Pas shfaqjes së mbetjeve me shkumë të bardhë në lumin Vardar, afër pikës ku derdhet lumi Lepenc, më 24 korrik 2026, Inspektorati Shtetëror për Mjedisin Jetësor nisi menjëherë kontrolle të jashtëzakonshme në terren dhe analiza laboratorike, në bashkërendim me të gjitha institucionet përgjegjëse. Kështu bëri të ditur Ministria e Mjedisit Jetësor dhe Planifikimit Hapësinor (MMJPH).

Në kuadër të këtyre veprimeve, inspektorët kryen mbikëqyrje të jashtëzakonshme në subjektet industriale të zonës që janë nën kompetencën e shtetit. Kontrollet nuk zbuluan shkelje ligjore, ndërsa u konstatua se subjektet kishin respektuar kushtet e përcaktuara në lejet ekologjike për administrimin e ujërave të ndotura.

Ministria sqaroi se në cilësinë e ujit në këtë segment ndikojnë disa faktorë, mes tyre ujërat komunale dhe atmosferike, por edhe veprimtaria e një numri të madh subjektesh afariste në zonën përreth. Për këtë arsye, institucionet kompetente po i ndërmarrin veprimet në mënyrë të koordinuar.

Për të përcaktuar me saktësi situatën, Ndërmarrja Publike “Ujësjellësi dhe Kanalizimi” – Shkup mori mostra uji në lokacionin përkatës. Raporti paraprak i datës 29 korrik, i dorëzuar në Ministrinë e Mjedisit Jetësor dhe Planifikimit Hapësinor, tregon se parametrat fiziko-kimikë të analizuar në mostër janë brenda vlerave kufitare të lejuara për shkarkim në ujërat sipërfaqësore.

Mostra të tjera janë marrë edhe nga një laborator i akredituar, me kërkesë të Inspektoratit Shtetëror për Mjedisin Jetësor. Raporti përfundimtar i laboratorit pritet t’i dorëzohet Inspektoratit dhe Ministrisë së Mjedisit Jetësor dhe Planifikimit Hapësinor të martën, më 4 gusht 2026. Pas pranimit të tij, opinioni do të njoftohet në kohë dhe në mënyrë transparente për rezultatet përfundimtare.

Sipas njoftimit, Inspektorati Shtetëror për Mjedisin Jetësor do t’i vijojë pa kompromis kontrollet e rregullta dhe të jashtëzakonshme, me synimin për të garantuar mbrojtjen e plotë të mjedisit jetësor dhe të shëndetit të qytetarëve./Telegrafi/

The post MMJPH: Parametrat e ujit në lumin Vardar nuk tejkalojnë kufijtë e lejuar, rezultatet përfundimtare më 4 gusht appeared first on Albeu.com.

Ministri i Mjedisit Jetësor dhe Planifikimit Hapësinor, Muamet Hoxha, zhvilloi sot një vizitë pune në Komunën e Bogovinës, ku bashkë me kryetarin Feti Abazi dhe zëvendësministren e Transportit dhe Lidhjeve, Kaltrina Zekolli Shaqiri, panë nga afër projektet infrastrukturore që po zbatohen me përkrahje financiare nga Ministria.

Në këtë komunë, MMJPH po mbështet tre projekte me një shumë prej rreth 60 milionë denarësh. Bëhet fjalë për ndërtimin e kanalit për ujërat atmosferikë në vendbanimin Pirok, rregullimin e shtratit të lumit Kusha në Pallçisht të Poshtëm, si dhe rregullimin e shtratit të lumit në Kamjan, realizimi i të cilit pritet të nisë së shpejti.

Zbatimi i këtyre ndërhyrjeve mundëson mbrojtje më efikase nga ujërat atmosferikë dhe rrjedhat e rrëmbyeshme, ul rrezikun nga përmbytjet dhe përmirëson sigurinë e jetesës për banorët e zonës.

Ministria e Mjedisit Jetësor dhe Planifikimit Hapësinor vijon të orientojë investime në projekte infrastrukturore në të gjithë vendin, pasi investime të tilla kapitale krijojnë bazën për kthesën e gjelbër dhe ndikojnë në zhvillim të qëndrueshëm, në rritjen e qëndrueshmërisë përballë sfidave klimatike dhe në sigurimin e një mjedisi më cilësor jetësor për të gjithë qytetarët.

The post Hoxha në Bogovinë: MMJPH financon tre projekte me vlerë rreth 60 milionë denarë appeared first on Albeu.com.