Në komunën e Zveçanit, në veri të Kosovës, janë vënë re mesazhe që lartësojnë figurën e kriminelit të dënuar të luftës, Ratko Mladiq.

Pamjet e publikuara në grupe serbe të platformës Telegram shfaqin një mural me portretin e tij, i shoqëruar nga mbishkrimet “Zveçani përjetësisht mirënjohës” dhe “Qoftë e falënderuar nëna jote”.

Një tjetër grafit i dedikohet Mladiqit, duke iu referuar me titullin “gjeneral”. Këto fotografi janë shoqëruar në Telegram me thirrjen “Ruajeni Kosovën”, ndërsa një prej postimeve e lokalizon qartë vendngjarjen në Zveçan.

“Gjeneral, përshëndetja e fundit. Mesazh për terroristët: të gjithë jemi ushtarët e Ratkos”, shkruhej në njërin nga postimet.

Ratko Mladiq, ish-komandant i Ushtrisë së Republikës Srpska, u dënua me burgim të përjetshëm nga gjykatat ndërkombëtare për gjenocidin e Srebrenicës, si dhe për krime kundër njerëzimit dhe krime lufte gjatë konfliktit në Bosnje dhe Hercegovinë.

The post Lavdërime për Mladiqin në Zveçan, mbishkrimet “Përjetësisht mirënjohës” ngrenë shqetësime appeared first on Albeu.com.

Ministri në detyrë i Punëve të Jashtme dhe Diasporës, Glauk Konjufca, ka reaguar ndaj nderimeve shtetërore të organizuara në Serbi për Ratko Mlladiqin, i cili është dënuar për gjenocid dhe krime lufte.

Përmes një postimi në X, Konjufca e ka cilësuar këtë akt si një turp të thellë moral e politik, duke shprehur kritika edhe për praninë e ministrave në detyrë në ceremoninë për nder të Mlladiqit.

“Nderimi i një krimineli të dënuar lufte, krimet e të cilit një tribunal ndërkombëtar i ka përshkruar si ‘ndër më të rëndat të njohura nga njerëzimi’, është një akt turpi të thellë moral dhe politik”, ka shkruar Konjufca.

Sipas tij, nderimet ushtarake dhe përfshirja e zyrtarëve të qeverisë në këtë ceremoni përfaqësojnë glorifikim institucional të një figure të dënuar për gjenocid.

Konjufca e ka vendosur këtë zhvillim në kontekstin e së kaluarës politike të Serbisë, duke përmendur edhe presidentin aktual, Alleksandar Vuçiq, i cili gjatë regjimit të Slobodan Millosheviqit ka mbajtur postin e ministrit të Informacionit.

“Për Republikën e Kosovës, kjo nuk është një debat abstrakt për historinë. Populli ynë e mbart kujtesën e masakrave, civilëve dhe fëmijëve të vrarë, dëbimeve masive dhe dhunës sistematike të kryer nga forcat shtetërore serbe”, ka deklaruar ai.

Ministri në detyrë ka theksuar se Kosova kundërshton çdo tentativë për t’i trajtuar krimet e vërtetuara nga gjykatat si çështje të interpretimit kombëtar, apo autorët e dënuar si persona që meritojnë nderime.

“Gjenocidi nuk merr një kuptim tjetër me kalimin e kohës dhe mohimi nuk mund ta fshijë dinjitetin e atyre që u vranë, u përndoqën dhe u dëbuan. Ne qëndrojmë në krah të popullit boshnjak, të viktimave dhe të mbijetuarve të Srebrenicës, si dhe të të gjitha familjeve, vuajtjet e të cilave nuk mund të pajtohen kurrë me glorifikimin e atyre që ishin përgjegjës për këto krime. Nuk mund të ketë pajtim të vërtetë pa të vërtetën dhe as një të ardhme të besueshme evropiane të ndërtuar mbi nderimin e autorëve të krimeve që tronditën ndërgjegjen e njerëzimit”, ka shkruar mes tjerash Konjufca.

The post Konjufca dënon nderimet për Mlladiqin: Një turp i rëndë moral dhe politik appeared first on Albeu.com.

Kryeministri në detyrë i Kosovës, Albin Kurti, deklaroi se glorifikimi në Serbi i ish-komandantit të Ushtrisë së Republika Srpskas, Ratko Mlladiq, tregon mungesën e një përballjeje të sinqertë me të kaluarën e luftërave në ish-Jugosllavi.

Kurti i bëri këto komente gjatë tryezës shkencore me temë “Memorandumi i SANU: Roli i diskursit akademik serb në nxitjen e konflikteve dhe dhunës në ish-Jugosllavi”, e cila u organizua nga Instituti për Krimet e Kryera Gjatë Luftës në Kosovë dhe Instituti i Historisë “Ali Hadri”.

