Qeveria e Kosovës ka mbajtur mbrëmë një mbledhje elektronike, ku ka miratuar një sërë projektligjesh dhe vendimesh.

Ndër aktet e miratuara është edhe Projektligji për Byronë Shtetërore për Verifikimin e Konfiskimin e Pasurisë së Pajustifikueshme. Ky projektligj parasheh themelimin dhe organizimin e Byrosë, përcaktimin e kompetencave të saj, si dhe procedurat për verifikimin dhe konfiskimin e pasurisë së pajustifikueshme.

Në kuadër të reformës në drejtësi, Qeveria ka miratuar Projektligjin për Rekrutimin, Vlerësimin e Performancës, Kontrollin e Integritetit dhe Statusin e Gjyqtarëve dhe Prokurorëve. Përmes tij rregullohen rekrutimi, vlerësimi i performancës, kontrolli i integritetit dhe statusi i gjyqtarëve e prokurorëve.

Miratim ka marrë edhe Projektligji për Përgjegjësinë Disiplinore të Gjyqtarëve dhe Prokurorëve, i cili përcakton parimet, procedurat, organet kompetente dhe masat që zbatohen në rast të shkeljes së detyrimeve profesionale.

Po ashtu, janë miratuar projektligjet për ndryshimin dhe plotësimin e Ligjit për Këshillin Gjyqësor të Kosovës dhe Ligjit për Këshillin Prokurorial të Kosovës, si dhe Projektligji për Akademinë e Drejtësisë.

Sipas Qeverisë, Projektligji për Akademinë e Drejtësisë synon të garantojë zhvillim profesional të vazhdueshëm, cilësor dhe të standardizuar për gjyqtarët, prokurorët dhe profesionistët e tjerë që lidhen me sistemin e drejtësisë.

Qeveria ka miratuar gjithashtu Projektligjin për Energjinë dhe Projektligjin për Energjinë Elektrike.

Projektligji për Energjinë, sipas njoftimit zyrtar, përcakton parimet dhe rregullat e përgjithshme për aktivitetet në sektorin energjetik në Republikën e Kosovës. Ai synon të sigurojë furnizim të sigurt, të qëndrueshëm dhe cilësor me energji, të mundësojë pjesëmarrjen aktive në tregjet rajonale dhe panevropiane të energjisë, si dhe të krijojë një treg të hapur, transparent e konkurrues me çmime të përballueshme të bazuara në treg. Projektligji parashikon edhe mbrojtjen dhe fuqizimin e konsumatorëve, përfshirë konsumatorët e cenueshëm, integrimin e energjisë nga burimet e ripërtërishme dhe përmirësimin e mbrojtjen e mjedisit e klimës.

Ndërsa Projektligji për Energjinë Elektrike synon të përcaktojë rregullat dhe masat për këtë sektor, me qëllim garantimin e furnizimit të sigurt, të qëndrueshëm dhe cilësor me energji elektrike, me çmime transparente dhe të përballueshme për konsumatorët fundorë, duke marrë parasysh edhe caqet klimatike të vendit.

Mes vendimeve të miratuara është edhe Projektligji për Ratifikimin e Marrëveshjes së Kredisë ndërmjet Republikës së Kosovës dhe Agjencisë Franceze për Zhvillim për Projektin e Lojërave Mesdhetare XXI në Kosovë.

Në mbledhje janë miratuar edhe Projektligji për Inovacion dhe Ndërmarrësi dhe Projektligji për Pagesat e Vonuara në Transaksionet Tregtare.

Ky i fundit ka për qëllim të parandalojë vonesat e pagesave në transaksionet tregtare dhe të përcaktojë rregullat për afatet dhe mënyrën e llogaritjes së kamatëvonesave ndërmjet shoqërive tregtare, si dhe ndërmjet shoqërive tregtare dhe autoriteteve publike.

Qeveria ka marrë vendim që Kuvendit t’ia propozojë kandidatët për kryesues të Bordit të Zyrës së Rregullatorit për Energji, së bashku me kandidatët për dy pozitat e anëtarëve të këtij bordi.

Janë miratuar edhe disa vendime për dhënien me qira të pjesëve të parcelave në zona të ndryshme kadastrale, të destinuara për nxjerrjen, përpunimin dhe shfrytëzimin e gurit gëlqeror, gurit dekorativ dhe materialeve të tjera.

Parcelat gjenden në Semajë të Kaçanikut, Vasilevë dhe Korroticë të Epërme të Drenasit, Rahovec, Samadrexhë të Suharekës, Zatriq të Rahovecit, Raçak të Shtimes dhe Strazhë të Kaçanikut.

Gjatë mbledhjes është miratuar edhe Deklarata e Prioriteteve Afatmesme të Qeverisë 2027-2029. Ky dokument përcakton kornizën e politikave për përgatitjen e Kornizës Afatmesme të Shpenzimeve dhe buxhetit vjetor.

Me një vendim tjetër, Qeveria ka zgjatur për tre muaj mandatin e Komisionit për Verifikimin e Diplomave të Lëshuara nga Universiteti i Mitrovicës së Veriut.

Në përfundim, janë miratuar vendimi për Listën e anëtarëve potencialë të Komisionit të Pranimit për Kategorinë e Ulët dhe të Mesme Drejtuese, si dhe vendimi për pezullimin nga marrëdhënia e punës të një nëpunësi civil të kategorisë së lartë drejtuese.

