Starti i dobët i sezonit e ka vënë menjëherë nën presion Massimiliano Allegrin te Napoli, dhe në Itali tashmë qarkullon emri i një trajneri që mund ta zëvendësojë.

Të martën në mbrëmje, në ndeshjen e parë të fazës së ligës së Ligës së Kampionëve, Napoli u mposht në shtëpi 0-1 nga Arsenali. Kjo ishte humbja e tretë me radhë për skuadrën napolitane në të gjitha kompeticionet, pas dy disfatave në Serie A ndaj Comos dhe Interit, duke e futur ekipin në një situatë të vështirë që në fillim të sezonit.

Megjithëse ndaj Arsenalit Napoli tregoi një fytyrë më të mirë dhe krijoi mundësi për të barazuar, tri humbjet radhazi në këtë periudhë të hershme kanë shkaktuar alarm në hierarkinë e klubit, duke vënë në dyshim qëndrueshmërinë e Allegrit në stol.

Sipas raportimeve të gazetarit Giovanni Scotto në emisionin “Radio Radio”, presidenti Aurelio De Laurentiis është jashtëzakonisht i mërzitur me nisjen e dobët. Ndjenja e tij është e ngjashme me atë të tifozëve, të cilët po humbasin durimin po aq shpejt.

Allegri tani ndodhet nën trysni të madhe për të reaguar pa vonesë. Të dielën pasdite, skuadra udhëton drejt Bolonjës për t’u ndeshur në “Stadio Renato Dall’Ara”, dhe një tjetër dështim do ta përshpejtonte krizën rreth trajnerit.

Në rast se Napoli dështon të marrë fitoren, menaxhmenti mund të nisë seriozisht të konsiderojë një ndryshim në stol. Në këtë kontekst, Raffaele Palladino, ish-trajneri i Fiorentinës, është shfaqur si një prej emrave më të përfolur për zëvendësim. Ai aktualisht konsiderohet një alternativë konkrete nëse De Laurentiis vendos t’i japë fund bashkëpunimit me Allegrin gjatë këtij sezoni, dhe tashmë ndodhet në radarin e klubit.

Gjendja bëhet edhe më e ndërlikuar nëse kujtojmë pritshmëritë e larta që shoqëruan ardhjen e Allegrit. Ai, një trajner me përvojë të gjerë në Itali, u soll për të mbajtur Napolin në krye të Serie A dhe për të bërë një rrugëtim të mirë në Champions League. Megjithatë, pas vetëm pak javësh, ekipi ka rënë në një seri negative që askush brenda klubit nuk e kishte parashikuar.

Ende nuk ka një vendim përfundimtar nga klubi dhe Allegri vazhdon të jetë në krye të ekipit. Megjithatë, presioni mbi të është shtuar ndjeshëm dhe ai është i ndërgjegjshëm se kërkohet një reagim i shpejtë. Një fitore në Bolonjë do t’i siguronte atij dhe skuadrës pak hapësirë për të marrë frymë dhe për të përmbysur situatën. Në të kundërt, një tjetër rezultat zhgënjyes do ta bënte gjithnjë e më të prekshëm skenarin e një ndryshimi në bankinë, ku Palladino tashmë shihet si një kandidat serioz për drejtimin e Napolit.

The post Krizë e hershme te Napoli: Allegri nën trysni, Palladino shfaqet si zëvendësuesi i mundshëm appeared first on Albeu.com.

Pas një sezoni në të cilin Milani nuk arriti të sigurojë një vend në Ligën e Kampionëve, drejtuesit e klubit vendosën të largojnë si Taren, ashtu edhe Allegrin. Në këtë kontekst, ish-drejtori sportiv shqiptar ndau vlerësimin e tij për trajnerin italian dhe për periudhën e kaluar te klubi.

“Ai [Allegri] është i klasit të parë, vendimi i Napolit ishte i mençur, në përputhje me ambiciet që klubi ka dhe duhet të vazhdojë të ketë për sezonin e ardhshëm”, u shpreh fillimisht Tare.

Më tej, ai theksoi se situata të tilla janë normale në botën e futbollit dhe në natyrën e profesionit. Sipas tij, që prej vitit të kaluar Allegri ishte ndër emrat e mundshëm për Napolin, ndaj lidhja mes palëve kishte mbetur aktive.

“Unë dhe Max flasim shpesh, çdo dy ose tre ditë telefonojmë njëri-tjetrin: kemi bërë disa gabime, por Allegri është një trajner që ka bërë shumë mirë në historinë e futbollit italian dhe do të vazhdojë ta bëjë këtë”.

Tare shtoi gjithashtu se dëshira e tij është që Milani të arrijë stabilitet dhe të ndërtojë një plan serioz për të ardhmen.

