Gjykata Themelore në Mitrovicë ka vendosur t’ua ndërpresë arrestin shtëpiak dy mjekëve, V.R. dhe E.S., të cilët po hetohen nën dyshimin për veprën penale të marrjes së ryshfetit.

Sipas një përgjigjeje me shkrim që kjo gjykatë i ka dërguar kp-së, vendimi është nxjerrë më 10 korrik 2026. Prokuroria Themelore në Mitrovicë nuk kishte paraqitur kërkesë për zgjatjen e kësaj mase apo për zëvendësimin e saj me ndonjë masë tjetër.

“Gjykata Themelore në Mitrovicë duke vendosur sipas detyrës zyrtare dhe në mbështetje të nenit 181, paragrafët 1 dhe 7, lidhur me nenin 188, paragrafi 1 të Kodit Nr. 08/L-032 të Procedurës Penale, më 10 korrik 2026 ka nxjerrë aktvendim me të cilin të pandehurve V.R. dhe E.S. u ndërpritet masa e arrestit shtëpiak”, thuhet në përgjigjen e Gjykatës.

Gjykata ka theksuar se ndaj dy të dyshuarve mbetet dyshimi i bazuar se kanë kryer veprën penale “Marrja e ryshfetit”, sipas Kodit Penal të Republikës së Kosovës.

Nga ana tjetër, Prokuroria Themelore në Mitrovicë ka njoftuar se nuk e ka kërkuar vazhdimin e arrestit shtëpiak, për shkak se nuk kanë ekzistuar më kushtet ligjore për paraqitjen e një kërkese të tillë.

Sipas Prokurorisë, deri në këtë fazë të procedurës janë intervistuar të gjithë dëshmitarët e nevojshëm dhe të pandehurit, përfshirë edhe personat për të cilët është zhvilluar procedurë lidhur me veprën penale të dhënies së ryshfetit.

Aktakuza, megjithatë, ende nuk është ngritur, pasi pritet të kryhen edhe disa veprime të tjera procedurale të nevojshme.

Prokuroria ka bërë të ditur se V.R. po hetohet për gjashtë raste të dyshuara të marrjes së ryshfetit, ndërsa E.S. për tri raste të tilla.

Në sqarimin e saj, Prokuroria ka njoftuar po ashtu se E.S. kishte qenë më herët në arrest shtëpiak, në periudhën nga 10 janari deri më 9 shkurt 2023, për një rast tjetër penal. Për atë rast, më 30 korrik 2024, Prokuroria kishte ngritur aktakuzë ndaj tij për veprën penale “Marrja e ryshfetit”, e cila ndodhet në procedurë në Gjykatën Themelore në Mitrovicë.

Dy mjekët e Spitalit të Përgjithshëm në Vushtrri u arrestuan nga Policia e Kosovës më 13 maj 2026, nën dyshimin për veprën penale “Marrja e ryshfetit”. Rasti vazhdon të hetohet nga Prokuroria Themelore në Mitrovicë.

The post Dy mjekëve të dyshuar për ryshfet u hiqet masa e arrestit shtëpiak appeared first on Albeu.com.

Ministri në detyrë i Infrastrukturës dhe Transportit, Dimal Basha, qëndroi sot në veri të vendit, ku pa nga afër gjendjen e rrugës Mitrovicë – Jarinjë dhe vizitoi edhe Urën e Leshakut.

Sipas Bashës, aksi rrugor në drejtim të Jarinjës ka kaluar nëpër sanime, por për shkak të rëndësisë që ka për banorët dhe për sigurinë publike, është planifikuar që gjatë vitit të ardhshëm të rehabilitohet dhe të zgjerohet aty ku e mundësojnë kushtet teknike.

Gjatë qëndrimit te Ura e Leshakut, ai tha se kjo urë ka pësuar dëmtime të mëdha si pasojë e vërshimeve dhe se gjendja e saj paraqet rrezik për qëndrueshmërinë.