The post Qeveria e Kosovës miraton projektligje për drejtësinë, energjinë dhe konfiskimin e pasurisë appeared first on Albeu.com.

Të githa projektligjet në rend dite morën dritën jeshile nga maxhoranca. Mes tyre, vendim marrës ishte dhe ai për angazhimin e Forcave tona të Armatosura në misionin paqeruajtës ndërkombëtar që po zhvillohet në Gaza.

Parlamenti dha gjithashtu miratimin për disa shtesa dhe ndryshime në ligjin “Për marrjen në kontroll të shoqërive me ofertë publike”, duke i dhënë fuqi ligjore këtij dokumenti të ri. Menjëherë pas përfundimit të këtij procesi, seanca u deklarua e mbyllur, në një atmosferë të ngarkuar me protesta dhe potere nga ana e opozitës.

The post Parlamenti miraton dërgimin e trupave shqiptare në Gaza, kryetari Peleshi mbyll seancën para kohe appeared first on Albeu.com.

Në vendimin prej 23 faqesh, gjykata braziliane përcakton se dokumentacioni i paraqitur nga autoritetet shqiptare plotëson kushtet ligjore për ekstradim.

Kërkesa lidhet me procedimin penal në Shqipëri për akuza që përfshijnë trafikimin e lëndëve narkotike, bashkëpunimin në një formë të veçantë dhe pjesëmarrjen në grup të strukturuar kriminal.

Në dosje përfshihen edhe të dhëna të siguruara nga komunikimet në aplikacionin e koduar Sky ECC. Sipas materialit të paraqitur para gjykatës braziliane, në shtator të vitit 2020, përdoruesi me identifikuesin GS4TDD, i identifikuar si Ervin Luan Mata, dyshohet se komunikonte për transportin e një sasie prej rreth 250 kilogramësh kokainë nga Brazili drejt aeroportit të Frankfurtit në Gjermani.

Në një komunikim të 29 shtatorit 2020, në dosje përmendet se Mata fliste për sekuestrimin e 240 njësive të mallit në Frankfurt.

Në një tjetër bisedë, ai shprehet se “të gjitha mallrat e mia u sekuestruan në Frankfurt, në doganë”, ndërsa përmendet edhe dërgimi i parave përmes personave të tjerë.

Dokumenti brazilian përfshin edhe komunikime që lidhen me Shqipërinë dhe Holandën. Në një prej tyre, Mata shprehet: “Vetëm në Shqipëri dua para”, ndërsa në një tjetër përmend shumën prej një milionësh në Holandë.

Në dosje janë përfshirë gjithashtu komunikime me Eralbi Breçanin. Në një bisedë të tetorit 2020, Mata flet për “ngarkesa” dhe për mundësinë e sigurimit të “daljeve të sigurta” për mallin.

Por Gjykata Supreme Federale e Brazilit vendos një kufizim të rëndësishëm: ajo nuk ka gjykuar nëse Ervin Mata është fajtor apo jo për veprat që i atribuohen.

Gjykata shpjegon se, në procedurat e ekstradimit, kontrolli i saj është i kufizuar dhe nuk përfshin një rigjykim të fakteve, autorësisë apo provave të çështjes penale.

Sipas vendimit, bëhet vetëm një vlerësim paraprak juridik për të përcaktuar nëse plotësohen kushtet për ekstradim. Gjykata konstaton se ekziston parimi i dënueshmërisë së dyfishtë, se veprat nuk janë parashkruar dhe se nuk ekziston ndonjë pengesë ligjore për ekstradimin.

Ekstradimi është miratuar si procedurë hetimore, pra për t’iu nënshtruar procedimit penal në Shqipëri dhe jo për ekzekutimin e një dënimi të formës së prerë.

Megjithatë, Ervin Mata nuk i dorëzohet automatikisht autoriteteve shqiptare. Vendimi përcakton se dorëzimi varet nga vendimi diskrecional i Presidentit të Brazilit.

Përveç kësaj, Shqipëria duhet të formalizojë garancitë e parashikuara nga ligji brazilian, ndër të tjera që Mata të mos ndiqet penalisht për një fakt tjetër të mëparshëm nga ai për të cilin është kërkuar ekstradimi, t’i llogaritet koha e qëndrimit në paraburgim në Brazil dhe të mos i nënshtrohet torturës apo trajtimit mizor, çnjerëzor ose degradues.

Vendimi i Gjykatës Supreme Federale të Brazilit, është unanim dhe mban datën 24 gusht 2026. Relator i çështjes është gjyqtari Alexandre de Moraes.

Pra, gjykata braziliane i ka hapur rrugë ekstradimit të Ervin Matës drejt Shqipërisë, por dorëzimi fizik i tij mbetet ende i kushtëzuar nga procedurat e përcaktuara në vendim.

The post Gjykata e Brazilit miraton ekstradimin e Ervin Matës appeared first on Albeu.com.

Sipas rezolutës, pushteti aktual mbahet në këmbë përmes manipulimit të procesit zgjedhor, ndërthurjes së partisë me shtetin, përdorimit të administratës dhe ndikimit të krimit të organizuar në zgjedhje.

Demokratët argumentojnë se këto fenomene janë evidentuar edhe në raportet e organizmave ndërkombëtarë, të cilat sipas tyre kanë ngritur shqetësime serioze për standardet demokratike në vend.

