Deputetja e PDK-së, Ganimete Musliu, nuk mori pjesë në mbledhjen e sotme të Komisionit për Administratë Publike, Digjitalizim, Pushtet Lokal, Media dhe Zhvillim Rajonal, pasi kundërshtoi rendin e ditës.

Ajo deklaroi se Kuvendi i Kosovës nuk duhet të vijojë me angazhime rutinë në një kohë kur qytetarët kërkojnë që në qendër të vëmendjes të jetë çështja e Dhomave të Specializuara të Kosovës.

Musliu kërkoi që Projektligji për ndryshimin dhe plotësimin e Ligjit për Dhomat e Specializuara të Kosovës të trajtohet si prioritet nga Kuvendi, raporton KosovaPress.

“Unë e kundërshtoj mbajtjen e një mbledhjeje rutinë, sepse qytetarët e Republikës së Kosovës po kërkojnë diçka tjetër dhe ne jemi këtu për t’i përfaqësuar interesat e qytetarëve të Republikës së Kosovës”, u shpreh ajo.

Sipas Musliut, deputetët duhet ta trajtojnë këtë çështje pa dallime politike.

“Unë e di që ne mund të kemi dallime politike për shumë çështje, por këtu nuk guxojmë të kemi dallime, këtu duhet të jemi bashkë. Nuk ka rëndësi a jemi parti politike të ndryshme, nuk ka rëndësi a jemi nacionalitete të ndryshme, unë konsideroj që për Republikën e Kosovës nuk ka asnjë çështje më prioritare se çështja e Dhomave të Specializuara në Hagë”, deklaroi Musliu.

Deputetja e PDK-së bëri të ditur se nuk do ta votonte rendin e ditës dhe se do të largohej nga mbledhja e komisionit.

Kryetari i këtij komisioni, Albert Kinolli, tha se pret që amendamentimi i Projektligjit për Dhomat e Specializuara të Kosovës të dërgohet së shpejti në Kuvend.

Kinolli sqaroi se këtë pritshmëri e bazon në informacionet e marra nga kryeministri.

“Sipas informacioneve që i kemi nga kryeministri, ne urojmë dhe shpresojmë që shumë shpejt amendamentimi i ligjit, i projektligjit për Gjykatën Speciale do të vijë në Kuvend, dhe urojmë më të mirën për luftëtarët e UÇK-së, të cilët padrejtësisht gjenden të gjykuar në Hagë. Uroj që ata çlirimtarë sa më shpejt të kthehen në shtetin tonë, në tokën e tyre, ku kanë dhënë kontribut për këtë liri dhe pavarësi, dhe po ashtu t’u bashkohen sa më shpejt familjeve të tyre”, tha ai.

Ndërkaq, deputetja e Vetëvendosjes, Arbëreshë Kryeziu-Hyseni, vlerësoi se puna e këtij komisioni nuk duhet të ndalet për shkak të çështjes së Dhomave të Specializuara.

Ajo theksoi se shqyrtimi i këtij ligji i takon Komisionit për Legjislacion dhe jo Komisionit për Administratë Publike, Digjitalizim, Pushtet Lokal, Media dhe Zhvillim Rajonal.

“Po mendoj që kjo nuk është çështje që duhet ta pengojë funksionimin e komisioneve, e aq më pak funksionimin e këtij komisioni parlamentar që s’ka të bëjë asgjë me trajtimin e këtij ligji, sepse është Komisioni për Legjislacion ai i cili ekskluzivisht do të merret me ligjin përkatës. Prandaj s’mendoj që duhet të pengohemi prej protestimeve ose kërkesave të tilla të deputetëve të Partisë Demokratike të Kosovës, sepse ne jemi qartë cila është fushëveprimtaria e këtij komisioni, prandaj duhet të ecim përpara dhe po shpresoj shumë që do të vazhdojmë të ecim përpara, sepse është fushëveprimtari e gjerë, ka një numër të konsiderueshëm të institucioneve të cilat pikërisht mbikëqyren prej këtij komisioni. Prandaj s’duhet asnjëherë të lejojmë që të pengohet puna e komisionit me kërkesa të tilla të cilat trajtohen prej një komisioni krejt tjetër, ndryshe prej tonit”, deklaroi Hyseni.

The post Ganimete Musliu largohet nga mbledhja e Komisionit për Administratë appeared first on Albeu.com.

