UNICEF-i në Kosovë, Ministria e Digjitalizimit dhe Administratës Publike dhe Ministria e Arsimit dhe Shkencës prezantuan sot studimin me titull “Nga qasja digjitale te kompetenca digjitale: Analizë gjithëpërfshirëse e zhvillimit të kompetencave digjitale në sistemin parauniversitar të Kosovës, Udhërrëfyes për Reformën e Arsimit Digjital”.

Sipas studimit, ndonëse digjitalizimi përbën një përparësi strategjike për arsimin në Kosovë, realizimi i tij vazhdon të pengohet nga një sërë problemesh. Mes tyre renditen bashkërendimi i dobët institucional, infrastruktura e pamjaftueshme, niveli i kufizuar i përgatitjes së mësimdhënësve, financimi dhe mungesa e një qasjeje të përcaktuar qartë ndaj teknologjive të reja, përfshirë Inteligjencën Artificiale.

Për projektin folën përfaqësuesit kompetentë të institucioneve partnere, përfshirë ministrin në detyrë të Ministrisë së Digjitalizimit dhe Administratës Publike, Lulëzon Jagxhiu.

Jagxhiu deklaroi se në themel të transformimit digjital në arsim duhet të jenë nxënësi dhe mësimdhënësi, jo vetë teknologjia. Sipas tij, synimi është që përdorimi i teknologjisë të kontribuojë në një arsim më cilësor dhe më gjithëpërfshirës, i cili i përgatit të rinjtë për të ardhmen.

Edhe zëvendësministri në detyrë i Ministrisë së Arsimit dhe Shkencës, Përparim Kryeziu, vlerësoi se Udhërrëfyesi Digjital krijon një bazë të mirë për vendimmarrje, në mënyrë që mundësitë që sjell digjitalizimi të shfrytëzohen në maksimum.

Kryeziu tha se digjitalizimi konsiderohet njëkohësisht domosdoshmëri e kohës dhe mundësi për përparim në cilësi e qasje, si dhe për më shumë barazi dhe gjithëpërfshirje në sistemin arsimor.

Shefja e Zyrës së UNICEF-it në Kosovë, Veronika Vashchenko, nënvizoi se fëmijët dhe të rinjtë në vend po rriten tashmë në një realitet digjital. Për këtë arsye, sipas saj, digjitalizimi nuk duhet të kufizohet vetëm te sigurimi i qasjes në teknologji.

Vashchenko theksoi se çdo fëmije duhet t’i jepet mundësia të zhvillojë kompetenca kritike digjitale, me përkrahjen e mësimdhënësve që kanë vetëbesim për ta përdorur teknologjinë në mënyrë kuptimplotë dhe të sistemeve arsimore që krijojnë mjedise të sigurta, gjithëpërfshirëse dhe efektive për të nxënit.

Raporti çmon hapat e ndërmarrë për përafrimin me standardet evropiane, ndërsa kërkon fuqizimin e zbatimit, monitorimit dhe llogaridhënies. Në përfundim, Udhërrëfyesi bën thirrje për angazhim të përbashkët nga institucionet qeveritare, komunat, shkollat, universitetet, partnerët zhvillimorë dhe sektori privat, me qëllim investimin në kompetencat digjitale që do të përcaktojnë të ardhmen e Kosovës.

The post Prezantohet studimi i UNICEF-it dhe MASH-it për reformimin e arsimit digjital appeared first on Albeu.com.

Afati për aplikimet në Provimin e Maturës Shtetërore është shtyrë nga Ministria e Arsimit dhe Shkencës, në mënyrë që edhe nxënësit që plotësojnë kushtet për të marrë pjesë në provim të mund të regjistrohen.

Sipas njoftimit të MASh-it, aplikimi do të jetë i hapur deri të hënën, më 24.08.2026, në orën 11:00. Miratimi i aplikimeve do të kryhet po atë ditë, deri në orën 12:00.

Deri tani, në Provimin e Maturës Shtetërore janë regjistruar 4,650 nxënës.

Megjithatë, referuar rezultateve të afatit të qershorit, ministria llogarit se rreth 1,000 nxënës që kanë të drejtë t’i nënshtrohen provimit nuk e kanë përfunduar ende aplikimin.

MASh shpjegon se vendimi për zgjatjen e afatit synon t’u krijojë të gjithë kandidatëve potencialë mundësinë për t’u përfshirë në procedurën e aplikimit.

The post Matura shtetërore, zgjatet deri më 24 gusht afati i aplikimit për rreth 1 mijë nxënës appeared first on Albeu.com.

Procesi për përgatitjen e Strategjisë së Arsimit të Kosovës 2035+ ka vijuar me konsultime të reja nga Ministria e Arsimit dhe Shkencës, e cila ka mbajtur një tryezë diskutimi me drejtues të institucioneve të arsimit të lartë.

