Republikanët në Senat arritën të bllokojnë propozimin e ri, me një votim 49 me 50, shumë më pak se 60 votat që duhen për të miratuar projektligjin,

Senatori demokrat nga Nju Jorku ishte shprehur më herët se synonte t’i detyronte republikanët që të merrnin pjesë në dy votime proceduriale. I pari, për një paketë të negociuar prej kohësh me vlerë 118 miliardë dollarë ku përfshihen masat për kufirin që u refuzuan nga republikanët. Votimi i dytë procedurial do të jetë për një paketë të ndryshuar nga ku është hequr pjesa për kufirin. Nëse republikanët do të mbështesnin ndonjërin prej këtyre propozimeve gjatë votimit procedurial, atëherë do t’i hapej drita jeshile Senatit për të bërë një votim të plotë gjatë seancës plenare.

“Vazhdojmë të mendojmë se Ukraina, Izraeli, ndihma humanitare në Lindjen e Mesme dhe për Indo-Paqësorin, si dhe forcimi i ushtrisë sonë, janë me rëndësi jetike”, u tha gazetarëve të mërkurën senatori Schumer.
Propozimi për ndihma rreth 60 miliardë dollarë për Ukrainën ka ngecur në Kongres prej muajsh për shkak të kundërshtive nga konservatorët e linjës së ashpër që kërkojnë një strategji daljeje nga lufta. Për shkak të këtij ngërçi, Shtetet e Bashkuara kanë ndalur dërgesat e armëve për Kievin, në një moment kyç për konfliktin gati dyvjeçar, duke i lënë ushtarët ukrainas pa municion të mjaftueshëm dhe pa raketa, ndërkohë që Rusia bën sulme të vazhdueshme.

Kauza e Ukrainës ende gëzon mbështetjen e shumë senatorëve republikanë, ndër ta drejtuesi i pakicës republikane në Senat, Mitch McConnell, por pikëpyetja të cilës nuk i kanë dhënë dot përgjigje ligjvënësit, ka qenë gjithnjë se si mund të hartohej një propozim që do të kalohej nga Dhoma e Përfaqësuesve me shumicë republikane.

“Fillimisht, republikanët thanë se do kalonin vetëm Ukrainën dhe Izraelin, ndihmat humanitare, me kufirin. Pastaj thanë se nuk do ta kalonin me kufirin”, tha senatori Schumer. “Atëherë do t’ua japim të dyja opsionet”.

Senatori Schumer shtoi se propozimi i ri do të përmbante edhe legjislacionin për të autorizuar sanksione dhe mjete kundër pastrimit të parave, për t’u përdorur ndaj organizatave kriminale që trafikojnë fentanilin drejt Shteteve të Bashkuara.

Sidoqoftë, nuk u bë menjëherë e qartë nëse plani i ri, edhe nëse do të kalonte në Senat, do të fitonte mbështetjen e Kryetarit të Dhomës së Përfaqësuesve, Mike Johnson. Ligjvënësit republikanë vazhdojnë të këmbëngulin për një plan për kufirin, megjithëse e refuzuan si të pamjaftueshme marrëveshjen e negociuar në Senat.
“Nuk shoh se si do të kalonte në këtë dhomë. Nuk di se si do ta paraqiste këtë kryetari në seancë plenare”, tha kryetari i Komisionit të Dhomës së Përfaqësuesve për Forcat e Armatosura, ligjvënësi republikan Mike Rogers, duke shtuar se dëshiron që propozimi të shoqërohet me politika më të ashpra kufitare.

“Nëse nuk përballemi me çështjen numër një në Amerikës, kur themi që kjo është mënyra e vetme për të arritur tek çështjet e tjera; nuk di si mund të shmanget kjo”, tha ai.

Pas kritikave të ashpra të ish Presidentit Donald Trump ndaj propozimit ndërpartiak të Senatit, Kryetari i Dhomës së Përfaqësuesve Johnson e refuzoi atë me shpejtësi. Qëndrimi i ish Presidentit i ka shtyrë edhe shumë republikanë që të lëkunden për sa i përket Ukrainës, duke sugjeruar se ai do të negocionte për t’i dhënë fund luftës.

