“Ende nuk i kemi pranuar rezultatet e mostrave të fundit. Ende nuk dihet data e saktë, por besoj se deri në fund të muajit deri më 28-29 dhjetor besoj që kthehen (rezultatet)”, tha për Radion Evropa e Lirë, Era Pireva, zëdhënëse e Institutit Kombëtar të Shëndetësisë Publike të Kosovës (IKSHPK).

Ajo tha se edhe gjatë 20 dhjetorit do të dërgohen për analizim mostra të reja në Gjermani.

Kosova dërgoi në fillim të dhjetorit 72 mostra në një laborator në Gjermani, përmes një programi të Qendrës Evropiane për Kontrollin dhe Parandalimin e Sëmundjeve (ECDC) për të parë nëse në to ka prani të variantit Omicron.

IKSHPK-ja edhe në të kaluarën ka dërguar në Gjermani mostra për të identifikuar praninë e variantit Delta dhe Delta Plus, pasi Kosova nuk ka kapacitete për ta bërë një gjë të tillë.

Aktualisht, gjendja epidemiologjike në Kosovë vlerësohet e qetë dhe në vend janë pak mbi 300 raste aktive me koronavirus.

Për dallim nga Kosova, shtetet rajonit dhe Evropës po përballen me rritje të rasteve me COVID-19, për shkak të variantit Omicron, i cili besohet se transmetohet më shpejt se variantet paraprake, përfshirë edhe variantin Delta.

Për shkak të Omicronit, shumë shtete evropiane kanë rivendosur masa kufizuese dhe Holanda është bërë shteti i parë që ka shpallur izolim mbarëkombëtar deri në mesin e janarit të vitit të ardhshëm.

Varianti Omicron u identifikua fillimisht në Afrikën e Jugut në muajin nëntor. Që atëherë, dhjetëra shtete kanë raportuar raste me këtë variant.

Organizata Botërore e Shëndetësisë e ka klasifikuar këtë variant si “shqetësues” për shkak të mutacioneve të shumta që ka.

Shkencëtarët ende nuk e kanë përcaktuar nëse ky variant shkakton sëmundje më të rëndë apo nëse shmang mbrojtjen që ofrojnë vaksinat ekzistuese kundër koronavirusit./REL

The post Kosova ende pa përgjigje për mostrat e dërguara në Gjermani për variantin Omicron appeared first on Albeu.com.

Lajmin e ka bërë të ditur Ministria e Shëndetësisë, përmes një njoftimi drejtuar mediave.

“Nga 70 mostra, të dërguara ditë më parë për sekuencionim përmes projektit të ECDC në laboratorët Eurofin, Gjermani, sekuencionimi është bërë në 59 raste, prej të cilave në 12 raste (20.33%) është detektuar varianti Delta Plus (AY.4-like) dhe në 47 raste është detektuar varianti Delta (79,66%),

IKSHPK planifikon që të hënën më 15.11.2021 të dërgojë mostrat e tjera pozitive me SARS-CoV-2 të mbledhura gjatë dy javëve të fundit, përmes të njëjtit projekt, me qëllim të mbikëqyrjes virologjike të varianteve të SARS-CoV-2 në qarkullim në Kosovë”, thuhet në komunikatë.

Tutje, Ministria ka bërë thirrje që të zbatohen vendimet e Qeverisë për masat anti-Covid, si dhe të vaksinohen.

“Duke pasur parasysh akoma numrin e lartë të personave aktiv që mund të bartin infeksionin dhe të panjohurat për shpërndarjen e shpejtë të COVID-19, Ministria e Shëndetësisë u bën thirrje të gjithëve që t’i zbatojnë vendimeve të fundit të Qeverisë dhe të bëhet monitorimi i vazhdueshëm i masave me një dinamikë të shtuar të kontrollit nga ana e Inspektorateve dhe Policisë së Kosovës për të pasur efekt në uljen e lakores epidemiologjike dhe në uljen e numrit të vdekjeve.

Gjithashtu, i bëhet thirrje qytetarëve që ende nuk janë vaksinuar që ta bëjnë këtë sa më parë me qëllim të mbrojtjes nga secili variant i SARS-COV-2 dhe arritjen sa më të shpejtë të imunitetit me vaksinën kundër Covid-19 duke u vaksinuar plotësisht”, thuhet në komunikatën e MSh’së./Gazeta Express

The post Përhapja e Delta Plus në Kosovë, të hënën dërgohen në Gjermani edhe mostra tjera appeared first on Albeu.com.