Ministria e Financave publikoi sot të dhënat për borxhin publik dhe shtetëror gjatë tremujorit të dytë të vitit 2026. Sipas shifrave zyrtare, borxhi publik përbën 58.8% të BPV-së, ndërsa në vlerë absolute arrin në 10.726 milionë euro.

Në krahasim me tremujorin paraardhës, niveli i borxhit publik ka rënë me 0.1 pikë përqindjeje, ose me 21 milionë euro në terma absolutë.

Ndërkaq, raporti i borxhit ndaj BPV-së në tremujorin e dytë të vitit 2026 është 2.6 pikë përqindjeje më i ulët se në fund të vitit 2024 dhe 0.6 pikë përqindjeje më i ulët krahasuar me gjendjen në fund të vitit 2025.

Gjatë tremujorit të dytë të vitit 2026, për shërbimin e një pjese të eurobondit u paguan më shumë se 300 milionë euro. Bëhet fjalë për një eurobond me vlerë totale prej 700 milionë eurosh, të emetuar në vitin 2020, ndërsa pjesa kryesore e tij ishte shlyer në tremujorin e parë.

Ministrja e Financave, Gordana Dimitrieska-Koçoska, deklaroi se menaxhimi i borxhit publik deri tani ka qenë i suksesshëm.

“Borxhi publik në tremujorin e dytë arriti në 58.8% të BPV-së. Le të shohim se sa arriti në vitin 2021 dhe sa ishte në vitin 2024. Ne arritëm t’i menaxhojmë të gjitha këto dhe t’i vëmë gjërat nën kontroll. Më besoni, nuk është e lehtë të lëvizësh me një nivel borxhi publik prej rreth 60% të PBB-së gjatë gjithë kohës dhe të luftosh që të mos e tejkalosh atë prag”, tha Dimitrieska-Koçoska në “RTVM”.

Ajo u shpreh se kufiri i huamarrjes, i cili në disa raste shihet edhe si një prag psikologjik, mund të tejkalohet, por theksoi se rëndësi të veçantë ka destinacioni i fondeve dhe ndikimi i tyre në rritjen ekonomike, e cila sipas saj ka vijuar gjatë viteve të fundit./Telegrafi/

The post Dimitrieska-Koçoska: Borxhi publik në tremujorin e dytë u ul në 58.8% të BPV-së appeared first on Albeu.com.

Ribalanci i plotësuar i propozuar për Buxhetin e vitit 2026 parashikon fonde shtesë për të përshpejtuar investimet kapitale, për të ndihmuar bujqësinë dhe komunat, si dhe për të zbatuar prioritetet zhvillimore të Qeverisë. Njëkohësisht, sigurohet përmbushja pa ndërprerje e detyrimeve që burojnë nga ligji.

Ministrja e Financave, Gordana Dimitrieska-Koçoska, ua paraqiti deputetëve në Kuvend plotësimin e Propozimit për ndryshimin dhe plotësimin e Buxhetit për vitin 2026. Ajo deklaroi se masat e parashikuara synojnë të vijojnë politikat për ruajtjen e stabilitetit ekonomik, nxitjen e zhvillimit dhe administrimin me përgjegjësi të financave publike.

Sipas ministres, në dokument janë përfshirë si ndërhyrjet e propozuara nga Qeveria, ashtu edhe amendamentet e miratuara gjatë shqyrtimit në komisionin amë parlamentar. Në këtë mënyrë, fuqizohet më tej mbështetja për qytetarët dhe për politikat që synojnë zhvillimin.

Dimitrieska-Koçoska tha se plotësimi i propozimit për ribalancin e Buxhetit të vitit 2026 i përshtat në mënyrë të përgjegjshme dhe në kohën e duhur projeksionet buxhetore me kushtet e reja ekonomike. Sipas saj, dokumenti garanton gjithashtu fondet e nevojshme për detyrimet ligjore të krijuara ndërkohë dhe për zbatimin e prioriteteve zhvillimore.

Ajo sqaroi se ndryshimet mundësojnë pagesën e pagave të rritura në sektorët ku është planifikuar rritje, ndihmë shtesë për bujqësinë, fonde më të mëdha për mbrojtjen sociale dhe më shumë mjete për komunat. Si veçori kryesore të këtij ribalanci, ministrja veçoi financimin shtesë për përshpejtimin e ciklit të investimeve dhe zbatimin e projekteve infrastrukturore.