I pyetur për Leaon, ai tha se nuk është i sigurt nëse është e drejtë apo jo që lojtari të kërkojë përvoja të reja, por nënvizoi se kur lind një dëshirë e tillë, kjo tregon se raporti ka përfunduar dhe se cikli ka marrë fund. Sipas tij, cilësitë e futbollistit nuk vihen në diskutim, por ai duhet të gjejë më shumë vazhdimësi në ndeshje, pasi është një lojtar që mund t’i vendosë ato i vetëm. Tare shtoi se këtë vit kjo nuk ndodhi, edhe për shkak të problemeve fizike që kishte lojtari.

Ndërkaq, pak ditë më parë Milani zyrtarizoi trajnerin e ri: portugezi Ruben Amorim do të marrë vendin e Max Allegrit në stolin e kuqezinjve. Megjithatë, gjendja brenda klubit mbetet ende e papërfunduar dhe në fazë përcaktimi.

The post Igli Tare flet për kohën te Milani: “Kemi gabuar”, komenton edhe Allegrin dhe të ardhmen e klubit appeared first on Albeu.com.

Allegri iu drejtua mediave në një konferencë për shtyp para ndeshjes të premten në prag të derbit në udhëtim kundër Torinos.

Trajneri i lindur në Livorno u përball me disa pyetje për të ardhmen e tij, pasi edhe pse ka një kontratë skadon në vitin 2025, ka raporte në rritje se Juventus dëshiron të ndajë rrugët me 56-vjeçarin dhe Allegri nuk garantoi se ai do të qëndronte.

“Tani për tani, ne duhet të mendojmë vetëm për objektivat tona; ato shkojnë mbi çdo gjë tjetër,” këmbënguli fillimisht Allegri.

“Mendoj se me kualifikimin në Ligën e Kampionëve, 100 milionë euro janë në lojë, kështu që tani ky është objektivi kryesor dhe të gjithë janë të përfshirë”.

“Sa i përket të ardhmes, si gjithmonë, klubi do të vendosë se çfarë është më e mira për Juventusin. Tani, gjëja më e mirë për të bërë është të qëndrojmë së bashku dhe të luajmë për këtë objektiv”.

A e kupton se derbi i nesërm mund të jetë i fundit i tij në krye të Juventusit?

“Nuk e kam menduar; Kam menduar vetëm se ishte një derbi i rëndësishëm, veçanërisht për ne, qytetin dhe klubin. Një klub si Juventusi, për historinë dhe markën e tij, nuk mund të mbetet jashtë Ligës së Kampionëve, edhe për arsye financiare”.

“Ne duhet të punojmë shumë dhe të fokusohemi në këtë muaj të fundit. Kur e nisëm sezonin, objektivi ishte kualifikimi në Ligën e Kampionëve dhe klubi e ka konfirmuar. Objektivi tjetër ishte Kupa e Italisë. Është e rëndësishme të jesh ende në garë. Zakonisht shumë gjëra përcaktohen në muajin e fundit, por të jesh këtu është e rëndësishme. Tani, ne duhet të arrijmë objektivat”, përfundoi italiani. /Telegrafi/

The post Allegri nuk garanton qëndrimin te Juventusi appeared first on Albeu.com.

Nuk është një sekret që Motta ka tërhequr interesim të madh nga disa klube të ndryshme, duke përfshirë Milanin, Napolin dhe Barcelonën.

Tani Footmercato ka pretenduar se Juventusi e ka vendosur Thiago Mottën në krye të listës së tyre të dëshirave, për të marrë drejtimin e skuadrës pas përfundimit të epokës së Allegrit.

Kjo gjithashtu i përshtatet sugjerimeve të fundit se Allegri dhe agjenti i tij Giovanni Branchini janë duke pritur klubin para se të dinë nëse ai do të jetë në stol deri në skadimin e kontratës (qershor 2025).

Drejtori sportiv i ‘Zonjës së Vjetër’, Cristiano Giuntoli, është një admirues i madh i Thiago Mottës dhe më herët kishte pasur kontakte me të, më saktësisht gjatë verës, kur Napoli kishte nevojë për një zëvendësues të Luciano Spallettit.

Kontrata e Thiago Mottës me Bolognën skadon në fund të sezonit aktual dhe rinovimi i saj momentalisht duket i pamundur duke marrë në konsideratë interesimin e madh që kanë klubet evropiane për të.

Bologna tashmë gjendet në pozitën e katërt në Serie A pas fitores 2-1 ndaj Atalantas në udhëtim, dhe janë në rrugën e duhur për të siguruar kualifikimin në Ligën e Kampionëve. /Telegrafi/

The post Juventus tashmë e ka të qartë se kush do të jetë zëvendësuesi i Allegrit në stol appeared first on Albeu.com.