Pas aktgjykimit dënues të Gjykatës Speciale në Hagë ndaj ish-drejtuesve të UÇK-së, Hashim Thaçi, Jakup Krasniqi, Kadri Veseli dhe Rexhep Selimi, ish-drejtuesi i Organizatës së Luftës së UÇK-së, Nasim Haradinaj, deklaroi se Kuvendi i Kosovës do të duhej të mblidhej.

Haradinaj shprehu pakënaqësinë që parlamenti ende nuk ka zhvilluar një mbledhje. Ai theksoi se ky është qëndrimi i tij personal, ndërsa të tjerët mund të kenë mendim ndryshe.

I pyetur nëse po kërkonte një seancë të jashtëzakonshme të Kuvendit dhe zhbërjen e Gjykatës Speciale, Haradinaj u shpreh se një individ mund të shpallet fajtor, por nuk duhet të ketë dënim kolektiv.

Sipas tij, një hap i tillë do të ishte i drejtë, pasi kontratën e prish pala që e shkel e para dhe, në këtë rast, nuk ishin ata që e kishin thyer. Haradinaj sqaroi se çështja nuk lidhej vetëm me dënimet, por me cenimin e dinjitetit dhe goditjen e motiveve të njerëzve për liri, si dhe të krenarisë së brezave të rinj për ushtrinë që kishin krijuar.

Ai shtoi se mund të jetë vetë fajtor dhe të dënohet, por kundërshtoi që përgjegjësia të shtrihet në mënyrë kolektive. Haradinaj tha se, pavarësisht përpjekjeve për ta paraqitur procesin si gjykim ndaj individëve dhe jo ndaj një partie, vendimi përfundimtar përbënte, sipas tij, dënim për të gjithë popullin.

Gjatë ditës, dhjetëra qytetarë u mblodhën në protestë përpara ndërtesës së Qeverisë së Kosovës, pas shpalljes fajtorë të katër ish-eprorëve të UÇK-së.

Situata gjatë protestës u tensionua, ndërsa disa pjesëmarrës qëlluan me gurë ndërtesën e Qeverisë dhe thyen disa xhama.

The post Nasim Haradinaj kërkon mbledhjen e Kuvendit të Kosovës pas vendimit dënues në Hagë appeared first on Albeu.com.

Avokati i Popullit ka kërkuar nga Këshilli Gjyqësor i Kosovës (KGJK) që ta rishqyrtojë sistemin e taksave gjyqësore, duke vlerësuar se rritja e tyre mund të krijojë barriera financiare dhe të cenojë qasjen efektive në drejtësi.

Në një opinion të publikuar të enjten, Avokati i Popullit ka shqyrtuar ndikimin e Udhëzimit Administrativ Nr. 03/2025 për Unifikimin e Taksave Gjyqësore në realizimin e së drejtës për qasje në drejtësi.

Sipas opinionit, edhe pse KGJK-ja ka kompetencë për miratimin e skemës unike të taksave gjyqësore, ushtrimi i kësaj kompetence duhet të jetë në përputhje me garancitë kushtetuese për qasje efektive në drejtësi dhe me parimin e proporcionalitetit.

“Taksat gjyqësore të përcaktuara me UA nr.03/2025 derdhen në buxhetin e Republikës së Kosovës dhe jo drejtpërdrejt në buxhetin e sistemit gjyqësor, gjë që dobëson lidhjen ndërmjet rritjes së taksave dhe përmirësimit të funksionimit të gjyqësorit. Për këtë arsye, nevoja dhe proporcionaliteti i rritjes së taksave duhet të arsyetohen në mënyrë të veçantë dhe të bazohen në vlerësime konkrete të ndikimit të tyre në qasjen efektive në drejtësi”, ka vlerësuar Avokati i Popullit.

Në opinion thuhet se rritja e konsiderueshme e taksave, pagesat shtesë për ushtrimin e mjeteve juridike dhe pasojat e mospagesës së tyre mund të krijojnë pengesa disproporcionale, veçanërisht për qytetarët që nuk përfitojnë nga mekanizmat e përjashtimit apo nga ndihma juridike falas.

Duke iu referuar standardeve të Gjykatës Evropiane për të Drejtat e Njeriut, Avokati i Popullit ka vlerësuar se ekziston rrezik real që dispozitat e Udhëzimit Administrativ Nr. 03/2025, në formën aktuale, të kenë efekte disproporcionale në raport me të drejtën për qasje në drejtësi.