Edhe pse pasiguria në ekonominë botërore vazhdon për shkak të zhvillimeve gjeopolitike, Dimitrieska-Koçoska nënvizoi se ekonomia maqedonase po vijon të tregojë stabilitet dhe qëndrueshmëri.

Për vitin 2026 parashikohet që prodhimi i brendshëm bruto të shënojë rritje reale prej 3.5%. Investimet pritet të jenë motori kryesor i aktivitetit ekonomik, të mbështetura nga zbatimi i projekteve të mëdha infrastrukturore dhe nga investimet kapitale në nivel qendror dhe lokal.

Projeksionet parashikojnë rritje të investimeve me 7.2% dhe të pagës mesatare neto me 8.3%. Papunësia pritet të zbresë më tej në 11%, ndërsa shkalla e punësimit të arrijë në 47%. Për vitin 2026, inflacioni mesatar projektohet në 4.5%, i ndikuar kryesisht nga presionet e jashtme mbi çmimet dhe nga zhvillimet gjeopolitike.

Vëmendje e posaçme iu kushtua zbatimit të shpenzimeve kapitale. Gjatë periudhës janar–qershor, ato arritën në 19.4 miliardë denarë, duke qenë 53.5% më të larta se në të njëjtën periudhë të vitit të kaluar.

The post Dimitrieska-Koçoska: Me ribalancin rritet financimi për projektet kapitale, bujqësinë, komunat dhe mbrojtjen sociale appeared first on Albeu.com.

Në mbledhjen e saj të fundit, qeveria dha dritën jeshile për versionin e plotësuar të Ribalancit të Buxhetit për vitin 2026, duke integruar amendamentet e miratuara. Ky veprim alokon burime të reja financiare për gratë që ushtrojnë aktivitet bujqësor, si dhe mbështetje të drejtpërdrejtë për personat e prekur nga dhuna në familje dhe ajo me bazë gjinore.

Ministria e Financave njofton se propozimi i rishikuar, i cili përmban ndryshimet e diskutuara në Komisionin parlamentar të Financave dhe Buxhetit, do të paraqitet në Kuvend për miratim përfundimtar. Në kuadër të këtij ribalanci, të ardhurat e përgjithshme buxhetore parashikohen të arrijnë 379.5 miliardë denarë, ndërsa shpenzimet totale janë projektuar në nivelin 425.8 miliardë denarë.

Fondet shtesë janë kanalizuar drejt përparësive të mirëpërcaktuara: rritje e subvencioneve në sektorin bujqësor, fonde shtesë për transportin hekurudhor, nxitje e veprimtarive sportive, si dhe përmirësim i kushteve për studentët dhe nxënësit. Njëkohësisht, janë siguruar mjete për shtresat e cenueshme të shoqërisë, përfshirë ndihmat sociale, shoqatat mbrojtëse, kuzhinat sociale dhe programet e deinstitucionalizimit, krahas burimeve shtesë për sistemin shëndetësor.

Një pikë qendrore e këtij rishikimi është ngritja e linjës kombëtare të urgjencës SOS si dhe vënia në funksion e dy qendrave të reja të kujdesit për viktimat e dhunës në familje dhe dhunës gjinore. Ribalanci gjithashtu përcakton një rritje të konsiderueshme të investimeve kapitale, të cilat kapin shifrën rreth 46 miliardë denarë, duke shënuar një zgjerim prej 14,5% krahasuar me buxhetin origjinal, teksa shpenzimet për mallra dhe shërbime janë ulur.

Deficiti buxhetor parashikohet të jetë në masën 46.3 miliardë denarë, që përfaqëson 4.1% të Prodhimit të Brendshëm Bruto, kurse rritja ekonomike mbetet e vlerësuar në nivelin 3.5% për vitin 2026.

The post Miratohet Ribalanci i Buxhetit 2026: Fonde shtesë për gratë fermere dhe linjën SOS për viktimat e dhunës appeared first on Albeu.com.

Në seancën e jashtëzakonshme të zhvilluar sot, Qeveria miratoi vendimin që përcakton llojin e energensave, afatin kohor dhe metodën e përllogaritjes së akcizës. Ky vendim mundëson zvogëlimin e akcizës për derivatet e naftës dhe, rrjedhimisht, uljen e çmimeve të benzinës dhe dizelit. Lajmin e bëri të ditur ministrja e Financave, Gordana Dimitrieska-Koçoska, përmes një postimi në profilin e saj në Facebook.

