Teknologjitë moderne dhe më efikase janë thelbësore për rritjen e sigurisë energjetike dhe përmirësimin e cilësisë së ajrit, deklaroi ministri i Mjedisit Jetësor dhe Planifikimit Hapësinor, Muamet Hoxha, në ceremoninë e inaugurimit të centralit të ri kogjenerativ të kompanisë “Tessa Energy” në Çair të Shkupit.

Hoxha tha se tranzicioni i gjelbër nuk nënkupton vetëm synime, por masa konkrete, veçanërisht në Shkup, ku lufta kundër ndotjes së ajrit mbetet një çështje e rëndësishme. Sipas tij, investimet në pajisje të reja dhe më produktive janë pjesë e kësaj qasjeje.

Gjatë aktivitetit, ku fjalën e morën edhe kryeministri Hristijan Mickoski dhe përfaqësues të kompanisë, u bë e ditur se faza e parë e investimit ka një vlerë prej 2.5 milionë eurosh.

Impianti përbëhet nga dy motorë gazi me rendiment të lartë. Ata gjenerojnë njëkohësisht 2.1 MW energji elektrike dhe 2.6 MW energji termike, ndërsa efikasiteti i përgjithshëm i shfrytëzimit të energjisë arrin deri në 90 për qind.

Një pjesë e rëndësishme e projektit është përdorimi i nxehtësisë së krijuar gjatë prodhimit të energjisë elektrike. Përmes sistemit të “Energy Ecolink”, kjo nxehtësi shërben për ngrohjen e ujit për rreth 500 amvisëri dhe 14 institucione në komunat e Çairit dhe Butelit.

Ministri Hoxha e cilësoi investimin si dëshmi të rolit që kanë bashkërisht aktorët e energjetikës dhe industrisë në krijimin e përmirësimeve në mjedis. Ai vlerësoi gjithashtu se projekti pasqyron mundësinë që sektori privat të orientohet drejt zgjidhjeve më të pastra dhe më efikase.

Në ceremoni u njoftua edhe nisja e fazës së dytë, e cila përfshin ndërtimin e një termocentrali të ri kogjenerativ me fuqi të instaluar prej 10.5 MW.

Ky investim pritet të kontribuojë në forcimin e rrjetit të ngrohjes qendrore dhe në shtimin e prodhimit vendor të energjisë elektrike.

“Projektet e këtij lloji tregojnë se rritja ekonomike, siguria energjetike dhe kujdesi për mjedisin mund të zhvillohen paralelisht, duke sjellë rezultate të prekshme për qytetarët”, deklaroi Hoxha, i cili uroi për përfundimin me sukses të projektit.

The post Hoxha: Investimet në centralet e gazit përmirësojnë ajrin dhe sigurinë energjetike appeared first on Albeu.com.

Një masë e madhe shkume u shfaq dje në digën ku lumi Lepenc bashkohet me Vardarin. Ky fenomen u raportua në Shkup dhe menjëherë pas njoftimit, ekipet e Qytetit dhe të Ministrisë së Mjedisit Jetësor dolën në terren për të kryer inspektimet e nevojshme.

Gazetari Zekirija Haxhiu bëri të ditur se megjithëse sot uji është i kthjellët, gjatë gjithë ditës së kaluar sipërfaqja ishte e mbuluar plotësisht nga shkuma. Ai shtoi se në pikën ku Lepenci derdhet në Vardar u pa një substancë e paidentifikuar dhe autoritetet përgjegjëse kanë marrë mostra, duke vijuar me inspektime për të përcaktuar natyrën e saj.

Mostrat janë mbledhur dhe analizat janë në proces. Nga Ministria e Mjedisit Jetësor u komunikua se procedurat e inspektimit nuk mund të kryhen me shpejtësi dhe kërkojnë të paktën 24 orë. Pritet që rezultatet konkrete të dalin të hënën.

Ministria e Mjedisit Jetësor theksoi se procesi i inspektimit është ende në zhvillim dhe verifikimet po realizohen sipas kornizës ligjore. Ata siguruan se sapo të përfundojnë të gjitha kontrollet dhe të merren rezultatet zyrtare, opinioni publik do të njoftohet në kohë dhe me transparencë për konstatimet dhe masat që do të ndërmerren.

Ndërkohë, nga ana e Qytetit të Shkupit u angazhua një dron për të identifikuar burimin e ndotjes, ndërsa shërbimet e Ndërmarrjes Publike “Ujësjellësi dhe Kanalizimi” u udhëzuan të merrnin kampione të ujit. Kryetari i Shkupit, Orce Gjorgjievski, paralajmëroi se shkaktari do të zbulohet shumë shpejt dhe ndaj tij do të ngrihet padi përkatëse./Alsat.mk.

The post Shkuma në Vardar është zhdukur, Inspektorati i Mjedisit pret rezultatet e analizave appeared first on Albeu.com.