Ministria e Energjisë, Minierave dhe Burimeve Minerale po monitoron pa ndërprerje zhvillimet rajonale dhe evropiane, si dhe treguesit hidrologjikë brenda territorit të vendit. Sipas njoftimit zyrtar, situata në Maqedoni aktualisht paraqitet e qëndrueshme dhe nuk ka shenja që rënia e nivelit të ujërave në kontinent të rrezikojë sigurinë e prodhimit të brendshëm të energjisë.

Bashkë me SHA EMV, SHA MEPSO dhe institucione të tjera përgjegjëse, Ministria ndjek në mënyrë sistematike parametrat hidrologjikë, rezervat ekzistuese dhe parashikimet përkatëse, në mënyrë që të reagohet në kohë me masa të përshtatshme nëse rrethanat pësojnë ndryshime.

Aktualisht, niveli i akumulacioneve është i qëndrueshëm dhe siguron një administrim të besueshëm të resurseve hidrike të vendit. Shkalla e përgjithshme e mbushjes së tyre sillet rreth 70 për qind, çka mjafton për të plotësuar kërkesat momentale sipas planifikimeve prodhuese. Menaxhimi i kujdesshëm dhe në përputhje me planet operative garanton furnizim të sigurt me energji elektrike dhe një funksionim të qëndrueshëm të rrjetit elektroenergjetik. Paralelisht, hidrocentralet vijojnë të jenë burim i shërbimeve sistemike thelbësore për ruajtjen e stabilitetit të infrastrukturës energjetike.

Të dhënat mbi prodhimin e brendshëm japin sinjale pozitive. Statistikat zyrtare tregojnë se gjatë muajit maj, Maqedonia gjeneroi 462.653 MWh energji elektrike, duke mbuluar kështu 96,5 për qind të nevojave të konsumit të brendshëm, një tregues ky i një kontributi shumë më të fuqishëm të prodhimit vendor. Gjithashtu, SHA EMV raporton një rritje të ndjeshme prej 76 për qind të prodhimit hidrik në krahasim me të njëjtën periudhë të vitit të shkuar, ndërsa centralet me erë shënuan një zgjerim prej rreth 10 për qind.

Këto shifra dëshmojnë se zgjerimi i gamës së burimeve prodhuese, administrimi racional i rezervave ujore dhe përmirësimi i proceseve planifikuese po rrisin rezistencën e sektorit energjetik përballë sfidave të shpeshta klimatike.

Në të njëjtën kohë, po kryhen investime në kapacitete të reja për energji të rinovueshme, në përmirësimin e rrjetit elektroenergjetik, në sistemet e magazinimit me bateri, si dhe në nisma që synojnë rritjen e fleksibilitetit dhe aftësisë përshtatëse të sistemit ndaj luhatjeve klimatike dhe të tregut.

Momentalisht është në proces ndërtimi i fazës së dytë të parkut të erës “Bogdanci”, e cila do ta çojë kapacitetin e instaluar në 50 MW. Po ashtu, kanë nisur punimet për centralet fotovoltaike “Bitola 1” dhe “Osllomej 2”, ndërkohë që projektet “Bitola 2” dhe “Bitola 3” ndodhen në një stad të avancuar përgatitor. Njëkohësisht, po krijohen premisat për një shpërndarje më të gjerë të sistemeve të ruajtjes së energjisë elektrike, të cilat do të mundësojnë përdorim më efikas të burimeve të ripërtëritshme dhe stabilitet më të lartë të sistemit, bën të ditur Ministria.

The post Ministria e Energjisë: Pavarësisht situatës evropiane, sistemi elektroenergjetik i Maqedonisë mbetet i qëndrueshëm dhe i gatshëm për sfida appeared first on Albeu.com.

Ministria e Energjisë, Minierave dhe Burimeve Minerale ka përmbyllur me sukses Studimin e parë gjithëpërfshirës Kombëtar për Hidrogjenin, duke shënuar një hap vendimtar drejt integrimit në ekonominë rajonale dhe evropiane të këtij burimi energjie. Hartimi i dokumentit u bë i mundur falë asistencës teknike të financuar nga Bashkimi Evropian në kuadër të programit IPA II.

Ky projekt u zhvillua përmes Kornizës së Investimeve për Ballkanin Perëndimor (WBIF) dhe Instrumentit për Projektet e Infrastrukturës 10 (IPF10), duke qenë pjesë e nismës më të gjerë për ndërlidhjen e gazit natyror ndërmjet Maqedonisë dhe Serbisë. Ai përbën dokumentin e parë në nivel shtetëror që trajton në mënyrë të thelluar potencialet për krijimin, shpërndarjen, magazinimin dhe konsumin e hidrogjenit të gjelbër, një lëndë djegëse kyçe për të ardhmen e pastër energjetike.