Sipas ministres së Financave, Qeveria po vijon të veprojë në mënyrë proaktive për t’u përballur me pasojat e krizës në Lindjen e Mesme. “Po e ndjekim me vëmendje situatën dhe po reagojmë në kohën e duhur, me synimin për të mbrojtur ekonominë dhe standardin e jetesës së qytetarëve”, deklaroi ajo në postim.

Dimitrieska-Koçoska vlerësoi se ndërhyrja në nivelin e akcizës do të ndihmojë në stabilizimin e çmimeve të derivateve të naftës, ndërsa në mënyrë të tërthortë do të ndikojë edhe në ruajtjen e qëndrueshmërisë së çmimeve të tjera.

“Edhe gjatë periudhës së ardhshme do ta ndjekim këtë qasje të përgjegjshme. Do ta vëzhgojmë situatën dhe do të ndërmarrim në kohë masa konkrete dhe reale për mbështetjen e ekonomisë dhe qytetarëve, me qëllim mbrojtjen e standardit të jetesës dhe ruajtjen e ekonomisë, e cila që nga fillimi i mandatit tonë po shënon një trend të rritjes së shpejtë”, theksoi ministrja.

The post Dimitrieska-Koçoska: Ekzekutivi miratoi uljen e akcizës për derivatet e naftës appeared first on Albeu.com.

Në mbledhjen e saj të fundit, Qeveria ka miratuar Strategjinë për luftën kundër mashtrimeve dhe mbrojtjen e interesave financiare të Bashkimit Evropian në vend për periudhën 2026–2030, njoftoi Ministria e Financave e Maqedonisë së Veriut.

Sipas Ministrisë, dokumenti është përgatitur në përputhje me obligimet e marra përmes Programit Nacional për Miratimin e së Drejtës së BE-së (NPAA), në kuadër të Kapitullit 32 – Kontrolli Financiar. Ky kapitull mbulon kontrollin e brendshëm financiar publik, revizionin e jashtëm, ruajtjen e interesave financiare të BE-së dhe mbrojtjen e euros nga falsifikimi.

Qëllimi i strategjisë është forcimi i disiplinës dhe transparencës gjatë përdorimit të fondeve publike, si atyre nacionale ashtu edhe mjeteve të BE-së, si dhe garantimi i mbrojtjes së interesave financiare të Bashkimit Evropian në RMV.

Strategjia është hartuar nga Njësia e Koordinimit për Luftën Kundër Mashtrimeve me Mjetet e BE-së (Njësia AFKOS) pranë Ministrisë së Financave, duke ndjekur një qasje pjesëmarrëse. Në proces janë përfshirë të gjitha palët e tanguara, përmes koordinimit ndërsektorial me institucionet e Rrjetit Institucional për Mbrojtjen e Interesave Financiare të BE-së në vend (Rrjeti AFKOS), organet dhe strukturat e sistemit për menaxhimin dhe kontrollin e mjeteve të Bashkimit Evropian, si edhe me Zyrën Evropiane për Luftën Kundër Mashtrimeve (OLAF).

Dokumenti për periudhën 2026-2030 parashikon zbatimin e reformave në disa fusha prioritare: parandalimin e parregullsive dhe mashtrimeve, evidentimin e parregullsive dhe rasteve të dyshuara për mashtrim, hetimin dhe ndjekjen penale të mashtrimeve, rikthimin e mjeteve finaciare dhe vendosjen e sanksioneve.

“Përmes zbatimit të strategjisë, pritet të përforcohet parandalimi i parregullsive dhe mashtrimeve, vendosja e masave efektive dhe proporcionale kundër mashtrimit, përmirësimi i mjeteve dhe teknikave për zbulimin e parregullsive dhe mashtrimeve, sigurimi i hetimit në kohë dhe trajtimi përkatës i rasteve të raportuara të dyshuara për mashtrim, si dhe përforcimi i kapacitetit për sigurimin e dënimeve proporcionale dhe dekurajuese, korrigjimet e përshtatshme financiare dhe dekurajimet në rast të parregullsive dhe mashtrimeve”, thonë nga Ministria e Financave.

