I ftuar në emisionin “Të Paekspozuarit” në MCN TV, Baze tha se është nevojë emergjente për Shqipërinë, decentralizimi i pushtetit vendor, pasi bashkitë nuk kanë kompetenca dhe gjithçka varet nga qeverisja vendore. Sipas Bazes, “pushteti vendor në Shqipëri, është pushteti më qesharak në botë”.

“Kam një sërë dilemash dhe dyshimesh se ç’mund të prodhojë për keq mandati i katërt, ashtu siç ka edhe gjëra që mund ti prodhojë për mirë, por ajo që jam i bindur është fakti që Rama, është shumë i fortë politikisht brenda partisë dhe shumë i fortë në të gjithë vendin, është një shans i rrallë për të, sepse mandatet e tjera nuk i ka patur kaq të forta dhe solide, që në mandatin e katërt ai të bëjë të kundërtën e asaj që i ka dhënë mandati popullor, të decentralizojë pushtetin vendor, që është nga gjërat më të rënda dhe defektet më të mëdha që ka Shqipëria dhe që është nga detyrimet për ne, për të hyrë në BE dhe duhet të kthejë sytë nga fshati, i cili përbën 2/3 e shtetit shqiptar. Kur them duhet të decentralizojë pushtetin vendor, duhet të them që pushteti vendor në Shqipëri, është pushteti më qesharak në botë. Kryetarët e bashkive nuk kanë në dorë asgjë, përveçse të marrin rrogën dhe të paguajnë rrogat. Populli nuk e di dhe i quan kryetarë bashkie, por po ta dijë i zë me gurë…

Ata nuk kanë asgjë në dorë. Taksat dhe tatimet ia merr qeveria, ekonominë lokale e ka qeveria qëndrore, ti mund të kesh në bashkinë tënde një minierë ari apo kromi, apo pus nafte, por janë të qeverisë qëndrore. Biznesin e vogël e ka pa taksa, të vetmet taksa që mund të merrte bashkia. Investimet vijnë nga qeveria qëndrore. Shëndetësia dhe arsimi varen nga qeveria qëndrore. Për turp të madh, këto të fundit që po them janë gjëmat e Edi Ramës. Ujësjellësit, varen nga qeveria qëndrore, OSHEE varet nga qeveria qëndrore, hipoteka po kështu. Më fal, përse mund ti ankohesh ti kryetarit të Bashkisë së Vlorës? Më thuaj. Hipotekën, nuk e pyet ai, nuk e qas fare. Ujësjellësin e ka Bela, nuk e pyet fare. OSHEE, e ka ai tjetri. Shëndetësinë, ajo e shëndetësisë. Arsimin e ka ajo e arsimit. Taksat i merr ky i financave. Çfarë do të bëjë ai ditëzi, përse do ti bërtasësh atij? Çfarë do të bëjë ai? Lejet i ka brigadierja e ndërtimit që është në Tiranë dhe i jep për të gjithë Shqipërinë, tani çfarë pune ka bashkia? Në këtë pikë ku ka arritur centralizimi i pushtetit vendor në Shqipëri, i ka bërë qesharakë. Është e hidhur ta them. Pushteti më i decentralizuar në Shqipëri, ka qenë pushteti i Enver Hoxhës. Kryetari i komitetit bënte të gjithë punët, sot kryetari i bashkisë nuk bën dot asnjë punë.

Sfida kryesore e Edi Ramës, është të dorëzojë pushtetin lokal në dorë të atyre që janë zgjedhur. Pushteti lokal është kot, në dorë të qeverisë qëndrore dhe me xhelozi të madhe, se mos kanë ndonjë kompetencë kryetarët e bashkive. Çdo gjë, çdo fond, çdo gjë që lëviz, është ose nga Fondi i Zhvillimit ose nga linjat e ministrive që investojnë. Kryetarët e bashkive janë thjesht disa vasalë politikë që punojnë. Sfida kryesore e Ramës, që të decentralizojë pushtetin, ta dorëzojë, ta kthejë te i Zoti dhe është komod, për shkak se ka shumicë të madhe në Parlament dhe shumicën e pushtetit vendor, pra e ka pak më të lehtë, sepse të vetëve po ua dorëzon hë për hë…”, tha Baze.

