Pas vendimit të 16 shtatorit për ish-krerët e UÇK-së në Hagë, në Kosovë dhe në vende të tjera kanë vijuar protestat dhe tubimet në shenjë mbështetjeje për ta.

Mobilizimi qytetar, i nisur menjëherë pas këtij vendimi, pritet të arrijë kulmin më 1 tetor në Prishtinë, ku platforma “Liria ka Emër” ka organizuar Marshin për Liri.

Në protestat e zhvilluara deri tani kanë marrë pjesë qytetarë dhe përfaqësues të organizatave të dala nga lufta. Pjesëmarrësit kanë shprehur mbështetjen për ish-drejtuesit e UÇK-së dhe kundërshtimin ndaj vendimit të fundit të Gjykatës në Hagë.

Hysni Gucati, kryetar i OVL-UÇK-së, ka deklaruar se pret që në marshin e 1 tetorit të mblidhen qytetarë nga Kosova, diaspora dhe të gjitha trevat shqiptare.

Ai ka bërë të ditur se protestat e nisura pas 16 shtatorit do të vijojnë deri në ditën e marshit, ndërsa ka kërkuar që tubimi të zhvillohet paqësisht dhe me qetësi.

Gucati u ka bërë thirrje pjesëmarrësve të tregojnë kujdes, të shmangin fyerjet dhe të mos përplasen me Policinë e Kosovës.

“Ish-krerëve të UÇK-së u është dhënë një vendim i padrejtë. Protestat kanë nisur më 16 shtator dhe do të vazhdojnë deri më 1 tetor, kur pres që njerëzit t’i bashkohen marshit. Angazhimi ynë është që protesta të jetë e qetë dhe paqësore. Duhet të jemi të kujdesshëm, të mos fyejmë policinë tonë dhe pres që në këtë protestë të bashkohen shqiptarë nga të gjitha vendet ku jetojnë”, ka thënë Gucati.

Sipas tij, protesta duhet të përcjellë një mesazh të qartë edhe për komunitetin ndërkombëtar. Ai pret që në këtë organizim të marrin pjesë shqiptarë nga vende të ndryshme.

Kreu i OVL-UÇK-së ka njoftuar se tubime të tjera pritet të organizohen në Shqipëri, Maqedoninë e Veriut dhe në disa vende të Evropës. Në mesin e tyre ka përmendur edhe protestën e paralajmëruar më 10 tetor në Bruksel, përpara selisë së NATO-s.

Gucati është shprehur optimist për rezultatin e procesit të apelit në Hagë për ish-krerët e UÇK-së. Ai beson se përmes protestave do t’u përcillet ndërkombëtarëve, siç është shprehur, e vërteta mbi luftën.

The post Gucati: Më 1 tetor pres pjesëmarrje nga të gjitha trevat shqiptare, besoj në fitore në apel appeared first on Albeu.com.

Pas vendimit dënues të Gjykatës Speciale në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit, platforma qytetare “Liria Ka Emër” ka kërkuar angazhimin dhe bashkërendimin e institucioneve të Kosovës.

Ismail Tasholli, përfaqësues i kësaj platforme, u ka bërë thirrje partive politike, diplomatëve, shoqërisë civile, ekspertëve dhe mërgatës që të përfshihen në një përpjekje të përbashkët për procesin në fjalë.

Ai deklaroi se situata nuk duhet të trajtohet përmes ndarjeve mes pozitës dhe opozitës apo duke rikthyer përplasjet politike të së kaluarës. Sipas Tashollit, institucionet e Republikës së Kosovës duhet të veprojnë me përgjegjësi, transparencë dhe koordinim, ndërsa Qeveria duhet të bëjë të ditur planin dhe strategjinë shtetërore.

Tasholli kërkoi gjithashtu sqarime për mbështetjen juridike dhe financiare që do të ofrohet, rolin e diplomacisë së Kosovës dhe mënyrën e angazhimit të institucioneve akademike e ekspertëve ndërkombëtarë.

Ai bëri thirrje për thirrjen sa më të shpejtë të një mbledhjeje të përbashkët mes Qeverisë së Kosovës dhe Qeverisë së Shqipërisë.

