Një masë e madhe shkume u shfaq dje në digën ku lumi Lepenc bashkohet me Vardarin. Ky fenomen u raportua në Shkup dhe menjëherë pas njoftimit, ekipet e Qytetit dhe të Ministrisë së Mjedisit Jetësor dolën në terren për të kryer inspektimet e nevojshme.

Gazetari Zekirija Haxhiu bëri të ditur se megjithëse sot uji është i kthjellët, gjatë gjithë ditës së kaluar sipërfaqja ishte e mbuluar plotësisht nga shkuma. Ai shtoi se në pikën ku Lepenci derdhet në Vardar u pa një substancë e paidentifikuar dhe autoritetet përgjegjëse kanë marrë mostra, duke vijuar me inspektime për të përcaktuar natyrën e saj.

Mostrat janë mbledhur dhe analizat janë në proces. Nga Ministria e Mjedisit Jetësor u komunikua se procedurat e inspektimit nuk mund të kryhen me shpejtësi dhe kërkojnë të paktën 24 orë. Pritet që rezultatet konkrete të dalin të hënën.

Ministria e Mjedisit Jetësor theksoi se procesi i inspektimit është ende në zhvillim dhe verifikimet po realizohen sipas kornizës ligjore. Ata siguruan se sapo të përfundojnë të gjitha kontrollet dhe të merren rezultatet zyrtare, opinioni publik do të njoftohet në kohë dhe me transparencë për konstatimet dhe masat që do të ndërmerren.

Ndërkohë, nga ana e Qytetit të Shkupit u angazhua një dron për të identifikuar burimin e ndotjes, ndërsa shërbimet e Ndërmarrjes Publike “Ujësjellësi dhe Kanalizimi” u udhëzuan të merrnin kampione të ujit. Kryetari i Shkupit, Orce Gjorgjievski, paralajmëroi se shkaktari do të zbulohet shumë shpejt dhe ndaj tij do të ngrihet padi përkatëse./Alsat.mk.

The post Shkuma në Vardar është zhdukur, Inspektorati i Mjedisit pret rezultatet e analizave appeared first on Albeu.com.

Shfaqja e shkumës së bardhë që kalon nga Lepeneci në lumin Vardar dëshmon për një dështim të plotë institucional, sipas akuzave të LSDM-së. Partia thekson se kjo gjendje vjen pas ndotjes së ujit të pijshëm në disa zona të vendit.

Socialdemokratët nënvizojnë se prania e shkumës, e cila ka pamje sintetike, përbën një provë konkrete të kontaminimit të mjedisit ujor.

“Fillimisht patëm ujë të ndotur në Gostivar, Vallandovë, Leshkë, Krushevë dhe Pllasnicë. Madje as në ambiente spitalore uji nuk ishte i sigurt për konsum. Tashmë një masë e bardhë shkumëzuese rrjedh përgjatë Lepencit në Shkup. Pamja e saj të lë përshtypjen se bëhet fjalë për një substancë sintetike. Një fakt i pakontestueshëm i ndotjes që derdhet pa pengesë në lumë, mu në vendin ku Lepeneci bashkohet me Vardarin. Kjo situatë nuk mund të cilësohet më thjesht si një incident i izoluar. Kemi të bëjmë me një kolaps të thellë sistemor të institucioneve, të cilat veprojnë nën drejtimin e Hristijan Mickoskit. Teksa ata merren me inaugurime pishinash, ndërrime ministrash dhe flasin për ‘dezinformata’, shtretërit e lumenjve mbushen me shkumë dhe qytetarëve u ndalohet pirja e ujit të rubinetit”, shprehet qëndrimi i LSDM-së.

The post LSDM: Pas ujit të ndotur në Gostivar, Krushevë e Pllasnicë, Vardari tashmë është mbuluar nga shkuma sintetike appeared first on Albeu.com.