“Për këtë arsye do të diskutojmë me projektuesit për ndërtimin e një ure të re, që do të ofrojë qasje më të mirë dhe siguri më të madhe për banorët e asaj zone.

Në Jarinjë u ndala edhe për t’i përshëndetur zyrtarët tanë kufitarë. Me këtë rast i falënderova për shërbimin profesional, përkushtimin dhe punën e palodhshme që bëjnë.

Qeveria Kurti ka investuar shumë në sigurinë e veriut, ndërsa tani po investojmë edhe në infrastrukturë. Sepse për ne, Kosova është një dhe e pandarë – si në siguri, ashtu edhe në investime”, shkroi Basha në Facebook.

The post Basha inspekton rrugën Mitrovicë – Jarinjë dhe Urën e Leshakut: Pas investimeve në siguri, qeveria po ndërhyn edhe në infrastrukturë në veri appeared first on Albeu.com.

Prokuroria Themelore në Mitrovicë ka dhënë sqarime lidhur me rastin e therjes me thikë të një të mituri në Mitrovicën e Jugut, ngjarje e ndodhur më 2 korrik 2026, rreth orës 15:42.

Për KosovaPress, kjo prokurori ka konfirmuar se tre të mitur dyshohen se kanë sulmuar me thikë një bashkëmoshatar të tyre dhe se ndaj tyre është nisur procedurë për veprën penale “Lëndim i lehtë trupor”.

Në përgjigjen e Prokurorisë thuhet se ngjarja dyshohet të ketë ndodhur pas një mosmarrëveshjeje të çastit, ndërsa personat e përfshirë janë të mitur të moshës rreth 13 deri në 15 vjeç. Sipas të njëjtit sqarim, i dëmtuari ka pasur gërvishtje në regjionin e gjurit.

Po ashtu, Prokuroria ka bërë të ditur me shkrim se rasti është duke u trajtuar në procedurë të rregullt.

Edhe Policia e Kosovës, në raportin 24-orësh, ka njoftuar se rasti mbetet nën hetim.

Në njoftimin e policisë thuhet se është raportuar që viktima, mashkull kosovar, pas një mosmarrëveshjeje, është therur me thikë nga tre persona të panjohur. Si pasojë, ai ka pësuar lëndime të lehta dhe është dërguar për trajtim mjekësor, ndërsa rasti është duke u hetuar.

The post Prokuroria publikon hollësi për plagosjen me thikë të një të mituri në Mitrovicë appeared first on Albeu.com.

Ajo tha se ky mural i është kushtuar personave që përjetuan dhunë seksuale gjatë luftës në Kosovë dhe se, përmes tij, e vërteta dhe historia e tyre po bëhen më të dukshme në hapësirën publike.

Sipas Haxhiut, kujtesa nuk duhet të kufizohet vetëm në sallat përkujtimore, por duhet të jetë e pranishme edhe në vende publike, afër shkollave, shtëpive dhe rrugëve ku qytetarët kalojnë çdo ditë.

Ajo u shpreh se “Çast” po lëviz nga një qytet në tjetrin, duke u kthyer në një rrugëtim të kujtesës. Pas Prishtinës, Therandës, Pejës dhe Mitrovicës, murali do të vendoset edhe në Drenas, Gjakovë, Gjilan, Ferizaj dhe Prizren.

Haxhiu rikujtoi se krimet e luftës, përfshirë edhe dhunën seksuale gjatë luftës, nuk falen dhe nuk parashkruhen, ndërsa u bëri thirrje institucioneve të drejtësisë të vazhdojnë angazhimin për hetimin dhe ndëshkimin e autorëve të këtyre krimeve.

Ajo shtoi se, ndonëse një mural nuk mund të zëvendësojë drejtësinë dhe as të lehtësojë dhimbjen, ai shërben për ruajtjen e kujtesës kolektive dhe për nderimin e të mbijetuarve, të cilët meritojnë respekt dhe mbështetje të vazhdueshme.

The post Në Mitrovicë zbulohet murali “Çast”, Haxhiu: E vërteta po gjen vend në muret e Kosovës appeared first on Albeu.com.