Mbledhja e nënshkrimeve në mbështetje të nismës legjislative qytetare për ndryshimin dhe plotësimin e Kodit Penal të Republikës së Kosovës do të vijojë nesër, më 4 gusht 2026, nga Instituti i Kosovës për Drejtësi (IKD) në Prishtinë.

Në njoftimin e Institutit bëhet e ditur se stenda do të jetë në sheshin “Nëna Terezë”, afër Ministrisë së Kulturës, Rinisë dhe Sportit. Aty, qytetarët mund të njihen me përmbajtjen e nismës dhe të shprehin përkrahjen e tyre duke nënshkruar.

Sipas IKD-së, iniciativa legjislative mbështetet në dy propozime kryesore për ndërhyrje në Kodin Penal.

“Përmes kësaj nisme legjislative qytetare kërkohet që moszbatimi i qëllimshëm i vendimeve të Gjykatës Kushtetuese të përcaktohet si vepër penale, ndërsa përdorimi i parasë publike për përfitime elektorale gjatë periudhave zgjedhore dhe parazgjedhore të ndëshkohet penalisht”, bëhet e ditur në njoftim.

Instituti u ka drejtuar thirrje qytetarëve që të paraqiten te stenda dhe ta përkrahin iniciativën përmes nënshkrimit.

“Qytetarët ftohen nga IKD që të vijnë te stenda në sheshin ‘Nëna Terezë’, të marrin informacion rreth nismës legjislative qytetare dhe ta mbështesin atë me nënshkrim. Secili nënshkrim ndihmon në fuqizimin e sundimit të ligjit, në respektimin e vendimeve të Gjykatës Kushtetuese dhe në mbrojtjen e parasë publike nga keqpërdorimi për interesa elektorale”, thuhet në njoftimin e IKD-së.

The post IKD do të vijojë më 4 gusht 2026 mbledhjen e nënshkrimeve për ndryshimet në Kodin Penal appeared first on Albeu.com.

Sekretari i Lidhjes Demokratike të Kosovës, Ilir Ferati, ka bërë të ditur se deri tani në zyrat qendrore të partisë nuk është depozituar asnjë nënshkrim për mbledhjen e Kuvendit të jashtëzakonshëm.

Ferati theksoi se lajmet që qarkullojnë mbi këtë nismë nuk mbështeten në të dhëna zyrtare dhe i cilësoi thjesht si hamendësime.

“Nuk vura re ndonjë burim të saktë në raportimet e atyre portaleve. Kjo mbetet në sferën e supozimeve. Unë ndodhem në seli dhe nuk ka asgjë, as dorëzim dokumentesh e as njoftim zyrtar”, u shpreh Ferati.

Reagimi i tij pason informacionet se të martën e 14 korrikut pritej të dorëzoheshin firmat për thirrjen e Kuvendit të LDK-së, ku do të kërkohej votëbesimi për kryetarin Lumir Abdixhiku.

Një javë më parë, KosovaPress kishte zbuluar ekskluzivisht se në krye të kësaj lëvizjeje qëndron Gazmend Muhaxheri, kryetar i Komunës së Pejës, i cili po zhvillon takime nëpër degët e LDK-së anembanë vendit për të mbledhur firmat e delegatëve që synojnë rrëzimin e Abdixhikut.

Prapavija e kërkesës për largimin e tij lidhet me zhgënjimin e brendshëm pas performancës së dobët të partisë në zgjedhjet e 7 qershorit.

Fillimisht pati thirrje për dorëheqje nga ana e Abdixhikut, por ai e refuzoi kategorikisht një hap të tillë.

Në ato zgjedhje, LDK-ja arriti të siguronte vetëm 16.69 për qind të votave, çka i dha 18 ulëse në Kuvendin e Kosovës.

Sipas rregullores së brendshme të LDK-së, firmat e një të tretës së anëtarëve të kuvendit nuk sjellin shkarkimin e menjëhershëm të kryetarit, por thjesht krijojnë mundësinë për të ngritur formalisht çështjen e besimit.

Kuvendi i LDK-së përbëhet statutarisht nga 355 delegatë të dalë nga kuvendet e degëve, duke përfshirë edhe vetë kryetarin aktual, Lumir Abdixhikun.

Kujtojmë se në janar të këtij viti, Abdixhiku i mbijetoi një vote besimi në kuvendin e partisë, pas rezultatit zhgënjyes në zgjedhjet e 28 dhjetorit të vitit të shkuar.

The post Iniciativa për shkarkimin e Abdixhikut, sekretari i LDK-së: Ende s’ka mbërritur asnjë firmë në seli appeared first on Albeu.com.

Pas rezultatit jo të mirë në zgjedhjet e fundit, brenda Lidhjes Demokratike të Kosovës ka nisur procesi i mbledhjes së nënshkrimeve për thirrjen e kuvendit të jashtëzakonshëm të partisë.

Në këtë kuvend, pritet të shtrohet kërkesa për shkarkimin e kryetarit të LDK-së, Lumir Abdixhiku.

Sipas asaj që mëson KosovaPress, iniciativa po drejtohet nga kryetari i Pejës, Gazmend Muhaxheri. Burimet e KosovaPress bëjnë të ditur se ai po viziton degët e partisë në nivel vendi dhe po kërkon firmat e delegatëve.

Po sipas burimeve të medias nga njëra prej degëve të LDK-së, si dhe nga delegatë që tashmë kanë dhënë nënshkrimin e tyre, numri i firmave të mbledhura deri tani është rreth 150, ndërsa LDK-ja ka gjithsejtë 355 delegatë.

Ndërkohë, media mëson se edhe Shkëmb Manaj kishte qenë për vizitë në të njëjtën degë, ku po përpiqej t’i bindte delegatët që të mos i jepnin nënshkrimet e tyre.

Gjatë ditës së sotme, media ka tentuar të kontaktojë si Manajn ashtu edhe Muhaxherin, por asnjëri prej tyre nuk ka qenë i qasshëm dhe nuk janë deklaruar deri në publikimin e këtij artikulli.

The post Në LDK nis grumbullimi i firmave për thirrjen e kuvendit të jashtëzakonshëm dhe shkarkimin e Lumir Abdixhikut appeared first on Albeu.com.