Një vendim i ri, që përcakton masa të detyrueshme për organizuesit e festivaleve, koncerteve dhe ngjarjeve të tjera publike, është miratuar nga Ministria e Mjedisit, Planifikimit Hapësinor dhe Infrastrukturës. Synimi i tij është mbrojtja e mjedisit.

Me hyrjen në fuqi të këtyre rregullave, organizatorët duhet të kujdesen për administrimin e përshtatshëm të mbeturinave dhe pastrimin e vendeve ku janë zhvilluar aktivitetet. Ata gjithashtu obligohen të respektojnë kufizimet e zhurmës dhe të ndërmarrin masa për ruajtjen e cilësisë së ajrit, ujit dhe natyrës.

Në njoftimin e institucionit theksohet se mbrojtja e mjedisit përbën një standard të cilin duhet ta zbatojë çdo organizator i ngjarjeve publike.

Komunave u është dhënë mundësia që, kur një aktivitet vlerësohet se shkakton ndikim më të madh në mjedis, të kërkojnë garanci financiare për rikthimin e hapësirës në gjendjen e duhur pas përfundimit të ngjarjes.

Ministria ka deklaruar se mundësia për vendosjen e kësaj garancie financiare ndaj aktiviteteve me ndikim më të lartë përfaqëson një standard të ri të përgjegjësisë mjedisore në Kosovë.

Sipas këtij institucioni, zgjerimi i jetës kulturore dhe argëtuese nuk duhet të ndahet nga detyrimi për t’u kujdesur për mjedisin.

Në njoftim thuhet se aktivitetet kulturore dhe argëtuese duhet të zhvillohen paralelisht me përpjekjet për mbrojtjen e mjedisit.

Zbatimi i masave të vendosura do të jetë nën mbikëqyrjen e Ministrisë, e cila ka paralajmëruar se nuk do të bëjë kompromis kur bëhet fjalë për respektimin e standardeve të reja.

Në përfundim, Ministria e Mjedisit ka bërë të ditur se do t’i zbatojë këto masa pa kompromis, pasi ruajtja e një mjedisi të pastër është përgjegjësi e përbashkët dhe një detyrim ndaj brezave të ardhshëm.

The post Rregulla të detyrueshme mjedisore për festivalet, koncertet dhe aktivitetet publike appeared first on Albeu.com.

Ministria për Evropën dhe Punët e Jashtme ka reaguar në rrjetin social “X” pas zbulimit të një varri tjetër masiv në Kalludër të Kosovës, duke e cilësuar ngjarjen si një kujtesë të dhimbshme se pasojat e luftës vijojnë të mbeten të hapura.

Sipas ministrisë, çdo zbulim i tillë përbën jo vetëm një mundësi për identifikimin e viktimave, por edhe një dëshmi të drejtpërdrejtë të krimeve të kryera. Eshtrat e gjetura rikthejnë nevojën që e vërteta të pranohet, përgjegjësitë të përcaktohen dhe drejtësia të vihet në vend.

Për familjet që prej më shumë se dy dekadash presin të mësojnë çfarë ka ndodhur me të afërmit e tyre të zhdukur, çdo identifikim përfaqëson një hap drejt dinjitetit, së vërtetës dhe drejtësisë. Ministria theksoi se Shqipëria do të vijojë të jetë në krah të Kosovës në zbardhjen e fatit të personave të zhdukur, në përpjekjet për drejtësi dhe në ruajtjen e së vërtetës historike, duke nënvizuar se pa të vërtetën nuk mund të ketë pajtim të qëndrueshëm.

The post Ministria e Jashtme: Varri masiv në Kalludër dëshmon se plagët e luftës në Kosovë nuk janë mbyllur appeared first on Albeu.com.

Një operacion i përbashkët i Policisë së Kosovës dhe Prokurorisë Themelore të Prishtinës ka çuar në prangosjen e një punonjësi të Ministrisë së Mjedisit, i cili dyshohet se ka mundësuar hyrjen në vend të kimikateve dhe pesticideve të ndaluara.

Sinjali ka siguruar informacione ekskluzive se personi i ndaluar është Nazmi Maxhera, i moshës rreth 63 vjeç.

