Autoritetet gjyqësore serbe kanë hapur procedurë penale ndaj shtetasit të Republikës së Kosovës, Dukagjin Maxhuni, duke i caktuar masën e paraburgimit prej 30 ditësh për shkak të pretendimeve lidhur me krime lufte të vitit 1999.

Ministria e Punëve të Jashtme dhe Diasporës bëri të ditur se ka reaguar përmes Zyrës Ndërlidhëse të Republikës së Kosovës në Serbi, duke ndërmarrë menjëherë veprimet e nevojshme diplomatike.

Në kuadër të këtyre hapave, MPJD-ja ka vënë në dijeni Delegacionin e Bashkimit Evropian në Serbi dhe u ka përcjellë notë verbale misioneve diplomatike të vendeve të Quint-it të akredituara në këtë shtet. Synimi është përfshirja e partnerëve ndërkombëtarë në garantimin e të drejtave dhe sigurisë së shtetasit kosovar.

Ambasadori i Republikës së Kosovës në Serbi, Jetish Jashari, po mban kontakte të vazhdueshme me familjen e Dukagjin Maxhunit. Ndërkohë, përmes Zyrës Ndërlidhëse do të dorëzohet kërkesa zyrtare për lejimin e vizitës së tij, e cila pritet të zhvillohet gjatë javës në vijim.

MPJD-ja ka deklaruar se Zyra Ndërlidhëse në Serbi do ta ndjekë nga afër situatën dhe do të përdorë të gjitha instrumentet e nevojshme diplomatike për mbrojtjen e të drejtave të të gjithë shtetasve të Republikës së Kosovës.

The post MPJD-ja njofton për rastin e Dukagjin Maxhunit: Janë aktivizuar kanalet diplomatike appeared first on Albeu.com.

Ministria e Punëve të Jashtme dhe Diasporës bëri me dije se gjendja në pikën kufitare Bajakovo, mes Kroacisë dhe Serbisë, është normalizuar dhe kalimi tani po zhvillohet pa pritje të zgjatura, pas orëve të raportuara me radhë dhe ngadalësime gjatë ditës.

Përmes Ambasadës së Kosovës në Kroaci, MPJD-ja ka komunikuar në mënyrë të pandërprerë me autoritetet kufitare, të cilat sqaruan se vonesat e përkohshme ishin pasojë e aplikimit të Sistemit EES (Entry/Exit System), që kërkon kontrolle shtesë në procedurat kufitare.

Ambasadori Martin Berishaj, së bashku me ekipin e ambasadës, shkoi personalisht në pikën kufitare Bajakovo për të ofruar asistencë dhe për t’u takuar me qytetarët që prisnin në kolonë.

MPJD theksoi se do të mbetet e përkushtuar për informimin dhe ndihmën ndaj qytetarëve, sidomos gjatë muajve të verës, kur fluksi i lëvizjeve në pikat kufitare rritet ndjeshëm.

The post Normalizohet qarkullimi në kufirin Kroaci–Serbi, MPJD: Pritjet e gjata u eliminuan appeared first on Albeu.com.

Ministria e Punëve të Jashtme dhe Diasporës u ka bërë thirrje qytetarëve të Kosovës, përfshirë edhe bashkatdhetarët që jetojnë në mërgatë dhe planifikojnë të vijnë në Kosovë, që të zgjedhin rrugë alternative dhe të mos kalojnë nëpër Serbi.

Sipas MPJD-së, ky apel është përsëritur vazhdimisht për shkak të rasteve të shpeshta të ndalimeve dhe arrestimeve të qytetarëve të Republikës së Kosovës nga autoritetet serbe.

Sezoni i pushimeve ka rritur ndjeshëm numrin e mërgimtarëve që udhëtojnë drejt Kosovës përmes Serbisë. Pak ditë më parë, autoritetet serbe arrestuan Osmam Selmanin, nën dyshimet e Serbisë për krime lufte të pretenduara në vitin 1999.

Nga kjo pikë kufitare kalojnë dhjetëra mijëra bashkatdhetarë tanë, ndërsa gjatë viteve të fundit janë regjistruar edhe shumë incidente, të cilat kryesisht lidhen me kontrolle më të gjata dhe marrje në pyetje.

Vetëm brenda dy viteve të fundit janë raportuar edhe arrestime, të cilat në pjesën më të madhe kanë qenë të lidhura me akuza për thyerjen e rendit kushtetues të republikës së Serbisë.

Për këtë çështje ka reaguar edhe avokati Arianit Koci, i cili thotë se duhet treguar kujdes gjatë kalimit nëpër Serbi.

MPJD thekson se, përmes Zyrës Ndërlidhëse të Republikës së Kosovës në Serbi, monitoron dhe trajton çdo rast që raportohet nga qytetarët ose familjarët e tyre, ndërsa njëkohësisht ka njoftuar vazhdimisht delegacionin e Bashkimit Evropian në Serbi dhe ka dërguar nota verbale pranë misioneve diplomatike të vendeve të Quint-it të akredituara në Serbi.

The post MPJD u kërkon qytetarëve të Kosovës të shmangin transitin përmes Serbisë appeared first on Albeu.com.

Sipas MPJD-së, Republika e Kosovës nuk përfshihet në Samitet e NATO-s si shtet pjesëmarrës, pasi ende nuk është anëtare e Aleancës Veri-Atlantike dhe njëkohësisht nuk bën pjesë në Programin e Partneritetit për Paqe.