Pogba u dënua për katër vjet nga gjykata anti-doping e Italisë të enjten, pasi doli pozitiv në test.

“Është shumë e trishtueshme si në nivel njerëzor ashtu edhe për futbollin, pasi po humbasim një lojtar të jashtëzakonshëm”, u ka thënë Allegri gazetarëve përpara ndeshjes së Juves në Serie A në Napoli të dielën. “Kam pasur fatin të punoj me të, ta trajnoj dhe është shumë e vështirë të gjesh lojtarë si ai… Ai është një djalë fantastik”.

The post Allegri për dënimin e Pogba: Futbolli pa një talent të jashtëzakonshëm appeared first on Albeu.com.

Pasi tani ndodhen shumë larg titullit të kampionit, Massimiliano Allegri është kthyer te objektivi i tyre i vjetër, që është një pozitë që i dërgon në Ligën e Kampionëve për sezonin e ardhshëm.

Trajneri i Juventusit ka thënë se i duhen edhe 13 pikë deri në fund të sezonit për të arritur qëllimin që kishin para fillimit të sezonit.

“Duhet të marrim rezultat pozitiv sepse u bënë pesë vite që nuk fitojmë në Napoli, muaji shkurt nuk ishte i bukur. Kemi fituar vetëm ndaj Frosinones”.

“Shpresojmë që marsi të jetë më me fat, duhet të përmirësojmë fazën mbrojtëse sepse pësojmë shumë. Në Maradona ndeshjet nuk përfundojnë kurrë dhe nëse nuk jemi të vëmendshëm do të përfundojmë me kocka të thyera”, tha Allegri.

Krejt në fund ai foli edhe për të ardhmen e tij, duke thënë se nuk e mendon largimin nga Allianz Stadium.

“Kam një kontratë deri në vitin 2025 dhe drejtuesit do të ma komunikojnë nëse kanë një ide tjetër për të ardhmen. Mendoj se për të garantuar pjesëmarrjen në Ligën e Kampioëve na duhen edhe 13 pikë”, u shpreh Allegri. /Telegrafi/

The post Allegri i frikësohet Napolit: Na duhen edhe 13 pikë për të arritur qëllimin appeared first on Albeu.com.

Bianconerët kanë filluar të bien në garën për titull në javët e fundit dhe shumë në Torino tani kanë filluar të shohin përpara në sezonin e ardhshëm, të vetëdijshëm se projekti i ri i qëndrueshëm do të bëjë një hap kyç përpara me rikthimin e tyre në Ligën e Kampionëve dhe kualifikimin e mundshëm në Kupën e Botës për Klube.

Allegri ka ndarë opinione te Juventusi, me disa që besojnë se ai meriton një shans për të vazhduar në rol pas punës së tij mbresëlënëse pavarësisht rrethanave të vështira, ndërsa të tjerët shpresojnë për një ndryshim dhe fillim të ri në këtë epokë të re.

Duke folur për gazetën Tuttosport, Ravanelli ofroi dy alternativa të mundshme ndaj Allegrit nëse Juventus bën një ndryshim në shtabin teknik.

“Nëse doni të vazhdoni me një siguri, unë them Conte. Kam luajtur me Antonion, ai është fitues i lindur dhe e njeh shumë mirë edhe ambientin”, ka thënë fillimisht Ravanelli.

“Përndryshe, nëse klubi synon të fokusohet te një trajner i ri dhe në zhvillim, i cili vjen nga provinca, siç ndodhi në atë kohë me Lippin, unë do të punësoja Thiago Mottan, i cili është dëshmuar se është një trajner i madh. Unë e konsideroj italo-brazilianin gati për të udhëhequr një klub të mirë”, përfundoi legjenda e Juves.

Juventusi aktualisht ndodhet i dyti në tabelën e Serie A pas 25 ndeshjesh, nëntë pikë prapa liderit të ligës Inter, i cili gjithashtu ka një ndeshje më pak. /Telegrafi/

The post Legjenda e klubit sugjeron drejtuesit e Juventusit për dy alternativa të Allegrit appeared first on Albeu.com.

Dyshimet ngrihen edhe pas fjalëve të teknikut në prag të ndeshjes me Udinesen. “Le të përpiqemi ta mbyllim sezonin në mënyrën më të mirë, kam ende një vit nga kontrata. Ne varemi gjithmonë nga rezultatet dhe puna që bëjmë”, është shprehur Allegri.