Bazuar në të dhënat e siguruara nga Sinjali, aksioni u zhvillua më 21 korrik, në orën 11:30, nga Drejtoria për Hetimin e Krimeve Ekonomike dhe Korrupsionit (DHKEK), konkretisht Sektori për Hetimin e Korrupsionit, në partneritet me Prokurorinë Themelore në Prishtinë.

Nga hetimet e kryera rezulton dyshimi se Nazmi Maxhera, në rolin e tij si zyrtar përgjegjës për produktet biocide në ish-Ministrinë e Mjedisit, ka shkelur kufijtë e autoritetit të tij duke lëshuar licenca importi në kundërshtim me Ligjin për Biocide dhe Kimikate.

Materiali hetimor tregon se ai akuzohet se ka autorizuar hyrjen e lëndëve aktive të ndaluara, të përcaktuara në listën e Agjencisë Evropiane për Kimikate (ECHA), si dhe të pesticideve, licensimi i të cilave i takonte ligjërisht institucionit përkatës pranë Ministrisë së Bujqësisë.

Sipas burimeve të Sinjalit, si pasojë e këtyre autorizimeve, substancat e ndaluara mendohet se kanë mbërritur në Kosovë në momente të ndryshme nëpërmjet operatorëve të ndryshëm ekonomikë.

Gjatë ndërhyrjes së policisë, të dyshuarit i janë konfiskuar përkohësisht dy aparate celularë, ndërsa ai është marrë në pyetje me pjesëmarrjen e mbrojtësit të tij ligjor.

Me urdhër të Prokurorit të Shtetit, Nazmi Maxhera është vendosur në mbajtje për 48 orë, nën akuzat për veprat penale “Keqpërdorim i detyrës ose autoritetit zyrtar” dhe “Falsifikim i dokumentit zyrtar”.

Veprimet hetimore për këtë çështje po vazhdojnë dhe synojnë të sqarojnë nëse nga këto veprime kanë pasur fitime operatorë të tjerë ekonomikë apo janë implikuar edhe individë të tjerë.

Shënim: Personat e përmendur në këtë shkrim konsiderohen të pafajshëm derisa faji i tyre të vërtetohet me një vendim gjyqësor të formës së prerë.

The post Arrestohet zyrtari i Ministrisë së Mjedisit, akuzohet për lejimin e importit të substancave të ndaluara në Kosovë appeared first on Albeu.com.

Pas reshjeve intensive dhe stuhisë që ka goditur Kosovën, Ministria e Infrastrukturës dhe Transportit njoftoi se ekipet përgjegjëse për mirëmbajtje janë mobilizuar dhe po ndërhyjnë me shpejtësi.

Erërat e fuqishme kanë rrëzuar drunj në rrugën rajonale R115, në hyrje të Shtërpcës. Rënia e tyre ka shkaktuar dëme edhe në disa automjete.

Menjëherë pas ngjarjes, ekipet e mirëmbajtjes dolën në terren, ku larguan drunjtë dhe pastruan segmentin rrugor.

Ministria bëri të ditur se ndërhyrja ka përfunduar, rruga është hapur dhe tani mund të shfrytëzohet nga të gjitha automjetet.

Postimi i plotë:

NJOFTIM

Ekipet e mirëmbajtjes ndodhen në gatishmëri dhe po veprojnë me përgjegjësi e pa humbur kohë, pas reshjeve të dendura dhe stuhisë që ka përfshirë vendin tonë.

Në hyrje të Shtërpcës, përgjatë rrugës R115, stuhia ka rrëzuar drunj, të cilët kanë dëmtuar edhe disa automjete. Ekipet tona të mirëmbajtjes kanë reaguar menjëherë, duke hequr drunjtë dhe duke pastruar rrugën.

Falë punës së ekipeve në terren, aksi është zhbllokuar dhe në këtë moment është i kalueshëm.

Vazhdojmë të jemi vigjilentë dhe po koordinohemi me të gjitha institucionet përgjegjëse, me synim që situatat me të cilat po përballemi të menaxhohen në mënyrën më të mirë të mundshme.

