronë e partive, interesat personale dhe partiake duhet të tërhiqen përballë shtetit

Publicisti dhe veprimtari Gazmend Dashi, duke analizuar zhvillimet e fundit në skenën politike, shprehet se qasja e PDK-së meriton të përshëndetet, nëse synon zhbllokimin e gjendjes dhe vënien në funksion të institucioneve. Por ai paralajmëron se veprime të tilla do të ishin të dëmshme për Kosovën, nëse pas tyre qëndrojnë interesa të ngushta personale ose partiake.

“Kosova nuk mund të trajtohet si pronë e asnjë partie politike dhe as si mjet për realizimin e interesave të individëve”, deklaron Dashi për “Bota sot”. Ai shton se një mënyrë e tillë veprimi do ta dëmtonte edhe më shumë imazhin e Kosovës në arenën ndërkombëtare.

Dashi e cilëson shqetësuese gjendjen e tanishme institucionale, duke vlerësuar se dështimi për të ngritur dhe funksionalizuar institucione të qëndrueshme po e çon vendin drejt një cikli pasigurie politike. Sipas tij, institucionet duhet të jenë në shërbim të qytetarit dhe të shtetit, jo të përdoren si instrumente për kontrollimin e pushtetit.

Duke iu referuar LDK-së, ai vlerëson se kjo parti e ka vendosur interesin shtetëror dhe kombëtar përpara interesit të ngushtë partiak. Dashi thotë se LDK-ja, edhe në rrethanat aktuale, po përpiqet të japë kontribut në gjetjen e një zgjidhjeje dhe në kapërcimin e kolapsit institucional.

Ai u bën thirrje subjekteve politike të heqin dorë nga inatet, përplasjet dhe përllogaritjet e ngushta, pasi Kosova, sipas tij, qëndron mbi çdo parti dhe ka më shumë rëndësi se cilido individ.

Dashi kërkon krijimin e një balance të shëndetshme në politikë, në mënyrë që asnjë subjekt të mos mund të qeverisë pa përgjegjësi dhe pa mbikëqyrje institucionale. Ai argumenton se pluralizmi demokratik mund të mbrohet dhe përqendrimi i pushtetit mund të parandalohet vetëm nëpërmjet një ekuilibri të tillë.

Në fund, publicisti bën thirrje për respektimin e Kushtetutës, funksionalizimin e institucioneve dhe ndërtimin e një kulture të re politike, në të cilën kundërshtari të konsiderohet pjesë e demokracisë dhe jo armik.

“Partitë vijnë e shkojnë, individët ndërrohen, por shteti mbetet”, përfundon Dashi, ndërsa mesazhin e mbyll me apelin: “Kosova mbi të gjitha! Shteti mbi partinë! Interesi kombëtar mbi interesin personal!”

The post Bllokimi i Kuvendit të Kosovës përplas partitë, dilema mbi arsyet e ngërçit politik appeared first on Albeu.com.

Bazuar në Kushtetutën e Kosovës, kjo parti që do të ketë shumicën parlamentare ka të drejtën ekskluzive për të nisur procedurat për konstituimin e Kuvendit e formimin e qeverisë, gjë që mund ta bëj në bashkëpunim me minoritetet jo-serbe. Sfida mbetet në sigurimin e kuorumit prej 80 deputetësh për zgjedhjen e presidentit, për çka duhet bashkim me partinë e dytë, Partinë Demokratike të Kosovës ose partinë e tretë Lidhjen Demokratike të Kosovës. Njohësit thonë se duhet një marrëveshje gjithëpërfshirëse për të tejkaluar këtë pengesë që vendin e çoi në zgjedhje.

“Logjika është se a do kemi kompromis për një marrëveshje gjithëpërfshirëse. Na duhet gjithsesi një marrëveshje gjithëpërfshirëse, jo vetëm për postin e presidentit. Sepse kjo është keqkuptu, është keqinterpretu qëllimshëm nga partia në pushtet, që me u fokusu në një pozitë”, deklaroi Dritëro Arifi, njohës i politikës.