Sipas tij, në rendin e ditës së kësaj mbledhjeje duhet të jetë mbështetja institucionale për mbrojtjen e luftës së UÇK-së dhe sigurimi i mjeteve të nevojshme për mbrojtjen juridike. Tasholli theksoi se Prishtina dhe Tirana duhet të veprojnë përmes një koordinimi dhe përgjegjësie të përbashkët institucionale.

Ndërkohë, Eliza Hoxha, përfaqësuese e platformës “Liria Ka Emër”, njoftoi se më 1 tetor do të mbahet marshi i madh me moton “JO NË EMRIN TIM”, në mbështetje të Hashim Thaçit, Kadri Veselit, Jakup Krasniqit dhe Rexhep Selimit.

Hoxha shpjegoi se data lidhet me 1 tetorin e vitit 1997, kur studentët e Kosovës zhvilluan një protestë paqësore që u shndërrua në një prej momenteve simbolike të rezistencës qytetare. Ajo tha se më 1 tetor qytetarët do të rikthehen në rrugë në mënyrë paqësore me mesazhin “JO NË EMRIN TIM”, ndërsa më 10 tetor kjo thirrje do të vijojë në Bruksel së bashku me mërgatën, me synimin që Kosova brenda dhe jashtë vendit të shprehë një qëndrim të përbashkët.

Platforma qytetare “Liria Ka Emër” do të nisë edhe peticionin qytetar “JO NË EMRIN TIM”. Ky peticion do t’u dërgohet në mënyrë simbolike institucioneve në Bruksel, Strasburg dhe Hagë, si shprehje e qëndrimit të qytetarëve që do t’i bashkohen nismës.

“Liria Ka Emër” ka bërë të ditur se do të vijojë organizimin e aktiviteteve qytetare, akademike dhe publike në Kosovë dhe jashtë saj.

Hoxha u kërkoi Qeverisë të paraqesë një plan, institucioneve të bashkërendohen, partive politike të bashkëpunojnë, ndërsa qytetarëve dhe mërgatës t’i përgjigjen kësaj nisme me pjesëmarrje qytetare. Ajo nënvizoi se kërkesa nuk është që të gjithë të kenë të njëjtin mendim, por që institucionet të përmbushin përgjegjësitë e tyre dhe dallimet politike të mos pengojnë koordinimin për çështjet me interes shtetëror.

The post Jo në emrin tim”, më 1 tetor Prishtina pret një marsh paqësor appeared first on Albeu.com.

Mijëra qytetarë u mblodhën të shtunën në Prishtinë për të marrë pjesë në “Marshin për Liri”, i organizuar në mbështetje të ish-krerëve të Ushtrisë Çlirimtare të Kosovës që po gjykohen në Hagë. Tubimi u mbajt vetëm katër ditë përpara shpalljes së aktgjykimit përfundimtar në çështjen ndaj Hashim Thaçit, Kadri Veselit, Rexhep Selimit dhe Jakup Krasniqit.

Aktiviteti u zhvillua në sheshin “Skënderbeu”, ku u mbajtën fjalime, ndërsa turma mbushi jo vetëm sheshin, por edhe rrugët përreth dhe hapësirat që çojnë drejt tij, përfshirë sheshet “Nëna Terezë” dhe “Zahir Pajaziti”.

Ngjarja u pasqyrua gjerësisht edhe nga mediat e huaja. Reuters raportoi se në marsh morën pjesë mijëra njerëz, ndërsa në mesin e pjesëmarrësve u panë flamuj që valëviteshin dhe pankarta.

Për organizimin shkroi edhe “The Washington Post”, e cila vuri në dukje se mijëra protestues u mblodhën në mbështetje të ish-presidentit Hashim Thaçi dhe tre ish-luftëtarëve të tjerë.

Edhe Associated Press njoftoi për tubimin, duke theksuar se mijëra persona u grumbulluan të shtunën në kryeqytetin e Kosovës në përkrahje të ish-krerëve të UÇK-së.

Sipas AP-së, protestuesit mbushën një prej shesheve qendrore të Prishtinës dhe shumë prej tyre mbanin flamuj kuq e zi shqiptarë. Nëpër qytet ishin vendosur portretet e katër ish-luftëtarëve të UÇK-së, krahas një ore të madhe dixhitale që numëron mbrapsht deri në momentin kur gjykata në Hagë do të shpallë aktgjykimet e saj të mërkurën. Në një pankartë të madhe shkruhej: “Në emër të popullit, shpallini të pafajshëm”.

