Barcelona ka në radar mbrojtësin brazilian Natan, i cili konsiderohet si një alternativë për të zëvendësuar Ronald Araujon. Ky i fundit pritet të largohet nga klubi katalanas dhe të transferohet te Liverpooli.

Gazetarja Aline Nastari bën të ditur se emri i ish-lojtarit të Flamengos ishte shqyrtuar edhe më parë nga drejtuesit e Barcelonës, por tashmë çështja ka hyrë në një fazë tjetër.

Sipas raportimeve, katalanasit kanë vendosur kontaktet e para me Real Betisin për të diskutuar kushtet e një marrëveshjeje të mundshme për mbrojtësin.

Natan e njeh futbollin evropian dhe mund t’i shtojë skuadrës një opsion tjetër në qendër të repartit defensiv, teksa Hansi Flick po punon për ndërtimin e ekipit për sezonin e ri.

Lëvizja e mundshme e Araujos drejt Liverpoolit do ta detyronte Barcelonën të ndërhynte në mbrojtje, sidomos në një periudhë kur klubi po analizon nivelin e përgjegjësive që mund t’u ngarkohen lojtarëve të rinj të këtij reparti.

Për rrjedhojë, Natan pritet të jetë një prej emrave për t’u monitoruar gjatë verës. Gjithsesi, deri tani Barcelona dhe Betisi nuk kanë gjetur ende gjuhën e përbashkët për transferimin e tij.

The post Barcelona nis kontaktet për Natanin, braziliani shihet si pasues i Araujos appeared first on Albeu.com.