Për këtë arsye, ai ka kërkuar që KGJK-ja ta rishqyrtojë sistemin e taksave gjyqësore, në mënyrë që të sigurohet një balancë ndërmjet funksionimit efikas të sistemit gjyqësor dhe garantimit të qasjes së barabartë dhe efektive në drejtësi për të gjithë qytetarët.

Në fillim të këtij viti, KGJK-ja njoftoi për udhëzimin e ri administrativ që rrit taksat gjyqësore. Kjo qe kritikuar nga njerëzit e drejtësisë, pasi sipas tyre, rritja e taksave do të ulë inicimin e lëndëve nëpër gjykata.

Deri vitin e kaluar, taksa për padi me vlerë kontesti nga 0 deri në 1,000 euro ishte 20 euro, ndërsa tani për vlera nga 0 deri në 5,000 euro taksa është rritur në 60 euro. Për konteste nga 50,001 deri në 100,000 euro, taksa nga 150 euro është rritur në 300 euro. Po ashtu, taksa për padi për pengim posedimi është dyfishuar nga 50 në 100 euro, ndërsa për propozim për sigurimin e provës nga 30 euro është rritur në 100 euro.

Rritje pati edhe në Gjykatën Komerciale. Për padi me vlerë kontesti deri në 25,000 euro, taksa e re është 200 euro, ndërsa për konteste nga 50,001 deri në 100,000 euro, taksa është rritur në 500 euro.

The post Avokati i Popullit kërkon që KGJK-ja ta rishqyrtojë rritjen e taksave gjyqësore appeared first on Albeu.com.

Në fjalimin e tij, Rama u ndal te koncepti i “Besës”, të cilin e lidhi me mënyrën se si pushteti duhet të komunikojë dhe të ndërveprojë me qytetarët.

Ai shpjegoi se për të, BESA nuk është thjesht një fjalë, por një parim që përmbledh besimin, empatinë, shërbimin dhe angazhimin.

Rama u bëri kritikë dhe thirrje të tijve që të mos mjaftohen vetëm me takimet, por të mbajnë shënime dhe të ndjekin problematikat e ngritura nga qytetarët.

“Pa përgjegjësinë transparenca është kronikë ndaj arsyeja e pasqyrës është e pamjaftueshme pa Besën, busulla që orienton pushtetin. Besa vërtetë është një fjalë shumë e madhe dhe e bukur, ndaj tani e përdorin të gjithë dhe në 90% të mesazheve që marr më kërkojnë besën, por për ne Besa nuk është vetëm fjala, por ankronim, Besim, Empati, shërbim angazhim. Çdo i pranishëm në sallë, këto 4 pjesë të sjelljes duhet t’ i bëjë vijë të sjelljes në kontakt me këdo qoftë.
Prania Besnike nuk është kalendar organizativ, është pjesë e jë sistemi që e kthen dëgjimin ën kusht dhe kushtin në detyrim për t’u përgjigjur. Problemi ynë nuk ka qenë kurrë që s’kemi ditur të bëjmë takime, madje kemi qenë kudo aq shumë herë për takime, sa askush tjetër dhe do të duhen vite që të tjerët të mbledhin takimet e tyre që të përafrohen me ato që kemi bërë dhe bëjmë ne në një vit. Por gjithçka matet me sa të hapur janë veshët e tu kur qytetari flet”, tha ai.

The post Mos mbyllni veshët para halleve të qytetarëve/ Rama u “kthehet” drejtuesve dhe përfaqësuesve të PS-së: Nuk mjaftojnë vetëm t’i mbledhim, mbani shënime appeared first on Albeu.com.

Këshilli Gjyqësor i Kosovës (KGJK) do ta mbajë të enjten mbledhjen e tij të 371-të, pas dy takimeve të mëparshme që nuk patën sukses, të planifikuara më 24 korrik dhe 7 gusht 2026.

Në agjendën e publikuar për këtë takim figurojnë 35 pika. Mes tyre janë zgjedhja e zëvendëskryesuesit, trajtimi i kërkesës së U.D Presidentes, si edhe njoftimet e gjyqtarëve dhe stafit të komunitetit serb lidhur me tërheqjen e dorëheqjeve të tyre. Po ashtu, pritet të hapet konkursi për pozitën e Kryetarit të Gjykatës Themelore në Ferizaj, raporton “Betimi për Drejtësi“.