The post Maqedonia e Veriut miraton strategjinë 2026–2030 kundër mashtrimeve dhe për mbrojtjen e fondeve të BE-së appeared first on Albeu.com.

Ndryshimet në Ligjin e Lizingut Financiar, të miratuara nga Kuvendi, sjellin një kuadër të përditësuar rregullator që përafrohet me standardet evropiane, mbikëqyrje më efikase, transparencë më të lartë dhe mbrojtje më të fortë për shfrytëzuesit. Nga Ministria e Financave bëhet e ditur se këto ndryshime përbëjnë një nga tetë hapat që po realizohen në kuadër të Axhendës reformuese.

Sipas Ministrisë së Fiancave, zgjidhjet e reja ligjore prekin kushtet për themelimin dhe funksionimin e ofruesve të lizingut financiar, qeverisjen korporative, instrumentet e mbikëqyrjes, transparencën e veprimtarisë dhe mbrojtjen e shfrytëzuesve të lizingut financiar. Rregullat e reja, thuhet më tej, nënkuptojnë kontrata më të qarta, mundësi për shlyerje të parakohshme pa shpenzime shtesë, kontroll më të madh mbi kompanitë e lizingut dhe standarde më të larta në mbrojtjen e shfrytëzuesve.

Për të forcuar transparencën dhe mbrojtjen e shfrytëzuesve, me ndryshimet përcaktohen qartë elementët e detyrueshëm që duhet të përfshijë çdo kontratë e lizingut financiar, përfshirë të gjitha kompensimet që lidhen me lizingun. Njëkohësisht, hapet mundësia që kontratat e lizingut financiar të nënshkruhen edhe në formë elektronike, nëse plotësohen kushtet sipas dispozitave për dokumentet elektronike, identifikimin elektronik dhe shërbimet konfidenciale, si dhe sipas rregullave për parandalimin e pastrimit të parave, mbrojtjen e të dhënave personale dhe dispozitave të tjera përkatëse.

Po ashtu, ndryshimet parashohin që shfrytëzuesi i lizingut financiar të mund t’i shlyejë detyrimet e mbetura, tërësisht ose pjesërisht, në çdo moment në pajtim me planin e amortizimit, pa kosto shtesë. Kjo i garanton atij edhe të drejtën për uljen e kostove të përgjithshme për periudhën e mbetur të kontratës.

Mbrojtja e shfrytëzuesve përforcohet edhe përmes përcaktimit se ofruesi i lizingut financiar nuk mund ta përdorë lëndën e lizingut financiar si kolateral pa pëlqimin paraprak me shkrim të shfrytëzuesit. Ky pëlqim duhet të jepet te noteri, në një dokument të veçantë – deklaratë, të ndarë nga kontrata e lizingut financiar, me kushtet e përgjithshme dhe me saktësimin e qartë të pasojave juridike të një pëlqimi të tillë.

Kompanitë që ofrojnë lizing financiar do të kenë detyrimin të publikojnë në faqet e tyre të internetit raportet financiare vjetore, së bashku me raportin dhe mendimin e revizorit të autorizuar. Në këtë mënyrë, si individët ashtu edhe personat juridikë që përdorin lizingun do të mund të krijojnë një pasqyrë më të qartë për punën e këtyre kompanive përpara se të hyjnë në marrëdhënie afariste.

Ndryshimet sjellin edhe forcim të mbikëqyrjes përmes përmirësimit të dispozitave kundërvajtëse, ndërsa njëkohësisht rrisin stabilitetin financiar të ofruesve të lizingut financiar duke e ngritur vlerën minimale të principalit bazë nga 6.000.000 në 30.000.000 denarë.

Në funksion të forcimit të integritetit të subjekteve që ushtrojnë lizing financiar, me këto ndryshime zbatohen edhe rekomandimet e Komitetit MONEYVAL pranë Këshillit të Evropës në fushën e parandalimit të pastrimit të parave dhe financimit të terrorizmit. Me to vendosen kritere për përshtatshmërinë dhe reputacionin që duhet t’i plotësojnë themeluesit dhe anëtarët e organeve drejtuese të ofruesve të lizingut financiar, thuhet në njoftimin e Ministrisë së Financave.

The post MF-Maqedoni: Ndryshime të reja për lizingun financiar, më shumë transparencë, mbrojtje për qytetarët dhe mbikëqyrje sipas standardeve evropiane appeared first on Albeu.com.

