Në këtë lëvizje përfshihen edhe banorë të Kosovës, të cilët kanë planifikuar pushimet e gushtit në bregdetin shqiptar.

Fluksi i automjeteve dhe udhëtarëve është përballuar në Pikën e Kalimit Kufitar Morinë, ku janë hapur të gjitha sportelet. Autoritetet po përdorin procedura të përshpejtuara, kryesisht për automjetet me targa të huaja, që në pjesën më të madhe u përkasin mërgimtarëve të Kosovës.

Ndërsa automjetet me targa të Kosovës dhe Shqipërisë kalojnë pa kontrolle kufitare, në zbatim të marrëveshjes mes dy vendeve për lehtësimin e lëvizjes.

Edhe pse numri i mjeteve është i konsiderueshëm, në pikën kufitare nuk janë krijuar probleme. Pritja për udhëtarët nuk i kalon 5 minuta dhe qarkullimi vijon normalisht falë menaxhimit të autoriteteve.

Rritja e lëvizjeve ishte e pritshme, pasi gushti përkon me periudhën më të ngarkuar të sezonit turistik. Në këtë muaj, qindra mërgimtarë të Kosovës që jetojnë në vende të ndryshme të Evropës i kalojnë pushimet në Kosovë dhe Shqipëri. Vetëm gjatë dy ditëve të para të gushtit, të cilat përkuan me fundjavën, në Shqipëri hynë mbi 50 mijë pushues nga Kosova, mes tyre edhe pjesëtarë të diasporës.

Autoritetet parashikojnë që ritmi i lartë i lëvizjeve të vijojë edhe në ditët e ardhshme. Fluksi pritet të shtohet veçanërisht gjatë fundjavave të muajit gusht, në të dyja drejtimet e kufirit.

The post Shqiptarët e Kosovës drejt plazheve shqiptare, mbi 50 mijë hyrje në Morinë vetëm në dy ditët e para të gushtit appeared first on Albeu.com.