Kryeministri në detyrë i Kosovës, Albin Kurti, ka deklaruar se Lëvizja Vetëvendosje dhe Lidhja Demokratike kanë interes, vullnet dhe gatishmëri për të arritur gjatë javës së ardhshme një marrëveshje mbi krijimin e institucioneve të reja të vendit.

Bisedimet ndërmjet LVV-së dhe LDK-së pritet të vazhdojnë pasi u ndërprenë muajin e kaluar për shkak të një votëbesimi të brendshëm partiak. Kryetari i partisë opozitare, Lumir Abdixhiku, e kaloi këtë proces gjatë kësaj jave.

Të shtunën vonë, Kurti u pyet se kur do t’i rifillojë takimet me Abdixhikun, ndërsa po afrohet seanca konstituive e Kuvendit, e parashikuar për 6 gusht. Ai tha se këto ditë do të shfrytëzohen për t’u përgatitur sa më mirë për nisjen e seancës që duhet t’i konstituojë institucionet e legjislaturës së 11-të.

Pas një aktiviteti të partisë së tij në Prishtinë, të organizuar për mikpritjen e mërgimtarëve, Kurti i tha Ekonomia Online se rezultati ende nuk mund të parashikohet, por përpjekjet nuk do të mungojnë. Sipas tij, ekzistojnë interesimi, vullneti dhe gatishmëria, ndërsa gjithçka do të bëhet e qartë javën e ardhshme.

Po të shtunën, nënkryetari i LDK-së, Lutfi Haziri, deklaroi për Radion Evropa e Lirë se në kuvendin partiak të mbajtur të enjten ishte arritur pajtim që LDK-ja të bashkëpunojë me partinë në pushtet për krijimin e institucioneve të reja pas zgjedhjeve të 7 qershorit.

Përpara një marrëveshjeje të mundshme me LVV-në, LDK-ja ka përcaktuar disa parime. Ato përfshijnë një marrëveshje për të gjitha institucionet – Kuvendin, Qeverinë dhe Presidencën – ose për asnjërin prej tyre, si dhe agjendën shtetërore, politikat sektoriale, programet qeverisëse, interesin e vendit dhe shpërndarjen e përgjegjësive.

Haziri tha për REL-in se këto tri parime e bashkojnë Grupin Parlamentar të LDK-së dhe se Kuvendi i partisë ka kërkuar që kjo e drejtë të ushtrohet deri në fund. Sipas tij, mënyra se si do të përfundojë kjo kërkesë tashmë varet nga negociatat me LVV-në.

Kurti, subjekti politik i të cilit doli fitues në zgjedhjet e 7 qershorit, duhet të arrijë marrëveshje me opozitën për të garantuar zgjedhjen e presidentit të ri dhe për t’i dhënë fund krizës së zgjatur politike dhe institucionale.

LVV-ja siguroi 53 mandate. Duke llogaritur edhe bashkëpunimin e deritanishëm të Kurtit me partitë e pakicave joserbe, të cilat kanë 10 ulëse, pritet që ai t’i ketë së paku 61 votat e nevojshme për konstituimin e Kuvendit dhe formimin e Qeverisë së re.

Megjithatë, që votimi për presidentin e Kosovës të konsiderohet i vlefshëm, në Kuvendin prej 120 deputetësh duhet të jenë të pranishëm 80 ligjvënës.

Nëse arrihet marrëveshje me LDK-në, e cila fitoi 18 vende, numri i votave do të shkonte në të paktën 81. Kjo do të mjaftonte për zgjedhjen e presidentit të ri, me kusht që së paku 80 deputetë të qëndrojnë në sallë.

Për këtë arsye, çështja e presidentit pritet të zërë vendin kryesor në diskutimet ndërmjet Kurtit dhe Abdixhikut.

A do të ishte e mjaftueshme një marrëveshje mes LVV-së dhe LDK-së?

Njohësit e skenës politike vlerësojnë se zhvillimet e fundit brenda LDK-së, së bashku me qëndrimet e përgjithshme të partive politike, nuk ofrojnë shenja të sigurta dhe premtuese për krijimin e institucioneve të reja.

Sipas tyre, diferenca e vogël ndërmjet votave pro dhe kundër vazhdimit të mandatit të Abdixhikut si kryetar dëshmon sërish se brenda LDK-së ka ndarje të thella mes dy kampeve.

Rrahman Paçarizi, analist dhe profesor i Gazetarisë në Universitetin e Prishtinës, tha për Radion Evropa e Lirë se situata nuk qartësohet nga deklarata e Hazirit, sipas së cilës LDK-ja do të synojë marrëveshje me LVV-në nëse kjo e fundit i respekton parimet e shpallura.

Sipas Paçarizit, kjo deklaratë shërben më shumë për të ndërtuar narrativën se LDK-ja nuk mund dhe nuk duhet të shihet si penguese e formimit të institucioneve.