Në dokument ngrihet alarmi edhe për situatën ekonomike dhe sociale, emigracionin, korrupsionin dhe pastrimin e parave, ndërsa Shqipëria cilësohet si një vend ku krimi i organizuar dhe interesat klienteliste kanë depërtuar në funksionet kryesore të shtetit.

PD akuzon qeverinë se ka penguar kontrollin demokratik dhe ka kufizuar rolin kushtetues të opozitës, si në Kuvend ashtu edhe në proceset e integrimit evropian.

Një nga pikat kryesore të rezolutës është kërkesa për krijimin e një qeverie teknike që, sipas PD-së, do të mundësonte zhvillimin e zgjedhjeve me standarde të pranueshme demokratike.

Në fund të dokumentit, Kuvendi Kombëtar u bën thirrje forcave opozitare dhe faktorëve shoqërorë të bashkohen në një front të përbashkët për atë që e cilëson si përmbysje të regjimit autokratik dhe ndërtimin e një Shqipërie demokratike dhe evropiane.

REZOLUTA
Kuvendi Kombëtar i Partisë Demokratike, mbledhur sot më datë 30.05.2026, pasi mori në shqyrtim situatën politike dhe shoqërore në Shqipëri, konstaton se: Shqipëria ndodhet sot në një udhëkryq historik. Në vend është instaluar një regjim autokratik dhe kleptokratik, në të cilin të gjitha pushtetet përqendrohen në një dorë, shteti ligjor është zëvendësuar me narkoshtetin, zgjedhjet me farsën zgjedhore;

Regjimi qëndron në pushtet nëpërmjet zgjedhjeve farsë. Raportet ndërkombëtare kanë provuar përfundimisht shuarjen e kufijve midis partisë dhe shtetit, patronazhimin që ushtron presion të skajshëm politik ndaj votuesit, përdorimin e krimit të organizuar për mbledhjen e votave si dhe ekzistencën e një administrate shumë të fryrë politike!

Shqipëria po zbrazet çdo ditë e më shumë! Vendi po kalon një situatë depresive ekonomike dhe shoqërore, të mungesës së shpresës dhe besimit për të ardhmen! Pamundësia për të jetuar me punë të ndershme dhe mungesa e perspektivës, shtrenjtimi i skajshëm i jetesës, papunësia dhe rënia e prodhimit vendas, mungesa e shanseve të barabarta, mungesa e një sistemi arsimor dhe shëndetësor dinjitoz, mungesa e shërbimeve bazike veçanërisht për shqiptarët që jetojnë në zonat rurale, po prodhojnë çdo vit emigracion masiv të rinisë dhe pjesës më të kualifikuar të forcës prodhuese.

Shqipëria është një narkoshtet! Ajo është kthyer në epiqendrën e krimit të organizuar dhe larjes së parasë së pisët. Krimi i organizuar kontrollon funksionet kryesore të shtetit, korrupsioni është i kudondodhur, agjencitë shtetërore të rendit dhe të sigurisë janë kompromentuar rëndë, sistemi gjyqësor është në kolaps, prona është e pambrojtur dhe aspak e sigurtë.

Ekonomia e furnizuar nga narkoeurot si dhe burimet kombëtare janë përqendruar në duar të personave të lidhur drejtpërdrejtë me qeverinë dhe krimin, nëpërmjet PPP megakorruptive dhe prokurimeve publike me fitues të paracaktuar. Biznesi për të mbijetuar duhet të gjunjëzohet. Kush nuk e bën shantazhohet. Paratë e krimit të organizuar pastrohen haptazi, veçanërisht në sektorin e ndërtimit. Në këmbim, me to blihen vota për të mbajtur narkoshtetin në pushtet. Kjo ka bllokuar rotacionin normal politik, në dëm të Shqipërisë dhe shqiptarëve;

Maxhoranca socialiste dhe drejtuesi i saj Edi Rama, pasi nuk ia dolën ta zhbëjnë apo ta blejnë Opozitën dhe Partinë Demokratike, po ndërmarrin çdo hap për të tkurrur rolin e saj kushtetues të kontrollit të pushtetit! Në Kuvend, hapësira legjislative dhe mbikëqyrëse që i takon Opozitës është tkurrur në maksimum. Opozita është përjashtuar tërësisht nga procesi i integrimit të vendit dhe ai mbikëqyrës institucional. Ndërkaq, mediat në shumicë të kontrolluara, tentojnë çdo ditë të shuajnë zërin e saj!

Maxhoranca socialiste dhe drejtuesi i saj Edi Rama i ka ofruar mbrojtje maksimale megakorrupsionit, nëpërmjet mbrojtes së megakorrpsionit me imunitet parlamentar dhe moszbatimit të vendimeve të Gjykatës Kushtetuese, Këto janë standard unikale për një vend që synon të bëhet pjesë e Evropës, në shkelje flagrante të ligjit dhe moralit politik dhe shoqëror evropian!

Në këtë kontekst të vështirë, Partia Demokratike ia ka dalë të ekspozojë tërësisht realitetin e hidhur shqiptar. Raporti OHDIR që shkërmoqi Partinë-Shtet, dy misione vëzhgimi nga institucionet ndërkombëtare, 8 rezoluta ndërkombëtare që rendisin të gjitha gjetjet dhe shqetësimet si dhe 34 kushtet e reja të imponuara nga BE në procesin e integrimit evropian, tregojnë qartë se realiteti shqiptar i fasadës demokratike dhe opinioneve të komisionuar, tashmë është përpara syve të opinionit publik shqiptar dhe ndërkombëtar.