Për “Marshin për Liri” raportoi edhe France24. Sipas këtij mediumi, protestuesit brohorisnin “UÇK” dhe mbanin fotografi të katër ish-luftëtarëve, të shoqëruara me mesazhet “Çlirimtarët, kthejini në shtëpi” dhe “Kosova po pret.” Ngjarja u pasqyrua gjithashtu nga “Washington Times” dhe Bloomberg.

The post Marshi për Liri” në Prishtinë tërheq vëmendjen e mediave ndërkombëtare appeared first on Albeu.com.

Mijëra qytetarë nga Kosova, trojet shqiptare dhe diaspora dolën të shtunën në qendër të Prishtinës për “Marshin për Liri”, i cili u organizua në mbështetje të Hashim Thaçit, Kadri Veselit, Jakup Krasniqit dhe Rexhep Selimit, që po gjykohen nga Dhomat e Specializuara në Hagë.

Protesta u mbajt katër ditë para datës së caktuar për shpalljen e aktgjykimit përfundimtar në çështjen gjyqësore ndaj katër ish-drejtuesve të Ushtrisë Çlirimtare të Kosovës.

Qytetarët mbushën sheshet “Skënderbeu”, “Nëna Terezë” dhe “Zahir Pajaziti”, si dhe rrugët ndërmjet tyre. Pjesëmarrësit mbanin flamuj kombëtarë, flamuj të Kosovës dhe simbole të UÇK-së. Në mesin e tyre ishin veteranë të luftës, familjarë të dëshmorëve dhe të të akuzuarve, përfaqësues politikë dhe qytetarë të ardhur nga komuna të ndryshme.

Platforma qytetare “Liria ka Emër”, e cila organizoi marshin, bëri të ditur pas përfundimit se në të kishin marrë pjesë rreth 100 mijë qytetarë. Megjithatë, kjo mbetet shifër e dhënë nga organizatorët dhe nuk është konfirmuar deri tani nga ndonjë institucion i pavarur.

Sipas organizatorëve, tubimi synonte të shprehte solidaritetin me katër ish-krerët e UÇK-së dhe të përcillte kërkesën për lirimin dhe shpalljen e pafajësisë së tyre.

Hysni Gucati, kryetar i Organizatës së Veteranëve të Luftës së UÇK-së, u kërkoi pjesëmarrësve një proces gjyqësor të drejtë dhe të paanshëm. Ai tha se as lufta çlirimtare dhe as sakrifica e popullit të Kosovës nuk mund të zhbëhen përmes një procesi gjyqësor.

Fjalim mbajti edhe kryetari i Partisë Demokratike të Kosovës, Bedri Hamza. Ai u bëri thirrje gjyqtarëve në Hagë të marrin parasysh, sipas tij, pasojat e vendimit që pritet të shpallet më 16 shtator. Hamza paralajmëroi se në Kosovë nuk do të pranohej lehtë një aktgjykim që pjesëmarrësit dhe qytetarët do ta vlerësonin si të padrejtë.

Kryetari i Aleancës për Ardhmërinë e Kosovës, Ardian Gjini, deklaroi se Thaçi, Veseli, Krasniqi dhe Selimi kishin luftuar për lirinë e vendit. Sipas tij, historia e luftës çlirimtare të Kosovës nuk mund të njolloset.

Qeveria e Kosovës i falënderoi organizatorët dhe pjesëmarrësit për zhvillimin e marshit dhe sjelljen e tyre. Policia e Kosovës njoftoi se tubimi u mbyll pa incidente dhe në qetësi.

Gjyqi ndaj Thaçit, Veselit, Krasniqit dhe Selimit nisi më 3 prill 2023. Katër të akuzuarit ndodhen në paraburgim në Hagë që nga nëntori i vitit 2020.

Aktakuza përfshin gjashtë pika për krime kundër njerëzimit dhe katër pika për krime lufte. Prokuroria e Specializuar pretendon se veprat për të cilat akuzohen lidhen me periudhën nga marsi i vitit 1998 deri në shtator të vitit 1999, si dhe me ngjarje të zhvilluara në Kosovë, Kukës dhe Cahan të Shqipërisë.

Prokuroria ka kërkuar nga 45 vjet burgim për secilin prej katër të akuzuarve. Thaçi, Veseli, Krasniqi dhe Selimi i kanë mohuar të gjitha akuzat dhe janë deklaruar të pafajshëm për çdo pikë të aktakuzës.

