Ndonëse institucionet përgjegjëse deklarojnë se interesi për shkollat profesionale është në rritje, gjendja në terren paraqitet ndryshe. Në shkollën e mesme profesionale “Boro Petrushevski” në Shkup, disa paralele në gjuhën shqipe janë përballë rrezikut të mbylljes për shkak të numrit të pamjaftueshëm të nxënësve. Mësimdhënësit paralajmërojnë se kjo situatë mund t’i lërë edhe pa vende pune.

Në vend të 200 nxënësve të paraparë për regjistrim, gjatë dy afateve të para janë regjistruar vetëm 164. Vështirësia më e theksuar paraqitet te drejtimet e komunikacionit. Në profilet “Komunikacion rrugor” dhe “Shpedicion” janë regjistruar vetëm nga 8 nxënës, ndërsa minimumi i përcaktuar nga Ministria e Arsimit është 12 nxënës për një klasë.

“Nga vendimet që kemi mar këtë vit nga ministria e arsimit thuhet shumë qartë se për të mbijetuar një klasë numri duhet të jetë 12 nxënës kështu që ne me këto statistika të nxënësve rrezikojmë që gati tre parale të zhduken nëse nuk ndryshohet ndonjë vendim nga Ministria e Arsimit, nëse nuk kanë mirkuptim. Unë do të kisha apleuar te Mnistria e Arsimit sepse ajo ka çelësin e funksionimit të paraleleve. Është pak problem sepse Ministria e Arsimit e llogarit afatin e dytë si afat përmbyllës dhe atje bëhet prerja e paraleleve. Ne kemi edhe një afat më 20 gusht”. – Kastriot Kasapi, mësimdhënës, shkolla profesionale QSHA “Boro Petrushevski”.

Sipas Kastriot Kasapit, mbyllja e këtyre paraleleve do të sillte pasoja edhe për stafin arsimor. Ai thotë se mungesa e nxënësve rrezikon fondin e orëve si për profesorët e lëndëve profesionale, ashtu edhe për ata të lëndëve të përgjithshme.

“Një profesor i lëndës proefesionale i ka 3 ose 4 orë në javë. Paramendoni një drejtim mos të jetë, po e marim si shembull shpedicionin, aty i pamundësohet fondi i orëve dhe mund ta ngelin edhe pa punë, Jo vetëm të lëndëve profesionale por edhe te lëndët e përgjithshme: histori, anglisht, matematikë, gjuhë shqipe, me një fjalë të gjithë jemi të rrezikuar tej mase”. – Kastriot Kasapi, mësimdhënës, shkolla profesionale QSHA “Boro Petrushevski”.

Nga ana tjetër, drejtori i shkollës Aleksandar Strezov shprehet se interesimi i nxënësve është përqendruar më shumë te makineria dhe te profilet katërvjeçare. Ai njëkohësisht kërkon që shteti të ofrojë më shumë përkrahje financiare për arsimin profesional.

“Drejtimi i makinerisë, tradicionalisht edhe këtë vit, si ai trevjeçar ashtu edhe ai katërvjeçar, tërhoqi interes më të madh nga nxënësit, ndërsa drejtimi i komunikacionit pati disi më pak interes, por numri i përgjithshëm është ky. Disa drejtime kërkojnë investime të mëdha, veçanërisht në laboratorë. Ne përpiqemi ta realizojmë këtë në bashkëpunim me Ministrinë e Arsimit, por edhe me sponsorë. Megjithatë, mund të them se ka ende shumë nevojë për financime në shkollat e mesme profesionale.” – Aleksandar Strezov, drejtor i shkollës profesionale QSHA “Boro Petrushevski”.

Afati i 20 gushtit shihet si mundësia e fundit për regjistrime të reja, por në të mund të marrin pjesë vetëm semimaturantët që kanë riprovime. Drejtuesit e shkollave profesionale vlerësojnë se e vetmja mënyrë për t’i shpëtuar paralelet me numër të ulët nxënësish mbetet vendimi i Ministrisë së Arsimit, në rast se ajo ul pragun e kërkuar të nxënësve për klasë. /Alsat.mk

The post Mësuesit kërkojnë shtyrje, shqetësim për mbylljen e klasave shqipe në Maqedoninë e Veriut appeared first on Albeu.com.

