Në Manastir po zbatohet një cikël i gjerë investimesh në arsim me mbështetjen e Qeverisë dhe Ministrisë së Arsimit dhe Shkencës, theksoi ministrja Vesna Janevska gjatë inspektimit të punimeve në lagjen Bukovski Livadi.

Sipas saj, Qeveria po vazhdon të investojë fuqishëm në përmirësimin e infrastrukturës arsimore, me synimin që çdo nxënës, pavarësisht vendbanimit, të ketë mundësi të barabarta për arsim cilësor.

Në këtë lagje po kryhen punime për përshtatjen e një objekti që deri në fund të vitit do të vihet në funksion si shkollë e re vartëse e SHFK “Kole Kaninski”. Investimi kap vlerën e 31 milionë denarëve dhe po realizohet nga vetëqeverisja lokale me përkrahje të Qeverisë. Punimet i panë nga afër sot kryeministri Hristijan Mickoski, ministrja e Arsimit dhe Shkencës, Vesna Janevska, si dhe kryetari i Manastirit, Toni Konjanovski.

“Urime për këtë investim të rëndësishëm të komunës së Manastirit, i realizuar me mbështetjen e Qeverisë. Është e rëndësishme të ndërtohet aty ku ka nevojë reale, të përmirësohet infrastruktura arsimore dhe kudo të krijohen kushte për arsim cilësor. Me adaptimin e këtij objekti, i cili do të ketë pesë klasë, bibliotekë dhe hapësira sanitare, përfshirë edhe për nxënës me nevoja të veçanta arsimore, fëmijët e lagjes Bukovski Livadi do të mund ta përfundojnë arsimin fillor në vendbanimin e tyre, në vend që çdo ditë të udhëtojnë në zona të tjera. Kështu u kursejmë kohë dhe u mundësojmë të përkushtohen më shumë në mësim dhe të arrijnë rezultate edhe më të mira”, deklaroi Janevska.

Ajo nënvizoi se ky projekt përbën vetëm një segment të investimeve të rëndësishme që po zhvillohen në Manastir me mbështetjen e institucioneve qendrore.

“Komuna nuk është e vetme në përpjekjet për arsim më të mirë. Janë siguruar mjete për rreth 15 investime infrastrukturore. Ministria tashmë ka përfunduar rikonstruksionin e sallës sportive në SHFK ‘Elpida Karamandi’, është në ndërtim një nga tre sallat e reja sportive shkollore, po finalizohet ndërtimi i shtatë fushave sportive shkollore, do të rikonstruktohen katër shkolla, ndërsa nga viti i ardhshëm fillon rikonstruksioni i konviktit studentor ‘Koço Racin’. Bëhet fjalë për një cikël investimesh me vlerë mbi 450 milionë denarë, pra më shumë se 7 milionë euro, me të cilin do të përmirësohen ndjeshëm kushtet për arsim dhe sport në Manastir”, theksoi Janevska.

The post Janevska: Në Manastir po avancon infrastruktura arsimore me investime qeveritare mbi 7 milionë euro appeared first on Albeu.com.

Ministrja e Arsimit dhe Shkencës, Vesna Janevska, bëri të ditur se gjatë muajit të kaluar dhe këtij muaji, rreth 30 nxënës kanë udhëtuar për të përfaqësuar Maqedoninë në olimpiadat ndërkombëtare të shkencës, ndërsa të gjitha kostot e pjesëmarrjes së tyre janë përballuar plotësisht nga shteti.

Ajo theksoi se Ministria e Arsimit dhe Shkencës, së bashku me Qeverinë, për të dytin vit me radhë kanë siguruar financim të plotë për shpenzimet e udhëtimit dhe tarifat e regjistrimit për këto talente të reja, me qëllim që familjet e tyre të mos ngarkohen me shpenzime shtesë financiare.

“Kështu do të vazhdojë të jetë. Talentet tona meritojnë mbështetje të plotë për të përparuar, për të zhvilluar njohuritë e tyre dhe për të treguar se Maqedonia ka të rinj që konkurrojnë në mënyrë të barabartë me më të mirët në botë”, deklaroi Janevska.

Nga Ministria nënvizojnë se përkrahja për nxënësit që marrin pjesë në gara prestigjioze ndërkombëtare është pjesë e angazhimeve për të nxitur përsosmërinë në arsim dhe për të krijuar kushte që të rinjtë të zhvillojnë aftësitë e tyre dhe ta përfaqësojnë vendin në nivelin më të lartë.