PËR KËTË ARSYE, KUVENDI KOMBËTAR I PARTISË DEMOKRATIKE DEKLARON SE:

Misioni i saj madhor ka qene dhe mbetet ‘Shqipëria Evropiane’ dhe ‘Shqipëria si e gjithë Evropa’. Për këtë, ndalimi i menjëhershëm i shpopullimit të Shqipërisë si kërcënimi më serioz që përballet Shqipëria, nëpërmjet shkëputjes së Shqipërisë nga shtetkapja dhe krimi i organizuar, lufta pas asnjë kompromis kundër pastrimit të parave, korrupsionit dhe keqqeverisjes, janë prioritete absolute të saj; Falënderon Misionin e OHDIR, Partinë Popullore Evropian dhe Unioni Ndërkombëtar Demokrat për mbështetjen e madhe që i kanë dhënë Partisë Demokratike në luftën e saj të pareshtur për Zgjedhje të Lira dhe të Ndershme, në përputhje me standardet më të mira të OSBE/OHDIR-it.

Konsideron zgjedhjet e lira dhe të ndershme si mekanizëm thelbësor që garanton pluralizmin politik dhe vlerat e familjes evropiane ku duam të bëhemi pjesë. Për këtë arsye Partia Demokratike do beje çdo përpjekje për një qeveri teknike, për të garantuar minimumin e standardeve të pranueshme zgjedhore, si parakusht për rotacionin politik që presin shqiptarët.

Mbështet me të gjitha forcat dhe mundësitë e saj procesin e integrimit të vendit në Bashkimin Evropian, si interes madhor kombëtar që shpreh aspiratat shekullore të shqiptarëve. Por njëkohësisht deklaron se Shqipëria në Evropë duhet të shkojë për meritë të saj, duke plotësuar të gjitha standardet evropiane drejtësisë dhe të shtetit ligjor. Ne kundërshtojmë më forcën më të madhe çdo projekt paralel që lë mënjane plotësimin e standardeve në këmbim të një anëtarësimi gjysmak;

Deklaron se në të gjithë aktivitetin e saj politik, nëpërmjet Grupit të saj Parlamentar në Kuvend dhe strukturës së saj kudo në Shqipëri, do të angazhohet në çdo akuze të drejtë në mbrojtje të qytetarëve të saj, të shtetit ligjor, të mirëqeverisjes, dhe transparencës, të normave demokratike, të lirisë së shprehjes dhe besimit. Kudo ku ka një kauzë për të mbrojtur, aty do të jetë Partia Demokratike, drejtuesit dhe strukturat e saj!

Për të realizuar misionin e saj, Kuvend Kombëtar i Partisë Demokratike bën një thirrje të sinqertë për bashkimin e të gjithë faktorëve politikë dhe shoqërorë në një front të vetëm opozitar, duke lënë mënjane çdo dallim, në emër të objektivit tonë të përbashkët: përmbysjes së regjimit autokratik dhe kleptokratik, si dhe mundësimit të së ardhmes së Shqipërisë tonë Evropiane!

The post Kuvendi i PD miraton rezolutën: 11 maji ishte farsë elektorale, do të bëjmë çdo përpjekje për qeveri teknike appeared first on Albeu.com.

Sipas raportit korrupsioni mbetet shqetësim serioz në vendin tonë ndërkohë që kërkon forcim të hetimeve dhe dënimeve, sidomos në nivele të larta.

“Kërkohet forcimi i organeve të qeverisjes së drejtësisë dhe investime në infrastrukturë e dixhitalizim. Korrupsioni mbetet shqetësim serioz dhe kërkon forcim të hetimeve dhe dënimeve, sidomos në nivele të larta”.

Ndërkohë një vend e veçantë i dedikohet medias, ku rekomandohet mbrojtje më e fortë e lirisë së shprehjes dhe pluralizmit mediatik.

Në raport shprehet shqetësim edhe mbi keqpërdorimin e burimevë të administratës dhe polarizimi politik e diskursin përplasës që dëmton funksionimin e institucioneve demokratike.

“Vëren se kuadri zgjedhor konsiderohet përgjithësisht i përshtatshëm, por shpreh shqetësime për barazinë e kushteve, keqpërdorimin e burimeve administrative, akuzat për blerje votash dhe presion mbi votuesit; bën thirrje për reformë zgjedhore gjithëpërfshirëse dhe zbatim të rekomandimeve të OSBE/ODIHR dhe Komisionit të Venecias”, thuhet në raport.