Ngjarjet e përsëritura të ditëve të fundit kanë shtuar shqetësimin lidhur me sjelljen e të rinjve dhe përhapjen e një klime ku dhuna po shihet gjithnjë e më shumë si normale. Psikologët theksojnë se ndryshimet e menjëhershme në sjelljen e një fëmije mund të jenë sinjal se ai po kalon dhunë ose po përballet me probleme brenda familjes.

Sipas specialistëve, këto tregues nuk duhen shpërfillur, ndërsa bashkërendimi mes shkollës dhe familjes mbetet thelbësor për të parandaluar dhunën mes bashkëmoshatarëve. Psikologu Safet Ballazhi vlerëson se ndër problemet më serioze është mungesa e përgjegjësisë nga disa prindër, të cilët, sipas tij, shpesh zgjedhin t’i mbrojnë fëmijët edhe kur ata shfaqin sjellje të dhunshme, në vend që të bashkëpunojnë me shkollën për zgjidhjen e situatës.

“Edhe nëpër vet shkollat kur kemi bisedime me arsimtarët vlerësojnë se nuk ka asnjë lloj ndëshkimi. Ndonjëherë kur arsimtarët i referohen ndonjë nxënësi se është problematikë dhe kur kanë biseda me prindërit, prindërit jo vetëm që nuk e ndëshkojnë fëminë po madje do i japin krahë dhe do i sulmojnë arsimtarët se kush janë ato të bëjnë atë dhe atë. Ne jetojmë në kohën e sindromit ”A e di ti kush jam unë”. E tani nëse një fëmijë prej anash e sheh këtë se prindërit e tyre ose të tjerë të rritur funksionojnë në atë mënyrë, ato vetëm e marrin përsipër dhe ata funksionojnë në atë mënyrë, unë jam i fortë, unë mund të bëj çfarë të dua, unë kam baba këtë ose atë. Normalisht atëherë nuk thirremi në vlera të mirëfillta por thiremi në ligjin e më të fortit”, tha Safet Ballazhi, psikolog.

Nga ana tjetër, Oda e Psikologëve nënvizon se mësuesit dhe bashkëpunëtorët profesionalë duhet t’i vërejnë në kohë ndryshimet te nxënësit, pasi ato mund të sinjalizojnë se fëmija ka nevojë për mbështetje.

“Një fëmijë me sukses të mirë deri para disa muajsh, vitin e kaluar, ose kur ka përfunduar gjysmëvjetorin e parë përnjëherë ka filluar të ketë ulje të suksesit, vjen i përgjumur, me veshmbathje jo të duhur dhe i lodhur, janë shenjat kryesore që tregojnë se diçka po ndodhë me të”, theksoi Emilija Boshkovska nga Oda e Psikologëve.

Edhe ministrja e Arsimit, Vesna Janevska, ka ritheksuar se pa përfshirjen e familjes nuk mund të ketë një përballje efektive me dhunën mes bashkëmoshatarëve. Ajo shtoi se shumë prej rasteve lidhen me neglizhencën ndaj fëmijëve dhe mungesën e edukimit në familje. Sipas Janevskës, institucionet do të vazhdojnë takimet dhe aktivitetet sensibilizuese me prindërit dhe shkollat, ndërsa njëkohësisht do të zbatohen masa më të ashpra për trajtimin e kësaj dukurie. Në procedurë parlamentare mbeten edhe ndryshimet ligjore që parashikojnë gjoba financiare për prindërit dhe kujdestarët e fëmijëve për të cilët do të konstatohet se kanë ushtruar dhunë mes bashkëmoshatarëve në shkollë./Alsat.mk.

The post Rritet alarmi për dhunën mes të rinjve në Maqedoni, psikologët kërkojnë rol më aktiv të prindërve appeared first on Albeu.com.

Procesi i aplikimit do të zhvillohet online, ndërsa më 24 qershor kandidatët do të duhet të dorëzojnë dokumentet e kërkuara në shkollat ku kanë paraqitur aplikimin.

