Në Reykjavik është firmosur marrëveshja e re mes misionit të NATO-s në Kosovë, KFOR, dhe Islandës, e cila zgjat bashkëpunimin për hapësirën ajrore mbi Kosovën.

Dokumenti i rinovuar do të mbetet në fuqi deri më 31 dhjetor 2028, bëri të ditur KFOR-i.

Sipas njoftimit, marrëveshja garanton vijimin e partneritetit mes KFOR-it dhe Qeverisë së Islandës, përmes Autoritetit Islandez të Transportit (ICETRA).

Bashkëpunimi synon të krijojë mundësi për hapjen e linjave të reja ajrore komerciale në hapësirën e ulët ajrore mbi Kosovën.

KFOR-i thekson se marrëveshja mbështetet në bashkëpunimin shumëvjeçar me Islandën dhe ndihmon përpjekjet që përdorimi i hapësirës së ulët ajrore mbi Kosovën të jetë i sigurt dhe efikas.

Misioni i NATO-s në Kosovë vijon zbatimin e mandatit të përcaktuar nga Rezoluta 1244 e Këshillit të Sigurimit të OKB-së, e miratuar në vitin 1999, me qëllim kontributin në krijimin e një mjedisi të sigurt dhe të qetë për të gjithë banorët e Kosovës, si dhe garantimin e lirisë së lëvizjes.

The post KFOR dhe Islanda rinovojnë marrëveshjen për menaxhimin e hapësirës ajrore të Kosovës deri në 2028 appeared first on Albeu.com.

Deputetët e Kuvendit të Kosovës pritet të mblidhen të mërkurën, më 9 shtator, për të vazhduar seancën konstituive, në një tjetër moment të rëndësishëm për zhvillimet politike në vend.

Seanca, e cila mbeti e papërfunduar gjatë muajit të kaluar, është paraparë të nisë në orën 11:00. Përfundimi i konstituimit të Kuvendit do të krijonte mundësinë për nisjen e procesit të formimit të institucioneve të reja shtetërore.

Megjithatë, përveç përmbylljes së procedurave parlamentare, vëmendja pritet të jetë e fokusuar edhe te hapi pasues: zgjedhja e presidentit të Republikës.

Ende nuk dihet nëse një marrëveshje e mundshme ndërmjet LVV-së dhe LDK-së do të prodhojë numrat e nevojshëm për zhbllokimin e situatës dhe funksionalizimin e plotë të institucioneve.

Në seancën e 9 shtatorit pritet të marrin pjesë edhe Partia Demokratike e Kosovës dhe Lidhja Demokratike e Kosovës, të cilat do të jenë pjesë e procesit të konstituimit të Kuvendit.

Drenori: Për seancën e së mërkurës janë të mundshëm tre skenarë

Analisti politik Xhavit Drenori ka renditur tre mundësi për mënyrën se si mund të zhvillohet seanca e së mërkurës.

Sipas tij, opsioni i parë është që LVV-ja të mos e çojë përpara konstituimin e institucioneve, nëse nuk siguron një marrëveshje për presidentin. Skenari i dytë parashikon vazhdimin e konstituimit të Kuvendit dhe krijimin e qeverisë, duke i lënë kohë LVV-së për të negociuar një zgjidhje. Ndërsa mundësia e tretë lidhet me arritjen e një marrëveshjeje ndërmjet partive, e cila do ta hapte rrugën për zgjedhjen e presidentit.

Drenori mendon se dy alternativat e para kanë më shumë gjasa të realizohen, ndërsa një marrëveshje e menjëhershme mes subjekteve politike mbetet më pak e mundshme.

“Në seancën e së mërkurës mund të shfaqen tre skenarë. I pari lidhet me mundësinë që Lëvizja Vetëvendosje të njoftojë se nuk ka arritur marrëveshje me asnjë subjekt politik. Meqë moszgjedhja e presidentit do ta çonte vendin drejt zgjedhjeve, LVV-ja mund të kërkojë pezullimin e hapave për konstituimin e institucioneve, përfshirë formimin e qeverisë, dhe përdorimin e hapësirës parlamentare për të gjetur një zgjidhje tjetër.

Një mundësi tjetër është që, edhe pa marrëveshje me partitë e tjera, të vazhdohet me konstituimin e Kuvendit dhe më pas me formimin e qeverisë. Kjo do t’i siguronte LVV-së kohë dhe hapësirë që gjatë dy muajve të ardhshëm të përpiqej të arrinte marrëveshje për zgjedhjen e presidentit.

Skenari i tretë do të ishte arritja e një marrëveshjeje ndërmjet subjekteve politike, përmes së cilës do të mund të niste procedura për zgjedhjen e presidentit. Këtë mundësi e vlerësoj si më pak të mundshme. Për këtë arsye, dy skenarët e parë duken më realistë për seancën e së mërkurës” – shpjegoi Drenori për “Bota sot”.

Makolli kritikon VV-në për vakumin institucional

Analisti politik Vesel Makolli e ka cilësuar paradoksale situatën në të cilën një subjekt që ka fituar tri palë zgjedhje radhazi, dy prej tyre me më shumë se 50% të votave, e ka lënë vendin për gati dy vjet pa institucione funksionale.

“Fitorja e tri palë zgjedhjeve radhazi, veçanërisht e dy proceseve të fundit me mbi 50% të votave, duhej të përkthehej në krijimin e institucioneve. Fakti që vendi është lënë për gati dy vjet në vakum institucional përbën një paradoks politik që kërkon një vlerësim shumë më të thellë se një analizë e zakonshme.

