Elbasani është në prag të sfidës së parë europiane, teksa në Conference League do të përballet me BATE Borisov. Takimi do të zhvillohet në stadiumin “Elbasan Arena”, të mërkurën në orën 20:09, në një ndeshje të rëndësishme për nënkampionët e Superiores, të cilët synojnë të nxjerrin maksimumin për një rezultat pozitiv përpara duelit të kthimit që do të luhet në Bjellorusi.

Në prag të kësaj përballjeje të veçantë, që shënon edhe kthimin e skuadrës pas 20 vitesh në arenën europiane, drejtori sportiv i verdhebluve, Elton Guranjaku, ka folur ekskluzivisht për “Newsport.al”. Ai është ndalur te objektivat e ekipit në këtë aventurë, situata brenda grupit dhe projektet për sezonin e ri në “Abissnet Superiore”.

Lidhur me gjendjen aktuale të skuadrës pas fazës përgatitore, Guranjaku theksoi se ekipi e ka përfunduar këtë mini-periudhë pune dhe është gati për ndeshjen ndaj BATE. Sipas tij, stafi ka bërë një punë të mirë, pavarësisht vështirësive që kanë ardhur nga ndryshimet e shumta në përbërje, dhe ai beson se skuadra do të jetë gati të martën në mbrëmje.

Për pritshmëritë nga kjo sfidë, drejtori sportiv u shpreh se ato janë të mëdha, pasi vetë rikthimi në Europë pas 20 vitesh për qytetin përbën një emocion të veçantë. Ai sqaroi se trajneri nuk është fokusuar vetëm te kthimi i futbollistëve në formën më të mirë fizike, por edhe te harmonizimi i grupit, që sipas tij mbetet pjesa më e vështirë në një kohë kaq të kufizuar përgatitjesh.

Sa i takon momentit jo të mirë të BATE Borisov, që vjen pas 12 ndeshjeve pa fitore, Guranjaku tha se Elbasani do të japë maksimumin në fushë. Megjithatë, ai nënvizoi se verdheblutë nuk kanë eksperiencë në këto nivele, pasi janë rikthyer në Superligë vetëm dy vite më parë, ndaj nuk e konsideron një shans të artë përballjen me një emër si BATE Borisov, pavarësisht formës së dobët të rivalit.

Guranjaku bëri të ditur gjithashtu se kundërshtari është analizuar. Ai vuri në dukje se BATE po luan javën e 14-të të kampionatit të vet dhe se stafi elbasanas ka parë ndeshjet e fundit të skuadrës bjelloruse. Sipas tij, avantazhi më i madh i kundërshtarit lidhet me ritmin dhe intensitetin e lartë, pasi ndodhet në kulmin e sezonit. Ai shtoi se fizikisht është një skuadër që vrapon shumë dhe që di si të administrojë ndeshje të tilla, por Elbasani ka marrë masat e veta dhe shpreson që ato të japin efekt në fund.

Duke u ndalur te merkatoja, ai pranoi se afrimet janë përqendruar kryesisht në repartin ofensiv, ndërsa largimet e shumta kanë sjellë edhe shqetësim te tifozët. Guranjaku u shpreh se forca e skuadrës në sezonin e kaluar ishte ruajtja e të njëjtit grup për dy vite. Sipas tij, ndryshimet e shumta nuk i bëjnë mirë ekipit, por klubi ka një buxhet të kufizuar dhe nuk mund të dalë jashtë tij. Ai shpjegoi se është e vështirë të negociohet me lojtarë që kërkojnë 3/4 herë më shumë se sa përfitonin më parë, ndërsa theksoi se në ekip kanë ardhur futbollistë që ai personalisht i vlerëson cilësorë. Problemi i vetëm, sipas tij, ka qenë koha e shkurtër në dispozicion për përgatitjen e kësaj ndeshjeje.