The post Janevska: Shteti ua mbulon tërësisht shpenzimet nxënësve që përfaqësojnë Maqedoninë në olimpiadat shkencore appeared first on Albeu.com.

Ministrja e Arsimit, Vesna Janevska, deklaroi se prindërit e fëmijëve që ushtrojnë dhunë ndaj bashkëmoshatarëve do të ndëshkohen me gjoba.

Sipas saj, në procedurë parlamentare ndodhen ndryshime ligjore që parashohin masa ndëshkuese për prindërit dhe kujdestarët e atyre fëmijëve për të cilët konstatohet se kanë kryer dhunë mes bashkëmoshatarëve në shkollë.

Janevska theksoi se në shumë familje mungon elementi edukativ dhe vlerësoi se, pa përfshirje më të madhe të prindërve, parandalimi i suksesshëm i dhunës mes bashkëmoshatarëve nuk mund të arrihet.

“Shumë familjeve u mungon pikërisht ai komponent edukativ, i cili është baza për rritje të shëndetshme. Rasti i fundit i dhunës nga bashkëmoshatarët tregoi fëmijë me mungesë empatie dhe vlera të shtrembëruara. Disa e shpërthejnë dhunën ndaj një fëmije, ndërsa të tjerë qëndrojnë mënjanë, filmojnë dhe argëtohen në vend që ta ndihmojnë”, u shpreh Janevska.

Në domenin publik është publikuar një video e dhunës mes bashkëmoshatarëve në Aerodrom./Telegrafi/

The post Janevska paralajmëron gjoba për prindërit e fëmijëve që kryejnë dhunë mes bashkëmoshatarëve appeared first on Albeu.com.

Në dy paraqitjet e qershorit për regjistrim në shkollat e mesme për vitin shkollor 2026/2027, janë regjistruar gjithsej 15 705 nxënës, bëri të ditur Ministria e Arsimit dhe Shkencës.

Sipas të dhënave të MASH-it, 11 171 nxënës janë regjistruar për ndjekjen e mësimit në gjuhën maqedonase, 4241 në gjuhën shqipe, 279 në gjuhën turke dhe 14 në gjuhën serbe.

Ndarë sipas llojit të arsimit, në të dy afatet janë regjistruar 4653 nxënës në arsimin gjimnazial dhe 10 823 në arsimin profesional. Në Akademinë sportive janë regjistruar 229 nxënës, ndërsa për arsimin artistik, sipas njoftimit të MASH-it, procesi i përzgjedhjes ende nuk ka përfunduar.

Afati i dytë i paraqitjes u realizua më 23 qershor, ndërsa dokumentacioni i nevojshëm u dorëzua nëpër shkolla më 24 qershor. MASH njoftoi se në këtë afat të dytë të qershorit janë paraqitur 2927 nxënës, prej të cilëve 1457 për mësim në gjuhën maqedonase, 1369 për mësim në gjuhën shqipe dhe 101 për mësim në gjuhën turke.

Më herët, MASH kishte informuar se në paraqitjen e parë për regjistrim në arsimin e mesëm, e zhvilluar me aplikim elektronik nga 12 deri më 15 qershor, ishin paraqitur 15 075 nxënës, ndërsa pas selektimit të bërë në arsimin artistik u regjistruan 13 423.

Nga ky numër, 9839 nxënës ishin regjistruar për mësim në gjuhën maqedonase, 3357 në gjuhën shqipe, 213 në gjuhën turke dhe 14 nxënës në gjuhën serbe.

The post MASH: Në dy afatet e qershorit, 15 705 nxënës u regjistruan në arsimin e mesëm appeared first on Albeu.com.

Këtë vit, konkursi i Ministrisë së Arsimit dhe Shkencës parashihte më shumë se 25.000 vende të lira në 109 shkolla të mesme publike në vend. Nga ky numër, mbi 17.000 vende ishin të destinuara për arsimin profesional, rreth 6.000 për gjimnazet dhe 570 për arsimin artistik.