RAPORTI:
Parlamenti Evropian,
– duke pasur parasysh Marrëveshjen e Stabilizim-Asociimit ndërmjet Komuniteteve Evropiane dhe Shteteve Anëtare të tyre, nga njëra anë, dhe Republikës së Shqipërisë, nga ana tjetër,

– duke pasur parasysh aplikimin e Shqipërisë për anëtarësim në BE, paraqitur më 24 prill 2009,

– duke pasur parasysh Rregulloren (BE) 2021/1529 të Parlamentit Evropian dhe të Këshillit të 15 shtatorit 2021 për krijimin e Instrumentit për Ndihmën e Para-Anëtarësimit (IPA III),

– duke pasur parasysh Rregulloren (BE) 2024/1449 të Parlamentit Evropian dhe të Këshillit të 14 majit 2024 për krijimin e Mekanizmit për Reforma dhe Rritje për Ballkanin Perëndimor,

– duke pasur parasysh komunikimin e Komisionit të 5 shkurtit 2020 “Forcimi i procesit të anëtarësimit – Një perspektivë e besueshme e BE-së për Ballkanin Perëndimor”,

– duke pasur parasysh komunikimin e Komisionit të 8 nëntorit 2023 “Plani i ri i rritjes për Ballkanin Perëndimor”,

– duke pasur parasysh Agjendën e Reformave të Shqipërisë të paraqitur në kuadër të Mekanizmit të Reformës dhe Rritjes së BE-së, siç është miratuar nga Komisioni më 23 tetor 2024,

– duke pasur parasysh komunikimin e Komisionit të 8 korrikut 2025 “Raporti për Shtetin e së Drejtës 2025”, i shoqëruar me dokumentin e punës së shërbimeve të Komisionit “Raporti për Shtetin e së Drejtës 2025 – Kapitulli për situatën e shtetit të së drejtës në Shqipëri”,

– duke pasur parasysh komunikimin e Komisionit të 4 nëntorit 2025 “Komunikimi 2025 për Politikën e Zgjerimit të BE-së”, i shoqëruar me dokumentin e punës “Raporti për Shqipërinë 2025”,

– duke pasur parasysh raportin përfundimtar të 23 tetorit 2025 të Misionit të Vëzhgimit të Zgjedhjeve të ODIHR-it të OSBE-së mbi zgjedhjet parlamentare të Shqipërisë të 11 majit 2025,

– duke pasur parasysh deklaratën e Samitit BE–Ballkani Perëndimor të mbajtur në Bruksel më 17 dhjetor 2025,

– duke pasur parasysh rezolutat e mëparshme për Shqipërinë,

– duke pasur parasysh nenin 55 të Rregullores së tij,

– duke pasur parasysh raportin e Komisionit për Punët e Jashtme (A10-0000/2026),

A. duke qenë se zgjerimi i BE-së mbetet një investim strategjik në paqe, siguri, stabilitet dhe zhvillim demokratik e socio-ekonomik në të gjithë kontinentin evropian;

B. duke qenë se Shqipëria ka ruajtur një orientim të qartë strategjik drejt anëtarësimit në BE dhe ka demonstruar përputhje të plotë me politikën e përbashkët të jashtme dhe të sigurisë (CFSP) të BE-së;

C. duke qenë se Shqipëria është vend kandidat që nga viti 2014, ka nisur negociatat e anëtarësimit në korrik 2022, ka përfunduar me sukses procesin e “screening”-ut në nëntor 2023 dhe ka hapur të gjitha grup-kapitujt e negociatave ndërmjet

15 tetorit 2024 dhe 17 nëntorit 2025;

D. duke qenë se Raporti i Komisionit për vitin 2025 konfirmon se vendi vazhdon të bëjë progres në shumicën e fushave të lidhura me anëtarësimin, ndërsa thekson nevojën për reforma më të thella, më të qëndrueshme dhe të pakthyeshme;

E. duke qenë se besueshmëria e procesit të zgjerimit varet nga kushtëzimi i rreptë, progresi i bazuar në meritë dhe zbatimi efektiv i reformave, jo vetëm nga miratimi formal i legjislacionit;

F. duke qenë se forcimi i institucioneve demokratike, pavarësia e gjyqësorit, lufta kundër korrupsionit, liria e medias dhe të drejtat themelore mbeten thelbësore për rrugëtimin e Shqipërisë drejt anëtarësimit;

G. duke qenë se rekomandimet e OSBE/ODIHR për përmirësimin e procesit zgjedhor ende nuk janë zbatuar plotësisht;

1. Përshëndet angazhimin e jashtëzakonshëm të Shqipërisë për integrimin në BE, të bazuar në konsensusin mes forcave politike dhe mbështetjen e gjerë qytetare, si dhe faktin që u hapën të gjitha grup-kapitujt brenda vetëm 13 muajve;

2. Përshëndet ambicien për të përmbyllur negociatat deri në fund të vitit 2027 dhe progresin e shpejtë të viteve të fundit; thekson nevojën për zbatim të plotë të legjislacionit;

3. Vëren se kuadri zgjedhor konsiderohet përgjithësisht i përshtatshëm, por shpreh shqetësime për barazinë e kushteve, keqpërdorimin e burimeve administrative, akuzat për blerje votash dhe presion mbi votuesit; bën thirrje për reformë zgjedhore gjithëpërfshirëse dhe zbatim të rekomandimeve të OSBE/ODIHR dhe Komisionit të Venecias;

4. Shpreh shqetësim për polarizimin politik dhe diskursin përplasës që dëmton funksionimin e institucioneve demokratike;

5. Inkurajon forcimin e rolit mbikëqyrës të Kuvendit, transparencën legjislative dhe konsultimin me shoqërinë civile;
—## Shteti i së drejtës, gjyqësori dhe lufta kundër korrupsionit