Ai vlerëson se ka pak mundësi që kryetari i LDK-së dhe kampi i pakënaqur me të brenda partisë të gjejnë një formulë që do të krijonte një qëndrim të përbashkët të të 18 deputetëve për një marrëveshje të mundshme me LVV-në.

Edhe analisti Artan Muhaxhiri tha se përplasjet e brendshme në LDK, pavarësisht se Abdixhikut iu rikonfirmua mandati në drejtimin e partisë, tregojnë se një marrëveshje me LVV-në nuk do ta siguronte mbështetjen e të gjithë 18 deputetëve të këtij subjekti në Kuvend.

Muhaxhiri theksoi se Abdixhikut, së paku, i mungon përkrahja e gjashtë ose shtatë deputetëve krahasuar me numrin e përgjithshëm. Sipas tij, detyra e vetme e kreut të LDK-së është ta ndryshojë për 180 shkallë qasjen ndaj deputetëve të pakënaqur dhe figurave shumë të rëndësishme të partisë, të cilat kundërshtojnë mënyrën e tij të udhëheqjes.

Nëse presidenti nuk zgjidhet brenda 60 ditësh nga konstituimi i Kuvendit, organi ligjvënës shpërndahet dhe vendi duhet të mbajë zgjedhje të reja.

Nëse Kosova do të shkonte përsëri në zgjedhje, ato do të ishin zgjedhjet e katërta parlamentare që prej fillimit të vitit 2025. / REL

The post Kurti shpreh gatishmëri për marrëveshje me LDK-në para konstituimit të Kuvendit appeared first on Albeu.com.

Partia Demokratike e Kosovës (LDK) ka deklaruar se do të bashkëpunojë me Lëvizjen Vetëvendosje (LVV), fituesen e zgjedhjeve të 7 qershorit, me synim arritjen e një marrëveshjeje që do të mundësonte krijimin e institucioneve të reja. Megjithatë, vëzhguesit mbeten skeptikë nëse kjo do të sillte zgjidhje, duke vënë në dukje përçarjet e brendshme në partinë e udhëhequr nga Lumir Abdixhiku.

Nënkryetari i LDK-së, Lufti Haziri, në një deklaratë për Radion Evropa e Lirë, tha se gjatë kuvendit partiak të 30 korrikut u arrit dakordësia që subjekti të angazhohet në bashkëpunim me partinë e kryeministrit në detyrë, Albin Kurti, për ngritjen e institucioneve.

Haziri theksoi se në parim janë pajtuar dhe kuvendi konfirmoi se LDK do të marrë pjesë në procesin e bashkëpunimit për ndërtimin e institucioneve, duke kontribuar për të shmangur mundësinë e zgjedhjeve të tjera në Kosovë.

Negociatat mes LDK-së dhe LVV-së u ndërprenë më 15 korrik, për shkak se një pjesë e zyrtarëve të LDK-së kërkuan shkarkimin e kryetarit Abdixhiku, pas pakënaqësisë me rezultatin zgjedhor. Edhe pse Abdixhiku i mbijetoi mocionit për shkarkim, dallimet dhe mospajtimet brenda partisë, të dëshmuara nga votimi pro dhe kundër tij, janë evidente, sipas zyrtarëve të lartë të LDK-së dhe njohësve të skenës politike.

Arritja e unitetit në LDK për një qëndrim të përbashkët të 18 deputetëve të saj mbi një marrëveshje të mundshme me LVV-në mbetet sfidë, veçanërisht pasi në mesin e tyre ka edhe ata që votuan për shkarkimin e Abdixhikut.

Ushtruesja e detyrës së presidentes, Albulena Haxhiu, pas takimit të së premtes me përfaqësuesit e partive politike parlamentare, e cilësoi lajm të mirë paralajmërimin e Abdixhikut për heqjen e pezullimit të bisedimeve për institucionet. Ajo theksoi se është shumë e rëndësishme që këto takime të vazhdojnë për të përmbyllur konstituimin e institucioneve të dala nga zgjedhjet e 7 qershorit.

Haxhiu kërkoi që takimet të thirren dhe të zhvillohen me përpjekje maksimale dhe seriozitet, për të arritur një marrëveshje që do të siguronte konsensusin për zgjedhjen e presidentit ose presidentes. Sipas saj, është thelbësore që këto takime të vijojnë sa më shpejt.

Megjithatë, një marrëveshje mes LVV-së dhe LDK-së ende nuk duket në horizont, pavarësisht se kanë mbetur më pak se një javë deri në seancën konstituive të Kuvendit të Kosovës, e caktuar më 6 gusht. Me konstituimin e Kuvendit, nisin afatet për formimin e qeverisë së re dhe zgjedhjen e presidentit, për të cilin deputetët e legjislaturës së re kanë 60 ditë afat nga dita e konstituimit për të votuar kreun e ri të shtetit.

