Pjesa e parë e ditës do të nisë me mot kryesisht të kthjellët, por gradualisht vranësirat do të shtohen. Në orët e mesditës dhe pasdites, vranësirat do të bëhen më të dendura, veçanërisht në zonat qendrore dhe në jug të vendit.

Këto kushte do të shoqërohen me reshje shiu të herëpashershme me intensitet të ulët në qendër dhe në jug.

Ndërkohë, në juglindje situata atmosferike pritet të jetë më e paqëndrueshme, me mundësi për shtrëngata, shkarkesa elektrike dhe breshër.

Edhe era do të jetë e pranishme gjatë ditës. Ajo do të fryjë kryesisht nga veriperëndimi dhe verilindja, me shpejtësi mesatare rreth 7 m/s. Në vijën bregdetare dhe në zonat luginore, era pritet të forcohet dhe të arrijë deri në 14 m/s.

Në det parashikohet një valëzim i forcës 1 deri në 3 ballë.

The post Pas ditëve përvëluese, moti bën kthesën e papritur/ Reshje dhe shtrëngata në disa zona të vendit appeared first on Albeu.com.

Seanca konstituive do të rifillojë nesër, pasi punimet e saj u ndërprenë dje me kërkesë të kryeministrit në detyrë, Albin Kurti, i cili kërkoi kohë shtesë.

Mbledhja është parashikuar të nisë në orën 11:00, ndërsa në rendin e ditës përfshihet zgjedhja e kryetarit të Kuvendit dhe e nënkryetarëve.

Sipas raportimeve në media, drejtuesi i seancës, Avni Dehari, ka filluar t’ua dërgojë ftesat deputetëve të zgjedhur të Legjislaturës së XI-të.

Gjatë seancës së mbajtur dje, e para pas certifikimit të rezultatit zgjedhor, deputetët patën mundësi të bënin zyrtarisht betimin si përfaqësues legjitimë të kësaj legjislature.

The post Seanca konstituive pritet të vijojë nesër appeared first on Albeu.com.

Nenad Rashiq, kryetar i Partisë për Liri, Drejtësi dhe Mbijetesë, nuk beson se seanca konstituive e 06.08.2026 do të shoqërohet me votimin e Qeverisë së re.

Ministri në detyrë për Komunitete dhe Kthim bëri të ditur se vetëm pas përmbylljes së procesit konstituiv mund të hapen diskutimet për krijimin e ekzekutivit të ardhshëm. Në këtë kuadër, ai nuk e përjashtoi as një takim me kryeministrin në detyrë, Albin Kurti.

“Deri tani nuk jemi takuar, por besoj se do të takohemi gjatë këtyre ditëve. Siç e dini, nesër do të merremi vetëm me konstituimin e Kuvendit dhe nuk do të hyjmë në negociata apo marrëveshje të tjera. Pres që pas ditës së nesërme të takohemi dhe të bisedojmë për mundësinë e një angazhimi në Qeverinë e re, kurdo që kjo të bëhet e mundur”, tha Rashiq.

Ai theksoi se, bazuar në informacionin dhe vlerësimin e tij, gjatë ditës së nesërme nuk pritet të hidhet në votim përbërja e Qeverisë.

“Sa kam dijeni, nesër nuk është paraparë seancë për formimin e Qeverisë së re. Vlerësimi im është se qeveria nuk do të votohet nesër. Ky është mendimi im personal”, deklaroi Rashiq.

The post Rashiq: Votimi i Qeverisë së re nuk pritet të zhvillohet nesër appeared first on Albeu.com.

Gjykata Themelore në Prishtinë do të zhvillojë nesër seancën gjyqësore ndaj Jovan dhe Dragisha Viqentijeviq, të cilët akuzohen se ishin të përfshirë në sulmin terrorist të nëntorit 2023 kundër kanalit të Ibër-Lepencit.

Sikurse në seancën fillestare, të dy të pandehurit janë deklaruar të pafajshëm për veprat penale që u vihen në ngarkim.

Prokuroria Speciale e Republikës së Kosovës pretendon se materialet provuese të siguruara gjatë procesit hetimor vërtetojnë përfshirjen e të akuzuarve në veprat penale për të cilat po gjykohen.

Sipas Prokurorisë, nga hetimet është evidentuar gjithashtu roli i Qeverisë së Serbisë në përgatitjen e sulmit.

Ndërkohë, sot ka dëshmuar Ernest Kerqeli, drejtor i Departamentit të Ujit dhe Gjenerimit në këtë ndërmarrje. Ai tregoi se pas shpërthimit në vendngjarje kishin mbërritur ekipet e Policisë, pjesëtarët e KFOR-it dhe punonjësit e ndërmarrjes, ndërsa ndërhyrja për sanimin e dëmit kishte filluar vetëm pas lejes së hetuesve.

Gjatë marrjes në pyetje, kryetari i trupit gjykues, Vesel Ismaili, kërkoi të dinte nga Kerqeli nëse në zonën ku kishte ndodhur shpërthimi ishin të pranishme edhe ekipet hetimore.

Kerqeli u përgjigj se forcat policore, KFOR-i dhe punëtorët e ndërmarrjes kishin arritur atje përpara tij. Ai sqaroi se sanimi nuk kishte nisur pa miratimin e hetuesve, të cilët po mblidhnin mostra, ndërsa në vendngjarje kishin ardhur edhe ekspertë të tjerë.

I pyetur nga gjyqtari nëse kishte dalluar gjurmë të shpërthimit ose të personave të pranishëm në atë zonë, dëshmitari deklaroi se nuk kishte vërejtur asgjë të tillë.

Kerqeli foli edhe për dëmet që mund të shkaktoheshin në rast se nuk do të merreshin menjëherë masa për riparimin, duke theksuar se pasojat për qytetarët dhe infrastrukturën e Kosovës do të ishin jashtëzakonisht të mëdha.

Sipas tij, qytetarët e Kosovës do të mbeteshin pa energji elektrike dhe pa linja telefonike, ndërsa banorët e Prishtinës dhe të zonave të tjera që furnizohen nga Termokosi nuk do të mund të ngroheshin. Ai shtoi se QKUK-ja do të mbetej pa energji, ngrohje dhe ujë, kurse ndalja e menjëhershme e Termocentralit B do të sillte pasoja të rënda për infrastrukturën. Kerqeli tha se humbjet do të arrinin në miliona për çdo ditë dhe se, me çdo ditë vonesë, dëmi do të shtohej milion mbi milion.

The post Nesër zhvillohet gjykimi për sulmin terrorist ndaj kanalit “Ibër-Lepenc” appeared first on Albeu.com.