Qytetarëve u kërkohet të tregojnë kujdes të shtuar, ndërsa gjatë paralajmërimeve për stuhi ose reshje të dendura duhet të shmangin daljet e panevojshme në rrugë dhe ta përshtatin vozitjen sipas kushteve atmosferike.

The post Stuhi dhe dëme në Shtërpcë, Ministria u kërkon qytetarëve vigjilencë appeared first on Albeu.com.

Ministria e Infrastrukturës dhe Transportit njoftoi dje se sot do të vendosen kufizime për qarkullimin në autoudhë të automjeteve që transportojnë mallra dhe kanë masë totale mbi 20 tonë.

Masa do të jetë në fuqi nga ora 11:00 deri në 17:30, për shkak se temperaturat e parashikuara pritet të arrijnë në 32°C ose më shumë.

Sipas ministrisë, në rrugët nacionale, rajonale dhe lidhëse nuk do të aplikohet asnjë kufizim, pasi nuk janë përmbushur kriteret e parashikuara në vendim.

Në njoftimin e publikuar, Ministria e Infrastrukturës dhe Transportit u bëri thirrje qytetarëve dhe operatorëve ekonomikë të kenë parasysh se, mbi bazën e parashikimit zyrtar të temperaturave për ditën e nesërme, janë plotësuar kushtet për zbatimin e vendimit mbi ndalimin e përkohshëm të qarkullimit në autoudhë për automjetet e transportit të mallrave me masë totale mbi 20 tonë.

Për autoudhët, kufizimi është përcaktuar të zbatohet nga ora 11:00 deri në 17:30, pasi vlerat e temperaturave të parashikuara shkojnë në 32°C ose më lart.

Ndërkohë, rrugët nacionale, rajonale dhe lidhëse do të mbeten pa kufizime, pasi kushtet e caktuara me vendim nuk janë përmbushur.

Ministria bëri të ditur se do të ndjekë çdo ditë ecurinë e temperaturave dhe do t’i informojë me kohë qytetarët dhe operatorët ekonomikë për çdo ndryshim që lidhet me zbatimin e këtij vendimi.

The post Temperaturat mbi 32°C sjellin sot ndalim për kamionët mbi 20 tonë në autoudhë appeared first on Albeu.com.

Gjatë kësaj periudhe janë raportuar 28 vatra zjarri, nga të cilat 3 vatra janë aktive dhe 6 janë në monitorim.

* Tërnovë (Bashkia Bulqizë) – Zjarri vazhdon të zhvillohet në kurorë me pyje të dendura nga qafa e malit në drejtim të qytetit të vjetër Bulqizë. Në operacion janë angazhuar 8 efektivë të MZSH të bashkisë Bulqizë, 4 forca bashkiake, 6 forca të pyjores, 3 forca policore, të mbështetur nga FA me 30 forca ushtarake dhe 1 helikopter. Po punohet për izolimin e zjarrit.

* Xeth (Bashkia Fushë-Arrëz) – Vijon puna për izolimin e zjarrit me angazhimin e 60 forcave operacionale, të ndihmuara nga 80 forca ushtarake dhe 1 helikopter. Intensiteti i flakëve është ulur, por puna për shuarjen vazhdon.

* Velë (Bashkia Mirditë) – Zjarr në një masiv me pisha, me rreth 6.5 ha të përshkruara nga flakët. Në terren janë 3 automjete zjarrfikëse me 6 efektivë të MZSH të bashkisë Mirditë, 12 forca bashkiake, 6 forca të pyjores, 2 forca policore dhe 6 forca ushtarake. Po punohet për shuarjen e plotë të zjarrit.

* Mali me Gropa – Bizë (Bashkia Bulqizë) – Zjarri zhvillohet në zonë shkëmbore, pa rrezik. Angazhuar 2 forca AdZM dhe 5 vullnetarë.

* Zhapokikë, Plashnik (lagja Lugas) dhe Rehovë (Bashkia Poliçan) – Vatra nën kontroll nga ndërhyrja e forcave, 2 helikopterëve, ndihmuar edhe nga reshjet e shiut.

* Velçan (Bashkia Berat) – Situata nën kontroll pas ndërhyrjes së 25 efektivëve MZSH, 2 helikopterëve dhe favorizuar nga reshjet e shiut.