Analiza konfirmon se vendi zotëron mundësi konkrete për të ndërtuar gradualisht një treg të hidrogjenit dhe për t’u pozicionuar aktivisht në infrastrukturën e ardhshme panevropiane. Sipas raportit, Maqedonia gëzon një pozicion gjeografik strategjik, së bashku me Greqinë dhe Serbinë, brenda Rrjetit Panevropian të Hidrogjenit dhe shtyllës evropiane të transportit ndërkufitar të njohur si European Hydrogen Backbone.

Një aspekt kyç i nënvizuar është se gazsjellësi i ri ndërlidhës me Greqinë, aktualisht në fazë ndërtimi, është konceptuar që në projekt për të transportuar 100% hidrogjen. Po ashtu, dokumentacioni i tenderit për përzgjedhjen e realizuesve të interkoneksionit të ardhshëm me Serbinë parashikon që edhe ky segment të jetë tërësisht i pajtueshëm me lëvizjen e pastër të hidrogjenit. Në këtë mënyrë, të dyja linjat do të shndërrohen në segmente thelbësore të shtyllës kombëtare të këtij energjenti dhe do të nxisin bashkimin rajonal me tregun evropian të hidrogjenit.

Me përpunimin e këtij studimi, Maqedonia i bashkohet grupit të paktë të shteteve në rajon që tashmë kanë një udhërrëfyes strategjik për zhvillimin e sektorit të hidrogjenit, çka përfaqëson një avantazh të konsiderueshëm në rrugëtimin e tranzicionit energjetik dhe përshtatjes me direktivat e Bashkimit Evropian.

The post Finalizohet studimi i parë kombëtar për hidrogjenin, Maqedonia hyn në hartën e ardhshme të korridorit evropian të energjisë appeared first on Albeu.com.

Ministria e Energjisë, Minierave dhe Burimeve Minerale ka bërë të ditur se në “Gazetën Zyrtare” është botuar Programi për ndryshimin e Programit për nxitjen e furnizimit me gaz në amvisëri për vitin 2026. Me këtë ndryshim, afati për paraqitjen e kërkesave për mbështetje financiare shtyhet deri më 31 tetor 2026.

Sipas ministrisë, ky vendim u krijon një mundësi të re të gjitha amvisërive që nuk kanë aplikuar ende, që të përfitojnë nga ndihma shtetërore. Mbështetja arrin deri në 30.000 denarë, gjegjësisht deri në 70 për qind të shpenzimeve të realizuara për kyçje në rrjetin e gazit natyror ose për blerjen e një kaldaje me gaz.

Për realizimin e kësaj mase janë vënë në dispozicion 3 milionë denarë, ndërsa shpërndarja e mjeteve do të bëhet sipas parimit ,,i pari që aplikon – i pari që përfiton”, deri në shterimin e fondit. Sipas ministrisë, zgjatja e afatit ka një synim të qartë, që sa më shumë qytetarë të mund ta shfrytëzojnë këtë masë, të ulin kostot e ngrohjes dhe në të njëjtën kohë të përdorin një burim energjie më të pastër dhe më efikas.

Të drejtë për aplikim kanë amvisëritë që gjatë vitit 2026 do të bëjnë kyçjen e shtëpisë në sistemin e shpërndarjes së gazit natyror, si edhe amvisëritë që do të blejnë një kaldajë me gaz për një objekt që tashmë ka qenë i lidhur në sistem deri më 1 janar 2026. Çdo amvisëri ka të drejtë të dorëzojë vetëm një kërkesë.

Ministria u ka bërë thirrje të gjithë qytetarëve të interesuar që t’i dorëzojnë në kohë aplikimet e tyre, në përputhje me kushtet e shpalljes publike. Informacione shtesë mund të gjenden në faqen zyrtare të Ministrisë – www.energy.gov.mk.

Pas skadimit të afatit, aplikimet e dorëzuara do të shqyrtohen nga një komision i ngritur nga Ministria, ndërsa mbështetja financiare do t’u transferohet të gjithë përfituesve që i përmbushin kushtet e përcaktuara. Nga ministria theksojnë se mbështetja për qytetarët, rritja e efikasitetit energjetik dhe krijimi i kushteve më cilësore të jetesës mbeten ndër prioritetet kryesore të Ministrisë së energjisë, minierave dhe burimeve minerale. Përmes masave të tilla, sipas tyre, Ministria vijon të zbatojë politika që sjellin përfitime të drejtpërdrejta për familjet dhe ndihmojnë në ndërtimin e një të ardhmeje energjetike më të sigurt, më të pastër dhe më të qëndrueshme.

The post Deri më 31 tetor 2026 afati i ri për subvencionin prej 30 mijë denarësh për kyçje në gaz natyror appeared first on Albeu.com.