6. Përshëndet vijimin e reformës në drejtësi dhe procesin e vettingut; vëren sfida si vonesat në çështje dhe përpjekjet për ndikim të padrejtë;

7. Kërkon forcimin e organeve të qeverisjes së drejtësisë dhe investime në infrastrukturë e dixhitalizim;

8. Thekson se korrupsioni mbetet shqetësim serioz dhe kërkon forcim të hetimeve dhe dënimeve, sidomos në nivele të larta;

9. Insiston në adresimin e korrupsionit në të gjitha nivelet për të rritur besimin e qytetarëve;

10. Thekson rëndësinë e luftës kundër krimit të organizuar dhe bashkëpunimit me agjenci të BE-së si Europol dhe Eurojust;
—## Të drejtat themelore dhe liria e medias

11. Kërkon mbrojtje më të fortë të lirisë së shprehjes dhe pluralizmit mediatik;

12. Inkurajon forcimin e mbrojtjes së minoriteteve dhe grupeve të cenueshme, përfshirë romët, egjiptianët, personat me aftësi të kufizuara, punëtorët migrantë dhe personat LGBTIQ+; shpreh shqetësim për retorikën antigjinore;

13. Nënvizon nevojën për përmirësimin e aksesit në drejtësi;
—## Reforma në administratën publike

14. Vlerëson progresin, por kërkon depolitizim dhe rekrutime mbi bazë merite;

15. Kërkon planifikim më të mirë të politikave dhe transparencë buxhetore;
—## Reforma socio-ekonomike dhe mjedisi

16. Përshëndet angazhimin në Planin e Rritjes së BE-së, por vëren dobësi strukturore si informaliteti dhe produktiviteti i ulët;

17. Thekson rëndësinë e investimeve në arsim dhe inovacion;

18. Nënvizon rëndësinë e dialogut social dhe përfaqësimit sindikal;

19. Shpreh shqetësim për mungesën e progresit në mjedis dhe klimë;
—## Politika e jashtme dhe bashkëpunimi rajonal

20. Përgëzon për përputhjen e plotë me politikën e jashtme dhe të sigurisë të BE-së;

21. Thekson rëndësinë e marrëdhënieve të fqinjësisë së mirë;
—## Mbështetja e BE-së

22. Përshëndet ndihmën financiare dhe teknike të BE-së, duke theksuar lidhjen e saj me zbatimin e reformave;

23. Ngarkon Presidentin e Parlamentit që ta përcjellë këtë rezolutë institucioneve përkatëse të BE-së dhe autoriteteve të Republikës së Shqipërisë.

The post Komisioni i Jashtëm i PE miraton rezolutën për Shqipërinë: Korrupsioni mbetet shqetësim serioz! Të forcohen hetimet dhe dënimet e niveleve të larta appeared first on Albeu.com.

Ndërkohë, shkarkimi i Elisa Spiropalit, u votua me 83 vota pro dhe dy kundër, një prej deputetëve që votoi kundër ishte deputetja e PD, Jozefina Topalli dhe Sali Berisha.

Shkarkimi  Pirro Vengut nga ministër i Mbrotjes, mori 81 vota pro, ndërsa shkarkimi i Albana Koçiut mori 83 vota pro.

Po kaq vota mori edhe shkarkimi i Besfort Lamallarit nga posti i Ministrit të Drejtësisë.

Ndërsa shkarkimi i Toni Gogut nga ministër për Parlamentin, mori 82 vota pro.

Ndërkohë Parlamenti votoi edhe dekretet e presidentit për ministrat e rinj:

Emërimi i Albana Koçiut, zv.kryeministre – 83 pro dhe 3 kundër

Emërimi i Ferit Hoxhës, ministër i Punëve të Jashtme-  83 pro dhe 4  kundër

Emërimi i Besfort Lamallarit, ministër i Punëve të Brendshme – 83 pro dhe 4 kundër

Emërimi i Ermal Nufit, ministër i Mbrojtjes-  83 pro dhe 6 kundër

Emërimi i Toni Gogu, Ministër i Drejtësisë-  83 pro 5 kundër

Emërimi i Enea Karakaçi, Ministër i Infrastrukturës dhe Energjisë 83 pro dhe 6 kundër

Emërimi i Erjona Ismaili, Ministre e Shtetit për marrëdhënien me Parlamentin- 82 pro dhe 4 kundër

The post Kuvendi miraton shkarkimin e Belinda Ballukut, asnjë votë kundër appeared first on Albeu.com.

Me 74 vota pro, 16 kundër dhe asnjë abstenim, deputetët miratuan projektvendimin për zgjedhjen e Selami Xhepës si anëtar i Këshillit Mbikëqyrës.

Në një tjetër votim, me 72 vota pro, 19 kundër dhe 1 abstenim, u miratua kandidatura e Holta Zaçajt, e cila do të bëhet pjesë e organit më të lartë vendimmarrës të bankës qendrore.

Ndërkohë, projektvendimi për zgjedhjen e Matilda Shehut, u shty për votim në një seancë tjetër plenare, me kërkesë të Kryetarit të Grupit Parlamentar të Partisë Socialiste.

Kuvendi miratoi gjithashtu me 74 vota pro, 17 kundër dhe asnjë abstenim emërimin e Ervin Metes si anëtar të Këshillit Mbikëqyrës.