Të dhënat zyrtare tregojnë se në afatin e parë të regjistrimit u pranuan 13.423 nxënës, ndërsa në afatin e dytë u regjistruan edhe 2.927 të tjerë. Nga totali i përgjithshëm, 11.171 nxënës do të vijojnë mësimin në gjuhën maqedonase, 4.241 në gjuhën shqipe, 279 në gjuhën turke dhe 14 në gjuhën serbe.

Interesimi më i madh i semimaturantëve ka qenë për arsimin profesional, ku janë regjistruar gjithsej 10.823 nxënës. Ndërkohë, 4.653 nxënës kanë zgjedhur gjimnazet, ndërsa 229 janë regjistruar në Akademinë e Sportit.

Për ata nxënës që kanë dorëzuar dokumentet në afatin e dytë, në rastet kur numri i kandidatëve është më i lartë se vendet e lira, testi klasifikues do të organizohet më 29 qershor. Po në të njëjtën ditë do të shpallen edhe rezultatet.

The post Mbi 15 mijë nxënës regjistrohen në shkollat e mesme në Maqedoninë e Veriut, më shumë se 9 mijë vende mbesin bosh appeared first on Albeu.com.

Ajo sqaroi se ligjet parashohin zgjidhje për mësuesit që mund të mbeten pa nxënës, duke u dhënë mundësinë që, me pëlqimin e tyre, të angazhohen si asistentë arsimorë për një periudhë njëvjeçare. Janevska nënvizoi se asnjë veprim nuk do të bëhet me detyrim, por vetëm në mënyrë transparente, me miratimin e stafit arsimor dhe në bashkëpunim me komunat, UNICEF-in dhe Bankën Botërore.

Duke paraqitur arsyet e këtij procesi, Janevska tha se dy të tretat e të gjitha objekteve shkollore në Maqedoni janë shkolla rajonale, ndërsa vetëm 12% e numrit të përgjithshëm të nxënësve vijojnë mësimin në to. Ajo shtoi se në rreth 100 objekte shkollore mësojnë më pak se 5 fëmijë.

Sipas saj, këto shkolla duhet të integrohen në institucione më të mëdha, me qëllim që nxënësit të kenë më shumë mundësi për socializim dhe arsimim në kushte më të mira. Janevska theksoi se interesi më i mirë i fëmijëve është arsyeja kryesore e optimizimit të rrjetit shkollor, ndërsa si përfitim dytësor përmendi kursimin e fondeve nga komunat, të cilat më pas mund të investohen në infrastrukturë.

Ajo paraqiti edhe të dhëna sipas të cilave në 20 vitet e fundit numri i nxënësve ka shënuar ulje prej 28%, ndërkohë që numri i mësuesve është rritur me 46%. Si pasojë, mesatarja në nivel kombëtar ka zbritur nga 18 nxënës për mësues në 11.4 nxënës për mësues, në krahasim me mesataren e OECD-së prej 15 nxënës për mësues.

The post Janevska: Optimizimi i rrjetit të shkollave nuk do të sjellë largim të mësuesve nga puna appeared first on Albeu.com.

Interesimi më i vogël gjatë dy afateve të para të regjistrimit është evidentuar në Shkollën ekonomike dhe në atë të tekstilit.

“Në shkollën ekonomike për fat të keq kemi numër të vogël të nxënësve të pranuar, e që numri është rreth dyzet, dhe tek shkolla e mesme tekstile, deri më tani nxënësit që kanë plotësuar kriterin me 45 pikë janë pranuar vetëm 44 nxënës dhe aty, do kërkojmë nga Ministria ulje të numrit të pikëve që të mund nxënësit që nuk kanë plotësuar kriteriumin e pikëve të regjistrohen”, u shpreh Nazmi Dauti nga Sektori për Arsim në komunën e Tetovës.

Nga ana tjetër, drejtimi më i preferuar mbetet ai i mjekësisë. Që në afatin e parë janë mbushur të gjitha vendet për profilin motër medicinale, ndërsa për drejtimin e kozmetikës kanë aplikuar mbi 200 nxënës për vetëm 30 vende të lira.

“Në afatin e parë të regjistrimit ne kishim diku mbi 600 aplikime në gjuhën shqipe, maqedonase dhe turke. Ndërsa në afatin e dytë afër 200 aplikime, por prej tyre shumë pak plotësonin kushtet për drejtimet 70 pikë. Prej tyre janë pranuar diku vetëm 20” , tha Malësore Ramadani, Drejtoreshë e SH M M “Nikolla Shtejn”.