Më 19 qershor 2026, u.d Presidentja Albulena Haxhiu i kishte dërguar një letër kryesuesit të KGJK-së, Rrustem Thaqi, përmes së cilës kërkonte që Këshilli të vendoste për dorëheqjet e paraqitura nga gjyqtarët dhe stafi mbështetës nga komuniteti serb në sistemin gjyqësor të Kosovës.

Në letër theksohej se mbajtja e këtyre pozitave të paplotësuara për një kohë kaq të gjatë dëmton sigurinë juridike, vështirëson funksionimin e plotë të drejtësisë dhe prek efikasitetin e institucioneve përgjegjëse.

Ndërkohë, në mbledhjen e 20 korrikut 2026, Këshilli Prokurorial i Kosovës refuzoi tërheqjen e dorëheqjeve të prokurorëve serbë dhe stafit të tyre mbështetës në sistemin prokurorial. KPK-ja i përcolli rastet te u.d Presidentja për lirimin e tyre nga detyra.

Një ditë më vonë, më 21 korrik, Haxhiu njoftoi se kishte nënshkruar dekretet për lirimin nga detyra të shtatë prokurorëve serbë, të cilët i kishin dorëzuar dorëheqjet në vitin 2022.

Bashkimi Evropian ka vlerësuar se veprimet e KPK-së dhe të Haxhiut janë në kundërshtim me ligjin.

Në reagimin e tij, BE-ja shprehu shqetësim për vendimin e KPK-së që të pranonte dorëheqjet, ndonëse ato ishin tërhequr, si dhe për vendimin e ushtrueses së detyrës së Presidentes për dekretimin e tyre. Sipas BE-së, këto veprime duket se nuk përputhen me ligjin, procedurën e rregullt ligjore dhe kërkesat e përgjithshme për sundimin e ligjit në Kosovë. BE-ja u bëri thirrje institucioneve përkatëse të shmangin veprimet që mund të pengojnë riintegrimin e personelit gjyqësor serb të Kosovës.

The post KGJK cakton mbledhjen e 371-të për të enjten, rikthehet në rend dite çështja e dorëheqjeve të gjyqtarëve dhe stafit serb appeared first on Albeu.com.

Mes kryebashkiakëve të pranishëm ishin edhe ata, bashkitë e të cilëve pritet të bashkohen me njësi më të mëdha vendore dhe nga 61 bashki që janë sot, pritet të bëhen 46.

Burimet bënë të ditur se përplasjen më të ashpër kryeministri e ka pasur me kryebashkiakun e Poliçanit, qyteti i parë ku qytetarët u revoltuan për shkrirjen e bashkisë së tyre.

Në atë protestë, një pjesë e mbështetësve të PS-së dogjën publikisht kartat e anëtarësisë duke e akuzuar këtë forcë politike si mosmirënjohëse për mbështetjen që i ka dhënë qyteti.

Adriatik Zotkaj e drejton bashkinë që prej vitit 2004, duke fituar në gjashtë zgjedhje rresht për pushtetin vendor.

Djegia publikisht e kartave të anëtarësisë në PS nga mbështetësit në Poliçan u kritikua ashpër nga kryeministri Rama menjëherë pas protestës që u mbajt në qytet.

Rama e quajti atë, një akt të turpshëm.
“Vazhdon qarja e hallit të kalorësit se po i varen këmbët, së fundi edhe me një agjitim të madh nga vajtorët e vajtojcat, që tanimë po protestohet edhe “brenda PS-së” dhe kjo qenka një shenjë tmerrësisht e keqe për “regjimin”. Në fakt jo, përjashto aktin e turpshëm të djegies së teserave të PS-së në një rast, nga disa individë që as vetë s’kanë ditur tamam ç’kanë bërë, apo ndonjë rast kur deputetë tanë kanë bërë “tribunin e vegjëlisë”, pa ditur tamam çfarë thonë, gjithçka tjetër është jo vetëm normale, po edhe e mirëseardhur”, tha Rama.

The post Rama e përzuri nga mbledhja pas djegies së kartave të anëtarësimit të PS-së, kush është kryebashkiaku i Poliçanit me 6 mandate appeared first on Albeu.com.