* Mali i Bërzhitës, Ibë (Bashkia Tiranë) – Vatra nën kontroll nga 3 automjete zjarrfikëse, 5 forca APR dhe policia.

* Damjan-Fortuzaj dhe Isufaj (Bashkia Tiranë) – Nën kontroll pas ndërhyrjes së MZSH, APR dhe Policisë.

* Ferraj dhe Zall-Herr (Bashkia Tiranë) – Intensitet i ulët, nën kontroll dhe pa rrezik për banesat.

Në operacionet për shuarjen e zjarreve u angazhuan 52 automjete zjarrfikëse dhe 740 forca operacionale, të ndihmuar nga FA me 323 forca ushtarake, 7 automjete zjarrfikëse dhe 1 helikopter të FA. Gjithashtu morën pjesë 4 helikopterë (EBA, çek, sllovak) dhe 1 avion Canadair nga Italia.

The post Situata nga zjarret, Ministria e Mbrojtjes: 28 vatra në 24 orë, vetëm 3 janë aktive, 6 në monitorim appeared first on Albeu.com.

Situata në njësinë Skënderbegas të Gramshit vijon të jetë e rënduar si pasojë e zjarrit që kalon nga fshati në fshat.

Nisur nga situata e rënduar, kanë nisur edhe evakuimet e banorëve, por për zjarrfikësit beteja me ta ka qenë po aq e vështirë sa beteja që po zhvillojnë prej dy ditësh me zjarrin.

Përballë situatës emergjente, janë banorët ata që ngulin këmbë të qëndrojnë për të mbrojtur shtëpitë e tyre dhe në shumë raste janë larguar edhe me forcë.

“Kryesorja është për banorët të ruajnë gjakftohtësinë, ne jemi për t’i ndihmuar, çfarë është bërë, është bërë. Të kenë besim te këta burra. Apeli është të largohet edhe banori i fundit. Keq është ta them, por kemi përdorur edhe forcën”, tha kryebashkiaku i Gramshit, Besjon Ajazi.

Në këto kushte emergjence, thirrja për banorët është që të ndjekin udhëzimet e ekipeve të emergjencës dhe të evakuohen menjëherë drejt zonave të sigurta.

Ekipet e Ministrisë së Bujqësisë po marrin masa, ndërkohë, për groposjen e kafshëve të ngordhura që janë djegur. Edhe pse është emergjencë nga zjarret, duhet ndërhyrë pikërisht në këto momente për të shmangur përhapjen e ndonjë epidemie.

The post Zjarret në vend/ Ministria e Bujqësisë paralajmëron frikën nga kafshët e ngordhura, urdhër të groposen sa më parë që të mos bëhen burim sëmundjesh appeared first on Albeu.com.

Aktualisht, vetëm një vatër zjarri është aktive.

Situata e zjarreve në rang vendi

Gjatë 24 orëve të fundit janë raportuar 58 vatra zjarri, nga të cilat vetëm një mbetet ende aktive.

Nga raportimet në Qendrën Kombëtare Operacionale të Emergjencave Civile, 8 vatra zjarri janë raportuar në qarkun e Lezhës, të cilat janë shuar brenda pak orësh.

Mbetet aktive vatra e zjarrit në një sipërfaqe pyjore me pishë dhebimësi të përzier, në fshatin Markatomaj, njësia administrative Zejmen, bashkia Lezhë.

Në vendngjarje kanë shkuar 4 automjete zjarrfikëse me personelin përkatës dhe banorë të zonës të cilët kanë punuar dhe izoluar vatrën e zjarrit rreth orës 05:45.

Vijon puna për shuarjen përshuarjen e trungjeve brenda sipërfaqes së përshkuar nga zjarri, të cilët të ndihmuar nga era vetëndizen herë pas here.

Në qarkun e Beratit janë raportuar 5 vatra aktive, gjatë 24 orëve të fundit, të cilat janë arritur të neutralizohen.

Në qarkun e Gjirokastrës janë shuar 2 vatrat e raportuara, gjatë orëve të fundit.