Prokuroria e kishte përfunduar paraqitjen e çështjes në prill të vitit 2025, ndërsa mbrojtja e mbylli paraqitjen e provave në dhjetor të po atij viti. Deklaratat përfundimtare u paraqitën në shkurt të vitit 2026.

Dhomat e Specializuara kanë vendosur që aktgjykimi të shpallet në seancë publike më 16 shtator. Ky vendim pritet të jetë ndër më të rëndësishmit që kjo gjykatë ka marrë që nga themelimi.

Marshi përfundoi me këngë patriotike, ndërsa organizatorët e përsëritën kërkesën që katër ish-drejtuesit e UÇK-së të shpallen të pafajshëm. / BS

The post Kosova po pret”: Qytetarët marshojnë në Prishtinë në mbështetje të ish-krerëve të UÇK-së para 16 shtatorit appeared first on Albeu.com.

Gjatë kësaj fundjave, më shumë se 8 mijë shtetas dhe rreth 2 mijë automjete u nisën nga Shqipëria drejt Kosovës, kryesisht në drejtim të Prishtinës, ku zhvillohej “Marshi i Lirisë”. Aktiviteti u organizua në mbështetje të ish-krerëve të UÇK-së, të cilët po përballen me proces gjyqësor në Hagë.

Të dhënat e Drejtorisë së Kufirit tregojnë se fluksi i lëvizjeve drejt Kosovës ka qenë i lartë. Mes personave që kanë udhëtuar raportohet të kenë qenë edhe pjesëtarë të diasporës.

Parashikohet që trafiku në dy autostradat që lidhin Shqipërinë me Kosovën të shtohet më tej gjatë orëve në vijim dhe gjatë ditës së diel, si në udhëtimet drejt Kosovës, ashtu edhe në kthimet drejt Shqipërisë.

Marshi i zhvilluar në Prishtinë kishte si qëllim shprehjen e mbështetjes për ish-drejtuesit e UÇK-së që po gjykohen në Hagë. Vendimi për çështjen e tyre pritet të shpallet më 16 shtator.

Gjatë ditës së sotme, Dukagjini ka publikuar pamje ku shihen një numër i madh qytetarësh nga Shqipëria duke kaluar në këmbë kufirin drejt Kosovës.

The post Mbi 8 mijë shqiptarë kaluan drejt Kosovës për të marrë pjesë në Marshin e Lirisë appeared first on Albeu.com.

Platforma qytetare “Liria Ka Emër” ka shprehur mirënjohjen për rreth 100 mijë qytetarët që iu bashkuan sot Marshit për Liri në Prishtinë. Sipas platformës, pjesëmarrja e tyre e shndërroi kryeqytetin në një zë të fuqishëm në mbështetje të lirisë, drejtësisë dhe së vërtetës mbi luftën çlirimtare të Kosovës.

Në njoftimin e saj, “Liria Ka Emër” bëri të ditur se në marsh morën pjesë qytetarë nga të gjitha trojet shqiptare, nga çdo komunë e Kosovës, si edhe bashkatdhetarë nga diaspora. Ata u bashkuan pa dallime rreth një mesazhi të vetëm: “Liri për çlirimtarët!”.

“Falënderojmë familjet e dëshmorëve, veteranët dhe invalidët e luftës, bashkëluftëtarët, qytetarët, diasporën, artistët, sportistët, përfaqësuesit politikë, organizatat, bizneset, mediat, vullnetarët dhe secilin që kontribuoi që ky marsh të ishte një manifestim i madh, paqësor dhe dinjitoz”, thuhet në reagim.

Sipas platformës, Kosova dëshmoi edhe një herë se, kur bëhet fjalë për lirinë, UÇK-në dhe njerëzit që morën përgjegjësi për vendin në periudhat më të vështira të historisë, qytetarët dinë të bashkohen.

“Liria Ka Emër” thekson se marshi i sotëm përcolli një mesazh të fuqishëm solidariteti për Hashim Thaçin, Kadri Veselin, Jakup Krasniqin dhe Rexhep Selimin. Mbi të gjitha, sipas njoftimit, ai ishte një thirrje në mbështetje të së vërtetës, drejtësisë dhe historisë së Kosovës.