Ministria ka bërë të ditur se Samitet e NATO-s zhvillohen si takime të udhëheqësve të shteteve dhe qeverive të 32 vendeve anëtare, ndërsa në raste të caktuara në to marrin ftesë edhe partnerë të organizatës, në varësi të agjendës së samitit.

Në reagim thuhet gjithashtu se në samitin e ardhshëm janë ftuar disa shtete partnere nga rajoni Indo-Paqësor, si edhe Ukraina, ndërsa Kosova deri më tani nuk ka qenë pjesë e listës së vendeve pjesëmarrëse në këtë format.

MPJD ka rikujtuar po ashtu se edhe në të kaluarën përfaqësimi i Kosovës në veprimtari të ndërlidhura me Samitin e NATO-s ka ndodhur vetëm në kuadër të ngjarjeve anësore të organizuara nga partnerë ndërkombëtarë, e jo në punimet e vetë samitit.

Në përmbyllje të reagimit, Ministria ka ritheksuar angazhimin e Kosovës për thellimin e bashkëpunimit me NATO-n dhe për çuarjen përpara të objektivit strategjik për anëtarësim të plotë në Aleancë.

The post MPJD: Kosova nuk merr pjesë në Samitin e NATO-s për shkak të statusit të saj appeared first on Albeu.com.

Një nga çështjet e veçuara në raport ka të bëjë me një kontratë për këshillim dhe përfaqësim ligjor në Ambasadën e Kosovës në Berlin. Sipas auditorëve, për këtë angazhim me tarifë 300 euro për orë pune nuk ishte caktuar menaxher i kontratës. Ndërkohë, në një rast tjetër, Konsullata e Përgjithshme në Frankfurt kishte kryer pagesë prej 39,181 eurosh për shërbime juridike, edhe pse nuk posedonte dëshmi të mjaftueshme që do të vërtetonin përputhjen mes orëve të faturuara dhe punës së realizuar. Në raport thuhet se mungonin dokumente të tilla si evidenca të hollësishme për orët e punës dhe raportet konkrete për shërbimet e kryera.

Parregullsi është konstatuar edhe në një tender për shërbime higjienike. Auditimi thekson se Komisioni Vlerësues kishte ndryshuar çmimin e ofertës së operatorit fitues, duke e zbritur nga 134,450 euro në 124,450 euro, me arsyetimin se po korrigjoheshin gabime aritmetike. Por auditorët kanë vlerësuar se në ofertë nuk ekzistonin gabime të tilla dhe se ndërhyrja prej 10 mijë eurosh shkonte përtej kufijve që ligji lejon për këso korrigjimesh.

Raporti po ashtu evidenton se në 20 misione diplomatike dhe konsullore, diplomatë dhe zyrtarë konsullorë kanë vijuar ushtrimin e funksioneve edhe pasi u kishte përfunduar mandati katërvjeçar i përcaktuar me ligj. Sipas gjetjeve të auditorit, disa prej tyre kishin mbetur në detyrë pa dekrete të reja për vazhdimin e mandatit ose pa vendime të reja emërimi. Nga 20 rastet e evidentuara, nëntë persona nuk i përkisnin shërbimit të përhershëm diplomatik.

Në auditim është përmendur edhe fakti se tri pozita të rregullta në ministri vazhdonin të mbaheshin nga ushtrues detyre përtej afateve të lejuara me ligj. Kjo kishte ndodhur edhe pse për këto vende pune nuk ishin hapur konkurse, pavarësisht përfshirjes së tyre në planin vjetor të rekrutimit.

Në përfundim, auditorët kanë rekomanduar që të forcohen mekanizmat e kontrollit të brendshëm, të respektohen rregullat e prokurimit publik, të caktohen menaxherë të kontratave dhe mandatet diplomatike të administrohen në përputhje me legjislacionin në fuqi.

The post Auditimi në MPJD zbulon ulje të paligjshme prej 10 mijë eurosh në tender dhe 39,181 euro pagesa për shërbime juridike pa prova të plota appeared first on Albeu.com.

Sipas njoftimit të MPJD-së, menjëherë pas marrjes së informacionit mbi arrestimin, Zyra Ndërlidhëse e Kosovës në Serbi ka dërguar kërkesë zyrtare te autoritetet serbe për konfirmimin e arrestimit, arsyet konkrete të ndalimit, vendndodhjen ku po mbahet si dhe çdo informacion tjetër të nevojshëm për trajtimin e mëtejshëm të rastit.

Ministria njofton gjithashtu se është informuar Delegacioni i Bashkimit Evropian në Serbi, si dhe janë dërguar nota verbale te misionet diplomatike të vendeve të QUINT-it, për të siguruar mbikëqyrje dhe angazhim ndërkombëtar në mbrojtje të të drejtave të Qenajt.

Zyra Ndërlidhëse e Kosovës në Serbi do të procedojë me kërkesën për lejimin e vizitës së të arrestuarit sapo të konfirmohet lokacioni i saktë i tij.

MPJD rithekson se do të informojë opinionin publik në mënyrë të vazhdueshme për çdo zhvillim lidhur me këtë rast.

Ministria i bën thirrje komunitetit ndërkombëtar të rrisë vigjilencën dhe presionin ndaj autoriteteve serbe, duke theksuar se Serbia vazhdon praktikën e keqtrajtimit dhe intimidimit të shtetasve të Kosovës, duke cenuar normat dhe standardet ndërkombëtare për të drejtat e njeriut.

The post MPJD kërkon angazhim ndërkombëtar pas arrestimit të ish-ushtarit të UÇK-së në Serbi appeared first on Albeu.com.