Edhe në qarkun e Fierit janë shuar të 8 vatrat e zjarrit të raportuara, kryesish në sipërfaqe me shkurre dhe bimësi.

Në qarkun e Elbasanit u arritën të neutralizohen 3 vatrat e zjarrit në sipërfaqe me bimësi në fshatin Petresh, Labinot Fushë dhe Kodër Bujaras.

Në qarkun e Tiranës janë raportuar 12 vatra zjarri, në bashkitë Tiranë, Kavajë, Rogozhinë, të cilat kryesisht kanë qenë në sipërfaqe me bimësi.

Të gjitha këto vatra janë neutralizuar në kohë. Një prej vatrave të zjarrit u raportua në shtëpinë e fëmijëve “Zyber Hallulli”, në një dhomë në katin e katërt të godinës. Zjarri u shua brenda pak minutave, ndërsa pati vetëm dëme materiale.

Në qarkun e Durrësit u raportuan 5 vatra zjarri, të cilat gjithashtu u izoluan nga forcat në terren.

Nga 2 vatra u raportuan në qarqet Shkodër e Korçë dhe 3 vatra në Vlorë. Të gjitha janë neutralizuar në kohë të shpejtë.

Por si pasojë e këtyre zjarreve janë djegur rreth 32 ha sipërfaqe me bimësi, por edhe një sipërfaqe e kon siderueshme me lis, arra, dhe rrënjë ulliri.

Në operacionet për shuarjen e zjarreve u angazhuan 85 automjete zjarrfikëse, 557 forca operacionale, 1 automjet zjarrfikës me 5 efektivë dhe 1 helikopter nga Forcat e Armatosura.

Sipas parashikimeve të Institutit të Gjeoshkencave, për ditën e sotme pritet nivel rrezik “I LARTË” në qarqet Lezhë, Durrës, Tiranë dhe Fier, ndërsa në qarqet e tjerë pritet nivel rrezik “I MODERUAR”.

Të gjitha strukturat e Mbrojtjes Civile mbeten të angazhuara në monitorim të situatës për shkak të temperaturave të larta.

U bëjmë thirrje të gjithë qytetarëve të jenë të kujdesshëm gjatë këtyre ditëve të nxehta dhe të kërkojnë ndihmën e strukturave vendore në çdo rast nevoje.

The post Ministria e Mbrojtjes: 58 vatra zjarri në 24 orët e fundit, vetëm një aktive appeared first on Albeu.com.

Përmes një komunikate në llogarinë zyrtare të Ministrisë së Drejtësisë, grupi ka kërkuar largimin e konkurrentit Kartesh, i cili iu bashkua garës vetëm në prime-in e fundit.

“Koordinatorja Kombëtare për mbrojtje nga dhuna në familje, dhuna ndaj grave dhe dhuna në baza gjinore, dhe Grupi Ndërministror reagojnë ashpër ndaj vendimit të Televizionit Klan Kosova për të futur brenda një shtëpie në kuadër të një emisioni televiziv, personin që është denoncuar për dhunë në familje ndaj të cilit deri në shtator të këtij viti ka pasur Urdhër Mbrojtës. Ky vendim përveç tjerash ka për qëllim minimizimin dhe normalizimin e një fenomeni të rrezikshëm më të cilin po përballet shoqëria jonë, siç është dhuna në familje”, theksuan ata në postimin e tyre.

“Grupi ndërministror për mbrojtjen dhe parandalimin e dhunës ndaj grave dhe dhunës në familje, kërkon të ndërmerren veprime urgjente:

Vendimin për largim nga emisioni – show televiziv Big Brother personin e denoncuar për dhunë në familje, Atilla Kardesh;

Ndërmarrjen e masave nga Komisioni i Pavarur i Mediave në raport me këtë vendim skandaloz të televizionit Klan Kosova;

Vlerësimin e përgjithshëm të përmbajtjeve të emisioneve në Kosovë në raport me raportimin e ndjeshëm gjinor, riviktimizimin e viktimave të dhunës dhe presionin psikologjik që u shkaktohet viktimave të dhunës;

Postimi i plotë:

Reagim i Koordinatores Kombëtare dhe Grupit Ndërministror Kundër Dhunës në Familje, Dhunës ndaj Grave dhe Dhunës me Bazë Gjinore

