Presidenti i Serbisë, Aleksandar Vuçiq, tha të hënën se Milan Radoiçiq, i cili ka pranuar përgjegjësinë për sulmin e armatosur kundër Policisë së Kosovës në Banjskë të Zveçanit në vitin 2023 dhe për të cilin është lëshuar një “Red Notice” nga Interpol, nuk po përballet me ndjekje penale për ndonjë vepër kriminale.

Siç u shpreh Vuçiq, procedurat që lidhen me të nuk burojnë nga akuza të caktuara penale, por nga rrethanat politike dhe tensionet ndërmjet Serbisë dhe Kosovës.

Ai deklaroi në një konferencë për media: “S’keni thënë pse Milan Radoiçiq është në njoftim të kuq. Nuk është për shkak të krimit, por për shkak të Kosovës”.

Këto deklarata vijnë në një moment kur rasti i Banjskës mbetet ndër çështjet më delikate të sigurisë në rajon, duke nxitur reagime të shumta si nga institucionet në Kosovë, ashtu edhe nga partnerët ndërkombëtarë.

Njohësi i sigurisë, Fidair Berisha, në një prononcim për “Bota sot”, i kundërshtoi deklaratat e presidentit serb Aleksandar Vuçiq, duke vlerësuar se ato kanë për qëllim të zbehin përgjegjësinë e Milan Radoiçiqit për sulmin në Banjskë.

Berisha tha: “Sigurisht që këtë deklaratë të presidentit Vuçiq e shoh si vazhdimësi të një qasjeje që synon ta relativizojë përgjegjësinë e Milan Radoiçiqit për sulmin terrorist në Banjskë. Pretendimi se ai nuk po ndiqet për krim, por vetëm “për shkak të Kosovës”, bie ndesh me faktin se Radoiçiq ka marrë publikisht përgjegjësinë për organizimin e sulmit dhe ndaj tij ekziston një njoftim i kuq i Interpolit në bazë të procedurave penale të zhvilluara nga autoritetet e Kosovës”.

Sipas tij, një qasje e tillë nga Serbia përcjell një sinjal shqetësues, pasi lë përshtypjen se po ofrohet mbrojtje politike për një person të akuzuar për sulmin në Banjskë.

Ai theksoi se kjo çështje nuk ka të bëjë vetëm me raportet mes Kosovës dhe Serbisë, por edhe me respektimin e sundimit të ligjit dhe me bashkëpunimin ndërkombëtar në luftën kundër krimit dhe terrorizmit.

“Mendoj se kjo qasje dërgon një mesazh shqetësues, sepse krijon përshtypjen e mbrojtjes politike për një person të akuzuar për një sulm të rëndë të armatosur. Kjo nuk është vetëm çështje e marrëdhënieve Kosovë–Serbi, por edhe e respektimit të parimit të sundimit të ligjit dhe bashkëpunimit ndërkombëtar në luftën kundër krimit dhe terrorizmit.

Konsideroj se partnerët ndërkombëtarë duhet ta marrin seriozisht këtë retorikë dhe të kërkojnë bashkëpunim të plotë nga Serbia me mekanizmat e drejtësisë. Nëse një person i kërkuar për një sulm të tillë mbetet i mbrojtur politikisht dhe nuk përballet me drejtësinë, kjo rrezikon të dëmtojë besueshmërinë e angazhimeve të Serbisë ndaj sundimit të ligjit dhe stabilitetit rajonal”, nënvizoi ai për “Bota sot”.

Edhe eksperti i sigurisë, Bedri Elezi, vlerësoi se deklaratat e Aleksandar Vuçiqit për Milan Radoiçiqin përbëjnë sfidë ndaj drejtësisë ndërkombëtare dhe tentojnë ta zhvendosin një rast penal të lidhur me sulmin në Banjskë në një kornizë politike.

Sipas Elezit, kjo reflekton mungesë vullneti nga Serbia për të bashkëpunuar në ndjekjen e përgjegjësisë penale.

Ai u shpreh: “Deklaratat e presidentit të Serbisë, Aleksandar Vuçiq, lidhur me Milan Radoiçiqin nuk përbëjnë më thjesht një qëndrim politik, por një sfidë të hapur ndaj parimeve themelore të drejtësisë ndërkombëtare dhe bashkëpunimit juridik mes shteteve.

Pretendimi se Radoiçiq “nuk kërkohet për krim, por për shkak të Kosovës” është një përpjekje e qartë për të zhvendosur një çështje penale të rëndë në një narrativë politike. Kjo narrativë bie ndesh me faktin se rasti lidhet me sulmin e armatosur në Banjskë të vitit 2023, një incident që ka cenuar drejtpërdrejt sigurinë e institucioneve të Republikës së Kosovës dhe stabilitetin rajonal.