Mbledhja e Këshillit Gjyqësor të Kosovës (KGJK) ka dështuar të zhvillohet për shkak se nuk u sigurua kuorumi. Në rendin e ditës ishte planifikuar të trajtohej kërkesa e ushtrueses së detyrës së Presidentes së Republikës së Kosovës, bashkë me njoftimet e gjyqtarëve dhe punonjësve administrativë të komunitetit serb për tërheqjen e dorëheqjeve, raporton KosovaPress.

Në takimin e parashikuar për sot nuk morën pjesë katër anëtarë të këshillit, ndonëse asnjëri prej tyre nuk kishte dorëzuar kërkesë për pushim.

Kryesuesi i KGJK-së, Rrustem Thaqi, kritikoi mungesën e anëtarëve. Ai bëri të ditur se kishte marrë me email pesë njoftime nga pesë anëtarë, përmes të cilave ishte informuar se katër prej tyre nuk do të merrnin pjesë në takim.

Sipas Thaqit, në njoftimet e tyre, në 12:09, ndër të tjera pretendohej se caktimi i mbledhjes nuk ishte në përputhje me vendimin e KGJK-së. Aty thuhej gjithashtu se këshilli ishte në pushim kolektiv, se nuk ekzistonin rrethana për thirrjen e një mbledhjeje të jashtëzakonshme dhe se përcaktimi i takimit duhej të koordinohej mes anëtarëve. Megjithatë, ai theksoi se këshilli nuk ka marrë asnjë vendim për pushim kolektiv.

Thaqi deklaroi se kjo situatë po shkakton vonesa në përmbushjen e përgjegjësive të KGJK-së, përfshirë përfundimin e procedurave disiplinore dhe krijimin e paneleve hetimore sipas kërkesave disiplinore.

Ai theksoi se asnjë prej anëtarëve nuk kishte paraqitur kërkesë për pushim dhe se një sjellje e tillë nuk mund të lejohej. Për pasojë, takimi nuk u mbajt, pasi mungonte kuorumi.

E njëjta çështje kishte nxitur përplasje edhe gjatë mbledhjes së fundit të KGJK-së. Ajo ishte ndërprerë pas debatit ndërmjet anëtarëve për shqyrtimin e kërkesës lidhur me tërheqjen e dorëheqjeve të gjyqtarëve dhe stafit të komunitetit serb në veri të vendit.

The post Mungesa e kuorumit pengon sërish mbajtjen e mbledhjes së KGJK-së appeared first on Albeu.com.

Këshilli Gjyqësor i Kosovës (KGJK) do ta mbajë mbledhjen e radhës të premten, më 7 gusht 2026. Ndër çështjet që pritet të shqyrtohen është edhe kërkesa e Ushtrueses së Detyrës së Presidentes së Republikës së Kosovës, Albulena Haxhiu, si dhe njoftimet e gjyqtarëve dhe stafit nga komuniteti serb për tërheqjen e dorëheqjeve.

Rendi i ditës përmban gjithsej 16 pika, ndërsa kjo çështje është renditur në pikën e nëntë, raporton “Betimi për Drejtësi”. Në mbledhjen e kaluar, të zhvilluar më 24 korrik, shqyrtimi nuk u bë për shkak të mungesës së kuorumit.

Albulena Haxhiu, në cilësinë e u.d. Presidentes, i ishte drejtuar më 19 qershor 2026 kryesuesit të KGJK-së, Rrustem Thaqi, me kërkesën që Këshilli të merrte një vendim përfundimtar lidhur me dorëheqjet e paraqitura nga gjyqtarët dhe stafi mbështetës serb në sistemin gjyqësor të Kosovës.

Në letrën e saj, Haxhiu kishte paralajmëruar se mbajtja e këtyre pozitave të paplotësuara për një kohë të gjatë cenon sigurinë juridike, vështirëson funksionimin e plotë të sistemit të drejtësisë dhe dëmton efikasitetin e institucioneve përgjegjëse.

Ndërkohë, Këshilli Prokurorial i Kosovës, në mbledhjen e 20 korrikut 2026, e kishte refuzuar tërheqjen e dorëheqjeve të prokurorëve dhe stafit mbështetës serb në sistemin prokurorial. Pas këtij vendimi, çështja iu përcoll u.d. Presidentes për lirimin e tyre nga detyra.