Sipas Ramadanit, ende ka vende të lira në drejtimet teknik i farmacisë, asistent dentar dhe gjinekologji, por kriteri i pikëve do të mbetet i njëjtë dhe nuk do të ketë ulje.

Pas mjekësisë, interesimi më i lartë në Tetovë është për gjimnazin “Kiril Pejçinoviq”, megjithatë në disa drejtime vazhdojnë të ketë vende të lira për regjistrim në afatet e mbetura./Alsat/

The post Interes i ulët për regjistrim në shkollat profesionale të Tetovës appeared first on Albeu.com.

“Vlerësoj se më në fund kemi sistem të qëndrueshëm për furnizimin dhe shpërndarjen e teksteve shkollore dhe se kjo çështje, të cilën e trashëguam të pazgjidhur, është zgjidhur tashmë. Mori kohë, por ishte e domosdoshme ta tejkalonim, si dhe çdo problem tjetër që e hasëm. Si Qeveri dhe si Ministri, vazhdojmë të fokusohemi në aspekte të tjera të arsimit, në drejtim të ngritjes së cilësinë e procesit edukativo-arsimor”, deklaroi Janevska.

Ajo bëri të ditur gjithashtu se gjatë këtij viti janë zhvilluar trajnime për shërbimet e shkollave, me qëllim që aplikacioni elektronik për porositjen e teksteve të plotësohej siç duhet, ndërsa shkollat, sipas saj, e realizuan me sukses këtë obligim.

Gjatë muajit prill u siguruan dhe u shpërndanë komplete krejtësisht të reja tekstesh për klasat nga e para deri në të tretën, me një tirazh prej afro 250 mijë kopjesh. Në njoftim thuhet se gjatë periudhës dyvjeçare, falë çmimeve më të ulëta të arritura në shtypje, janë kursyer rreth 45 milionë denarë.

“Gjatë ditëve në vijim do të fillojë edhe shpërndarja e teksteve shkollore për klasat e katërta dhe klasat më të larta në arsimin fillor dhe të mesëm. Porositë janë bërë, tekstet shkollore po shtypen për të gjitha lëndët, përfshirë edhe tekstet në të gjitha gjuhët e huaja, të cilat nuk ishin viteve të fundit, ndërsa nga viti i kaluar janë në dispozicion. Përjashtim do të bëjnë tekstet shkollore për klasën e nëntë dhe për vitin e tretë të arsimit të mesëm, sepse në këto klasa, në përputhje me planin etapues për reformimin e sistemit arsimor, është paraparë që vitin e ardhshëm të hartohen programe të reja mësimore dhe, në përputhje me to, edhe tekste të reja shkollore”, deklaroi Janevska./Telegrafi/

The post Janevska: Më 1 shtator, të gjithë nxënësit do të pajisen me mjete mësimore, ndërsa furnizimi me tekste sigurohet në kohë për të tretin vit rresht appeared first on Albeu.com.

Sipas njoftimit të Ministrisë së Arsimit dhe Shkencës, raundi i dytë i regjistrimit në afatin e qershorit do të zhvillohet elektronikisht të martën, më 23 qershor.

Pasi të përfundojë aplikimi online, kandidatët më 24 qershor do të duhet të dorëzojnë dokumentet e nevojshme në shkollat përkatëse.

Rezultatet e regjistrimit, përmes listave të renditjes, do të shpallen më 25 qershor deri në orën 12:00, si në shkolla ashtu edhe në faqet e tyre zyrtare në internet.

Nëse në shkolla të caktuara paraqiten kandidatë me numër të njëjtë pikësh, atëherë më 29 qershor do të organizohet testimi kualifikues, ditë kur do të bëhen publike edhe listat përfundimtare të renditjes.

Në total, për aplikimin e dytë janë të lira 11,882 vende. Prej tyre, 7,404 janë për mësim në gjuhën maqedonase, 4,002 për mësim në gjuhën shqipe, 456 për gjuhën turke dhe 20 për gjuhën serbe.

Ministria e Arsimit bëri të ditur se në regjistrimin e parë aplikuan elektronikisht 15,075 nxënës, ndërsa 13,397 prej tyre u regjistruan.

The post Të martën hapet afati i dytë për regjistrimin në shkollat e mesme, në dispozicion 11,882 vende appeared first on Albeu.com.