Në vend të distancimit institucional nga një individ që ka marrë publikisht përgjegjësinë për një akt të tillë, diskursi politik nga Beogradi ka shkuar në drejtim të relativizimit dhe mbrojtjes indirekte. Kjo qasje krijon një perceptim serioz në opinionin ndërkombëtar se ekziston një mungesë e vullnetit politik për bashkëpunim në ndjekjen e përgjegjësisë penale, sidomos kur ajo prek struktura të ndërlidhura me interesat shtetërore”.

Elezi shtoi se rasti i Banjskës nuk duhet parë si një ngjarje e shkëputur, por si një rast që kërkon hetim edhe për strukturat mbështetëse dhe për përgjegjësinë politike. Sipas tij, mungesa e një aktakuze gjithëpërfshirëse hap rrugë për mohim politik dhe shtrembërim të fakteve.

“Rasti Banjska nuk mund të trajtohet si episod i izoluar kriminal. Ai përfaqëson një model të organizimit të dhunës së strukturuar, ku pyetjet kryesore nuk lidhen vetëm me ekzekutorët, por me zinxhirin e mundshëm të komandës, mbështetjes logjistike dhe politike. Pikërisht këtu lind edhe dimensioni më i ndjeshëm: përgjegjësia shtetërore dhe politike, e cila nuk mund të fshihet pas narrativave deklarative.

Në këtë kontekst, mungesa e një aktakuze gjithëpërfshirëse që të adresojë jo vetëm autorët e drejtpërdrejtë, por edhe strukturat mbështetëse dhe dimensionin ndër-shtetëror të mundshëm, përbën një boshllëk serioz në trajtimin juridik të rastit. Ky vakum institucional i jep hapësirë mohimit politik dhe deformimit të fakteve.

Prandaj, deklaratat e Vuçiqit nuk janë thjesht koment politik, por pjesë e një diskursi që rrezikon të normalizojë mos-ndëshkueshmërinë për aktet e dhunës së organizuar. Nëse figura të tilla mbrohen politikisht në vend që të distancohen juridikisht, atëherë vihet në pikëpyetje jo vetëm sundimi i ligjit në Serbi, por edhe serioziteti i angazhimeve të saj ndërkombëtare”.

Në fund, Elezi theksoi se çështja e Banjskës tashmë është një provë për drejtësinë ndërkombëtare dhe se përgjegjësia penale nuk duhet të zëvendësohet me narrativa politike.

“Ky rast tashmë e tejkalon kornizën Kosovë–Serbi. Ai është test për Bashkimin Evropian dhe partnerët ndërkombëtarë: nëse parimi i përgjegjësisë penale zbatohet pa standarde të dyfishta, apo nëse lejohet që narrativat politike të zëvendësojnë përgjegjësinë juridike.

Në fund, Banjska mbetet një pikë ndarëse mes dy botëve: asaj të rendit ndërkombëtar të bazuar në ligj, dhe asaj të politikës së forcës, ku përgjegjësia relativizohet dhe dhuna trajtohet si instrument i justifikueshëm politik” – përfundon ai për “Bota sot”.

The post Ekspertët kritikojnë deklaratën e Vuçiqit për Radoiçiqin: Po minohet drejtësia ndërkombëtare appeared first on Albeu.com.

Naim Miftari, ish-epror dhe luftëtar i UÇK-së e TMK-së, ka komentuar për “Bota sot” shfaqjen e Milan Radoiçiqit dhe të ashtuquajturve “Mjekrra Kuqe” në protestën e organizuar në mbështetje të pushtetit të presidentit serb, Aleksandar Vuçiq.

Sipas Miftarit, kjo paraqitje e tyre vetëm sa e përforcon atë që, siç thotë ai, tashmë njihet gjerësisht në opinionin ndërkombëtar.

“Dalja e Radoiçiqit dhe “Mjekrra Kuqeve” në protestën për mbrojtjen e pushtetit të Aleksandar Vuçiqit, bashkë me deklarimin e Vuçiqit për terroristin Milan Radoiçiç, e vërteton edhe një herë atë që e di e gjithë bota: që Radoiçiqi është thjesht një vegël e Vuçiqit dhe Vulinit.