Më 14 korrik hyn në fuqi ligji i ri për Lojërat e fatit dhe lojërat argëtuese, i cili për herë të parë vendos rregulla ligjore për organizimin e lojërave “Giveaway”. Ministria e Financave bën të ditur se organizatorët do të jenë të detyruar të pajisen me leje, të paguajnë tatim në masën 18 përqind të vlerës së përgjithshme të fondit të çmimeve dhe të bëjnë publike rregullat si edhe rezultatet e lojës.

Sipas përcaktimit të ri ligjor, termi “giveaway” përkufizohet për herë të parë si lojë fati, ku pjesëmarrja kushtëzohet nga veprime të tilla si pëlqimi, etiketimi, ndarja apo publikimi i përmbajtjes. Këto organizohen me synim promovimin e produkteve ose shërbimeve përmes internetit, pajisjeve mobile apo platformave të tjera.

Për të marrë lejen, organizatori duhet të dorëzojë kërkesë në Ministrinë e Financave jo më vonë se 30 ditë para nisjes së lojës. Bashkë me kërkesën duhet të paraqitet edhe dokumentacioni përkatës, ku përfshihen rregullat e lojës, dëshmi për origjinën e çmimeve, dokumentet e regjistrimit dhe vërtetimet për pagesën e detyrimeve publike, ndërsa personat juridikë duhet të sjellin edhe certifikatë që nuk kanë ndalime për organizimin e lojërave të fatit.

Ligji parashikon që tatimi prej 18 përqind të fondit të çmimeve duhet të paguhet brenda tre ditëve nga marrja e lejes. Nëse kjo nuk ndodh, leja revokohet.

Po ashtu, rregullat e lojës me shpërblime duhet të publikohen para nisjes së saj, ndërsa fituesit duhet të shpallen jo më vonë se tre ditë pas shortit. Dorëzimi i çmimeve duhet të bëhet brenda afatit të parashikuar në rregullore, por ky afat nuk mund të kalojë 60 ditë nga shpallja e rezultateve.

Dispozitat ligjore përcaktojnë edhe çfarë duhet të përmbajnë detyrimisht rregullat e lojës, përfshirë të dhënat për organizatorin, kushtet e pjesëmarrjes, mënyrën e përzgjedhjes së fituesve, vlerën e çmimeve, procedurën e ankesave, si dhe ndalimin e pjesëmarrjes për punonjësit e organizatorit dhe anëtarët e familjeve të tyre të ngushta.

Një lojë “giveaway” nuk lejohet të zgjasë më shumë se një vit.

Sipas Ministrisë së Financave, këto rregulla të reja sjellin më shumë transparencë, siguri ligjore dhe mbrojtje për pjesëmarrësit, ndërsa njëkohësisht vendosin detyrime të qarta për organizatorët e këtyre lojërave promovuese.

The post Nga 14 korriku “Giveaway” futet në rregullim ligjor, nevojitet leje dhe tatim 18% për fondin e çmimeve appeared first on Albeu.com.

Ministria e Financave bëri të ditur se në Bankën Zhvillimore janë transferuar edhe 148.6 milionë denarë, përkatësisht 2.4 milionë euro, fonde që janë paraparë për përkrahjen e investimeve të kompanive vendase.

Sipas Ministrisë së Financave, pas këtij transferimi të fundit nga buxheti qendror drejt Bankës Zhvillimore, shuma e përgjithshme e mjeteve të vendosura në ekonominë vendase për realizimin e investimeve nga kompanitë ka arritur në 14.5 miliardë denarë ose 235.8 milionë euro.

“Buxheti i përgjithshëm për mbështetjen e kompanive vendase i parashikuar në buxhet është 250 milionë euro, kurse vlera e ciklit të investimeve vlerësohet në rreth 300 milionë euro. Mjetet që i siguroi Qeveria dhe plasohen te kompanitë vendase me kushte të favorshme, kanë për qëllim realizimin e investimeve private, me ç’rast do të sigurojnë zhvillimin e tyre dhe do të stimulojnë rritjen ekonomike”.

Nga ministria theksojnë se këto mjete do t’u vihen në dispozicion përfituesve përfundimtarë përmes bankave afariste, me normë interesi prej 1.95% në vit, afat kthimi deri në 15 vjet dhe periudhë grejs deri në 3 vjet.