Në lidhje me sezonin e ri në Superiore dhe formatin e ri të kampionatit, Guranjaku u shpreh se, edhe pse forma ka ndryshuar, në fund çdo ndeshje vlen për 3 pikë. Ai tha se është kurioz të shohë se si do të funksionojë ky format, por nënvizoi se ai është i njëjtë për të gjithë dhe nuk sjell diferenca. Duke folur për objektivat, ai theksoi se të bësh më mirë se sezoni i kaluar do të thotë të shpallesh kampion, pasi Elbasani e humbi titullin vetëm për shkak të golavarazhit më të dobët. Gjithsesi, ai shtoi se fillimisht synimi është të ndërtohet edhe një herë skuadra, çka nuk është e lehtë, e më pas të shihet se si do të ecin gjërat.

Për rivalët në sezonin e ardhshëm, drejtori sportiv deklaroi se për Elbasanin të gjithë janë rivalë. Ai vlerësoi se shumë skuadra po investojnë dhe se kampionati i ardhshëm do të jetë edhe më i vështirë se ai i kaluar. Megjithatë, sipas tij, duke parë investimet, Egnatia duket një hap përpara skuadrave të tjera.

/Ermal SPAHIU/

The post Elton Guranjaku: Elbasani është gati për BATE Borisov, kemi bërë përgatitjet tona! Në Superiore, Egnatia duket një hap para appeared first on Albeu.com.

Florent Ramadani është sërish futbollist i Shkëndijës, me klubin tetovar që ka konfirmuar zyrtarisht rikthimin e mesfushorit. Lajmi u bë i ditur përmes rrjeteve sociale, ku kuqezinjtë njoftuan afrimin e tij të dytë në këtë sesion merkatoje, duke forcuar mesfushën me një lojtar me përvojë.

Në faqen zyrtare të Shkëndijës është publikuar edhe mesazhi i shkurtër: “Welcome Back, F. Ramadani”.

Mesfushori 25-vjeçar ishte pjesë e Dritës në Superligën e Kosovës, ndërsa pas mbylljes së kontratës ai rikthehet te skuadra me të cilën ka luajtur më herët në sezonet 2019/20 dhe 2025/26.

The post Shkëndija zyrtarizon kthimin e Florent Ramadanit në mesfushë appeared first on Albeu.com.

Rruga e Emiljano Mustës me Elbasanin ka ardhur në fund. Futbollisti i krahut të majtë i dha sot lamtumirën skuadrës “verdheblu”, ndërsa 34-vjeçari zgjodhi t’i falënderonte të gjithë përmes një mesazhi në rrjetet sociale.

Në postimin e tij, Musta shkroi: “Faleminderit Elbasani, ishte kënaqësi dhe privilegj të përfaqësoja dhe udhëhiqja ngjyrat e qytetit tim të lindjes në 2 sezone fantastike që kaluam së bashku”.

Edhe e ardhmja e lojtarit tashmë është e qartë. Sipas asaj që raportoi dje “Newsport.al”, anësori i majtë, i cili aktivizohet kryesisht në rolin e mbrojtësit, do të vazhdojë karrierën te Vllaznia, me firmën që është hedhur ditën e djeshme.

The post Emiljano Musta mbyll aventurën me Elbasanin, mbrojtësi i majtë përshëndet klubin: Ishte kënaqësi dhe privilegj! appeared first on Albeu.com.

Xhonatan Lajthia ka nisur zyrtarisht aventurën e tij të re, pasi është prezantuar si futbollisti më i ri i Dibba SÇ. Sulmuesi 27-vjeçar i dha fund qëndrimit te Elbasani për të vijuar karrierën në Emiratet e Bashkuara Arabe.

27-vjeçari ka nënshkruar me klubin e tij të ri një marrëveshje 1-vjeçare, e cila do të jetë në fuqi deri në verën e vitit 2027. Duke qenë lojtar i lirë në momentin e transferimit, Dibba SÇ nuk ka shpenzuar asnjë “kacidhe” për të siguruar shërbimet e tij.