Reforma e dytë ku qeveria socialiste duhet të fokuset, sipas Bazes, është “integrimi i fshatit në shtetin shqiptar” dhe zhvillimi i bujqësisë.

“E dyta që mendoj se është problem i madh, integrimi i fshatit shqiptar në shtetin shqiptar. Kjo që bëjnë këta, me fshatin shqiptar, ka shkatërruar gjithë bujqësinë, që është dega më e rëndësishme e ekonomisë kombëtare, që i ka ardhur fati në derë për shkak të turizmit. Meqenëse turizmi mbërriti në Shqipëri, bujqësia është e vetmja degë e ekonomisë, që mund të përfitonte nga turizmi dhe të kapilarizonte, të ardhurat nga turizmi, në të gjithë ekonominë shqiptare.

Bujqësia shqiptare është e paralizuar së pari nga ligji 7501, për shkak të ndarjes abuzive të tokave, të cilat kanë 35 vjet pa punuar. Nuk ka asnjë komb, as një shtet në botë, që 35 vjet, në mënyrë të papërgjegjshme, lejon që një tufë fshatarësh shqiptarë, të kenë marrë një copë letër që e kanë humbur edhe atë dhe të thonë, ajo toka atje është e imja, mos e prek, se unë jam në Greqi po punoj tokën e grekut apo italianit. Ka 35 vjet që Shqipëria nuk zhvillohet, sepse çdo investitor që do të shkojë në fshat, nuk kanë me kë të flasin për tokën. Qeveria nuk flet sepse ua ka ndarë fshatëarëve, ndërsa fshatarët nuk kanë letrat…

Për këtë arsye qeveria duhet të bëjë një reformë të thellë e cila ka kosto politike, por Edi Rama e ka këtë luks sepse nuk ka më kosto politike. Po të ishte në situatë tjetër nuk e bënte dot. Ndaj them se duhet të jetë prioritet i këtij mandati. Edi Rama nuk e zhbën dot ligjin 7501, sepse ajo është bërë tani, por mendoj se mund të bëhen disa reforma që ta tejkalojnë efektin e keq të ligjit 7501. Fjala vjen duhet të vendoset një koefiçent boniteti mbi tokat, që kjo tokë është pasuri kombëtare, duhet të japë për Shqipërinë kaq lekë, ti thua që është e jotja, por duhet të dorëzosh kaq lekë, ndaç punoje ose jo, ndryshe shteti e shtetëzon dhe mund të nxisë forma të tjera të zhvillimit të bujqësisë.

Mund të jetë nxitja e atyre, se ka emër të keq tu thuash kooperativa bujqësore, por kooperative ose ferma, si të duash quaje, investitorët që duan të investojnë, ti kthejnë në aksionerë pronarët e tokave, me përqindje modeste sa i takon, dhe të zhvillojnë bujqësinë duke konsideruar edhe ata si pjesë të biznesit të tyre. Kjo që fshatarët, edhe kur duan ta shesin, ta shesin sikur ësht truall për kullë… Toka bujqësore në të gjithë botën e ka çmimin 1 dollarë për metër katror, në Francë e ka 1 dollarë. Këtu ta shesin sikur do të bësh ndërtesë. Nuk ka njeri që ble tokë bujqësore 20 dollarë metri katror, që të mbjellë domate që bëjnë 30 cent. Pra reforma për fshatin, duhet të përfshijë tejkalimin e efekteve negative të ligjit 7501, subvencione të forta për prodhimin blegtoral dhe bujqësor dhe rregullimin e jetës sociale në fshat, që për mua është një nga gjërat kryesore që mund të nxisë kthimin e njerëzve në fshat.