Haziri pohoi se LDK-ja mund t’i mbyllë të gjitha çështjet parimore brenda 24 orësh. Kuvendi i LDK-së, ku delegatët i dhanë besimin Abdixhikut për të vazhduar në krye, nxori në pah qartësisht divergjencat e brendshme: 170 delegatë votuan për vazhdimin e mandatit të tij, 152 e kundërshtuan dhe 5 abstenuan.

Sipas Hazirit, pavarësisht këtyre divergjencave, LDK tani përballet me ofertën e LVV-së për bashkëpunim. Ai kujtoi parimet e LDK-së për një marrëveshje: një marrëveshje gjithëpërfshirëse për të gjitha institucionet (Kuvend, Qeveri, Presidencë) ose asnjë; agjendë shtetërore, politika sektoriale, programe qeverisëse, interesi i vendit dhe ndarja e përgjegjësive. Ai tha se këto parime e bashkojnë grupin parlamentar dhe se kuvendi ka kërkuar që kjo e drejtë të ushtrohet deri në fund, ndërsa mënyra e përmbushjes së kërkesës tani është çështje negociatash me LVV-në.

Haziri shtoi se që nga takimi i parë formal mes Kurtit, Abdixhikut dhe ish-presidentes Vjosa Osmani më 10 korrik, LVV-ja është në dijeni të këtyre parimeve dhe tani radha i takon asaj të tregojë nëse i pranon. Në rast pajtimi, uniteti i grupit parlamentar të LDK-së mund të sigurohet përmes bashkëpunimit të brendshëm. Ai shprehu besimin në pjekurinë politike të grupit për të mbështetur vendimet e kryetarit.

Njohësit e zhvillimeve politike thonë se zhvillimet e fundit në LDK dhe pozicionimi i partive në përgjithësi nuk japin sinjale premtuese për formimin e institucioneve të reja. Rezultati i ngushtë i votimit për Abdixhikun rikonfirmon çarje të thella mes dy taborëve, gjë që e vështirëson ose e bën të pamundur funksionimin normal të partisë dhe çdo strategji negociuese me LVV-në.

Analisti Rrahman Paçarizi, profesor i gazetarisë në Universitetin e Prishtinës, deklaroi për Radion Evropa e Lirë se deklarata e Hazirit se LDK do të shkojë drejt marrëveshjes nëse LVV respekton parimet e saj nuk e sqaron situatën, por më shumë shërben për të ndërtuar narrativën se LDK nuk është bllokuese e institucioneve. Sipas tij, ky veprim është i kushtëzuar, pasi partitë, përfshirë LVV-në, ende ndërtojnë narrativa për fajtorët e mosformimit të institucioneve. Paçarizi mendon se as LDK e as partitë e tjera nuk do të deklarohen kundër krijimit të institucioneve, por sheh pak gjasa që Abdixhiku dhe tabori i pakënaqur të gjejnë një formulë për qëndrim të përbashkët të 18 deputetëve.

Ai thekson se mundësitë për marrëveshje nuk janë shteruar plotësisht, por ajo do të varet nga vullneti dhe serioziteti i Albin Kurtit. Megjithatë, ai mbetet skeptik për formimin e institucioneve edhe nëse arrihet marrëveshja, pasi nyja e problemit është zgjedhja e presidentit. Në dy raundet e para nevojiten 80 vota, ndërsa në raundin e tretë mjaftojnë 61 vota në Kuvendin 120-vendësh. LVV ka 53 deputetë dhe mund të mbështetet nga 9-10 deputetë të komuniteteve joshumicë. Duke shtuar 18 deputetët e LDK-së, mund të arrihet numri 80, por është shumë e vështirë të sigurohen të gjitha votat e LDK-së për një zgjidhje jo maksimale për ta; sipas Paçarizit, as zgjidhjet më optimale nuk do të funksiononin.

Edhe analisti Artan Muhaxhiri thekson se konfliktet brenda LDK-së tregojnë se asnjë marrëveshje me LVV-në nuk do të ketë mbështetjen e të 18 deputetëve. Sipas tij, minimumi i mungojnë gjashtë ose shtatë deputetë, ndaj Abdixhiku duhet të ndryshojë rrënjësisht qasjen ndaj deputetëve të pakënaqur dhe figurave të rëndësishme që kundërshtojnë lidershipin e tij. Mirëpo, Muhaxhiri nuk pret një ndryshim të tillë dhe arrin në përfundimin se, duke marrë parasysh edhe fakte të tjera, opsioni i vetëm mbeten zgjedhjet e reja, pasi me këtë klimë politike është e pamundur të sigurohen 80 vota, çelësi për zgjidhjen e problemeve dhe shmangien e zgjedhjeve.