Një ditë më vonë, më 21 korrik, Haxhiu bëri të ditur se kishte nënshkruar dekretet për lirimin nga detyra të shtatë prokurorëve serbë, të cilët i kishin paraqitur dorëheqjet në vitin 2022.

Bashkimi Evropian e ka vlerësuar vendimin e KPK-së dhe atë të Haxhiut si veprime në kundërshtim me ligjin.

“BE-ja është e shqetësuar nga vendimi i djeshëm i Këshillit Prokurorial të Kosovës (KPK) për të pranuar dorëheqjet që ishin tërhequr tashmë dhe nga vendimi i sotëm i ushtrueses së detyrës së Presidentes, që dekretoi dorëheqjet. Kjo duket se nuk është në përputhje me ligjin, me procedurën e rregullt ligjore dhe me kërkesat e përgjithshme të sundimit të ligjit në Kosovë. BE-ja u bën thirrje të gjitha institucioneve përkatëse që të përmbahen nga veprimet që synojnë pengimin e riintegrimit të personelit gjyqësor serb të Kosovës”, thuhej në reagimin e BE-së.

The post KGJK e vendos në rend dite shqyrtimin e dorëheqjeve të gjyqtarëve dhe stafit serb appeared first on Albeu.com.

Aktivisti Rron Gjinovci ka lëshuar akuza të forta pas seancës së Këshillit Gjyqësor të Kosovës, duke vënë në pikëpyetje diskutimet rreth fatit të magjistratëve serbë që dhanë dorëheqjen. Ai shprehu habi të thellë për faktin që, sipas tij, disa zëra brenda këtij organi po përpiqen të zbusin seriozitetin e rikthimit të tyre në gjyqësorin kosovar.

Në reagimin e tij, Gjinovci ngre pretendimin se institucionet tona nuk vepruan me urgjencën e duhur, duke neglizhuar shkarkimin formal të gjyqtarëve serbë pas dorëheqjes së tyre. Kjo ka bërë që ata të kenë përfituar rroga për një periudhë katërvjeçare, pavarësisht se nuk ishin më aktivë në detyrë.

Ai argumentoi se në një shtet me mekanizma të pavarur dhe funksionalë, përgjegjësit për këtë dështim do të përballeshin vetë me organet e drejtësisë për mosveprimin e tyre. Më tej, ai shtoi se nëse do të ndodhej në krye të Ministrisë së Financave, do të kishte urdhëruar që humbjet që pësoi Kosova nga këto pagesa t’u zbriteshin nga pagat personave përgjegjës.

Në fund të kritikës së tij, Gjinovci drejtoi gishtin nga disa pjesëmarrës në takim, të cilët i akuzoi hapur se po synojnë rikthimin e magjistratëve serbë në punë, një lëvizje që, sipas tij, rrezikon të risjellë ndikimin e Beogradit në sistemin e drejtësisë së Kosovës.

The post Gjinovci shpërthen ndaj KGJK-së: “E pabesueshme që mbroni njerëzit e Serbisë”, kërkon llogari për katër vjet paga të padrejta appeared first on Albeu.com.

Në mbledhjen e saj të rregullt të mbajtur sot, Qeveria në detyrë e Kosovës mori një sërë vendimesh të rëndësishme.

U dha dritë jeshile për Rregulloren e Procedurave të Rekrutimit të Zjarrfikësve, e cila normon kriteret dhe hapat për t’u pranuar në Njësitë Profesionale të Zjarrfikjes dhe Shpëtimit, duke respektuar parimet bazë të Ligjit për Zyrtarët Publikë (Nr. 08/L-197).

Po ashtu, u miratua dhënia me qira e një sipërfaqeje prej 61402.9 metrash katrorë në Zonën Kadastrale të Raçakut, Komuna e Shtimes, si përgjigje ndaj kërkesës së Agjencisë Pyjore të Kosovës. Kontrata, me afat 15-vjeçar, ka për qëllim nxjerrjen dhe përpunimin e gurit gëlqeror.

Një tjetër vendim kishte të bënte me kalimin në përdorim të një hapësire rreth 30 ari, pronë e Agjencisë Pyjore – Ndërmarrja e Pyjeve në Prizren, për Ministrinë e Drejtësisë. Ky veprim synon të krijojë kushte më të mira infrastrukturore për përmbushjen e detyrave institucionale të ministrisë, duke nxitur bashkëpunimin mes institucioneve dhe duke ulur shpenzimet operative.