Po ashtu, me 73 vota pro, 18 kundër dhe asnjë abstenim, u miratua zgjedhja e Jonida Priftit si anëtare e këtij institucioni.

The post Seanca maratonë/ Kuvendi miratoi katër anëtarë të rinj të Këshillit Mbikëqyrës të Bankës së Shqipërisë appeared first on Albeu.com.

Ai thotë se 447 persona përfitojnë lirim të menjëhershëm nga burgu dhe 853 të tjerë ulje dënimi. Mes tyre ka gra, të mitur dhe shtetas të huaj.

Numri real i përfituesve nga pushimi i ndjekjes penale është shumë më i lartë.

“Në mbledhjen e sotme të Qeverisë miratuam Amnistinë Penale, nismën që prezantuam rreth një muaj më parë dhe nga sot ky vendim depozitohet në Kuvend. Nga të dhënat më të fundit të rakorduara me Drejtorinë e Përgjithshme të Burgjeve, Shërbimin e Provës si dhe Prokurorinë e Përgjithshme, rezulton se plot 447 persona përfitojnë lirim të menjëhershëm dhe 853 të tjerë ulje dënimi, ndërkohë nga Shërbimi i Provës amnistohen 5077 të dënuar me masa alternative. Për më tepër, duke filluar nga viti 2024 pushohet ndjekja penale për plot 14 mijë procedime për vepra të lehta.

Përveçse një akt i qartë human dhe një mundësi e dytë për rehabilitim dhe ri-integrim, ky është një hap konkret që ul presionin e popullimit të burgjeve dhe për të fokusuar drejtësinë aty ku rreziku shoqëror është real. Nuk bëhet fjalë për tolerancë ndaj krimit, por për një qasje të matur që synon riintegimin dhe përdorimin më efikas të drejtësisë penale teksa ne po punojmë për të ulur përdorimin e panevojshëm të paraburgimit, në përputhje me shqetësimet e drejta të ngritura nga Këshilli i Evropës si dhe standardet evropiane”, shprehet ministri Lamallari.

Ministri i Drejtësisë, thotë më tej në deklaratën e tij se pret që Parlamenti ta shqyrtojë projektligjin pa vonesa në mënyrë që amnistia të fillojë efektet e saj.

“Objektivi ynë ambicioz është të kemi një sistem që di të ndëshkojë fort kur duhet, por edhe të japë një shans për t’u rikthyer në shoqëri. Drejtësia nuk është vetëm ndëshkim, por edhe një mundësi e dytë e drejtuar nga humanizmi dhe rehabilitimi. Falënderoj të gjitha institucionet që kontribuuan në këtë proces dhe pres që Parlamenti ta shqyrtojë projektligjin sa më parë, në mënyrë që efektet pozitive të amnistisë të ndihen nga mijëra familje shqiptare”, deklaron Ministri i Drejtësisë, Besfort Lamallari.

Nga kjo amnisi nuk përfitojnë subjektet e Prokurorisë dhe Gjykatës së Posacme për Korrupsionit dhe Krimit e Organizuar.

Projektligji i amnistisë do të depozitohet në Kuvend, ku do të nisë shqyrtimi në komisionet parlamentare dhe më pas kalon për miratim në seancë plenare.

The post Qeveria miraton amnistinë penale, ministri i Lamallari: 447 persona lirohen menjëherë nga burgu, ulje dënimi për 853 të dënuar appeared first on Albeu.com.

Projektligji “Për aderimin e Republikës së Shqipërisë në Traktatin e Marrakeshit për lehtësimin e aksesit në veprat e botuara për personat e verbër, me vështirësi në shikim ose me aftësi të kufizuara në leximin e teksteve të shtypura, bërë në Marrakesh, më 27.6.2013”. / 100 vota PRO, miratohet

Projektligji “Për pranimin e ndryshimeve të Statutit të Romës për Gjykatën Ndërkombëtare Penale, për krimin e agresionit, ratifikuar me ligjin nr. 8984, datë 23.12.2002”./ 102 vota PRO, miratohet

Projektligji “Për aderimin e Republikës së Shqipërisë në memorandumin e mirëkuptimit për kontrollin shtetëror portual në Rajonin e Mesdheut, bërë në Maltë, më 11 korrik 1997”./ 100 vota PRO, miratohet

Projektligji “Për ratifikimin e marrëveshjes së grantit, ndërmjet Republikës së Shqipërisë dhe Bankës Evropiane për Investime, për projektin “Infrastruktura hekurudhore e korridorit VIII, faza I – Shqipëri””./ 79 vota PRO, 21 KUNDËR, miratohet

Projektligj “Për ratifikimin e kontratës financiare, ndërmjet Republikës së Shqipërisë dhe Bankës Evropiane për Investime, për projektin “Infrastruktura hekurudhore e korridorit VIII, faza I – Shqipëri”./ 79 vota PRO, miratohet

Projektligji “Për ratifikimin e marrëveshjes së huas, ndërmjet Republikës së Shqipërisë dhe Bankës Evropiane për Rindërtim dhe Zhvillim, për projektin “Korridori hekurudhor VIII, faza I – seksioni Durrës – Rrogozhinë””./ 79 vota PRO, miratohet