Koordinatorja Kombëtare për mbrojtje nga dhuna në familje, dhuna ndaj grave dhe dhuna në baza gjinore, dhe Grupi Ndërministror reagojnë ashpër ndaj vendimit të Televizionit Klan Kosova për të futur brenda një shtëpie në kuadër të një emisioni televiziv, personin që është denoncuar për dhunë në familje ndaj të cilit deri në shtator të këtij viti ka pasur Urdhër Mbrojtës.  Ky vendim përveç tjerash ka për qëllim minimizimin dhe normalizimin e një fenomeni të rrezikshëm më të cilin po përballet shoqëria jonë, siç është dhuna në familje.

Grupi ndërministror për mbrojtjen dhe parandalimin e dhunës ndaj grave dhe dhunës në familje, kërkon të ndërmerren veprime urgjente:

Vendimin për largim nga emisioni – show televiziv Big Brother personin e denoncuar për dhunë në familje, Atilla Kardesh

Ndërmarrjen e masave nga Komisioni i Pavarur i Mediave në raport me këtë vendim skandaloz të televizionit Klan Kosova

Vlerësimin e përgjithshëm të përmbajtjeve të emisioneve në Kosovë në raport me raportimin e ndjeshëm gjinor, riviktimizimin e viktimave të dhunës dhe presionin psikologjik që u shkaktohet viktimave të dhunës.

Republika e Kosovës përmes amandamentimit të Kushtetutës ka bërë Konventën e Stambollit pjesë integrale të saj dhe e njëjta mbizotëron mbi legjislacionin vendor. Nisur nga mandati i dhënë sipas kësaj Konvente, respektivisht përgjegjësive institucionale Neni 12 i Konventës së Stambollit  – Detyrimet e përgjithshme:

Pika 2. Palët marrin masat e nevojshme legjislative dhe masa të tjera për të parandaluar të gjitha format e dhunës të mbuluara nga objekti i kësaj Konvente nga çdo person fizik ose juridik.

Pika 3. Çdo masë e marrë sipas këtij kapitulli merr në konsideratë nevojat specifike të personave pa mbrojtje për shkak të rrethanave të veçanta dhe i japin prioritet të drejtave të të gjitha viktimave.

Koordinatorja Nacionale dhe përfaqësuesit e grupit ndërministror me qëllim të zbatimit ‘’të masave për të promovuar dhe mbrojtur të drejtën për çdokënd, veçanërisht gratë, për të jetuar pa dhunë në sferën publike, si dhe në atë private”, tërheqin vëmendjen e televizionit të lartëcekur, në rastin e znj. Drenusha Latifi pjesëmarrëse e emisionit ‘’Big Brother’’ e cila është e mbijetuar e dhunës në familje, dhe e cila ka poseduar Urdhër Mbrojtje (UM) prej ish bashkëshortit të saj, z. Atilla Kardesh, i cili UM ishte aktiv nga data 10/02/2024 për periudhën kohore në afat prej 6 muajsh.

Vendosja e znj. Latifi nën presion psikologjik përballë ish bashkëshortit i cili është cilësuar si dhunues me vetë lëshimin e UM, është formë e dhunës psikologjike, e cila e vendos znj. Latifi në pozitë të cenueshme psikologjike, dhe paraqet mundësi të ri-viktimizimit por tani në situatë të presionit psikologjik publik.

Situata me të cilin potencialisht do të përballet znj. Latifi, në praninë e ish bashkëshortit “dhunues” paraqet rast të veçantë, dhe në emër të prioritizimit të mbrojtjes së dinjitetit të një të mbijetuare të dhunës në familje – viktimë,  e cila është shprehur publikisht për kërcënimet nga ish bashkëshorti, tashmë të provuara, bëjmë thirrje menaxhmentit të Klan Kosova të tërheqë z. Atilla Kardesh nga formati televiziv, për të parandaluar çfarëdo lloj forme të presionit, ose dhunës psikologjike, që rëndon pozicionin dhe krijon kushte për ri-përjetimin e dhunës nga e mbijetuara znj. Latifi.