Sipas kalendarit të parashikuar në konkursin e Ministrisë së Arsimit dhe Shkencës, shkollat janë të obliguara që më 25 qershor, deri në ora 12:00, të shpallin listat e renditjes me rezultatet e regjistrimit, në një hapësirë publike brenda shkollës dhe/ose në faqen e tyre zyrtare në internet.

Nëse në listën e renditjes paraqiten më shumë nxënës me numër të barabartë pikësh, atëherë do të organizohet testim kualifikues. Për afatin e dytë të qershorit, ky test do të mbahet më 29 qershor, datë në të cilën do të publikohen edhe listat përfundimtare të rezultateve në tabelën e shpalljeve të shkollës dhe/ose në faqen e internetit.

Ministria e Arsimit dhe Shkencës njofton se në afatin e dytë të regjistrimit janë në dispozicion 11.882 vende të lira. Nga ky numër, 7.404 vende janë për mësim në gjuhën maqedonase, 4.002 për mësim në gjuhën shqipe, 456 për mësim në gjuhën turke dhe 20 për mësim në gjuhën serbe.

Të dhënat e ministrisë tregojnë se në afatin e parë të regjistrimit në shkollat e mesme, i realizuar përmes aplikimit elektronik nga 12 deri më 15 qershor dhe me dorëzimin e dokumenteve më 16 dhe 17 qershor, kanë aplikuar gjithsej 15.075 nxënës. Prej tyre, 13.397 janë regjistruar.

Nga numri i përgjithshëm i nxënësve të regjistruar, 9.813 janë regjistruar në mësim në gjuhën maqedonase, 3.357 në gjuhën shqipe, 213 në gjuhën turke dhe 14 në gjuhën serbe.

Sipas llojit të arsimit, në afatin e parë janë regjistruar 3.010 nxënës në arsimin gjimnazor në gjuhën maqedonase, 1.165 nxënës në gjimnaz në gjuhën shqipe, 89 nxënës në gjimnaz në gjuhën turke dhe 14 nxënës në gjimnaz në gjuhën serbe.

Në arsimin profesional, gjatë afatit të parë të qershorit janë regjistruar 6.653 nxënës në mësim në gjuhën maqedonase, 2.133 nxënës në gjuhën shqipe dhe 124 nxënës në gjuhën turke.

Në arsimin artistik, ndërkaq, janë regjistruar 150 nxënës në drejtimin e artit muzikor në gjuhën maqedonase dhe 59 nxënës në drejtimin e artit muzikor në gjuhën shqipe. Për drejtimin e artit figurativ, përzgjedhja ende nuk ka përfunduar.

Ministria bën të ditur gjithashtu se në afatin e parë është planifikuar testim kualifikues në sektorin e shëndetësisë dhe mbrojtjes sociale, për profilin teknik farmaceutik në gjuhën shqipe, në shkollën e mesme mjekësore “Dr. Pançe Karagjozov” në Shkup. Testimi për nxënësit do të zhvillohet më 22 qershor, me provime nga biologjia dhe kimia, sipas programit mësimor të klasës së tetë dhe të nëntë.

Nga ana tjetër, Ministria ka njoftuar se në disa shkolla, pas afatit të parë, nuk ka më vende të lira. Konkursi për regjistrim në arsimin gjimnazor në gjuhën maqedonase është mbyllur në gjimnazin “Josip Broz Tito” në Manastir, në gjimnazet e Shkupit “Georgi Dimitrov”, “Rade Jovçevski Korçagin” dhe “Nikolla Karev”, si edhe në shkollat e mesme “Metodi Mitevski Brico” në Dellçevë, “Naum Naumovski Borçe” në Probishtip dhe “Metodi Mitevski Brico” në Shkup.

Po ashtu, ministria ka publikuar të dhëna edhe për shkollat profesionale, përkatësisht për sektorët dhe kualifikimet ku konkursi tashmë është mbyllur dhe për të cilat nuk do të pranohen aplikime në afatin e dytë të qershorit.

The post Afati i dytë për regjistrim në shkollat e mesme në Maqedoninë e Veriut hapet më 23 qershor appeared first on Albeu.com.