Por, sipas njohësve nuk ekziston një vullnet i tillë dhe vendi rrezikon të shkojë në zgjedhje edhe një herë tjetër.

“Me cilindo nga partnerët që e merr Vetëvendosja, besoj që bëhen numrat edhe për të gjitha institucionet. Kjo do të duhej të ishte logjika, por duke i njohur lojtarët e sistemin se si e kanë strukturu, pak shpresoj që mund të kemi kompromis mbi këtë çështje”, shtoi Arifi.

Zgjedhjet e fundit treguan po ashtu edhe fuqinë e partive të tjera politike, të cilat pa Listën Serbe nuk arrijnë në 61 vota siç e kërkon kushtetuta. Kësisoj, njohësit thonë se avantazhi që kanë ndaj Lëvizjes Vetëvendosje është për bashkëqeverisje.

“Ato mund të vendosin vetëm njërin kusht, që pa bashkëpjesëmarrje në qeverisje nuk ka numra për president. Kjo është i vetmi kusht, por ajo e ka një kosto mandej, me shkuarje në zgjedhje, e sa janë të gatshme, varet nga lidershipi i partive politike”, theksoi Arifi.

Sipas njohësve, nëse vendi shkon ose jo në zgjedhje të tjera si mungesë e vullnetit politik, do të varet krejtësisht nga gatishmëria e Albin Kurtit dhe Lëvizjes Vetëvendosje për kompromis.

Nga zgjedhjet e fundit, Vetëvendosje siguroi 53 ulëse në Kuvend, PDK-ja 22, 18 i mori LDK-ja e 7 Aleanca për Ardhmërinë e Kosovës. 20 vende janë të rezervuara për pakicat.

The post Kosova sërish në ngërç, Kurti fiton zgjedhjet, por Presidenti kërkon marrëveshje politike appeared first on Albeu.com.

Gjatë një interviste për Shërbimin Gjeorgjian të Radios Evropa e Lirë, ish-diplomati foli se pse presidenti rus, Vladimir Putin, do të vazhdojë të përshkallëzojë situatën në Ukrainë, ndoshta edhe duke zgjedhur që të përdorë armë bërthamore dhe duke thyer kështu “tabunë” dekadëshe e duke e zhytur botën në pasiguri të mëtejshme.

Radio Evropa e Lirë: Më herët gjatë këtij muaji, Putin festoi ditëlindjen e 70-të një ditë pasi më 8 tetor u sulmua Ura e Krimesë, që Moska beson se u krye nga një kamion-bombë. Pas kësaj, Rusia nisi sulmet më të mëdha ajrore ndaj Ukrainës që nga nisja e pushtimit më 24 shkurt, duke treguar se Putin është i gatshëm që të përshkallëzojë situatën. Sipas jush, cili do të jetë veprimi i tij i radhës?

Graham Allison: Nëse Putin detyrohet të zgjedhë mes një humbjeje poshtëruese, në njërën anë, dhe përshkallëzimit të nivelit të shkatërrimit… kam të gjitha arsyet që të besoj se ai do të zgjedhë këtë të fundit. Kur ngrehni nivelin e shkatërrimit, hapi i parë është bombardimi i infrastrukturës. Mendoj se ai është duke e bërë këtë tani, edhe pse ai nuk ka aq shumë bomba të mençura sa do të donte, prandaj ata nuk po mund t’i shënjestrojnë caqet me kujdes, por ngritja e kësaj shkalle të shkatërrimit, thjesht po i shkatërron njerëzit.

Narrativi perëndimor, dhe veçanërisht i [presidentit ukrainas, Volodymyr] Zelenskyt, thotë se Putin po vranë shumë civilë. Në fakt, ai nuk ka vrarë shumë, nëse e vendosni këtë në terma historikë. Nëse ai do të donte të vriste fëmijë, nëse do të dëshironte të vriste mijëra njerëz, ai mund të bombardojë Kievin; asgjë nuk e ndalon atë që të dërgojë bombardues mbi Kiev apo ta sulmojë Kievin me qindra raketa. Në Ukrainë ka shumë qendra të banuara.