Të nxitet zhvillimi, një njeri që ka jetuar në Tiranë, nuk mund të kthehet në fshat që nuk ka as ujë dhe as drita, as kanale, që ka qenë të egër rrugëve dhe njerëz të çmendur që mund të të vrasin… Duhet që rregullat me të cilat administrohen qytetet, të administrohen edhe fshatrat. Njerëzit nuk kthehen, për shkak të infrastrukturës, për shkak të subvenciove që mungojnë dhe nuk kthehen edhe për shkak të jetës sociale, nuk ka më vajza që duan të martohen në fshat, duket banale, por nuk gjen ndonjë vajzë ta martosh në fshat dhe nëse nuk martohen më njerëz në fshat dhe nuk lindin më fëmijë, nëse ky cikël mbyllet siç po mbyllet, Shqipëria do të kthehet në një kapanon gjigand, ku njerëzit flenë në qytet, ata që jetojnë dhe punojnë këtu, të tjerët jashtë shtetit, kthehet në një vend konsumator pa asnjë vlerë.

Reformat e mëdha që duhet të bëjë qeveria në mandatin e katërt, sepse e ka të plotë mandatin dhe nuk ka kosto, madje edhe sikur të humbasë zgjedhjet e tjera, i bën nder vetes po të bëjë këto reforma, me qëllim që fshati shqiptar të integrohet në shtetin shqiptar. Fshati shqiptar nuk ka asnjë lidhje me shtetin shqiptar, as paguan taksa, as merr shërbime nga shteti, ndonjë punë private bëjnë, jetojnë në gjendje gjysmë primitive, është turp për një vend që thotë se do të hyjë në Bashkimin Europian”, deklaroi Baze.

The post Turp për një vend që kërkon të hyjë në BE”/ Baze tregon dy reformat që Rama duhet t’i bëjë edhe nëse merr kosto appeared first on Albeu.com.

Debati mbi kullën më të lartë të Tiranës ndodhi befasisht. Edhe pse leja ishte dhënë qysh në muajin mars, disa zëra që e kishin përshkruar atë si një “qokë” të pushteti për familjen Berisha nuk është se u morën shumë seriozisht. Në të vërtetë, grupi që ndërton kullën, është më i madh se ai që ka emrin dhe po lakohet.

Në thelb grupi që qëndron jo vetëm pas kësaj kulle, por pas rreth 1 miliard eurosh ndërtime në Tiranë, ka brenda vetes pronarët e mëdhenj të grupit “Klan”, të cilët shërbejnë si telefon i prishur mes Berishës dhe Ramës. Ramës duke i shitur pallavra për Berishën dhe Berishës duke i shitur miqësinë me Ramën si kërcënim për ta braktisur, po nuk i dëgjoi.

Janë të njëjtët që ndërtojnë në fund të “Rrugës së Kavajës”, duke shkatërruar qysh në kohë të Berishës, ndoshta muzeun më të mirë në Ballkan që ka pasur Shqipëria, atë të Shkencave të Natyrës, dhe në disa kantiere të tjera në zona të mira të Tiranës. Brenda këtij grupi, Ilir Shtufi është thjesht njeriu që i ka dhënë garanci pushtetit se brenda atij grupi ai është njeri i Berishës dhe për këtë kullë Sali Berisha nuk do të bëjë zhurmë.

Por brenda grupit ka dhe biznesmenë të afërt me ministra socialistë, që kanë ndihmuar njeriun e Berishës të marrë dhjetëra licenca për parqe fotovoltaike dhe tenderë rindërtimi.

Zhurma filloi pikërisht kur u pa se ky premtim i tij po mbahej. Për muaj të tërë Sali Berisha dhe njerëzit e tij jo vetëm që shmangën çdo shenjë agresiviteti ndaj projektit, por e kishin ndërtuesin sponsorin e tyre kryesor në çdo aktivitet të Foltores. Dhe këtë më mirë se pjesa e pushtetit e dinë vetëm militantët e Foltores.

