Kompania e re Nilu ka zhvilluar një motor V12 me kapacitet 6.5 litra për hiperveturën e saj sportive, Nilu27.

Njësia është prodhuar nga Hartley Engines në Zelandën e Re dhe në provën e parë në stendë ka kaluar synimin prej 1070 kuaj/fuqish.

Motori pritet të ketë një tingull mbresëlënës kur të vendoset në automjet, pasi kufiri i rrotullimeve është caktuar në 11 mijë rrotullime në minutë.

Për të ilustruar karakterin e tij, Nilu ka publikuar një fragment audio me zhurmën e motorit.

Brenda pak kohësh, motori do të dërgohet nga Zelanda e Re drejt Gjermanisë, aty ku vepron departamenti i zhvillimit të markës. Në këtë fazë, ai do të lidhet me një transmision me shtatë shpejtësi dhe do të montohet në automjetin që do të përdoret si prototipi i parë funksional për provat në rrugë.

Koncepti i hiperveturës sportive Nilu u shfaq rreth dy vite më parë. Projekti duket se ka vijuar të zhvillohet, ndërsa kompania po hyn në fazat e radhës për realizimin e këtij automjeti ekstrem.

Nilu27 pritet të pozicionohet mes hiperveturave më të dallueshme në treg, falë ndërthurjes së një motori tradicional atmosferik V12 me performancë të lartë dhe teknologjive moderne të ndërtimit.

The post Nilu teston motorin V12 6.5-litërsh që kalon 1070 kuaj/fuqi appeared first on Albeu.com.

Kur një motor qëndron në regjim boshe, pra në “ler”, normalisht duhet të funksionojë qetë dhe në mënyrë të qëndrueshme.

Nëse vëreni dridhje, djegie jo të njëtrajtshme apo rritje të rrotullimeve të motorit, atëherë kemi të bëjmë me një sinjal se diçka nuk po shkon siç duhet.

Zakonisht, në “ler”, një automjet punon rreth 700–800 rrotullime në minutë (o/min). Një shofer me përvojë arrin ta dallojë lehtësisht kur motori nuk sillet si zakonisht.

Shpesh, kjo tregon praninë e disa defekteve të mundshme. Te motorët me benzinë, një nga arsyet mund të jenë kandelet (qirinjtë e ndezjes) të harxhuar, të cilët e vështirësojnë ndezjen e përzierjes brenda cilindrit. Po kështu, burimi i problemit mund të jetë edhe te kabllot e kandeleve ose te instalimi elektrik.

Ndër shkaqet e tjera përmenden injektorët e karburantit të ndotur, si edhe filtri i ajrit i bllokuar. Po ashtu, edhe një valvul e dëmtuar e rrjedhës së ajrit mund të ndikojë në këtë funksionim të paqëndrueshëm. Punimi jo i njëtrajtshëm i motorit mund të vijë edhe nga prishja e vakumit në sistemin e furnizimit me ajër dhe karburant, si pasojë e konsumimit ose dëmtimit.

Edhe pas ndërrimit të rripit të kohëzimit mund të shfaqen probleme, nëse ai nuk është sinkronizuar siç duhet. Në këtë rast, koordinimi i valvulave prishet.

Si pasojë, kompresioni bie dhe motori nuk punon në mënyrë optimale në gjendje boshe. Të njëjtat shqetësime mund të lidhen edhe me konsumimin e vetë këtij rripi.

Në fund, një arsye tjetër mund të jetë edhe koha e ndezjes së përzierjes, e cila, kur nuk është e rregullt, mund ta bëjë motorin të punojë më ashpër ose edhe të fiket. Në çdo rast, nëse vini re se motori funksionon në mënyrë të pabarabartë, duhet të kërkoni ndihmën e një mekaniku.

The post Luhatjet e motorit në regjim boshe, nga vijnë dhe cilat mund të jenë arsyet? appeared first on Albeu.com.