Nëse partitë nuk arrijnë ujdi për presidentin, vendi do të shkojë përsëri në zgjedhje. Këto do të ishin zgjedhjet e dyta të shkaktuara nga mungesa e konsensusit për kreun e shtetit dhe të katërtat që nga shkurti i vitit 2025. / REL

The post LDK shpreh vullnet për bashkëpunim, por analistët dyshojnë në formimin e institucioneve appeared first on Albeu.com.

Fitore Pacolli, ministre në detyrë e Mjedisit dhe Planifikimit Hapësinor, së bashku me Ejup Maqedoncin, ministër në detyrë i Mbrojtjes, kanë vënë nënshkrimet në një Marrëveshje Mirëkuptimi për të thelluar bashkëpunimin midis institucioneve në fushën e ruajtjes së mjedisit.

Sipas njoftimit të Pacollit, kjo marrëveshje parasheh që Forca e Sigurisë së Kosovës të vihet në dispozicion të operacioneve shtetërore, duke ofruar efektivë, pajisje të rënda dhe mbështetje logjistike për të siguruar një ambient të pastër dhe pa rreziqe.

“Ruajtja e mjedisit është detyrë kombëtare dhe kërkon përpjekje të përbashkëta,” theksoi Pacolli. Ajo shtoi se ky partneritet tregon se institucionet e Kosovës po ecin të sinkronizuara në misionin për të mbrojtur hapësirat e përbashkëta, për të ngritur nivelin e sigurisë mjedisore dhe për t’i dhënë qytetarëve një vendbanim më të pastër.

The post Pacolli dhe Maqedonci firmosën marrëveshjen për të forcuar mbrojtjen e mjedisit appeared first on Albeu.com.

Glauk Konjufca, ministër në detyrë i Punëve të Jashtme, ka komentuar takimet e zhvilluara nga kryetari i Lëvizjes Vetëvendosje, Albin Kurti, me drejtuesit e PDK-së dhe LDK-së.

Sipas Konjufcës, nga biseda mes Kurtit dhe kreut të PDK-së, Bedri Hamza, është kuptuar se kjo parti vazhdon t’u përmbahet kryesisht qëndrimeve të shfaqura prej kohësh, të cilat ai i cilësoi si pozicione të vjetra.

Një përshtypje tjetër, sipas tij, është krijuar pas takimit me LDK-në. Konjufca deklaroi se, ndryshe nga herët e kaluara, kësaj radhe te kjo parti është vërejtur më shumë vullnet për ta kapërcyer situatën në të cilën ndodhet Kosova.

Ai tha se LDK-ja ka treguar gatishmëri më të lartë për bashkëpunim dhe se mundësitë për arritjen e një marrëveshjeje varen drejtpërdrejt nga vullneti politik. Sipas tij, sa më e madhe të jetë gatishmëria e palëve për të bashkëpunuar, aq më shumë shtohen alternativat për gjetjen e një zgjidhjeje dhe për ndarjen e përgjegjësive të ndryshme. Konjufca shtoi se, veçanërisht që nga zgjedhjet e dhjetorit, ka ekzistuar një bllokadë totale.

Duke folur për zhvillimet e brendshme në Lidhjen Demokratike të Kosovës, Konjufca theksoi se nuk u takon atyre as t’i komentojnë dhe as ta këshillojnë këtë subjekt politik, pasi LDK-ja është një parti që vepron prej kohësh në Kosovë.

Ai nënvizoi se LDK-ja gëzon autonomi të plotë për të marrë vendime lidhur me çështjet e veta të brendshme dhe shprehu bindjen se drejtuesit e saj dinë t’i zgjidhin vetë punët brenda partisë.

Sa i përket bashkëpunimit me Lëvizjen Vetëvendosje, Konjufca tha se takimi i Kurtit me Osmanin dhe Abdixhikun kishte një natyrë tjetër diskutimi krahasuar me rastet e mëparshme. Sipas tij, kjo i ka bërë më optimistë se një zgjidhje mund të arrihet së shpejti.

Konjufca u ndal edhe te qëndrimi i AAK-së. Ai deklaroi se, megjithëse përfaqësuesit e kësaj partie nuk pranuan të merrnin pjesë në takim me Kurtin, ata paraqitën arsyet dhe kushtet në të cilat do të ishin të gatshëm të bashkëpunonin.

The post Konjufca për krijimin e institucioneve: LDK-ja po tregon më shumë gatishmëri appeared first on Albeu.com.

Zëvendëskryeministrja dhe Ministrja e Drejtësisë në detyrë, Donika Gërvalla, deklaroi se dy marrëveshjet e reja ndërkombëtare të lidhura me Francën parashikojnë mekanizma më efikasë të bashkëpunimit juridik.

Përmes një postimi në “Facebook”, ajo njoftoi se janë nënshkruar Marrëveshja për Ndihmë të Ndërsjellë Juridike në Çështjet Penale dhe Marrëveshja për Ekstradim. Sipas Gërvallës, këto akte fuqizojnë bashkërendimin ndërmjet institucioneve të Kosovës dhe Francës në përballjen me krimin e organizuar, korrupsionin dhe kriminalitetin ndërkufitar.