Konventa e Stambollit obligon shtetin që të ndërmarr të gjitha veprimet përmes Nenit 13 të   Konventës “për të rritur ndërgjegjësimin dhe perceptimin nga publiku i gjerë, në lidhje me manifestimet e ndryshme të të gjitha formave të dhunës të mbuluara nga objekti i kësaj Konvente, pasojat e tyre për fëmijët dhe nevojën për të parandaluar një dhunë të tillë”.

Nisur nga fakti se znj. Latifi dhe ish bashkëshorti i saj kanë dy fëmijë të përbashkët, shprehim shqetësimin tonë, se fëmijët e ish çiftit janë vendosur në rrethanat e rrezikut potencial për viktimizim dhe ri-viktimizim, duke u bërë publikisht dëshmitarë të situatave potencialisht të dhunshme verbale apo fizike, përmes presionit publik i cili do të transmetohet në opinion, dhe kjo do të ketë ndikim negativ në mirëqenien emocionale të fëmijëve.

Media ka rol të pa zëvendësueshëm edukimi dhe krijimi në opinion, ruajta e lirisë së shprehjes dhe shprehja e kreativitetit për tërheqjen e shikueshmërinë pa dyshim se është e drejtë e garantuar, mirëpo legjislacioni vendor dhe ai ndërkombëtarë drejtpërdrejtë i zbatueshëm në Republikën e Kosovës, bën përgjegjës edhe median për të siguruar mbrojtje dhe inkurajim të pjesëmarrjes së grave në jetën publike, duke parandaluar çdo formë të diskriminimit apo vënies në situatë të pa lakmueshme përmes mos cenimit të dinjitetit dhe ruajtjes së mirëqenies fizike dhe emocionale.

Konventa e Stambollit Neni 17 “Pjesëmarrja e sektorit privat dhe medias” njeh rolin dhe përgjegjësinë e Medias dhe sektorit privat në parandalimin e çfarëdo lloj dhune ndaj grave citojmë: ‘’Palët nxisin sektorin privat, sektorin e teknologjisë së komunikimit dhe informacionit dhe medias, në lidhje me lirinë e shprehjes dhe pavarësinë e tyre, për të marrë pjesë në përpunimin dhe zbatimin e politikave dhe për të caktuar udhëzime dhe standarde vetë rregullatorë për parandalimin e dhunës kundër grave dhe rritjen e respektit për dinjitetin e tyre”.

Prandaj, në cilësinë e Mekanizmit institucional për koordinim mbarëkombëtarë kundër dhunës ndaj grave, me synim të parandalimit të çfarëdo lloj dhune psikologjike, verbale, apo fizike apelojmë tek Menaxhmenti i Klan Kosova të marrë vendim për largimin e z. Atilla Kardesh nga emisioni, me synim të parandalimit dhe mbrojtjes së mirëqenies psikologjike, fizike dhe ruajtjes së dinjitetit të viktimës.

Duke u nisur nga historia e përjetimeve të të mbijetuarës së dhunës, të dëshmuar me ekzistencën faktike të UM në afat prej 6 muajsh, si dhe me rrëfimet e bëra publike nga vetë e mbijetuara, me qëllim të parandalimit të dhunës dhe presionit psikologjik që potencialisht mund të ushtrohet nga ish bashkëshorti prezent në formatin e emisionit, si dhe të parandalimit të presionit publik që mund të ushtrohet nga vetë audienca e emisionit, sepse një qasje e tillë relativizon dhunën ndaj grave,  hapë rrugë për shprehje të gjuhës së urrejtjes në diskursin publik, përmes komenteve denigruese që mund ta përcjellin situatën.

Mediat i konsiderojmë si aleatët më të fuqishëm në parandalimin e dhunës ndaj grave dhe qasja proaktive e tyre për transmetim të programeve mediatike që fuqizojnë rolin e gruas në shoqëri, parandalojnë dhunën ndaj grave duke krijuar ambiente të sigurta dhe jo diskriminuese ndaj grave është imperativ.