Ndërtuesi është pjesë e njerëzve të besuar të Shkëlzen Berishës në fushën e investimeve të ndërtimit, pasi ndërtuesi është kushëri i parë i Shkëlqim Beshirit, që shfaqet befas pronar atu ku kthehen tokat e Teqes së Zallit në Ksamil, ku kthehet prona e familjes Delvina në Sarandë, apo ku merr lejen si investitor strategjik në Lalëz tek ish- toka e investitorit arab që u rrah nga banditët lokal aty.

Kush ka kuriozitet për të si investitor mund të ndjekë linkun e kompanisë së tij që është publike. https://lim-em.al/godinat. Mendoni pak Berishën tani të lejonte njerëzit e kundërshtarëve të tij politik, të bënin qoftë dhe një godinë. Ua çonte rruspat natën.

Ndërsa kushëriri i tij i pare, që është ndërtuesi i kullës, aktualisht ka këto kantiere në Tiranë bashkë me këta ortakët që përmenda më lart. Kompania Nova construction në Tiranë në fushën e ndërtimeve si më poshtë: https://novaconstruction.al/al/

Ka 85 mijë metra katror e gjitha sipër dhe nën toke, 200 metra e larte pas TOB (Kulla)

Ka ne proces ndërtimin te muzeu i shkencave “Garden building”, kompleks pallatesh 27 mije metra katror

Ka ne proces ndërtimin te “Mine Peza”, te marketi Vefa, 35 mije metra katror

Ka ne proces një te “Komuna Parisit”, objekt i madh 30 mije metra katror investim. Sapo e ka nisur këtë.

Ka ne proces ndërtim ne Laprake 15 mije metra katror

Ne proces përballë “Casa Italia” 5 godina banimi 50 mije metra katror

Kulla te oborri i “Gardës” 15 mije metra katror.

Pra ka gjithsej 257 mijë metra katrorë ndërtimi leje vetëm në Tiranë, që shkojnë tek rreth 1 milard euro. Të mos vazhojmë më tej nëpër Shqipëri.

Debati për kullën u bë i prekshëm kur vendi u rrethua dhe grupimi i Arlind Qorrit protestoi para rrethimit për prishje të lulishtes. Kur unë fola para disa muajsh, as që e vuri njeri ujin në zjarr, çka tregonte se Berisha po e mbante fjalën.

Pastaj dolën zëra të tjerë që provuan lidhjet me Berishën dhe ai u bë viral.

Ky debat tani ka ri-rreshtuar politikën dhe natyrisht shtypin, duke vënë në siklet dhjetëra opozitarë dhe qeveritarë.

I gjithë spektri i shtypit që mbështet Sali Berishën, me një lehtësi të padurueshme filluan të relativizojnë lidhjet, edhe pse e i njohin mirë investitorët, duke u sjellë si “njerëz normalë” dhe duke e trajtuar si biznes ligjor. A thua nuk janë këta që akuzojnë gjithë dynjanë pa asnjë lidhje, as faktike, as logjike, jo vetëm për biznese, por qoftë dhe nga “qytetari digital”.

Në siklet janë vënë mediat e mëdha, për shkak të aleancave me njëra- tjetrën, për shkak të përfshirjes në këtë histori të pronarëve juridik dhe partnerëve të grupit Klan.

Akoma më në siklet ndjehen segmente të qeverisë, ministra dhe ish- ministra, që e kanë të njëjtin investitor partner të tyre dhe e kanë mbushur me licenca dhe tenderë, gjithmonë duke u premtuar se për ta nuk do flasë Doktori.

Që ti bie shkurt, kjo histori në fakt tregon thjesht se si funksionon politika në Shqipëri dhe çfarë shesin tek dy palët sekserët e politikës.

