Përmes një njoftimi në X, Hoxha bëri të ditur se në këtë takim u diskutua për zhvillimet në Shqipëri, në Kosovë, në rajon, si edhe për dinamikat evropiane që paraqesin interes të përbashkët.

Ai theksoi se Kosova sapo ka kaluar një proces zgjedhor, ndërsa Shqipëria ka hyrë në fazën përfundimtare të negociatave për anëtarësim në Bashkimin Evropian. Sipas tij, në këtë kontekst, shkëmbimi i ideve, analizave dhe qasjeve, si edhe koordinimi i ngushtë, janë thelbësore për përmbushjen e interesave të dy vendeve.

“Ndërsa Kosova është në procesin e analizimit të rezultateve të zgjedhjeve për krijimin e institucioneve të reja dhe Shqipëria sapo ka hyrë në fazën përfundimtare të negociatave për anëtarësim në Bashkimin Evropian, shkëmbimi i ideve, analizave dhe qasjeve si dhe koordinimi i ngushtë me synim forcimin dhe zgjerimin e bashkëpunimit mbeten çelësi për avancimin e interesave tona reciproke e të përbashkëta”, shkroi ai.

Hoxha shtoi se veprimi i përbashkët dhe një vizion i qartë për të ardhmen do të ndihmojnë në ruajtjen dhe forcimin e mëtejshëm të lidhjes mes dy vendeve, në funksion të një Shqipërie më të fortë, më të begatë dhe të integruar në #BE, si edhe të një Kosove po aq të fortë, më të zhvilluar dhe më të sigurt.

“Duke vepruar së bashku dhe me vizionin e qartë të së ardhmes do të mund ta ruajmë dhe ta forcojmë më tej lidhjen tonë të pathyeshme, në funksion të një Shqipërie më të fortë, më të begatë dhe të integruar në #BE, dhe Kosovës po aq të fortë, më të zhvilluar e më të sigurt. Ky është njëkohësisht një investim kyç si për forcimin e bashkëpunimit rajonal ashtu edhe për të ardhmen tonë të përbashkët në familjen #euroatlantike”.

The post Hoxha dhe Konjufca bisedojnë në Forumin e Dubrovnikut për bashkëpunim të afërt në rrugëtimin drejt BE-së appeared first on Albeu.com.