Edicionin e kaluar, Lajthia spikati në “Abissnet Superiore” me fanellën e Elbasanit. Sulmuesi anësor realizoi 13 gola dhe kontribuoi edhe me një asist.

The post Xhonatan Lajthia zyrtarizohet te Dibba SÇ appeared first on Albeu.com.

Skënderbeu ka zyrtarizuar afrimin e Victor Braga, i cili bëhet lojtari më i ri i skuadrës korçare. Mesfushori brazilian 25-vjeçar vjen pas eksperiencës së tij të fundit në Kazakistan me Tobol Kostanay dhe tashmë ka zgjedhur të vazhdojë karrierën në Kategorinë Superiore të Shqipërisë.

Gjatë karrierës së tij, Braga ka luajtur në Kazakistan jo vetëm me Tobol Kostanay, por edhe me Zhetysu, Ordabasy dhe Maktaaral. Ndërkohë, në Hungari ka qenë pjesë e Debrecen, ndërsa në Brazil është aktivizuar me Avenida, Santa Cruz, Londrina PR dhe Santos B.

Futbollisti brazilian ka nënshkruar një kontratë 1-vjeçare me klubin, ndërsa marrëveshja përfshin edhe opsionin e rinovimit për një tjetër sezon. Sipas “Transfermarkt”, vlera e tij aktuale është 250 mijë euro.

“Victor Braga është lojtari më i ri që i bashkohet klubit, mesfushori brazilian 24-vjeçar, vjen pas eksperiencave në Kazakistan dhe Hungari, ku ka qenë pjesë e klubeve si Tobol dhe Debrecen. Suksese”, shkruan klubi korçar.

The post Skënderbeu afron Victor Braga, mesfushorin me vlerë 250 mijë euro dhe ish-lojtarin e Santos appeared first on Albeu.com.

David Fadairo pritet të bëhet afrimi më i fundit i Dinamos. Sipas shtypit të shkruar, sulmuesi 25-vjeçar do të ndahet përkohësisht nga Partizani për t’u bashkuar me “Nëndetësen” në formë huazimi, vetëm për angazhimin në Kupat e Evropës, konkretisht në Conference League.

Me këtë lëvizje, Ilir Daja forcon repartin e avancuar, teksa Fadairo aktivizohet në krahun e djathtë të sulmit. Edhe pse periudha e tij te “Demat” nuk ka rezultuar sipas pritshmërive, futbollisti nigerian konsiderohet si një alternativë e vlefshme për sfidat evropiane.

Partizani e afroi Fadairon nga Teuta në janar të këtij viti. Megjithatë, në 7 ndeshjet e zhvilluara me fanellën e të kuqve, ai nuk ka arritur të shënojë dhe as të dhurojë asist.

The post Dinamo gjen përforcim te Partizani, David Fadairo drejt huazimit për ndeshjet e Conference League appeared first on Albeu.com.

Elbasani ka realizuar një tjetër afrimi në merkaton e verës. Sipas burimeve të “Newsport.al”, verdheblutë kanë siguruar shërbimet e një mesfushori që vjen nga Serie B italiane.

I njëjti burim bën me dije se prezantimi zyrtar pritet të ndodhë nga çasti në çast, ndërsa për momentin është zgjedhur që identiteti i lojtarit të mos bëhet publik.

Njoftimi i së mërkurës për largimin e 8 futbollistëve kishte krijuar idenë se te nënkampionët po zhvillohet një ndryshim i thellë në skuadër. Kjo situatë u shoqërua edhe me kritika, sidomos për shkak të ndeshjes së rëndësishme përballë BATE Borisov, e cila do të luhet më 7 korrik.

Megjithatë, lëvizja më e fundit në prag të këtij dueli të rëndësishëm europian tregon se trajneri Ivan Gvozdenovic do të ketë në dispozicion edhe një element me vlerë të shtuar në organikë.