Duke iu referuar Memorandumit të Akademisë Serbe të Shkencave dhe Arteve, ai theksoi se, edhe katër dekada pas publikimit, dokumenti vazhdon të ketë rëndësi për t’u analizuar, veçanërisht për ndikimin e tij në diskursin politik dhe shoqëror të Serbisë.

Sipas Kurtit, në fundin e viteve ’80 dhe përgjatë viteve ’90, pretendimet për rrezikimin e serbëve në Kosovë u shndërruan në instrument të mobilizimit politik. Pas kësaj, tha ai, erdhën suprimimi i autonomisë së Kosovës, përjashtimi i shqiptarëve nga institucionet, diskriminimi dhe represioni shtetëror.

Ai vuri në dukje se zhvillimet historike në ish-Jugosllavi tregojnë se narrativat e hartuara dhe të mbështetura nga qarqe politike e akademike mund të krijojnë kushtet për normalizimin e diskriminimit dhe pranimin e dhunës si mekanizëm politik.

Një pjesë të fjalës së tij Kurti ia kushtoi edhe Ratko Mlladiqit, i cili është dënuar për gjenocid dhe krime lufte. Ai kritikoi faktin që Mlladiqi u prit me nderime në Serbi pas vdekjes.

“Kur një shoqëri nderon publikisht një të dënuar për gjenocid, është e vështirë të flitet për përballje me të kaluarën, pendesë apo distancim nga politika që prodhoi ato krime”, u shpreh Kurti.

Kryeministri në detyrë nënvizoi se shoqëritë demokratike duhet të kenë institucione akademike të pavarura, arkiva të qasshme dhe diskutim shkencor të mbështetur te faktet, në mënyrë që e kaluara të dokumentohet dhe të mos deformohet.

Ai e cilësoi po ashtu të domosdoshëm dokumentimin e krimeve të luftës në Kosovë, si dhe ruajtjen e dëshmive për brezat që do të vijnë.

Kurti përmbylli fjalën duke thënë se Kosova ka përgjegjësinë të dokumentojë me saktësi, të analizojë me seriozitet dhe ta mbrojë të vërtetën historike përmes fakteve.

The post Kurti: Nderimi i Ratko Mlladiqit dëshmon se Serbia nuk është përballur ende me të kaluarën appeared first on Albeu.com.

“Jam aktiviste e të drejtave të njeriut për shumë vite dhe pozicioni im është të qëndrojë prapa të gjithë viktimave të Srebrenicës”, tha Corovic pas arrestimit.

Të martën, më 9 nëntor, në Ditën Ndërkombëtare kundër Fashizmit, Antisemitizmit dhe Ksenofobisë, Aida Çorovic hodhi vezë në një mural kushtuar kriminelit të luftës Ratko Mlladiq, i cili ishte duke u mbrojtur nga policia. Pas kësaj, ajo u arrestua së bashku me aktivisten Jelena Jacimovic.

Fituesja e çmimit “Pushtimi i Lirisë”, e ka luftuar nacionalizmin dhe fashizmin për vite me radhë si dhe ka qenë aktiviste për të drejtat e grave.

Aida Corovic ka lindur në vitin 1961 në Novi Pazar, ka studiuar arkitekturën dhe historinë e artit në Beograd.

Deri në shpërthimin e luftërave në ish-Jugosllavi, ajo ishte e angazhuar në kritikë të artit dhe në hulumtime arkeologjike dhe arkitekturale. Pas luftës, ajo u bë aktiviste e paqes në Beograd, në qendrën për aksion kundër luftës dhe në organizatën Gratë në të Zeza.

Ajo ka qenë anëtare e Aleancës Qytetarë dhe pastaj në Partinë Unioni Social Demokrat që ka marrë pjesë në formimin e Opozitës Demokratike të Serbisë që ka luftuar nacionalizmin në Serbi, duke insistuar në vendosjen e marrëdhënieve miqësore me shtetet e ish-Jugosllavisë.

Nga prilli 2014 deri në qershor 2016, ajo ishte deputete e parlamentit të Serbisë.

Në një nga seancat e parlamentit, Corovic kishte deklaruar se për shkak të punës së saj si aktiviste, ajo ishte kërcënuar me vdekje.

Gjatë vitit 2020, ajo kishte njoftuar se është e papunë dhe kërkonte një punë. Asaj i kishte ardhur një ofertë pune nga zyra e presidentit të Serbisë, Aleksander Vuçiq të cilën e kishte refuzuar./GazetaExpress

The post Kush është Aida Çorovic, aktivistja serbe që u sulmua nga përkrahësit e Mlladiq appeared first on Albeu.com.