Ajo theksoi se marrëveshjet mundësojnë bashkëpunim më efektiv juridik, shkëmbim të provave dhe informacioneve, si dhe ndjekjen e ekstradimin e personave që kërkohen nga drejtësia.

Gërvalla i cilësoi këto zhvillime si lajm të mirë për sistemin e drejtësisë dhe për qytetarët, ndërsa tha se ato përbëjnë lajm të keq për grupet kriminale.

Sipas saj, kapacitetet e institucioneve të Kosovës dhe Francës për luftimin e krimit të organizuar, korrupsionit dhe formave të tjera të kriminalitetit ndërkufitar do të fuqizohen ndjeshëm. Ajo shtoi se synimi është që askush të mos mund t’i shmanget drejtësisë duke u strehuar përtej kufijve shtetërorë.

Duke iu referuar marrëveshjes së nënshkruar me Belgjikën në muajin prill, Gërvalla tha se bashkëpunimi i Kosovës me Francën në fushën e drejtësisë e zgjeron më tej rrjetin ndërkombëtar të vendit. Ajo nënvizoi se drejtësia nuk kufizohet nga kufijtë, se ndaj krimit dhe korrupsionit nuk mund të ketë kompromis dhe se lufta kundër tyre nuk ndalet në kufijtë shtetërorë, duke shtuar se askush nuk duhet të jetë mbi ligjin.

The post Gërvalla: Dy marrëveshjet me Francën fuqizojnë bashkëpunimin në drejtësi appeared first on Albeu.com.

Ministria për Punë, Familje dhe Vlerat e Luftës Çlirimtare (MPFVLÇ) dhe Deutsche Gesellschaft für Internationale Zusammenarbeit (GIZ) kanë formalizuar Marrëveshjen e Zbatimit të projektit “Fuqizimi Ekonomik i Grave (EEW)”. Nisma synon përmirësimin e kushteve strukturore, individuale dhe shoqërore për gratë në Kosovë, duke zgjeruar qasjen e tyre në tregun e punës dhe mundësitë për punësim. Vëmendje e veçantë do t’u kushtohet grave nga zonat rurale dhe kategorive më pak të përfaqësuara.

Ministria njofton se projekti do të ndihmojë në zhvillimin dhe avancimin e shërbimeve të punësimit, forcimin e kapaciteteve institucionale, ofrimin e orientimit në karrierë dhe aftësimin profesional. Po ashtu, do të nxitet zbatimi i politikave aktive të tregut të punës, me qëllim hapjen e më shumë mundësive për pjesëmarrjen e grave në jetën ekonomike.

Në kuadër të projektit parashikohet një bashkëpunim i afërt me Ministrinë e Punës, Familjes dhe Vlerave të Luftës Çlirimtare dhe Agjencinë e Punësimit të Republikës së Kosovës për përkrahjen e ndërmarrjeve sociale. Sipas njoftimit, do të krijohet një grup i përbashkët pune dhe do të kryhet një vlerësim i nevojave. Gjetjet e këtij vlerësimi do të shërbejnë si bazë për planifikimin e aktiviteteve të ardhshme, në përputhje me objektivat e projektit dhe burimet që janë në dispozicion.

Kjo marrëveshje është pjesë e bashkëpunimit zhvillimor mes Republikës së Kosovës dhe Republikës Federale të Gjermanisë. Zbatimi i saj bëhet në kuadër të marrëveshjeve dhe dakordimeve të arritura ndërmjet dy qeverive për bashkëpunim ekonomik dhe teknik, duke rikonfirmuar partneritetin e afërt të të dyja vendeve në mbështetje të zhvillimit ekonomik dhe social të Kosovës.

The post Nënshkruhet marrëveshja që synon fuqizimin ekonomik të grave në Kosovë appeared first on Albeu.com.

Ministri në detyrë i Digjitalizimit dhe Administratës Publike i Kosovës, Lulëzon Jagxhiu, deklaroi gjatë ceremonisë së nënshkrimit se ky dakordim u hap rrugën qytetarëve dhe bizneseve të të dyja shteteve që t’u njihen reciprokisht shërbimet e kualifikuara të besuara dhe skemat e identifikimit elektronik.

Jagxhiu: Marrëveshja me Malin e Zi mundëson njohjen e ndërsjellë të identifikimit elektronik

Ai tha se marrëveshja mbulon njohjen e ndërsjellë të shërbimeve të kualifikuara të besuara dhe të skemave të identifikimit elektronik mes Republikës së Kosovës dhe Malit të Zi. Sipas tij, marrëdhëniet mes dy vendeve janë miqësore dhe mbështeten te vlerat e përbashkëta, respekti reciprok dhe synimi i përbashkët për anëtarësim në Bashkimin Evropian. Jagxhiu e cilësoi marrëveshjen e nënshkruar si një hap të ri në forcimin e raporteve dypalëshe.