The post Ministria e Financave transferon edhe 2.4 milionë euro për mbështetjen e bizneseve vendase appeared first on Albeu.com.

Gjatë periudhës janar–qershor, në Buxhet janë mbledhur gjithsej 170 miliardë denarë (169,9 miliardë denarë), çka nënkupton një rritje prej 8,6% në raport me të njëjtën periudhë të vitit të kaluar dhe një realizim të planit mbi 45%.

Në Kuvend, gjatë debatit në komision për ribalancin e Buxhetit për vitin 2026, ministrja e Financave Gordana Dimitrieska‑Koçoska deklaroi në ekspozenë e saj se financat publike mbeten të qëndrueshme, se të ardhurat po ecin në përputhje me pritjet dhe se shpenzimet janë fokusuar te zbatimi i detyrimeve ligjore dhe politikave prioritare për zhvillim.

Sipas saj, pjesa dërrmuese e të ardhurave sigurohet nga aktiviteti i rregullt ekonomik. Të ardhurat tatimore kanë arritur në 96,7 miliardë denarë, ndërsa nga kjo shumë, 43,3 miliardë denarë vijnë nga TVSH, e cila zë rreth 44,7% të totalit të të ardhurave tatimore. Nga tatimi mbi të ardhurat personale janë mbledhur 17,5 miliardë denarë, nga tatimi mbi fitimin 13,8 miliardë denarë, ndërsa nga akcizat janë realizuar 13,9 miliardë denarë.

Të dhënat tregojnë se të ardhurat nga tatimi mbi të ardhurat personale janë rritur me 11,7%, ato nga tatimi mbi fitimin me 14,5%, nga TVSH me 16,4%, si edhe detyrimet doganore të importit kanë shënuar rritje prej 8,3%.

Ministrja theksoi se këto lëvizje janë tregues i vazhdimësisë së aktivitetit ekonomik, i funksionimit të kompanive, i rritjes së pagave dhe i mbledhjes më efikase të të ardhurave, paralelisht me uljen e ekonomisë gri.

Në të njëjtën periudhë, kontributet sociale, si burim thelbësor për financimin e sistemit pensional dhe atij shëndetësor, kanë arritur në 58,8 miliardë denarë, ose 7,5% më shumë krahasuar me vitin e kaluar.

Sa u përket shpenzimeve, realizimi i buxhetit ka arritur në 205,9 miliardë denarë, me fokus në përmbushjen e rregullt të detyrimeve ligjore ndaj qytetarëve dhe ekonomisë.

Për kthimin e mjeteve nga tatimi solidar janë paguar 1,2 miliardë denarë. Për pensione janë alokuar 58,1 miliardë denarë, për shëndetësi 25,5 miliardë denarë dhe për mbrojtje sociale 7,6 miliardë denarë. Ndërkohë, komunave u janë transferuar 15,1 miliardë denarë përmes bllok‑dotacioneve, si edhe 2,4 miliardë denarë shtesë nga TVSH‑ja.

Në gjysmën e parë të vitit, shteti i ka shlyer të gjitha detyrimet ndaj kreditorëve vendorë dhe të huaj. Për interesa janë paguar 12 miliardë denarë, ndërsa për kthimin e principalit 60,7 miliardë denarë, gjë që, sipas ministres, ka rëndësi për ruajtjen e besimit të investitorëve dhe të institucioneve financiare ndërkombëtare.

Ajo nënvizoi se disiplinimi financiar dhe shlyerja e rregullt e detyrimeve vazhdojnë të jenë prioritet.

Shpenzimet kapitale për këtë periudhë kanë arritur në 19,4 miliardë denarë, duke shënuar rritje vjetore prej 53,5%. Këto fonde janë drejtuar për infrastrukturë, shkolla, çerdhe, objekte shëndetësore, energjetikë dhe zhvillim lokal. Për Korridoret 8 dhe 10‑d janë realizuar 6,3 miliardë denarë, ndërsa për projektet infrastrukturore komunale 2,1 miliardë denarë.

The post Dimitrieska-Koçoska: Në buxhet u arkëtuan 170 miliardë denarë, me rritje të të ardhurave dhe zgjerim të investimeve appeared first on Albeu.com.