The post Rreth 100 mijë qytetarë morën pjesë në Marshin për UÇK-në në Prishtinë appeared first on Albeu.com.

Kryetari i Grupit Parlamentar të Partisë Socialiste, Taulant Balla, ishte pjesë e “Marshit për Liri” të zhvilluar në Prishtinë.

Pas mbylljes së aktivitetit, ai ndau pamje nga marshi dhe deklaroi se populli i Kosovës i ka shpallur të pafajshëm Hashim Thaçin, Kadri Veselin, Jakup Krasniqin dhe Rexhep Selimin.

Aktiviteti nisi në orën 14:00 dhe zgjati rreth 1 orë. Në përfundim, fjalën e morën organizatorët, krerë partish, si edhe fëmijë të ish-ushtarëve të UÇK-së.

The post Balla pas marshit në Prishtinë: Populli i Kosovës i konsideron të pafajshëm ish-drejtuesit e UÇK-së appeared first on Albeu.com.

Kryetari i PDK-së, Bedri Hamza, deputeti i Aleancës, Ramush Haradinaj, dhe lideri i Bashkimit Demokratik për Integrim (BDI), Ali Ahmeti, morën pjesë në “Marshin për Liri”, i cili po zhvillohet sot në Prishtinë.

Protesta është organizuar në shenjë mbështetjeje për ish-krerët e Ushtrisë Çlirimtare të Kosovës, që po përballen me proces gjyqësor në Hagë.

Mes qytetarëve të mbledhur nga Kosova dhe trevat shqiptare janë parë edhe Haradinaj e Ahmeti. Në aktivitet po marrin pjesë gjithashtu deputetë të Lëvizjes Vetëvendosje, së bashku me qytetarë dhe përfaqësues të tjerë politikë.

Deputetët e LVV-së, Shqipe Selimi, Adnan Rrustemi, Driton Hyseni dhe Sali Zyba, janë ndër pjesëmarrësit e marshit.

“Marshi për Liri” po mbahet në prag të vendimit për çështjen ndaj Hashim Thaçit, Kadri Veselit, Rexhep Selimit dhe Jakup Krasniqit në Dhomat e Specializuara të Kosovës në Hagë.

Organizatorët kanë kërkuar pjesëmarrje të gjerë, ndërsa në qendër të Prishtinës qytetarët janë grumbulluar me pankarta dhe flamuj në përkrahje të ish-udhëheqësve të UÇK-së.

Aktiviteti vijon në qendër të kryeqytetit, ku priten edhe prononcime nga përfaqësues politikë dhe organizatorë.

The post Figurat politike i bashkohen marshit në Prishtinë në mbështetje të ish-krerëve të UÇK-së appeared first on Albeu.com.

Sheshet e Prishtinës janë mbushur me qytetarë të ardhur nga të gjitha pjesët e Kosovës, të cilët do të marrin pjesë në marshin e organizuar para shpalljes së verdiktit përfundimtar ndaj katërshes së UÇK-së në Hagë.

Aktiviteti, i titulluar “Marshi për Liri”, do të zhvillohet sot nga ora 14:00 në sheshin “Skënderbeu”, sipas programit të publikuar nga platforma qytetare “Liria Ka Emër”.

Veprimtarinë do ta drejtojë moderatori Berat Miftari. Programi do të hapet me një performancë artistike të Arbnora Zogianit, e cila do të interpretojë këngën “Pa duvak s’ka me u ba nuse”.

Pas kësaj, Miftari do të shpallë hapjen zyrtare të marshit dhe do të ftojë në skenë përfaqësuesit e platformës “Liria Ka Emër”, Ismail Tashollin dhe Eliza Hoxhën.

Në program është përfshirë edhe një fjalim i Hysni Gucatit. Fjalën e saj do ta mbajë gjithashtu Lirjona Sylejmani, vajza e dëshmorit të kombit, Bajram Sylejmani.

Pjesë e aktivitetit do të jetë edhe këngëtari Arif Vladi, i cili do të interpretojë “Marshin e UÇK-së”.

The post Qytetarë të shumtë mblidhen në Prishtinë për “Marshin për Liri appeared first on Albeu.com.