Prandaj, unë mendoj se fillimisht ai po shënjestron infrastrukturën sepse ai dëshiron që ta ngrijë Ukrainën dhe ta zhysë në terr këtë shtet. Por, përmes këtyre sulmeve vriten njerëz. Dhe pas kësaj vijnë armët kimike, dhe pas kësaj vijnë sulmet bërthamore.

Radio Evropa e Lirë: Ju po paraqisni një pamje mjaft të zymtë lidhur me atë se në cilin drejtim mund të shkojë konflikti.

Graham Allison: Është një pamje shumë e shëmtuar. Edhe pse një humbje poshtëruese e Rusisë në Ukrainë, sipas meje, nuk do të ishte ekzistenciale për Rusinë – Rusia mund të mbijetojë pa Ukrainë – por mendoj se do të ishte ekzistenciale për Putinin.

Radio Evropa e Lirë: A jemi në atë moment kur Putin e ndien se është mbështetur për muri?

Graham Allison: Mendoj se po. Sikurse ka thënë presidenti [amerikan, Joe] Biden, në deklarata private, por që u bënë publike javën që shkoi, ai mendon se jemi duke ecur drejt asaj pike.

Radio Evropa e Lirë: Nëse me të vërtetë do të ketë sulme bërthamore në Ukrainë, për shembull, si një shfaqje e forcës vendimtare, çfarë do të thotë kjo jo vetëm për Ukrainën, por edhe për Rusinë dhe për pjesën tjetër të botës?

Graham Allison: Kjo është një pyetje, që sigurisht se çdo person vendimmarrës në Uashington –që ka shumë – por sigurisht edhe presidenti Biden dhe i gjithë ekipi i tij i sigurisë kombëtare, është duke e bërë. Këtë pyetje po e bëjnë evropianët dhe sigurisht se ata duhet ta bëjnë këtë pyetje. Pra, cila është pamja e përgjithshme? Ne kemi kaluar shtatë dekada pa përdorimin e armëve bërthamore në luftë. Kjo është e jashtëzakonshme. Nuk është një gjë natyrale. Është një arritje. Tabuja bërthamore është krijuar ngadalë, por është krijuar. Dhe, fatmirësisht, shtetet janë përmbajtur nga përdorimi i armëve bërthamore.

igurisht, Putin ka aftësi për të kryer një sulm bërthamor. Sipas tij, ai madje ka edhe mund të ketë arsye për të kryer sulm bërthamor nëse ai mendon se ka shanse që do t’i lejonin atij që të dilte nga kjo situatë si fitues, e jo si humbës. Putin nuk e mendon veten si një humbës dhe besoj se do të jetë i dëshpëruar, siç ka thënë drejtori i CIA-s, [William] Burns, për të gjetur një rrugë për të dalë nga situata, nëse mbështetet për muri.

Prandaj, mendoj se nëse ai e bënë këtë [përdorimin e armëve bërthamore] ne do të jetojmë në një botë të re, ashtu siç ka thënë Biden. Se si do të përgjigjej SHBA-ja dhe aleatët perëndimorë nëse do të ndodhte kjo, është ende e paqartë. Shumë mund të varet se cili do të ishte caku i sulmeve me armë bërthamore. Ai [Putin] mund të ketë ‘bombë demonstruese’, pra të hedhë në ajër diçka në një pyll apo në Detin e Zi. Ai mund të godasë një cak ushtarak, mund të godasë një qytet.

Nëse dëgjoni se çfarë deklaroi javën e kaluar, ai tha se hedhja e bombave bërthamore në Hiroshima dhe Ngaasaki nga [ish-presidenti amerikan, Harry] Truman, ishte precedent. Kështu deklaroi ai. Epo, në Hiroshima, bombën që e lëshuan amerikanët në këtë qytet, la të vrarë 140.000 persona. Prandaj, një sulm bërthamor ndaj Kievit me armë taktike bërthamore mund të shkaktojë të njëjtin dëm – bomba që u lëshua në Hiroshima ishte 15 kilotonëshe – duke vrarë shumë njerëz. Mund të thoni “Oh, Zot, cila do të ishte përgjigja ndaj kësaj?”. Unë mendoj se Uashingtoni ka një sërë opsionesh për këtë çështje.