Edi Rama, Sali Berisha, Lulzim Basha, Ilir Meta dhe të tjerë, do të ishte më normale të takoheshin vet me njëri- tjetrin nëse duan të bëjnë pazare dhe Shqipërisë do t’i kushtonte më pak. Në këtë histori ata janë më shumë të përdorur se sa përfitues. Përfshi dhe Sali Berishën, në këtë rast më dhimbset pak (që mund ta merrni me mend sa mend më dhimbset), se nga “kapadai” që shfaqet në publik, është kthyer thjeshtë në një dordolec që e urdhërojnë sekserët që i flasin në emër të Edi Ramës.

Këta që bëjnë si “besnikë” të Berishës, drekojnë e darkojnë me Edi Ramën duke i treguar atij “qyfyre” nga Berisha, pastaj darkojnë me Berishën duke i treguar se ishin tek Rama dhe i thanë ashtu e kështu për të, pastaj kapin ministra të Ramës dhe u kërkojnë punë për njerëz të Berishës dhe u thonë se Berisha nuk flet, pastaj kapin Berishën dhe njerëzit e tij dhe u kërkojnë pjesën që u rregulluan punë, dhe kështu pafundësisht.

Kur nuk funksionon, kur ngecin tek ndonjë minister, dalin në TV si analistë të pavarur dhe godasin “korrupsionin” e qeverisë Rama dhe në këtë rast pronari i TV Klanit bën si i nxehur se nuk e “pyesin”, se janë të pavarur.

Pra nuk është puna se janë një grup biznesmeno- meditatik që mbështet Berishën apo Ramën. Të jesh me Berishën apo Ramën është zgjedhje personale dhe nuk ke pse i merr leje askujt. Këta janë ata që për të rrjepur Edi Ramën duhet patjetër të mbajnë në lojë Berishën, pasi nuk kanë më arsye pse të jenë pastaj sekserë mes tij dhe Berishës.

Kaq është gjithë historia jo vetëm e kësaj kulle, por dhe e gjithë miliardave që ky grup po bën në Shqipëri, që aktualisht ka një vlerë ndërtimi që shkon tek 4 miliard euro, nëse ua fotografon vetëm lejet publike që kanë në gjithë Shqipërinë.

Sa për dijeni, meqë keni hallin e se kjo aferë u shpik nga unë dhe të tjerë për të mbuluar aferën e inceneratorëve, përveçse nuk kam asnjë lidhje me asnjë personazh të inceneratorëve, kam dhe një neveri për stilin prej gabeli me të cilin janë kryer gjithë pazaret në atë histori. Por që të jeni të qetë, gërmuesin e dherave të inceneratorëve e keni pjesë të këtij grupi dhe paratë e shpenzuara deri tani për inceneratorët, megjithë vjedhjet, janë para xhepi për këta.

Tani quajeni si të doni Berishën në këtë histori, në daçi viktimë, në daçi të kapur, në daçi pronar, por e gjithë historia tregon se korrupsioni politik i Berishës dhe nevoja që të qëndrojë në politikë me çdo kusht, në fakt ka prodhuar miliarderët e shekullit në Shqipëri./Albeu.com

The post Kush po ndërton kullën, Mero Baze: Debati për të është radiografi e sekserëve të politikës appeared first on Albeu.com.

Analisti Mero Baze, përmes një komenti lidhur me këtë deklaratë, thotë se Ahmetaj është i kërcënuar seriozisht nga Sali Berisha.

Sipas analistit, Berisha po përpiqet të krijojë një komision hetimor përmes të cilit do përpiqet të shpëtojë jetën e Ahmetajt.

Ai vijon më tej, duke thënë se SPAK nuk mund ta marrë në mbrojtje Ahmetajn pasi ai nuk është dorëzuar para drejtësisë, por ka një mënyrë për t’i ruajtur jetën. Dhe kjo, sipas Bazes, duke mbajtur nën kontroll Berishën dhe grupin e tij.

Komenti i Mero Baze

Me sa duket Arben Ahmetajt nuk i mbarojnë kusuret vetëm me drejtësinë. Tani ka përsipër dhe një rrezik të ri. Është “përpjekja” e Sali Berishës për ta mbrojtur nga Edi Rama dhe Erion Veliaj se mos e “vrasin”.