Kabineti qeveritar amendoi gjithashtu Vendimin e mëparshëm Nr. 05/16, të 30 prillit 2026. Sipas ndryshimit, Ministria e Shëndetësisë do të ofrojë përkrahje financiare ekskluzivisht për mjeket specializante që kanë rifilluar punën pas pushimit të lehonisë dhe, për shkak të ndërprerjes së specializimit, nuk kanë arritur të finalizojnë modulet apo ciklet trajnuese të parapara, duke filluar nga 1 nëntori 2025 e deri më 31 dhjetor 2026.

Një hap drejt dixhitalizimit u shënua me miratimin e Kornizës për Ngritjen e Kapaciteteve Dixhitale të Qeverisë, një dokument që ofron një model të vetëm për zhvillimin e shkathtësive themelore dixhitale, thelbësore për një administratë efikase, ofrim shërbimesh dhe promovim të inovacionit në epokën digjitale.

Në parim u miratua edhe nisja e një Marrëveshjeje Ndërkombëtare me Bashkimin Evropian për aderimin në zonën “EU Roam Like Home”, çka përbën një parakusht për implementimin e plotë të legjislacionit të BE-së për roamingun. Marrëveshja vendos bazën për përfshirjen graduale të Kosovës në këtë regjim, duke i hapur rrugë përdorimit të shërbimeve të roamingut pa kosto shtesë midis Kosovës dhe vendeve anëtare, pasi të jenë plotësuar kushtet e nevojshme.

Tutje, u dha pëlqimi paraprak për një Marrëveshje Granti midis qeverisë kosovare, të përfaqësuar nga Ministria e Financave, ndërmarrjes “Termokos” dhe Bankës Evropiane për Investime për projektin ambicioz të zgjerimit të rrjetit të ngrohjes qendrore në kryeqytet.

Sa u përket alokimeve buxhetore, u vendos për një rialokim prej 2,000,000.00 eurosh në Ministrinë e Administrimit të Pushtetit Lokal, brenda nënprogramit “Administrata qendrore”. Mjetet do të zhvendosen nga kategoria e shpenzimeve kapitale, pikërisht nga projekti “Programi për Grantin e Performancës Komunale”, drejt 15 projekteve të tjera kapitale, në përputhje me marrëveshjet e mbështetjes financiare të nënshkruara midis ministrit përgjegjës dhe kryetarëve të komunave përfituese.

Në fushën e kulturës, u themelua Këshilli Kombëtar i Arteve, një trup i ri institucional i konceptuar si një mekanizëm kyc për forcimin e politikave publike artistike dhe kulturore, duke garantuar profesionalizëm, autonomi dhe përfaqësim dinjitoz. Anëtarët e tij janë: Yll Rugova (arte pamore), Baki Jashari (muzikë klasike dhe operë), Visare Aliu (teatër), Afrim Spahiu (film dhe audiovizual), Ardianë Pajaziti (letërsi dhe libër), Visar Munishi (folklor muzikor dhe kërcimi), Aulona Nuhiu (balet dhe vallëzim modern), Alberta Troni (akademi dhe kërkime në art e kulturë), Arif Muharremi (sektori i pavarur kulturor), Artnet Haskuka (fusha të ndërlidhura me kulturën, si dizajni dhe industritë kreative) dhe Visar Haxhibeqiri, që përfaqëson administratën e Ministrisë së Kulturës.

Për promovimin ndërkombëtar, qeveria ndau shumën prej 9,480.00 eurosh për realizimin e programit “OringinAL”. Ky program synon të përmirësojë imazhin e Kosovës në botë, të nxjerrë në pah potencialin e saj turistik, kulturor dhe zhvillimor, si dhe të thellojë bashkëpunimin me mërgatën për zhvillimin e qëndrueshëm të vendit.

Në fund, ekzekutivi miratoi propozimin e Ministrisë së Financave për t’i kërkuar Presidentes së vendit autorizimin që ministri të nënshkruajë Marrëveshjen e Kredisë me Agjencinë Franceze për Zhvillim për Projektin e Lojërave Mesdhetare XXI në Kosovë, si dhe rikonfirmoi Raportin Vjetor Financiar për Buxhetin e vitit 2025.

The post Seanca e 30-të e Ekzekutivit në Detyrë të Kosovës appeared first on Albeu.com.