Radio Evropa e Lirë: A mendoni se ndonjëri nga këto opsione është që Uashingtoni të përgjigjet me armë bërthamore?

Graham Allison: Uashingtoni do të deklarojë se të gjitha opsionet janë në tavolinë. Por, unë mendoj se një përgjigje bërthamore ka pak gjasa të ndodhë dhe unë jam kundër kësaj. Pastaj pyetja do të ishte se si do të kundërpërgjigjej Putini. Kështu që, jemi në një zonë ku ka opsione të këqija dhe më të këqija, dhe nuk ka opsione të mira. Prandaj ka shumë përpjekje tani që Putin të bindet se kjo është një ide e keqe, edhe për veten e tij, për shtetin e tij dhe për botën. Por, ai duhet ta kuptojë këtë vetë, në kuptimin se SHBA-ja dhe Perëndimi do të përgjigjej, dhe shpresoj se ai po merr këshilla nga ata që u beson, sikurse Kina.

Radio Evropa e Lirë: Në një intervistë për Der Spiegel që dhatë disa muaj më parë, ju deklaruat: “Ne duhet t’i japim fund luftës me djallin”. Një prej shembujve që ju përmendët ishte se si [ish-presidenti amerikan Franklin] Roosevelt dhe [ish-kryeministri britanik Winston] Churchill u ulën dhe biseduam me [ish-diktatorin sovjetik Josep] Stalin, i cili kishte vrarë miliona njerëz. Po ashtu ju përmendët shembullin e [ish-presidentit amerikan] Nixon që u takua [me ish-liderin komunist të Kinës, Mao] Zedung, i cili po ashtu kishte vrarë njerëz. Prandaj, më lejoni t’iu pyes: Si do të dukej një marrëveshje me djallin, kur bëhet fjalë për Putinin?

Graham Allison: Nëse e dëgjoni presidentin Biden, nëse i lexoni deklaratat e tij, ata qartësisht po mendojnë për opsione alternative – në këtë mënyrë po mendon Uashingtoni për këtë çështje.

Skenari më optimist, sipas meje, është që në muajt e ardhshëm, situata do të pësojë një ngërç. Me gjasë diku në vijën aktuale të kontrollit, ndoshta Ukraina do ta kontrollojë shumicën e pjesës perëndimore të Lumit Dinepër dhe lumit tjetër (Inulets) afër Hersonit dhe Rusia do të kontrollojë shumicën e territorit në pjesën tjetër; intensiteti i luftimeve me gjasë do të ulet, sikurse që ndodhi ndërmjet viteve 2016-2020 në Donjeck dhe Luhansk.

Dhe në këtë fazë, Putin do të mendonte se ka mjaftueshëm arsye për të deklaruar se ka pasur sukses. Ai do të kishte lidhje tokësore me Krimenë dhe disa territore shtesë. Prandaj, në një situatë të tillë ai do të mendonte se ka pasur sukses. Dhe ana tjetër po ashtu do të thoshte se ka korrur sukses, sepse do të argumentonim se Ukraina shpëtoi si shtet i pavarur dhe i lirë, se nuk po jep territor. Po ashtu, Kievi do të zotohej për të rimarrë territorin e humbur në të ardhmen. Dhe më pas Ukraina do të përqendrohej në ndërtimin e suksesshëm të shtetit, që është një ndërmarrje e vështirë, por mendoj se Perëndimi do t’i ofronte mbështetje të madhe financiare.

