Policia e Kosovës ka zbuluar dhe konfiskuar një arsenal të konsiderueshëm armësh, municioni dhe pajisjesh ushtarake në fshatrat përreth Kalludrës, në Zubin Potok, bëri të ditur ministri në detyrë i Punëve të Brendshme, Xhelal Sveçla.

Sipas tij, operacioni është zhvilluar pas një hetimi intensiv të institucioneve të Kosovës, ndërsa detajet u prezantuan në konferencën e jashtëzakonshme të Policisë së Kosovës në Mitrovicë.

Sveçla tha se arsenali është gjetur në të njëjtën zonë ku, gjatë javëve të fundit, janë zbuluar tri varreza masive me mbetje mortore të 23 personave.

Ministri në detyrë e lidhi zbulimin e armatimit dhe të varrezave me shtrirjen e sovranitetit shtetëror në veri, vendosjen e rendit dhe ligjit, si dhe bashkëpunimin ndërinstitucional.

Ai theksoi se zbulimi i varrezave masive ka rikthyer në vëmendje përmasat e krimeve të kryera gjatë luftës së fundit në Kosovë.

Sipas deklarimit të tij, veriu i Kosovës, përveçse ishte vendi ku u kryen krime të rënda ndaj civilëve shqiptarë, maltretime dhe dëbime, u përdor edhe për fshehjen e trupave të viktimave.

Sveçla deklaroi se Serbia ka investuar vazhdimisht për ta mbajtur veriun e Kosovës të destabilizuar dhe rezistent ndaj institucioneve të sigurisë së Kosovës.

Ai shtoi se, gati tri dekada pas përfundimit të luftës, familjarët e personave të zhdukur vazhdojnë të presin gjetjen e mbetjeve mortore të më të dashurve të tyre. Kosova, ndërkaq, kërkon përgjegjësi për të gjithë ata që kanë marrë pjesë në krime, në fshehjen e trupave apo në mbajtjen e fshehtë të informacioneve për vendndodhjen e viktimave.

Në tri lokacione të kësaj zone janë gjetur mbetje mortore të 23 personave. Në lokacionin e parë janë zbuluar mbetjet e 13 personave, në të dytin të katër personave, ndërsa në të tretin mbetjet e gjashtë personave.

Gjatë konferencës, Policia e Kosovës prezantoi armët, municionin dhe pajisjet ushtarake të gjetura e të konfiskuara gjatë operacioneve në këtë zonë.

The post Sveçla: Armët u zbuluan pranë tri lokacioneve ku u gjetën varreza masive appeared first on Albeu.com.

Xhelal Sveçla, ministër në detyrë i Punëve të Brendshme, bëri të ditur se Vladimir Luçiq, shefi i Telekomit të Serbisë, është shpallur person i padëshirueshëm (non grata) në Republikën e Kosovës. Vendimi i ndalon atij në mënyrë të përhershme hyrjen, qëndrimin dhe kalimin transit në territorin e vendit.

Përmes një njoftimi në Facebook, Sveçla sqaroi se kjo masë është ndërmarrë për shkak të deklaratave publike të Luçiqit, raporton “Bota sot”. Ai theksoi se Kosova nuk do të pranojë veprime apo qëndrime që dëmtojnë rendin kushtetues, sovranitetin dhe integritetin territorial të saj.

Në njoftimin e plotë, Sveçla deklaroi se askujt nuk mund t’i lejohet të hyjë në Republikën e Kosovës dhe, duke qëndruar në territorin e saj, të veprojë ose të shprehet kundër rendit kushtetues, sovranitetit dhe integritetit territorial. Sipas tij, nuk do të tolerohet promovimi apo përkrahja e politikave që cenojnë autoritetin e institucioneve dhe vënë në dyshim shtetësinë e Republikës së Kosovës.

Ai bëri të qartë se, duke u mbështetur në deklaratat publike të Vladimir Luçiqit, ka vendosur ta shpallë atë person të padëshirueshëm (non grata), duke i ndaluar përgjithmonë hyrjen, qëndrimin dhe kalimin transit në Republikën e Kosovës. Sveçla ritheksoi se Republika e Kosovës është shtet i pavarur dhe sovran, ndërsa institucionet do të vijojnë ta mbrojnë me vendosmëri rendin kushtetues, sovranitetin dhe integritetin territorial të vendit.

The post Sveçla shpall “non grata” Vladimir Luçiqin, i ndalohet përgjithmonë hyrja në Kosovë appeared first on Albeu.com.