Ministri në detyrë theksoi se Kosova po përparon me reformat për transformimin digjital, duke përmendur platformën e-Kosova si një prej shtyllave kryesore. Ai tha se qytetarët dhe bizneset tashmë mund të përdorin mbi 320 shërbime elektronike përmes kësaj platforme.

Sipas Jagxhiut, puna po vazhdon edhe për zgjerimin dhe modernizimin e platformës së interoperabilitetit, si dhe për ndryshimin e modelit të ofrimit të shërbimeve. Kjo qasje, siç u shpreh ai, synon shërbime të ndërtuara mbi ngjarjet jetësore, të personalizuara, të integruara dhe proaktive. Në agjendë përfshihen gjithashtu kalimi drejt teknologjive Cloud, modernizimi i rrjetit qeveritar dhe zbatimi i identifikimit elektronik me kuletën digjitale (Digital Wallet), e cila ndodhet në proces lansimi.

Nga ana tjetër, ministri i Administratës Publike i Malit të Zi, Marash Dukaj, vlerësoi se marrëveshja me Kosovën për njohjen reciproke të shërbimeve të besuara dhe identifikimit elektronik ka peshë të veçantë për qytetarët, bizneset dhe rrugën e integrimit evropian.

Dukaj tha se ndihej i lumtur për praninë e tij në Prishtinë, ndërsa marrëveshjen e konsideroi një hap që eliminon kufijtë digjitalë mes dy shteteve.

Dukaj: Me Kosovën po i heqim kufijtë digjitalë

Ai deklaroi se shqiptarët e Malit të Zi e shohin Prishtinën si vendin e tyre dhe se nënshkrimi formal i kësaj marrëveshjeje i jep rëndësi të posaçme vizitës. Sipas Dukajt, heqja e kufijve digjitalë me Republikën e Kosovës është e rëndësishme para së gjithash për qytetarët e të dy vendeve, të cilët jetojnë dhe punojnë në Kosovë dhe në Mal të Zi.

Ministri malazez shtoi se përfitimet e marrëveshjes nuk kufizohen vetëm te qytetarët, por shtrihen edhe te bizneset dhe bashkëpunimi i përgjithshëm, të cilin e vlerësoi si thelbësor për integrimin e përbashkët në Bashkimin Evropian. Ai theksoi se Mali i Zi kryeson formalisht në këto procese dhe se beson e shpreson që ato të përmbyllen deri në fund të vitit 2028.

Dukaj u shpreh se Mali i Zi është i gatshëm të ndajë përvojat e tij me Kosovën në fusha të ndryshme, por edhe të mësojë prej saj. Ai tha se të dyja vendet ndodhen pothuajse në të njëjtin nivel, pasi në disa sektorë Mali i Zi është përpara, ndërsa në disa të tjerë Kosova ka epërsi. Sipas tij, bashkëpunimi mes dy vendeve pritet të intensifikohet në të ardhmen.

Ai nënvizoi se nënshkrimi lidhet edhe me Planin e Rritjes dhe falënderoi veçanërisht ministrin Jagxhiu për angazhimin në arritjen e një bashkëpunimi intensiv. Dukaj tha se marrëveshja u finalizua brenda një periudhe shumë të shkurtër. Ai shtoi se Mali i Zi synon që deri në fund të tetorit të nënshkruajë një marrëveshje të tillë me të gjitha shtetet e Ballkanit Perëndimor, duke e cilësuar këtë si një arritje të madhe për aspiratat e vendeve drejt Bashkimit Evropian.

The post Kosova dhe Mali i Zi dakordësohen për njohjen reciproke të identifikimit elektronik appeared first on Albeu.com.

Sipas MPJD-së, marrëveshja e saponënshkruar përcakton të drejtën e anëtarëve të familjeve të personelit diplomatik dhe konsullor që të angazhohen në veprimtari fitimprurëse gjatë periudhës së shërbimit jashtë vendit, duke ofruar kushte më të mira për diplomatët e të dy shteteve.

Dokumenti është nënshkruar nga zëvendësministri i Punëve të Jashtme dhe Diasporës i Republikës së Kosovës, Kreshnik Ahmeti, dhe nga Sekretari i Përgjithshëm i Ministrisë Federale për Çështje Evropiane dhe Ndërkombëtare të Austrisë, Nikolaus Marschik.

MPJD ka bërë të ditur po ashtu se, pas ceremonisë së nënshkrimit, është mbajtur edhe një takim bilateral, gjatë të cilit është biseduar për thellimin e marrëdhënieve ndërmjet dy vendeve, bashkëpunimin ekonomik e institucional, si edhe zhvillimet politike dhe të sigurisë në Ballkanin Perëndimor dhe në Evropë.

The post Kosova dhe Austria firmosin marrëveshje, familjarët e diplomatëve fitojnë të drejtën e punës appeared first on Albeu.com.

