Fundjava e fundit rezultoi mjaft frytdhënëse për futbollistët shqiptarë që luajnë jashtë vendit, me disa prej tyre që lanë gjurmë të thella në ndeshjet e kampionateve përkatëse. Cristian Shpendi u dallua qartë si figura më e spikatur, pasi shënoi dy herë në Serinë B dhe tani kryeson listën e golashënuesve në Itali me 5 realizime.

Sulmuesi i Cesenës pati një ndikim thelbësor në barazimin 2-2 përballë Cremoneses. Fillimisht, në minutën e 22-të, ai zhbllokoi sfidën me një goditje të fuqishme nga distanca, duke dërguar topin mbi portierin kundërshtar. Më pas, në minutën e 59-të, u tregua i saktë nga pika e penalltisë, duke kompletuar dopietën personale dhe duke u ngjitur në krye të klasifikimit të golashënuesve të këtij kampionati.

Edhe Jasir Asani konfirmoi formën e tij të mirë në kampionatin iranian. Sulmuesi i Kombëtares shqiptare shënoi golin e fitores për Esteghlalin në ndeshjen kundër Paykan. Në minutën e 76-të, ai ekzekutoi me sukses një penallti, duke i siguruar skuadrës së tij një triumf minimal 1-0 në javën e shtatë. Ky rezultat i lejoi Esteghlalit të ngjitet në pozitën e dytë të renditjes me 15 pikë.

Në Slloveni, Indrit Tuci kontribuoi me një gol për Olimpija Ljubljanën në fitoren 3-1 në fushën e Koper. Ai realizoi golin e tretë të takimit, duke vulosur suksesin e skuadrës së tij. Në po të njëjtën sfidë, Marvin Cuni pati gjithashtu një rol protagonist, duke shënuar një herë dhe duke dhënë një asist.

Fundjava solli emocione edhe nga lojtarët e Kombëtares Shqiptare U-21. Kevin Dodaj la shenjë me fanellën e Lechia Gdańsk në sfidën kundër Legnicas, duke shënuar në minutën e 53-të pas një pasimi vendimtar dhe duke ndihmuar skuadrën polake të sigurojë fitoren.

Në anën tjetër të Adriatikut, Adi Kurti debutoi me gol për Audace Cerignolën në Serinë C. Në javën e katërt, skuadra e tij fitoi bindshëm 4-0 ndaj Giuglianos dhe Kurtit iu deshën vetëm katër minuta në fushë për të gjetur rrjetën. Ai hyri në lojë në minutën e 73-të dhe shënoi në të 77-tën, duke regjistruar kështu golin e parë me fanellën e re.

Përtej atyre që shënuan, një numër i konsiderueshëm lojtarësh të Kombëtares u angazhuan si titullarë gjatë kësaj fundjave. Berat Gjimshiti, Klisman Cake, Bujar Pllana, Stavro Pilo, Kristjan Asllani, Ylber Ramadani, Qazim Laçi, Adrion Pajaziti, Arbër Hoxha, Ernest Muçi dhe Rey Manaj e nisën ndeshjen nga minuta e parë me skuadrat e tyre përkatëse.

Ndërkohë, disa të tjerë u aktivizuan duke hyrë nga stoli. Ardian Ismajli, Luis Hasa, Mirlind Daku dhe Armando Broja vazhduan të marrin minuta në kampionatet ndërkombëtare si zëvendësues, duke ruajtur kështu ritmin e ndeshjeve.

The post Dopieta e Shpendit në Serinë B, Asani dhe Tuci gjithashtu protagonistë në skuadrat e tyre appeared first on Albeu.com.

Olimpija Ljuubljana po dominon transfertën ndaj Koperit, ku rezultati momental është 0-3, ndërsa protagonistë janë bërë dy sulmuesit shqiptarë të skuadrës.

Marvin Çuni realizoi golin e parë të takimit në minutën e 52-të. Vetëm dy minuta më vonë, ai asistoi për Mitrovskin, i cili shënoi golin e dytë të Olimpija Ljuubljanës.

Goli i tretë mban firmën e Indrit Tucit. Futbollisti tjetër i Kombëtares shqiptare e dërgoi topin në rrjetë në minutën e 67-të.

Për Çunin, ky ishte realizimi i dytë në këtë sezon, ndërsa në llogarinë e tij janë edhe dy asistime.

Goli i Marvin Çunit

Goli i Indrit Tucit

The post VIDEO/ Çuni shënon dhe asiston, Tuci realizon në fitoren e Olimpija Ljuubljanës ndaj Koperit appeared first on Albeu.com.