Në qendër të takimit ishin prioritetet që duhet të përcaktohen në nivel strategjik, si edhe roli i universiteteve dhe institucioneve të tjera të arsimit të lartë në hartimin dhe zbatimin e politikave të reja në arsim.

Ministri në detyrë i Arsimit dhe Shkencës, Hajrulla Çeku, deklaroi se Strategjia do të hartohet në bashkëpunim me institucionet arsimore, komunat dhe partnerët, me synimin që zbatimi i saj të jetë sa më i suksesshëm.

Sekretarja e Përgjithshme e MASh-it, Fadile Dyla, çmoi angazhimin e institucioneve të arsimit të lartë dhe nënvizoi se përfshirja e tyre është e rëndësishme si në planifikim, ashtu edhe në realizimin e objektivave të Strategjisë.

Taulant Hoxha, koordinatori i procesit për hartimin e Strategjisë, bëri të ditur se dokumenti do të përgatitet përmes konsultimeve të hapura dhe gjithëpërfshirëse me të gjithë akterët relevantë.

Nga ana e tyre, përfaqësuesit e institucioneve të arsimit të lartë paraqitën propozime dhe rekomandime për avancimin e mëtejshëm të këtij niveli të arsimit. Ata shprehën gatishmëri për të dhënë kontribut në hartimin e politikave që synojnë cilësi më të lartë, inovacion dhe zhvillim afatgjatë të sistemit arsimor në Kosovë.

The post MASh zhvillon konsultime me arsimin e lartë për Strategjinë e Arsimit 2035+ appeared first on Albeu.com.

Për vitin shkollor 2026/2027, Ministria e Arsimit dhe Shkencës (MASh) ka bërë të ditur se do të ofrojë 100 bursa për nxënësit e Arsimit dhe Aftësimit Profesional (AAP), me synim që të inkurajojë regjistrimin në drejtimet deficitare dhe të shtojë përfshirjen e vajzave në drejtimet teknike.

Sipas njoftimit, këto bursa u dedikohen nxënësve të klasës së dhjetë në Institucionet e Arsimit dhe Aftësimit Profesional (IAAP). Vlera e secilës bursë është 50 euro në muaj, ose 500 euro për një vit shkollor, pa përfshirë muajt korrik dhe gusht.

“Ministria e Arsimit dhe Shkencës, edhe për vitin shkollor 2026/2027, do të mbështesë nxënësit e Arsimit dhe Aftësimit Profesional (AAP) përmes ndarjes së 100 bursave, me synim nxitjen e regjistrimit në drejtimet deficitare dhe rritjen e pjesëmarrjes së vajzave në drejtimet teknike. Bursat janë të dedikuara për nxënësit e klasës së dhjetë në IAAP dhe kanë vlerën 50 euro në muaj, përkatësisht 500 euro për vitin shkollor, ndërsa mbështetja do të vazhdojë për tri vite të shkollimit, sipas kritereve të përcaktuara”, thuhet në njoftim.

Nga numri i përgjithshëm prej 100 bursash, 70 janë paraparë për nxënësit që regjistrohen në drejtimet deficitare, ndërsa 30 të tjera janë rezervuar për vajzat që përzgjedhin drejtimet teknike.

“Nga numri i përgjithshëm i bursave, 70 janë të destinuara për nxënësit që regjistrohen në drejtimet deficitare, ndërsa 30 për vajzat që zgjedhin drejtimet teknike, me qëllim zhvillimin e aftësive profesionale në fushat ku tregu i punës ka nevojë për kuadro të reja”, thuhet më tej.

Ministria ka sqaruar se periudha e aplikimit nis më 9 korrik dhe përfundon më 1 tetor 2026. Dokumentacioni dhe aplikimi dorëzohen në IAAP, ndërsa drejtorët e këtyre institucioneve kanë obligim që aplikacionet t’i përcjellin në MASh, përkatësisht në Departamentin e Arsimit dhe Aftësimit Profesional, deri më 5 tetor 2026.

The post MASh shpall 100 bursa për nxënësit e Arsimit Profesional për vitin 2026/2027, afati i aplikimit deri më 1 tetor appeared first on Albeu.com.

Prej disa orësh në faqen e kësaj ministrie shfaqet mesazhi, në të cilin thuhet se faqja është hakeruar nga hakerat grekë “HACKED BY GREEK HACKINGTEAM NETËATCHERS”.

Për shkak të sulmit, nuk hapet asnjë nënfaqe e kësaj ueb faqeje, ndërsa të gjitha lidhjet e publikuara çuan në një video në YouTube të titulluar “Maqedonia e famshme”, shkruan Alsat.

Për momentin, faqja është plotësisht jashtë linje.

The post Hakerohet faqja e MASH në Maqedoninë e Veriut: E kanë bërë grekët appeared first on Albeu.com.