Projektligji “Për ratifikimin e marrëveshjes së garancisë, ndërmjet Republikës së Shqipërisë dhe Bankës Evropiane për Rindërtim dhe Zhvillim (BERZH), për marrëveshjen e huas, ndërmjet Korporatës Elektroenergjetike Shqiptare, sh.a., (KESH, sh.a.) dhe Bankës Evropiane për Rindërtim dhe Zhvillim (BERZH), për projektin fotovoltaik (FV) solar nga 2 KESH-i”./ 79 vota PRO, 22 vota KUNDËR, miratohet

Projektligji “Për përgjegjësitë e zgjeruara të subjekteve prodhuese të produkteve që gjenerojnë mbetje”./ 79 vota PRO, 22 vota KUNDËR, miratohet

Projektligji “Për disa ndryshime dhe shtesa në ligjin nr. 10304, datë 15.7.2010 “Për sektorin minerar në Republikën e Shqipërisë”, të ndryshuar”./ 78 vota PRO, 23 vota KUNDËR, miratohet

Projektligji “Për disa ndryshime dhe shtesa në ligjin nr. 95/2015, “Për shërbimet dhe produktet biocide në shëndetin publik”, të ndryshuar”./ 79 vota PRO, 24 vota KUNDËR, miratohet

Projektligji “Për disa shtesa dhe ndryshime në ligjin nr. 15, datë 5.3.2015 “Për rolin e Kuvendit në procesin e integrimit të Republikës së Shqipërisë në Bashkimin Europian” i ndryshuar”./ 79 vota PRO, 23 vota KUNDËR, miratohet

Projektligji “Për disa shtesa dhe ndryshime në ligjin nr. 8454, datë 4.2.1999 “Për Avokatin e Popullit”, të ndryshuar”./ 101 vota PRO, miratohet

Projektvendimi “Për emërimin e anëtarit të Bordit të Autoritetit të Mbikëqyrjes Financiare, që do të mbajë funksionin e Drejtorit të Përgjithshëm Ekzekutiv të Autoritetit”./ 78 vota pro, 22 KUNDËR, Adela Xhemali zgjidhet Drejtore e Përgjithshme Ekzekutive e Autoritetit të Mbikëqyrjes Financiare

Projektvendimi “Për zgjedhjen e Komisionerit për Mbikëqyrjen e Shërbimit Civil”./ 79 vota PRO, 1 votë ABSTENIM, 4 vota KUNDËR, Lefteria Lleshi Luzi zgjidhet Komisionere për Mbikëqyrjen e Shërbimit Civil

Projektvendimi “Për ngritjen e nënkomisionit për Auditimin e Sektorit Publik në përbërje të Komisionit të Përhershëm Parlamentar për Ekonominë, Punësimin dhe Financat”/ 100 vota PRO, miratohet

The post Kuvendi miraton projektligjet pas një seance maratonë appeared first on Albeu.com.

Marrëveshja e propozuar do të shohë që Taipei do të shpenzojë 330 milionë dollarë, për të blerë pjesë këmbimi për avionët e prodhuar në Amerikë që operon, tha Departamenti Amerikan i Luftës në një deklaratë të enjten.

Blerja duhet ta ndihmojë Tajvanin në “ruajtjen e gatishmërisë operacionale të… flotës së F-16, C-130” dhe aeroplanëve të tjerë, thuhet në deklaratë.

Zëdhënësja e zyrës presidenciale të Tajvanit, Karen Kuo, e mirëpriti miratimin, duke pretenduar se; “thellimi i partneritetit të sigurisë Tajvan-SHBA është një gur themeli i rëndësishëm i paqes dhe stabilitetit në rajonin Indo-Paqësor”.

Sipas Ministrisë së Mbrojtjes të Taipeit, shitja e pjesëve të avionëve amerikanë do të “hyjë në fuqi” brenda një muaji.

Zëdhënësi i Ministrisë së Jashtme kineze, Lin Jian, tha gjatë një takimi informues se Pekini “e dënon dhe kundërshton” shitjet e armëve amerikane në Tajvan, të cilat shkojnë kundër interesave të sigurisë së Kinës dhe “dërgojnë një sinjal shumë të gabuar për forcat separatiste të ‘pavarësisë së Tajvanit’”.

Çështja e Tajvanit është “vija e parë e kuqe që nuk duhet të kalohet në marrëdhëniet Kinë-SHBA”, paralajmëroi zëdhënësi.

Zyrtarisht, SHBA-të mbështesin politikën e Një Kine të Vetëm, duke deklaruar se Tajvani, i cili ka ruajtur vetëqeverisje de facto që nga viti 1949, por që nuk e ka shpallur kurrë zyrtarisht pavarësinë nga Pekini, është një pjesë integrale e vendit.

Megjithatë, Uashingtoni ka mbajtur kontakte me autoritetet në Taipei dhe ka premtuar ta mbrojë ishullin ushtarakisht në rast të një konflikti me kontinentin.

Kina ka thënë vazhdimisht se qëllimi i saj është “ribashkimi paqësor” me Tajvanin, por ka paralajmëruar se nuk do të hezitojë të përdorë forcën nëse Taipei shpall zyrtarisht pavarësinë.

Në shtator, gazeta Washington Post raportoi se Trump kishte bllokuar një marrëveshje armësh prej 400 milionë dollarësh me Taipein përpara takimit të tij me homologun e tij kinez Xi Jinping.

The post SHBA miraton shitjen e parë të armëve drejt Tajvanit nën administratën e Trump appeared first on Albeu.com.