Në një deklarim për REL, Haziri ka bërë të ditur se votat e LDK-së do të mund të bashkoheshin vetëm nëse kandidati për president do të vinte nga radhët e partisë dhe jo jashtë saj.

“Në rast se ky emër është Lumiri [Abdixhiku, kryetar i partisë] ose emri im, atëherë mund të unifikohemi. Lumirit i bie të jetë i pari, sipas detyrës zyrtare, sepse është kryetar. Pas Lumirit, konsensus më të madh [brenda LDK-së] kam unë”, ka deklaruar Haziri.

Ai ka theksuar po ashtu se aktualisht ekziston vetëm një adresë kryesore ku mund të drejtohet Lëvizja Vetëvendosje për një marrëveshje të mundshme me LDK-në.

“Vetëm me Lumir Abdixhikun. Ai është kryetar. Ne nuk kemi mbledhur Kuvendin [e LDK-së]. Nëse mblidhet Kuvendi ose ka akt të dorëheqjes, atëherë kemi situatë të re. Deri atëherë është vetëm një adresë dhe nuk ka adresë të dytë”, është shprehur Haziri.

Në zgjedhjet e 7 qershorit, LDK-ja kishte hyrë në garë me Vjosa Osmanin si kandidate për presidente dhe me Lumir Abdixhikun si kandidat për kryeministër.

Kjo forcë politike arriti të marrë 18 ulëse në Kuvendin e Kosovës, por sipas Hazirit, në rastin e emrit të Osmanit, partia nuk do të arrinte të siguronte mbështetjen e plotë të të gjithë deputetëve të saj.

“Mund të jetë sikur herën e kaluar, pra, dy-tri vota, mund të ndahen, por në rastin e Lumirit ose rastin tim, mund të unifikohemi”, ka sqaruar ai.

Për këto deklarata të Hazirit dhe për sa i besueshëm është një skenar i tillë politik, çfarë do të fitonin të dyja palët nga një marrëveshje e tillë, çfarë tregon kjo për raportet e brendshme në LDK dhe për pozicionin aktual të Osmanit ndaj partisë, si dhe nëse kemi të bëjmë me një hap drejt një koalicioni më të gjerë qeverisës apo vetëm me një bashkëpunim të kufizuar institucional, ka folur për “Bota sot” analisti politik Eduard Gashi.

Sipas tij, deklaratat e fundit të Hazirit sinjalizojnë hapjen e një faze të re pragmatizmi politik në Kosovë, ndërsa skenari mbetet i realizueshëm, por me pasoja potencialisht ekzistenciale për vetë LDK-në.

“Deklaratat e fundit të nënkryetarit të LDK-së, Lutfi Haziri, kanë hapur një kapitull të ri të pragmatizmit politik në Kosovë, duke sinjalizuar një gatishmëri të mundshme për marrëveshje me Lëvizjen Vetëvendosje (LVV) në këmbim të postit të Presidentit. Nëse e analizojmë këtë lëvizje pa doreza diplomacie, ky skenar nxjerr në pah një rregull të artë të skenës sonë politike: Lëvizjes Vetëvendosje nuk mund t’i besohet asnjëherë në marrëveshje afatgjata. Tregtia me postin e Presidentit: Çfarë fshihet pas pazarit?

Skenari ku LDK-ja ofron 18 votat e saj për kuorum dhe zgjedhje të presidentit është plotësisht real, por mbart rreziqe ekzistenciale për vetë LDK-në.

Nga njëra anë, LDK-ja synon rikthimin në qendër të vendimmarrjes përmes një figure si Lumir Abdixhiku apo Lutfi Haziri, duke tentuar të portretizohet si “shpëtimtare e shtetit” nga krizat kushtetuese. Nga ana tjetër, Albin Kurti blen rehati absolute. Duke siguruar kuorumin, ai eliminon rrezikun e zgjedhjeve të jashtëzakonshme dhe mban ekzekutivin pa lëshuar pe në dikasteret kryesore. Megjithatë, historia politike e Kosovës ka vërtetuar se VV-ja i përdor partnerët vetëm si mjete për të kaluar pengesën e radhës. Për Kurtin, çdo marrëveshje është taktike, jo parimore. Në momentin që LDK-ja dorëzon votat dhe betonon Kurtin në kryeministri, ajo humb të vetmen kartë presioni që ka në dorë”, ka deklaruar Gashi.

Sipas analistit, deklarimi i Hazirit se LDK-ja mund të bashkohet rreth Lumir Abdixhikut ose rreth vetë tij përbën edhe një sinjal të qartë për marrëdhëniet e brendshme në parti dhe për të ardhmen politike të ish-presidentes.

Ai vlerëson se kjo tregon qartë se përplasjet e vitit 2020, kur Osmani u largua nga LDK-ja, ende nuk janë tejkaluar.