Në sheshin “Skënderbeu” të Prishtinës mbahet sot Marshi për Liri, i organizuar në përkrahje të Hashim Thaçit, Kadri Veselit, Jakup Krasniqit dhe Rexhep Selimit, vetëm pak ditë përpara se Gjykata Speciale të shpallë vendimin për ish-udhëheqësit e Ushtrisë Çlirimtare të Kosovës.

Organizatorët e kësaj nisme, të quajtur “Liria ka emër”, u kanë bërë thirrje qytetarëve që të dalin masivisht në shesh për t’i mbështetur ata.

Në këtë tubim, të pranishëmve do t’u drejtohen kryetari i Partisë Demokratike të Kosovës, Bedri Hamza, si dhe kryetari i Aleancës për Ardhmërinë e Kosovës, Ardian Gjini.

Përfaqësuesit e platformës “Liria ka emër” kanë ftuar edhe spektrin politik që t’i bashkohet marshit.

Kryeministri në detyrë, Albin Kurti, të mërkurën nuk dha përgjigje në pyetjen e gazetarëve nëse do të jetë pjesëmarrës në këtë tubim apo jo.

Eliza Hoxha dhe Ismail Tasholli, përfaqësues të platformës qytetare “Liria ka Emër”, i kishin ftuar udhëheqësit e katër partive parlamentare shqiptare që të marrin fjalën gjatë marshit, por bënë të ditur se ftesës i janë përgjigjur pozitivisht vetëm Bedri Hamza nga PDK-ja dhe Ardian Gjini nga AAK-ja.

Një ditë më parë, Hoxha prezantoi edhe programin e marshit dhe listën e folësve.

“Në emër të platformës ‘Liria ka Emër’ do të flasim ne të dy së bashku, do ta hapim, në fakt, pjesën formale të Marshit. Në emër të shoqatave të dala nga lufta do të flasë Hysni Gucati. Do të flasë Liriona Sulejmani në emër të fëmijëve të dëshmorëve, si vajza e dëshmorit Bajram Sulejmani, duke sjellë zërin dhe mesazhin e një brezi që trashëgon kujtesën dhe sakrificën e luftës edhe në familje. Qytetarëve do t’u drejtohen gjithashtu Ardian Gjini dhe Bedri Hamza, si dhe Buna Mustafa, e bija e Salih Mustafës-Calit. Programi do të shoqërohet edhe me këngë, të cilat do të jenë pjesë e mesazhit të këtij tubimi, këngë patriotike, natyrisht, që na kanë frymëzuar dhe na kanë kujtuar gjithmonë për përkushtimin tonë për liri”, u shpreh Hoxha.

Ajo shtoi se nga platforma “Liria ka emër” është siguruar transport me autobusë nga të gjitha qytetet e Kosovës.

“Ejani me familjet tuaja, ejani me fëmijët tuaj, ejani me prindërit tuaj, me miqtë tuaj, ejani të gjithë bashkë në Marsh më 12 shtator, në orën 14:00, në Sheshin ‘Skënderbeu’, të Marshojmë për çlirimtarët tanë”, tha ajo.

Ndërkohë, Ismail Tasholli i ftoi qytetarët të marrin pjesë në marsh, duke theksuar se mesazhi i organizatorëve nga Prishtina deri në Hagë mbetet i pandryshuar: të qëndrojnë të bashkuar dhe pranë njëri-tjetrit në momente që, sipas tij, kanë rëndësi të veçantë.

“Prandaj, sot dua t’ju drejtoj një ftesë të gjithë qytetarëve. Bashkohuni me ne më 12 shtator, në orën 14:00, në Sheshin ‘Skënderbeu’ në Prishtinë. Mos ejani vetëm, ejani me familjet tuaja, merrni fëmijët, prindërit, vëllezërit, motrat dhe miqtë tuaj, ashtu siç erdhi edhe Eliza. Le të jetë ky Marsh një Marsh qytetar, familjar, paqësor dhe dinjitoz. Le të jemi sa më shumë, le të jemi bashkë. Më 12 shtator, ora 14:00, Sheshi ‘Skënderbeu’. Dhe më 15 shtator, nga ora 22:00, takohemi përsëri në Hagë, në natën e pritjes, për të qëndruar së bashku deri në nisjen e seancës së gjyqit”, tha ai.

Këtij marshi mbështetje i kanë shprehur edhe shumë figura publike.

The post Sot zhvillohet Marshi për Liri në sheshin “Skënderbeu” në Prishtinë appeared first on Albeu.com.