Sipas njoftimit zyrtar, më datë 08.06.2026 një 17-vjeçare është paraqitur në Komisariatin e Policisë Fier bashkë me nënën e saj dhe ka kallëzuar se ishte dhunuar e filmuar në banesën e shtetases L. L., 19-vjeçe, nga kjo e fundit dhe dy vajza të tjera 15-vjeçare.

Menjëherë pas denoncimit, shërbimet e Drejtorisë Vendore të Policisë Fier e trajtuan me prioritet rastin dhe, në bashkëpunim me Prokurorinë, kryen të gjitha veprimet procedurale dhe hetimore të parashikuara në ligj.

Gjatë hetimeve, në ambientet e Komisariatit të Policisë u shoqëruan shtetasja L. L., 19 vjeçe, si edhe dy të miturat 15-vjeçare, të cilat pranuan se kishin ushtruar dhunë ndaj shoqes së tyre 17-vjeçare për motive të dobëta.

Pas përmbylljes së veprimeve, më datë 09.06.2026, materialet procedurale iu kaluan Prokurorisë për veprën penale “Dëmtime të tjera me dashje”, në ngarkim të tre shtetaseve të sipërpërmendura.

Policia bën me dije gjithashtu se, më datë 28.06.2026, specialistët për Hetimin e Krimeve, në bashkërendim me Prokurorinë e Juridiksionit të Përgjithshëm Fier, arrestuan njërën prej 15-vjeçareve të përfshira në dhunimin e 17-vjeçares. Ajo u vu në pranga pas kallëzimit të nënës së saj, e cila deklaroi se ishte dhunuar nga e bija dhe kishte pësuar dëmtime fizike.

Pas kryerjes së procedurave përkatëse dhe mbi bazën e vlerësimit të autoriteteve kompetente, 15-vjeçarja e arrestuar është dërguar për trajtim në një institucion të specializuar shëndetësor për shëndetin mendor në Tiranë.

Drejtoria Vendore e Policisë Fier thekson se të gjitha veprimet e nevojshme hetimore janë kryer në përputhje me ligjin dhe në koordinim të ngushtë me Prokurorinë, e cila është autoriteti kompetent për vijimin e procedimit penal.

Policia e Shtetit nënvizon se mbetet e angazhuar maksimalisht për të trajtuar me seriozitet çdo rast që cenon sigurinë e qytetarëve, veçanërisht kur në ngjarje përfshihen të mitur, duke vepruar me profesionalizëm, paanësi dhe në zbatim të plotë të ligjit.

The post Dhuna ndaj bashkëmoshatares dhe videoja e shpërndarë, reagon policia: Tre adoleshentet u proceduan, njëra prej tyre ishte arrestuar edhe më herët appeared first on Albeu.com.