Edhe dy muaj e gjysmë pas riorganizimit të Qeverisë, me të cilin u zëvendësuan gjithsej tetë ministra, emërimet e reja të zv.ministrave dhe drejtuesve të institucioneve ende nuk janë përmbyllur. Kryeministri Hristijan Mickoski përsëriti se procedura do të finalizohet së shpejti, njësoj siç kishte deklaruar edhe një muaj më parë.

Sipas tij, emrat dhe pozicionet janë përcaktuar në vija të përgjithshme, por duhet të marrin edhe konfirmimin e koalicionit. Mickoski tha se kjo pritet të ndodhë brenda një ose dy javësh.

Pas ndryshimeve të fundit në kabinet, vendet e zv.ministrit të Kulturës dhe të Politikës Sociale mbetën të lira, pasi Sedat Sulejmani dhe Gjoko Vellkovski u emëruan ministra. Në të njëjtën kohë, janë paralajmëruar lëvizje edhe në nivelet e drejtorëve dhe zv.drejtorëve.

Deri tani, megjithatë, nuk është bërë publik asnjë kandidat konkret. Përfaqësuesit e partisë VLEN deklarojnë se procesi i riorganizimit do të vijojë edhe në nivelin e dytë.

Nga VLEN sqarojnë se po shqyrtohen pozitat që burojnë nga marrëveshja e koalicionit dhe se, në rastet kur shihet e nevojshme, do të paraqiten propozime për ndryshime te drejtorët dhe zëvendësdrejtorët. Sipas tyre, emrat ende nuk janë formalizuar.

Ndryshimet e para në Qeveri u miratuan nga Kuvendi më 13 korrik. Në postet ministrore u zgjodhën Jeton Shasivari në Drejtësi, Agon Ferati në Marrëdhënie mes Bashkësive, Borçe Serafimovski në Bujqësi, Sasho Klekovski në Shëndetësi, Gjoko Vellkovski në Politikë Sociale, Ivan Stoillkoviq në Vetëqeverisje Lokale, Sedat Sulejmani në Kulturë dhe Erxhan Demir si ministër pa portofol./Alsat/

The post Brenda dy javësh pritet të bëhen të ditur emrat e zv.ministrave të Kulturës dhe Politikës Sociale appeared first on Albeu.com.

Ministri i Kulturës dhe Turizmit, Zoran Ljutkov, ka reaguar ndaj deklaratave të bëra gjatë debatit në seancën e Komitetit të Ribalancimit të Buxhetit, duke theksuar se ato nuk përputhen me dokumentacionin zyrtar buxhetor.

Sipas Ljutkovit, në politikë mund të ketë lexime dhe interpretime të ndryshme, por faktet nuk lihen në dorë të interpretimeve. Ai nënvizon se në ribalancimin zyrtar nuk ekzistojnë pretendime që mjetet për personelin dhe mbikëqyrjen inspektuese po ridestinohen për pajisje zyre, dhe as që fondet për Agjencinë e Filmit apo për investimet kapitale po pësojnë ulje.

Ministri bën të ditur se përmes ribalancimit të buxhetit janë planifikuar 61 milion denarë për projektin “Shkupi – Kryeqyteti Evropian i Kulturës 2028”, ndërsa 200 milionë denarë të tjerë janë paraparë shtesë për investime kapitale.

Ai shprehet se kritika në një shoqëri demokratike është e domosdoshme dhe e ligjshme, por ajo duhet të mbështetet në fakte. Sipas tij, veçanërisht kur flitet për dokumente buxhetore, kërkohet lexim i kujdesshëm dhe i saktë i të dhënave zyrtare.

Ljutkov rikujton gjithashtu se para dy javësh, në një konferencë për shtyp, u prezantuan rezultatet e punës së Ministrisë së Kulturës dhe Turizmit, të cilat, siç thotë ai, janë të mbështetura me shifra konkrete./Telegrafi/

The post Ljutkov: Dokumentet e buxhetit nuk interpretohen sipas partisë dhe as nuk mësohen përmendësh appeared first on Albeu.com.