Pak a shumë po ndjek strategjinë që ka ndjekur me vrasjet e 21 janarit. Sapo drejtësia nisi punën të hetonte vrasjet, ai ngriti një Komision Hetimor kundër drejtësisë, kryesuar nga ministri i tij i Drejtësisë dhe zbukuruar nga pasthirrmat e Dash Sulës, sa herë përmendeshin rreziqe për komplote, puç shteti, skenar A, skenar B etj.

Qëllimi, i cili u arrit maksimalisht, ishte që prokurorët të mos hetonin 21 janarin, por të ishin nën presionin e “hetimeve” të tij, ku unë dhe tre kolegë gazetarë ishin të skeduar si “puçistë”.

Pak a shumë po përsërit këtë skemë. Prej dy ditësh i ka prishur pushimet Belindit dhe ish- vartëses së dikurshme të Arben Ahmetaj, që të ngrejnë një “komision hetimor” për këtë çështje, dhe përditë të “dëshmojnë me fakte alternative”, se çfarë ka bërë Edi Rama dhe Erion Veliaj dhe se si mund të shpëtojnë jetën e Arben Ahmetajt nga këta dy.

E gjitha kjo do të bëhet natyrisht dhe në emër të Arben Ahmetaj, duke përdorur faktet publike, si fakte të ofruara prej tij, si i rrezikuari i madh.

Natyrisht që tani nuk jemi në kushtet e 21 janarit, ku vrasësi kryesor i katër gardistëve ende nuk është marrë në pyetje për turpin historik të drejtësisë shqiptare.

Tani jemi në kushtet kur SPAK ka shumë më tepër integritet dhe forcë për të hetuar të vërtetat e tij dhe për të kuptuar se çfarë fshihet pas të “vërtetave alternative” të Sali Berishës, që po sillet si avokat i autorizuar i Ahmetajt.

Por tek thirrja e Berishës që SPAK të marrë në mbrojtje Ahmetajn, “pasi i rrezikohet jeta”, duhet bërë pak kujdes. E di që SPAK nuk ka si ta mbrojë Ahmetajn, pasi nuk është dorëzuar para drejtësisë, por ka një mënyrë se si t’ia ruajë jetën. Të mbajë nën kontroll Sali Berishën dhe grupin e tij, pasi atë që thonë me zë të lartë për Edi Ramën, ka shumë shanse ta pëshpëritin me njëri- tjetrin si një skenar për të plotësuar skenarin e tyre të të vërtetave alternative.

Arben Ahmetaj ndoshta nuk ka ndonjë rrezik aq të madh nga drejtësia sa ç’duket, sa çka rrezik nga nevoja që ka Berisha ta përdorë atë. Të gjallë, ose të vdekur!

The post Analisti: Arben Ahmetaj është i rrezikuar seriozisht nga Berisha, ja si mund ta mbrojë SPAK jetën e ish-ministrit appeared first on Albeu.com.

Arrestimi i Fredi Belerit është një ngjarje më e rëndë se sa krimi i tij. Dhe është i tillë për shkak të ndjeshmërisë që duhet të kemi parasysh për një përfaqësues të pakicës greke në Shqipëri, edhe pse Beleri nuk është një përfaqësues i denjë i tyre. Por ne nuk mund t’ua zgjedhim atyre përfaquesuesit. Enver Hoxha ua pati zgjedh.

Shqipëria jo vetëm që e pranon minoritetin grek si pjesë natyrale të shoqërisë së saj, por ka dhe prirjen për një “diskriminim pozitiv” ndaj tij, për t’i dhënë edhe më shumë të drejta se kanë nevojë, për t’u ndjerë si në shtëpi të tyre.

Një nga diskriminimet pozitive të tyre është dhe fakti që ne kemi dy bashki të pakicës greke, Dropull dhe Finiq, jashtë kritereve sasiore që kanë bashkitë e tjera shqiptare, dhe Bashkinë e Himarës të përzier.