Është interesant se në kohën kur ndodhi sulmi në Banjskë, Vuçiq kishte shkuar në OKB, në Nju Jork të Amerikës, në mënyrë që të ishte larg Kosovës pikërisht kur pritej të realizohej marrja e veriut të Kosovës nga terroristët serbë. Po ashtu, interesant mbetet edhe fakti se për këtë plan dyshohet të jetë korruptuar edhe një komandant bashkë me stafin e tij, i cili kishte nën drejtim qindra ushtarë në veriun e Kosovës dhe ishte pjesë e një strukture ushtarake të një shteti anëtar të NATO-s. Operacioni i fshehtë drejtohej nga Aleksandar Vulin, i cili çdo orë i raportonte shefit të tij, A. Vuçiq”, ka deklaruar ai.

Më tej, ai ka vlerësuar se veprimi i institucioneve në veriun e Kosovës ka pësuar ndryshim të madh në raport me periudhat e mëhershme, duke nënvizuar se sot shteti ka më shumë kontroll dhe vendosmëri në terren.

“Por, llogaritë i bënë gabim. Qeveria e Kosovës, kryeministri Kurti dhe policia e Kosovës nuk ishin si në të kaluarën, kur Hashim Thaçi kishte dërguar policinë në veri për sundim të ligjit, ndërsa në prapaskenë përgatitej ndarja e veriut me Serbinë. Pas vrasjes së Enver Zymberit dhe plagosjes së shumë policëve të Kosovës, shteti i Kosovës ishte tërhequr nga veriu me turp.

Në rastin e Banjskës, Thaçi ndodhej në burg, ndërsa qeveria e Kosovës me Albin Kurtin kishte vendosur seriozisht që asnjë pëllëmbë e Kosovës të mos sundohet apo kontrollohet nga bandat e Beogradit, bandat e drogës dhe të kontrabandës”, ka shtuar ai.

Në fund, Miftari ka vënë theksin te roli i institucioneve aktuale të Kosovës dhe ai i faktorëve ndërkombëtarë në zhvillimet që lidhen me sigurinë në veri të vendit.

“Kosova kishte zot shtëpie dhe djem që e mbrojnë shtetin e Kosovës. Kosova kishte fat që Franca kishte tërhequr ushtrinë e saj pro-serbe nga veriu i Kosovës. Po ashtu, fat tjetër ishte që një agjent francez i DGSE-së ishte në burg në Hagë. Dhe fat ishte që tani kishim kryeministër Albin Kurtin, presidenten Vjosa Osmani dhe ministrin e MPB-së Xhelal Sveçla. Kosova ishte me fat”, ka përfunduar Miftari për “Bota sot”.

The post Ish-eprori: Radoiçiqi vepron nën ndikimin e Vuçiqit dhe Vulinit, Banjskën e lidh me skenarë nga Beogradi appeared first on Albeu.com.

Më shumë se gjashtë muaj pas sulmit terrorist në Banjskë, të udhëhequr nga grupi i armatosur i Milan Radoiçiqit në Serbi nuk ka rezultate në ndjekjen penale të përgjegjësve. Por, në një njoftim të fundit nga Prokuroria e Lartë Publike në Beograd, thuhet se hetimi është duke vazhduar në bashkëpunim me Ministrinë e Punëve të Brendshme dhe Doganën për të përcaktuar origjinën e armëve dhe kanalet përmes të cilave kanë arritur në Kosovë.

Për ekspertët juridikë mungesa e progresit në këtë rast është shqetësuese.

“Nga pikëpamja juridike asgjë nuk ka ndodhur institucionalisht në Serbi. Ende kemi vetëm një të dyshuar dhe hetim në mënyrë nominale. Nuk kemi asnjë informacion për hetimin e mundshëm edhe kundër personave të tjerë të përmendur”, tha Lluka Jovanoviq, jurist.

Radoiçiq, një biznesmen kontrovers, është i afërt me regjimin aktual të Aleksandër Vuçiqit.

Ekspertet juridikë paralajmërojnë se në Serbi nuk ka gatishmëri politike për të zbuluar rastin deri në fund.

“Për sa i përket vullnetit politik, mendoj se fatkeqësisht tani situata është e tillë që nuk jam i sigurt se sa mund të flasim për mungesën e vullnetit politik aq sa për mungesën e interesit politik për vetë incidentin”, shtoi ai.

Në anën tjetër, në Kosovë ka nisur konfiskimi i pronave që i ka poseduar Radoiçiq. Një pjesë e opinionit ne Serbi beson se incidenti në Banjskë do të ketë pasoja politike për shtetin serb dhe është një test i rëndësishëm për cilësinë e vetë sistemit gjyqësor në Serbi.

The post Milan Radoiçiq nën hetime nga Serbia, por i lirë appeared first on Albeu.com.