“Izolimi i Vjosa Osmanit dhe spastrimi i llogarive të vjetra!

Deklarata e Hazirit se LDK-ja mund të unifikohet rreth Abdixhikut apo vetë atij, por “jo domosdoshmërisht rreth Vjosa Osmanit”, është një mesazh i qartë për raportet e brendshme dhe fatin politik të ish- Presidentes.Kjo tregon se plagët e vitit 2020 – kur Osmani braktisi LDK-në dhe krijoi listën “Guxo” për t’u bërë presidente me votat e VV-së – nuk janë shëruar. LDK-ja e sotme nuk ka asnjë interes të investojë kapital politik për ta mbajtur Osmanin në post. Sot, Vjosa Osmani gjendet më e izoluar se kurrë: raportet e saj me Albin Kurtin janë ftohur dukshëm, partia e saj “Guxo” është shkrirë nën hijen e VV-së, dhe LDK-ja sapo ia mbylli përfundimisht derën e rikthimit. Mesazhi është i prerë: nëse bëhet pazar, përfiton LDK-ja, jo ata që e braktisën atë”, ka theksuar ai.

Në përfundim, Gashi shprehet se edhe nëse arrihet një marrëveshje për presidentin, ajo nuk duhet parë si hyrje drejt një koalicioni të gjerë qeverisës.

“Koalicion qeverisës apo thjesht transaksion institucional?Nëse kjo marrëveshje realizohet, ajo nuk do të jetë kurrë një hap drejt një koalicioni të gjerë dhe të sinqertë qeverisës. Albin Kurti nuk dëshiron të ndajë pushtetin ekzekutiv, buxhetin apo ministritë me një partner që mund t’i bëjë obstrukcione nesër. Për VV-në, partneri ideal është ai që nuk kushtëzon. Prandaj, ky bashkëpunim do të mbyllej si një “kontratë shërbimi” e kufizuar: LDK-ja kryen punë në Kuvend për Presidentin, VV-ja qeverisë e vetme. Duke hyrë në një marrëveshje të tillë pa garanci të forta, LDK-ja rrezikon të shihet nga votuesit e saj thjesht si një “patericë” e Vetëvendosjes. Në lojën e shahut politik, Kurti njihet për sakrifikimin e figurave të të tjerëve për të mbrojtur Mbretin. Nëse LDK-ja beson se një nënshkrim në letër e obligon VV-në të respektojë marrëveshjen për pesë vitet e ardhshme, ata po përsërisin të njëjtin gabim naiv që u kushtoi shtrenjtë në të kaluarën”, ka përfunduar Gashi.

The post Haziri vendos kushtin e LDK-së për presidentin, analisti: një ujdi me VV-në është e mundur, por me kosto të lartë appeared first on Albeu.com.

Zëdhënësi i Ministrisë së Jashtme iraniane, Esmaeil Baghaei, tha se mundësia për një marrëveshje në ditët në vijim mbetet e hapur, por theksoi se Teherani mbetet i kujdesshëm për shkak të asaj që e cilësoi si “paqëndrueshmëri të palës tjetër”.

“Mundësia që kjo të ndodhë në ditët në vijim nuk përjashtohet. Megjithatë, për shkak të paqëndrueshmërisë së palës tjetër, duhet të jemi të kujdesshëm ndaj çdo deklarate në lidhje me këtë proces”, u shpreh Baghaei, sipas agjencisë iraniane Tasnim.

Ai sqaroi se dokumenti në diskutim nuk përbën një marrëveshje përfundimtare mes Iranit dhe SHBA-së, por një memorandum që përcakton pikat kryesore të mosmarrëveshjeve dhe kushtet për përfundimin e konfliktit.

Deklaratat e zyrtarit iranian vijnë pasi kryeministri i Pakistanit, Shehbaz Sharif, njoftoi se kushtet e marrëveshjes mund të finalizohen brenda 24 orëve të ardhshme. Mesazhi i tij në rrjetin social X u ripostua më pas edhe nga Presidenti amerikan Donald Trump në platformën Truth Social.

Ndërkohë, Ministria e Jashtme e Pakistanit bëri të ditur se ceremonia e nënshkrimit elektronik të marrëveshjes është planifikuar për nesër. Sipas autoriteteve pakistaneze, ministri i Jashtëm Mohammad Ishaq Dar ka zhvilluar gjithashtu bisedime me homologun e tij nga Arabia Saudite lidhur me zhvillimet e fundit.

Edhe një burim i afërt me negociatat i tha CNN se nënshkrimi elektronik i marrëveshjes mund të realizohet deri në fund të ditës së nesërme, ose edhe më herët. Deri tani, Shtëpia e Bardhë nuk ka dhënë një koment zyrtar mbi raportimet.

The post Pritej firma për marrëveshjen gjatë kësaj fundjave, Irani ndërron mendje dhe kërkon ende kohë appeared first on Albeu.com.