Arrestimi i Fredi Belerit dy ditë para zgjedhjeve, ngjall një debat të rrezikshëm në Shqipëri, lidhur me politikën penale dhe jo me veprën penale.

Jam i qartë që Fredi Beleri blen vota. Do të isha po kaq i qartë edhe nëse nuk do ta kishin kapur me fakte. E kanë bërë historikisht këtë gjithë kandidatët e PBDNJ, madje për fat të keq e kanë bërë në emër të Greqisë, edhe pse mund të mos ketë qenë e vërtetë.

Ka qenë një kohë që blinin gjithçka me viza në politikën shqiptare, dhe politikanët, dhe median. Si të tillë shumë nga figurat periferike që merren me politikë në pakicën greke në Shqiperi, janë të korruptuar në sistemin e të menduarit dhe të vepruarit në Shqipëri. Madje kanë qenë gjithmonë korruptues edhe të shqiptarëve

Nuk jam për tolerimin e kësaj vepre penale, por meqë ai po blinte vota të martë, të mërkurë, të enjte, mund ta ndiqnin deri të dielën, se me siguri do të vazhdonte të thellohej në krim, dhe aty e kishin ditën e henë, mund ta arrestonin. Nuk ka pas ndërmend të arratiset.

Kështu së paku nuk do hidhnin në erë klimën parazgjedhore dhe nuk do përfshinin në një tension të panevojshëm dhe artificial Shqipërinë me Greqinë, në një çështje që edhe pse e kuptojnë, të dy palët janë në vështirësi pa ta pranuar siç është, pasi në të dy vendet ka zgjedhje dhe të dy qeveritë duhet të tregohen “patriote” para popullit të tyre.

Arrestimi dëshmon një linjë pavarësie të  Prokuroriisë , por kjo nuk do të thotë që të përdorësh pavarësinë për të hedhur në erë stabilitetin mes dy vendeve dhe klimën e shkëlqyer të raporteve mes shqiptarëve dhe grekëve. Të vendossh drejtësi nuk do të thotë vetëm të ndëshkosh, por të kujdesesh që vendimi të prodhojë drejtësi dhe paqe.

Fredi Beleri hajdut do ishte dhe të hënën, dhe mund të mos e arrestonin qysh të premte, aq më tepër pas një polemike politike tri ditore mes tij dhe kryeministrit, të cilën tani po përpiqen ta mbivendosin në mënyrë spekulative.

Tani që e arrestuan është mirë ta nxjerrin në ndjekje të lirë, pasi ndëshkimi nuk ka qëllim mbajtjen në burg, por dënimin për atë që ka bërë. Derisa gjykata të shprehet për fajësinë e tij, ai nuk ka pse qëndron në burg.

Veprimi i Prokurorisë së Vlorës është një akt ndoshta i drejtë ligjor, por Prokuroria  ka hyrë në këtë çështje si një elefant në një dyqan qelqurinash, dhe ka bërë më shumë dëm se sa drejtësi. Dhe e ka bërë këtë pa ju dashur askujt, përveç Fredi Belerit, të cilit tani dhe vjedhja e votës do t’i quhet heroizëm, pasi e ka bërë në një shtet tjetër, jo në Greqi.

Ndaj tani drejtesia duhet t’i dalë zot asaj që ka bërë, duke dëshmuar se ka prova të forta që justifikojnë këtë dëm të madh që i ka bërë paqes publike me pakicën greke dhe vendin fqinj Greqinë. Ata duhet të jenë bindës në prova dhe në gjykim, ndryshe duhet të gjykohen dhe paragjykohen ata si provokatorë të këtij debati krejt të panevojshëm, duke na i shndërruar hajdutët, në heronj të rremë nacionalistë.

The post Prokuroria ka hyrë Himarë si një elefant në dyqan qelqurinash appeared first on Albeu.com.