Nëse ndodh kështu, unë mendoj se do të ishte një lajm i mirë që do të zgjaste për një vit, dy ose pesë vjet. Më kujtohet historia e Gjermanisë Lindore dhe Gjermanisë Perëndimore. Gjermania Peërndimore kur nuk hoqi dorë së pretenduari Gjermaninë Lindore. Kjo histori tregon se çfarë mund të arrijë një shoqëri e lirë, në krahasim me autokracitë e kontrolluara socialiste. Ose shembulli i Koresë së Veriut dhe Koresë së Jugut, ose ndoshta shembulli që i përshtatet më shumë Ukrainës: shtetet e Baltikut.

Doracaku i Putinit në Ukrainë më duket se është marrë drejtpërdrejt nga doracaku komunist për Baltikun në fund të Luftës së Dytë Botërore, kur ata mbajtën referendume të rreme, aneksuan Lituaninë, Letoninë dhe Estoninë dhe thanë se ishin republika të Bashkimit Sovjetik. Perëndimi, SHBA-ja nuk i njohën këto pretendime të Bashkimit Sovjetik mbi këto territore. Ato nuk u pranuan as nga njerëzit që jetonin jashtë këtyre shteteve në atë kohë, dhe më pas këto tri shtete u pavarësuan.

Prandaj, mund të marrë shumë kohë. Kjo është për keqardhje, por pasi alternativa do të ishte edhe më e keqe, unë do ta cilësoj këtë si skenarin më optimist./REL

The post Pse Putin do të preferonte një ngërç në vend të sulmit bërthamor? appeared first on Albeu.com.

Ndarjet gjeopolitike midis Rusisë dhe Perëndimit janë thelluar në mënyrë dramatike – ndoshta edhe në mënyrë të pakthyeshme – pas pushtimit të paprovokuar të Ukrainës nga Moska. Por, diçka e rëndësishme i lidh ende ata, së paku tani për tani: energjia.

Rusia, prej kohësh, ka qenë furnizuesja kryesore e Bashkimit Evropian me gaz natyror. Gjatë tremujorit të parë të vitit 2021, ajo ka siguruar pothuajse gjysmën e të gjithë gazit natyror të importuar nga blloku.

The post Perëndimi dhe gazi rus, çfarë ngërçi krijon për BE ndërprerja e furnizimit nga Moska (FOTO LAJM) appeared first on Albeu.com.

Albeu.com ju sjell disa mënyra se si mund të ndihmoni në lehtësimin e ngërçeve:

Shtriqja

Pasi të ndjeni një ngërç, shtriqni zonën ku ndjeni siklet për të shtrirë muskulin. Është mirë të bëni disa masazhe të muskujve gjatë ose pas shtrirjes.

Nëse ndjeni ngërçe gjatë natës, ngrihuni dhe vendoseni peshën tuaj në njërën këmbë që ndihet e ngushtë, në mënyrë që thembra të shtypet dhe muskuli i viçit të shtrihet më mirë.

Magnezi

Nëse shpesh keni ngërçe në këmbë që nuk lidhen me diçka më serioze, atëherë me siguri keni nevojë për më shumë magnez në dietën tuaj. Arrat dhe të gjitha farat janë një burim i shkëlqyer i magnezit. Madje magnezi rekomandohet si suplement për gratë shtatzëna për të trajtuar ngërçet e shpeshta. Sigurisht që së pari duhet të konsultoheni me mjekun tuaj.

Nxehtësia

Uji i ngrohtë mund të lehtësojë ngërçet nëse e aplikoni menjëherë.

Hidratimi

Një mënyrë tjetër për të ndaluar ngërçet e këmbëve është të qëndroni të hidratuar. Një gotë ujë, apo edhe më mirë një pije me elektrolit, do të zvogëlojë mundësinë e ngërçeve të përsëritura.

Ecja

Ecja u  dërgon një sinjal muskujve që ata duhet të bëhen më elastikë. Nëse asnjë nga sa më sipër nuk funksionon për ju, provoni të masazhoni këmbët shpesh për të ndihmuar muskujt tuaj të relaksohen.

The post Ju zë shpesh ngërçi i këmbës? Këto “truke” të lehta që do t’ju qetësojnë appeared first on Albeu.com.