Emisioni në fjalë ka audiencë të gjerë dhe në mënyrë të drejtpërdrejtë dhe të tërthortë e vendos publikun dhe shoqërinë në pozitë të ‘’ bashkëfajtorit’’, në kohë reale,  të presionit dhe dhunës psikologjike, e cila besojmë që nuk është synim i emisionit dhe politikave redaktoriale të Televizionit.

The post Ministria e Drejtësisë i kërkon Klan Kosovës largimin e Atilla Kartesh nga formati Big Brother VIP Kosova appeared first on Albeu.com.

Ushtria izraelite tha se kishte shënjestruar një qendër komanduese të Hamasit– grupit palestinez të shpallur organizatë terroriste nga SHBA-ja dhe BE-ja – në atë që dikur ishte një shkollë.
Sipas ministrisë, 30 të tjerë u plagosën në sulmin ndaj shkollës në zonën Zeitoun të Gazës. Shumica e viktimave ishin gra dhe fëmijë.

Ende nuk është e qartë në cilin spital janë dërguar të vdekurit dhe të plagosurit.

Ushtria izraelite deklaroi më parë se kishte goditur “qendrën komanduese dhe të kontrollit të Hamasit, që ishte vendosur brenda një kompleksi që më parë ka shërbyer” si shkollë.

Ata thanë se kishin marrë masa për të kufizuar dëmtimin e civilëve, përfshirë përdorimin e municioneve të sakta dhe mbikëqyrjen ajrore.

Që nga shpërthimi i luftës midis Izraelit dhe Hamasit, ushtria izraelite ka goditur disa shkolla, të mbushura me dhjetëra mijëra palestinezë të larguar nga shtëpitë e tyre për shkak të ofensivave dhe urdhrave të evakuimit të Izraelit.

Sipas Kombeve të Bashkuara, 90 për qind e palestinezëve në Gaza janë zhvendosur.

Ushtria izraelite vazhdimisht ka akuzuar Hamasin se operon nga brenda infrastrukturës civile në Gaza, përfshirë shkolla, objekte të OKB-së dhe spitale.

Më herët këtë muaj, një sulm izraelit goditi një shkollë në kampin e refugjatëve Nuseirat, duke vrarë 14 persona. Ushtria izraelite tha se po shënjestronte militantët e Hamasit që po planifikonin sulme nga brenda shkollës.

Në korrik, sulmet ajrore izraelite goditën një shkollë për vajza në Deir al-Balah, duke vrarë të paktën 30 njerëz që strehoheshin brenda.

Ushtria izraelite tha se kishte shënjestruar një qendër komanduese të Hamasit që përdorej për të drejtuar sulme dhe për të ruajtur “sasi të mëdha armësh”.

Lufta filloi kur luftëtarët e udhëhequr nga Hamasi vranë rreth 1.200 persona, kryesisht civilë, në një sulm më 7 tetor në Izraelin jugor.

Ata rrëmbyen rreth 250 njerëz dhe ende mbajnë peng rreth 100. Fushata e Izraelit në Gaza ka vrarë të paktën 41.000 palestinezë, sipas Ministrisë së Shëndetësisë së Gazës, e cila nuk bën dallim në shifra midis luftëtarëve dhe civilëve.

Gjithashtu të shtunën, Ministria e Shëndetësisë së Gazës tha se pesë punonjës të saj u vranë dhe pesë të tjerë u plagosën nga zjarri izraelit që goditi magazinat e ministrisë në zonën Musbah në jug.

Tensionet u rritën të premten pasi një sulm ajror izraelit në një lagje të Beirutit në Liban vrau dhjetëra njerëz, përfshirë civilë dhe Ibrahim Akilin, kreun e forcave elitë Radwan të Hezbollahut.

Po ashtu u vra edhe Ahmed Wahbi, një tjetër komandant i lartë në krahun ushtarak të grupit.

Sulmi ndodhi disa orë pasi Hezbollahu nisi një nga bombardimet më të ashpra ndaj veriut të Izraelit në gati një vit luftimesh. Sistemi i mbrojtjes me raketa “Iron Dome” i Izraelit arriti të ndalonte shumicën e raketave./REL

The post Ministria e Shëndetësisë e Gazës: Një sulm izraelit në një shkollë vrau 22 persona appeared first on Albeu.com.