Kryetari Johnson tha këtë javë do të donte ta shqyrtonte ndihmën për Izraelin dhe Ukrainën në paketa të veçuara, por një projektligj që ai paraqiti me vetëm ndihmën për Izraelin nuk u miratua të martën në Dhomën e Përfaqësuesve.

Drejtuesi i pakicës në Dhomën e Përfaqësuesve, ligjvënësi demokrat Hakeem Jeffries tha të mërkurën se e vetmja rrugëzgjidhje ishte një përqasje gjithëpërfshirëse që përmban fonde për aleatët e Shteteve të Bashkuara në mbarë botën, si dhe mbështetjen humanitare për civilët në konfliktet në Gazë dhe Ukrainë.

Paketa e re përmban 14 miliardë dollarë për Izraelin, investime në industrinë amerikane të mbrojtjes, fonde për vendet aleate në Azi, si dhe 10 miliardë dollarë për operacionet humanitare në Ukrainë, Izrael, Gazë dhe vende të tjera.

The post Senati nuk miraton një plan të ri ndihmash për Ukrainën dhe Izraelin appeared first on Albeu.com.

Duke folur nga Shtëpia e Bardhë, Biden u tha ligjvënësve që të miratojnë masën, e cila sipas tij përfshin kërkesat e republikanëve për çështjet e migrimit, dhe që atë legjislacion t’ia dërgojnë atij që ta nënshkruajë në ligj. Ai theksoi nevojën urgjente për të miratuar ndihmën prej 60 miliardë dollarësh për Ukrainën që po përballet me pushtimin rus të nisur nga presidenti Vladimir Putin në shkurt të vitit 2022.

“Koha po kalon. Çdo javë, çdo muaj që kalon pa ndihmë të re për Ukrainën nënkupton se ata do të kenë më pak municione të artilerisë, më pak sisteme të mbrojtjes ajrore më pak mjete që të mbrojnë veten ndaj rusëve”, tha Biden.

Biden tha se ky është moment kritik, duke theksuar se Putini “po pret” që SHBA-ja të heqë dorë nga mbështetja për Ukrainën. Presidenti amerikan paralajmëroi se nëse Uashingtoni dështon të miratojë ndihmën për Ukrainën, ky do të ishte një gabim historik.

“Mbështetja e këtij projektligji nënkupton që të ngrihemi kundër Putinit. Kundërshtimi i legjislacionit është që të veprojmë në favor të tij [Putinit]. Bota po shikon”, tha Biden.

Ai shtoi se kostoja për amerikanët dhe aleatët e Uashingtonit vetëm se do të rritet, nëse kjo ndihmë nuk miratohet.

Biden ia la fajin Trumpit për mosmiratimin e legjislacionit në Senatin amerikan, duke thënë se ish-presidenti amerikan “mendon se kjo është gjë e keqe në aspektin politik për të”, prandaj nuk do të zgjidhë çështjen e kufirit në mënyrë që ta përdorë gjatë fushatës presidenciale të këtij viti.

Gjatë fundjavës, një grup senatorësh nga të dyja partitë njoftuan se kanë arritur një marrëveshje për frenimin e kalimeve të paligjshme në kufirin mes SHBA-së dhe Meksikës. Biden tha se ky projektligj “do të vendosë reformat më të ashpra të sigurisë kufitare që janë vendosur ndonjëherë”.

Presidenti mbajti fjalimin e tij nga Shtëpia e bardhë pasi kishte indikacione se projektligji nuk do të kalonte, për shkak se senatorët republikanë që mbështesin Trumpin, shprehën mospajtimin e tyre për legjislacionin, duke thënë se masat për mbrojtje kufitare janë të pamjaftueshme.

The post Biden i bën thirrje Kongresit që të miratojë ndihmën për Ukrainën appeared first on Albeu.com.