Ministrja e Financave, Gordana Dimitrieska-Koçoska, deklaroi sot se pas dy viteve të menaxhimit të financave publike, në një periudhë të shoqëruar me vështirësi ekonomike, pasiguri globale dhe sfida të mëdha fiskale, vendi po regjistron rikuperim të qëndrueshëm dhe rritje të pandërprerë ekonomike.

Duke folur në një konferencë për shtyp në Qeveri, ku prezantoi bilancin e punës së bërë, ajo tha se gjatë këtyre dy viteve janë ndërmarrë vendime të vetëdijshme në favor të disiplinës, përgjegjësisë fiskale dhe zgjidhjeve afatgjata, në vend të populizmit afatshkurtër.

Sipas saj, treguesit makroekonomikë e konfirmojnë qartë këtë drejtim. Ajo rikujtoi se nga viti 2017 deri në vitin 2023 rritja mesatare ekonomike ishte rreth 1,8 për qind, ndërsa tani dinamika është dukshëm më e lartë, me 3 për qind rritje në vitin 2024 dhe 3,5 për qind në periudhën 2025 dhe 2026, duke reflektuar një trajektore stabile dhe pozitive të rritjes ekonomike.

Dimitrieska-Koçoska theksoi gjithashtu se inflacioni, i cili në vitin 2022 arriti në 14,2 për qind dhe goditi ndjeshëm standardin jetësor të qytetarëve, tani është ulur. Sipas saj, megjithëse paqartësitë globale vazhdojnë dhe pasojat e një prej krizave më të mëdha energjetike dhe ekonomike të dekadave të fundit ende ndihen, në muajin maj inflacioni ishte 4,8 për qind. Ajo shtoi se projeksionet për këtë vit mbeten brenda kornizës së stabilitetit të pritur.

“Kjo do të thotë se arritëm t’i amortizojmë tronditjet glonale të çmimeve dhe sërish të sigurojmë ambient të parashikueshëm ekonomik. Kjo është posaçërisht me rëndësi sepse inflacioni stabil krijon kushste për rritje reale të rrogave. Në këto dy vite rritja e rrogave vazhdoi me dinamikë të fuqishme. Rritja nominale e rrogave në vitin 2024 ishte 12,6 për qind, në vitin 2025 9,6 për qind, ndërsa edhe këtë vit presim rritje prej mbi 8 për qind. Por, akoma më me rëndësi është që pas një periudhe të gjatë qytetarët sërish kanë rritje reale të të ardhurave. Pas rënies së rrogave reale në vitin 2022 prej 2,9 për qind, në vitin 2024 ato u rritën për 8,8 për qind, ndërsa në vitin 2025 për plotësisht 5,3 për qind. Ky është sinjal kyç se fuqia reale blerëse po përmirësohet. jemi të vetëdijshëm për problemet e qytetarëve, i jetojmë së bashku dhe punojmë shumë për t’i zgjidhur”, potencoi ministrja.

Ajo nënvizoi se përmirësimi është i dukshëm pothuajse në të gjithë indikatorët statistikorë ekonomikë.

Ministrja tha se këto të dhëna do të mbeten si dëshmi e punës së bërë, duke shtuar se rezultatet ekonomike nuk arrihen brenda natës. Sipas saj, pas tyre qëndron angazhim i madh dhe punë e vazhdueshme në Ministrinë e Financave gjatë dy viteve të fundit.

Dimitrieska-Koçoska theksoi se rikthimi i besimit te politika fiskale ishte një nga motivet e saj personale për pranimin e këtij posti. Ajo sqaroi se, kur mori përgjegjësinë, objektivi kryesor ishte stabilizimi i financave publike. Me ribalancimin e Buxhetit për vitin 2024, sipas saj, u sigurua likuiditeti, u garantua pagesa e rregullt e rrogave, pensioneve dhe transfereve sociale, si edhe u mundësua shërbimi në kohë i detyrimeve të shtetit. Ajo shtoi se ky prioritet është reflektuar edhe në vendimet e mëvonshme buxhetore dhe do të mbetet i tillë edhe në vijim.

Në këtë periudhë, bëri të ditur ministrja, janë servisuar 4,4 miliardë euro nga borxhi publik, ndërsa deri në fund të vitit arrijnë edhe 983 milionë euro.

The post Dimitrieska-Koçoska: Pas dy vjetësh në drejtimin e financave publike, ekonomia ka hyrë në një fazë rritjeje të qëndrueshme appeared first on Albeu.com.