Incidentet që shoqëruan fundin e përballjes mes Lyonit dhe Fenerbahçes kanë sjellë masa disiplinore nga UEFA ndaj disa prej protagonistëve të ndeshjes.

Mattéo Guendouzi është pezulluar për katër ndeshje në kompeticionet evropiane, ndërsa dy prej tyre janë me kusht. Përveç pezullimit, mesfushori i Fenerbahçes duhet të paguajë edhe një gjobë prej 50 mijë eurosh.

Një ndeshje pezullim dhe 30 mijë euro gjobë ka marrë edhe Mason Greenwood. Sipas UEFA-s, të dy futbollistët kanë provokuar tifozët e Lyonit përmes gjesteve pas triumfit 2-1 të skuadrës turke.

Fenerbahçe e mbylli ndeshjen në Francë me fitore 2-1 dhe siguroi kualifikimin në fazën kryesore të Ligës së Kampionëve, pasi rezultati i përgjithshëm i dy takimeve shkoi në 3-2. Megjithatë, pas vërshëllimës së fundit nisën përplasjet mes palëve.

Raportimet e mediave franceze bëjnë me dije se Guendouzi kishte provokuar mbështetësit vendas që gjatë nxehjes. Sipas të njëjtave burime, ai i përsëriti këto veprime edhe pas përfundimit të sfidës.

Situata u tensionua më tej mes lojtarëve të dy ekipeve. Në një moment, mbrojtësi i Lyonit, Zachary Athekame, e spërkati Guendouzin me ujë.

Kaosi vijoi edhe në tunel, ku pati shtyrje dhe përplasje fizike. Canal+ raportoi se gjatë incidentit një pjesëtar i stafit të Lyonit u godit në fytyrë.

Masat e UEFA-s prekën edhe portierin e Lyonit, Antonio Ferreira. Ai u pezullua për pesë ndeshje, me dy prej tyre të vendosura me kusht, për shkak të një ndërhyrjeje të rëndë.

Për incidentet dhe trazirat e shkaktuara nga tifozët, gjoba u vendosën gjithashtu ndaj Fenerbahçes dhe Lyonit.

Në këtë mënyrë, kualifikimi i Fenerbahçes në Ligën e Kampionëve u shoqërua me një sërë ndëshkimesh disiplinore të vendosura nga UEFA.

The post UEFA ndëshkon Guendouzin pas tensioneve dhe përleshjeve në Lyon-Fenerbahçe appeared first on Albeu.com.

Fenerbahçe siguroi kualifikimin në fazën e ligës së Ligës së Kampionëve pasi fitoi 2-1 në Francë ndaj Lyonit në ndeshjen e kthimit të play-off-it, me rezultat të përgjithshëm 3-2.

Sidoqoftë, pas sinjalit të fundit të arbitrit, situata u përshkallëzua dhe lojtarë e anëtarë të stafeve nga të dyja skuadrat u përfshinë në një përleshje masive në fushë.

UEFA ka nisur procedurë disiplinore ndaj mesfushorit Matteo Guendouzi dhe sulmuesit Mason Greenwood, si dhe ndaj vetë klubit turk, për ngjarjet e ndodhura pas ndeshjes. Fenerbahçe konfirmoi se do t’i paraqesë UEFA-s argumentet e veta dhe dokumentet e nevojshme në kuadër të këtij procesi disiplinor.

Pikërisht Guendouzi u vu në qendër të vëmendjes, pasi dukej se kishte provokuar tifozët e Lyonit teksa festonte kualifikimin e Fenerbahçes. Më vonë, mesfushori francez shpjegoi se veprimet e tij ishin një reagim ndaj fyerjeve që, sipas tij, erdhën nga tifozët dhe kishin si shënjestër familjen e tij.

Tani mbetet për t’u parë se çfarë masash do të vendosë UEFA ndaj lojtarëve dhe klubit, ndërsa vendimi përfundimtar do të merret pas shqyrtimit të çështjes nga organet përkatëse disiplinore.

The post Procedurë disiplinore e UEFA-s ndaj dy yjeve të Fenerbahçes appeared first on Albeu.com.

Kualifikimi i Fenerbahces në Ligën e Kampionëve, pas 18 vitesh mungesë, u la në hije nga incidentet e rënda që pasuan ndeshjen ndaj Lyonit në Francë.

Protagonisti kryesor i situatës ishte Matteo Guendouzi, mesfushori i skuadrës turke dhe ish-futbollisti i Marseille, i cili me veprimet e tij provokoi tifozët dhe kundërshtarët.

Gjatë nxehjes, Guendouzi u vu në shënjestër të mbështetësve vendas. Tensioni u rrit edhe më tej kur ai iu drejtua tribunave duke ngritur gishtin e mesëm.

Pas përfundimit të takimit, futbollisti turk festoi përpara tifozëve të Lyonit, duke thirrur “Go Marseille!” dhe duke kopjuar lëvizjet e njohura të reperit nga Marseille, Julo.

Gjesti shkaktoi zemërimin e lojtarëve të klubit francez, ndërsa Pavel Schulz dhe Ruben Kluivert u përplasën menjëherë me të.

Situata doli shpejt jashtë kontrollit dhe konflikti vijoi në tunelin e stadiumit, ku u përfshinë lojtarë dhe pjesëtarë të stafit teknik të të dyja skuadrave.

Në përleshjen e zhvilluar në tunel mbeti i dëmtuar edhe trajneri i portierëve të Lyonit, Antonio Ferreira. Pas ndeshjes, kapiteni i Lyonit, Corentin Tolisso, kritikoi ashpër sjelljen e kundërshtarit dhe e cilësoi atë të panevojshme.

“I thashë të qëndronte i përulur në fitore dhe të festonte me ekipin e tij në dhomën e zhveshjes, sepse tifozët na fyejnë çdo fundjavë në udhëtime, kështu që ne nuk reagojmë kështu”, deklaroi Tolisso.

Guendouzi, nga ana e tij, u përpoq të justifikonte veprimet e tij, duke thënë se tifozët e Lyonit kishin fyer nënën dhe familjen e tij gjatë gjithë 90 minutave dhe se ai e konsideronte këtë si mungesë respekti.

Pas përplasjeve dhe pamjeve skandaloze të regjistruara në Francë, pritet që Federata Evropiane e Futbollit (UEFA) të reagojë shpejt dhe në mënyrë të ashpër.

The post Përleshje masive në Lyon pas kualifikimit të Fenerbahces, Guendouzi ndez tensionet appeared first on Albeu.com.