The post Elbasani përgjigjet ndaj kritikave, gati zyrtarizimi i mesfushorit që vjen nga Serie B appeared first on Albeu.com.

Vllaznia ka bërë zyrtare afrimin e Rrok Tomës, i cili bëhet lojtari më i ri i skuadrës shkodrane. Ashtu siç ishte raportuar disa ditë më parë nga “Newsport.al”, sulmuesi 22-vjeçar është transferuar nga Partizani te kuqeblutë në formë huazimi.

Marrëveshja e huazimit do të vlejë për ndeshjet e Kupave të Evropës, ndërsa më tej nuk përjashtohet mundësia që lëvizja të kthehet në transferim përfundimtar. Megjithatë, deri në këto momente nuk ka ende bisedime për një operacion të tillë.

Kalimin e Tomës e ka konfirmuar vetë klubi shkodran përmes një njoftimi zyrtar.

“KF Vllaznia dëshiron të njoftojë se ka arritur një marrëveshje me FK Partizani për huazimin e futbollistit Rrok Toma. Sulmuesi që është edhe pjesë e kombëtares U21 do të vishet tashmë kuqeblu duke premtuar të bëjë më të mirën me skuadrën tonë”, shkruan klubi shkodran.

The post Vllaznia zyrtarizon afrimin e Rrok Tomës në huazim nga Partizani para sfidave evropiane appeared first on Albeu.com.

Vora ka zyrtarizuar afrimin e radhës, teksa pjesë e skuadrës është bërë Milan Kovaçi. Mbrojtësi 19-vjeçar ka zgjedhur të mbyllë qëndrimin te Peterbourough në Angli për të nisur një eksperiencë të re në “Abissnet Superiore”.

Për talentin e lindur në Londër dhe të formuar në akademinë e Peterbourough, kjo do të jetë hera e parë që luan jashtë Anglisë. Më herët, ai ka qenë gjithashtu pjesë e Kombëtares shqiptare U15, U16 dhe U17.

“Milan Kovaci i bashkohet klubit tonë. Klubi ynë ka kënaqësinë të njoftojë se Milan Kovaci është zyrtarisht pjesë e skuadrës sonë. Me talentin dhe dëshirën për t’u zhvilluar, besojmë se Milani do të ketë një të ardhme premtuese me ekipin tonë”, shkruan klubi vorak ndër të tjera.

The post Vora afron Milan Kovaçin, 19-vjeçarin që vjen nga Anglia dhe ka luajtur me Shqipërinë appeared first on Albeu.com.

Teuta ka bërë prezantimin e afrimit të saj më të ri, teksa Geraldo Bajrami është tashmë futbollist i skuadrës durrsake. Siç ishte raportuar nga “Newsport.al” disa ditë më parë, mesfushori 26-vjeçar i dha fund eksperiencës së tij në Angli për të nisur një kapitull të ri në “Abissnet Superiore”.

Gjatë gjithë karrierës së tij, Bajrami ka luajtur në Angli me ekipe si Birmingham, Solihull Moors, Kidderminster, Notts Counti, Butron Albion dhe Craëley. Në pjesën më të madhe të kohës, ai ka qenë pjesë e skuadrave të ligës së 3-të angleze, duke u aktivizuar kryesisht si mesfushor difensiv, por edhe në repartin e mbrojtjes.

Në njoftimin e klubit durrsak thuhet: “Mirë se vjen, Geraldo Bajrami! KF Teuta ka kënaqësinë të zyrtarizojë afrimin më të ri në skuadër, qendërmbrojtësin Geraldo Bajrami. Klubi i uron Geraldos mirëseardhje në Durrës dhe shumë suksese me fanellën blu”.

The post Teuta zyrtarizon Geraldo Bajramin, përforcim i rëndësishëm për Edlir Tetovën appeared first on Albeu.com.