E thënë në mënyrë tjetër, nëse Juventusi të paktën nuk kualifikohet në Champions League, Allegri me shumë mundësi do t’i japë lamtumirën klubit torinez. Në krahun tjetër drejtuesit e “Zonjës” kanë nisur të shqyrtojnë zëvendësuesit e mundshëm, por të mos u surprizuar nga largimi i Allegrit në fund të sezonit aktual. /newsport.al/

The post Allegri gjithnjë e më larg Juventusit, nis puna për të gjetur zëvendësuesin appeared first on Albeu.com.

Partnerja e tij, aktore e njohur në Itali, pasi kishte bërë gjithçka që ta ruante këtë lidhje në momente të tjera krize më herët, kësaj radhe nuk e ka toleruar trajnerin bardhezi. Deri këtu gjërat kishin mbetur mes çiftit, por sot, shkuarja e gazetarëve të “Striscia la Notizia” në shtëpinë e saj në Milano, duke i dhënë “Tapiro d’Oro” në shenjë perzonazhi të radhës publik negativ, ka tërbuar vajzën e aktores.

Kjo e fundit, Jolanda, ardhur në jetë nga martesa e Ambra me këngëtarin e njohur italian, Francesco Renga, ka shpërthyer keq në rrjetet sociale. Ajo e ka më shumë me emisionin e njohur italian, që kërkon të bëjë humor me fatkeqësitë e të tjerëve, ndërsa mes rreshtave ngre pyetjen ekzistenciale sipas saj: Çfarë është e dënueshme mes besimit te dashuria dhe tradhtisë?

Ja mesazhi i saj i plotë, që nënkupton hapur tradhtinë e trajnerit të Juventusit: “Sot, nëna ime mori një ‘Tapir’ (gjitar barngrënës, i ngjashëm në formë me derrin), pas publikimit të artikujve të ndryshëm mbi përfundimin e lidhjes së saj. Sidoqoftë, arsyeja e kësaj vizite nuk është e qartë për mua.

Natyrisht, e di mirë se jeta e një personazhi publik, sipas disave, nuk mund të mbahet private, por a është vërtet e nevojshme ta zemërohesh dikë në një situatë të tillë? Pse duhej të trokisnit tek ajo në Milano? Pse të mos shkonit në Torino (ku është Allegri)?

Kështu po fajësoni nënën time, pse i besoi personit me të cilin ishte dhe me të cilin ndau katër vite të jetës së saj?! Nëse, në fund, ky person doli të ishte ndryshe nga sa hiqej, a është faji i atyre që besojnë apo atyre që tradhtojnë besimin, por edhe tradhtojnë në çdo kuptim të mundshëm?

Çfarë është e dënueshme; tradhtia apo besimi te dashuria? Ju luani lojën, jam dakord, por nuk duket se luhet kaq kollaj me dikë. Dhe më thoni çfarë dëshironit që i shkuat në shtëpi, se nuk di të bëj shaka pa kripë si ju. Nuk bëni askënd të qeshë, teksa i trajtoni kështu vuajtjet e njerëzve. Nëna ime ishte e përfshirë në një lidhje që përfundoi, por nuk e meritonte ta trajtonit kështu”.

The post Allegri e tradhtoi me dikë tjetër, vajza e aktores italiane shpërthen keq në rrjetet sociale (VIDEO) appeared first on Albeu.com.

Juventusi e çoi dëm një epërsi prej dy golave në Dacia Arena të dielën pasdite, duke e lejuar Udinesen t’ia nxjerrë një pikë me një barazim 2:2.

Kjo ishte ndeshja e parë e Allegrit në stolin e Juves që prej kthimit të tij këtë verë dhe italiani beson se ky barazim duhet të shërbejë si mësim për lojtarët e tij.

“Në bëmë ndeshje të mirë. Fatkeqësisht, kështu e ka futbolli. Duhej të kishim luajtur më mirë në pjesën e dytë, por nuk ishim në gjendje t’i kontrollonim rastet e papritura. Kjo duhet të na shërbejë si mësim”, tha Allegri për DAZN.

Ronaldo e nisi ndeshjen nga stoli dhe u fut në lojë në pjesën e dytë për të shënuar një gol në kohën shtesë, i cili iu anulua për pozitë jashtë loje.

Pati thashetheme se Ronaldo u la në stol për shkak se dëshiron të largohet nga Juventusi, por Allegri nuk deshi të përfshihet në bisedime të tilla.

“Ronaldo po ndihet mirë. M’u desh të bisedoja më të para ndeshjes, për t’i treguar se ndeshjen do ta niste nga banka rezervë. Ai ishte në dispozicion dhe luajti mirë kur u fut në lojë”, shpjegoi Allegri.

The post U përfol se do të largohet, Allegri shpjegon arsyet pse e la në stol Ronaldon appeared first on Albeu.com.