Kjo është edhe përgjegjësia për të cilën elektorati kosovar ka dhënë besimin dhe, në një kuptim të plotë, e ka obliguar subjektin fitues. Nuk është e mjaftueshme që përgjegjësia t’u atribuohet opozitës, sistemit, rrethanave apo bllokadave institucionale.

Një lider që fiton tri herë radhazi dhe merr një mbështetje kaq të madhe elektorale ka një përgjegjësi të jashtëzakonshme për ta shndërruar mandatin në institucione funksionale. Rezultati politik nuk matet vetëm me votat e marra në ditën e zgjedhjeve, por edhe me aftësinë për ta kthyer atë besim në qeverisje, stabilitet, institucione dhe rezultate” – tha Makolli për “Bota sot”.

Sipas Makollit, Avni Dehari, në cilësinë e thirrësit të seancës konstituive, ka kompetenca vetëm për drejtimin e asaj seance. Ai konsideron se shtyrja e mbledhjes dhe shfrytëzimi i afateve kushtetuese përbëjnë një veprim politik në përputhje me interesat e partisë së Deharit.

“Personi që ka thirrur mbledhjen e Kuvendit për 9 shtatorin është deputet si gjithë të tjerët. Rregullorja e Punës së Kuvendit, duke u bazuar në moshën e tij, e ngarkon atë vetëm me thirrjen dhe drejtimin e mbledhjes konstituive. Përtej këtij funksioni, ai nuk ka detyrime apo kompetenca të veçanta.

Për rrjedhojë, shtyrja ose zvarritja e mbledhjes dhe shfrytëzimi i të gjitha afateve kushtetuese nga Avni Dehari nuk mund të shihet vetëm si një çështje procedurale. Bëhet fjalë për një veprim politik, i cili, bazuar në zhvillimet e deritanishme, duket se është ndërmarrë në përputhje me vendimin dhe interesin politik të partisë së tij.

Opozita ka të drejtë, në mënyrë normale dhe demokratike, ta kundërshtojë qeverinë, të kërkojë zgjedhje të reja, të mos e votojë qeverinë dhe të përdorë të gjitha mjetet politike e parlamentare që i lejojnë Kushtetuta dhe demokracia” – u shpreh ai.

Makolli theksoi se përgjegjësia kryesore për krijimin e institucioneve i takon forcës që ka dalë fituese në zgjedhje.

Ai vlerësoi se zgjatja e afateve kushtetuese mund të jetë pjesë e një strategjie politike, përmes së cilës synohet që opozita të bartë përgjegjësinë për krizën dhe për mundësinë e mbajtjes së zgjedhjeve të reja.

“Përgjegjësia kryesore për formimin e institucioneve bie mbi subjektin që ka fituar zgjedhjet dhe ka kërkuar mandatin për ta drejtuar vendin. Nuk mund të përmbyset kjo logjikë duke ia ngarkuar opozitës barrën kryesore për vakumin institucional, kur fituesi i zgjedhjeve, me mbi 50% të votave, ka pasur numrat dhe mandatin për t’i krijuar institucionet.

VV-ja nuk ka qenë që në fillim e gatshme të kërkojë kompromis politik dhe të formojë institucionet shtetërore, për shkak të obligimeve që burojnë nga marrëveshjet ndërkombëtare dhe vendimeve që duhet të zbatohen.

Në këtë rrethanë, mosrespektimi i afateve kushtetuese mund të jetë pjesë e një strategjie të llogaritur. Ai mund të shërbejë si karrem për opozitën, në mënyrë që pas konstituimit të Kuvendit dhe zgjedhjes së Qeverisë më 9 shtator, ajo t’i drejtohet Gjykatës Kushtetuese për shkeljen e afateve.

Qëllimi politik i VV-së do të ishte krijimi i një situate ku përgjegjësia për vazhdimin e krizës institucionale dhe për një cikël të ri zgjedhjesh parlamentare t’i atribuohej opozitës. Pra, nuk kemi të bëjmë vetëm me një ngërç procedural, por me një kalkulim të mirëfilltë politik” – përfundoi ai.

The post 9 shtatori vendimtar për institucionet e Kosovës, në tryezë tre skenarë politikë appeared first on Albeu.com.

Albin Kurti, kryeministër në detyrë i Kosovës, vlerësoi se marrëveshja politike e arritur me Lidhjen Demokratike të Kosovës është përballur me një “goditje të rëndë”, por theksoi se ajo nuk e ka humbur vlefshmërinë. Sipas tij, zgjedhjet mund të evitohen nëse votohet Bekim Sejdiu.

Kur u pyet për mundësinë e zhvillimit të bisedimeve të tjera me kryetarin e LDK-së, Kurti e cilësoi marrëveshjen si arritje të të dyja subjekteve politike. Ai tha se ende ekziston një mundësi për të shmangur zgjedhjet dhe për të fuqizuar institucionet.

Në një deklaratë për Ekonomia Online, Kurti u shpreh se, ndonëse marrëveshja politike ka pësuar një goditje serioze, ajo nuk është zhvlerësuar. Ai e konsideroi atë një sukses të madh të dy forcave politike, duke shtuar se ata që synojnë stabilitet institucional, evitimin e zgjedhjeve dhe forcimin e shtetit e kanë ende shansin.

Kurti nënvizoi se nga ky dakordim politik është përcaktuar edhe një kandidat konkret, duke përmendur profesorin Bekim Sejdiu.

Ai sqaroi se emri i përveçëm i dalë nga marrëveshja politike është pikërisht ai i profesorit Bekim Sejdiu.

Megjithatë, Kurti nuk pranoi të tregonte nëse do të propozohet ndonjë kandidat tjetër për president.

The post Kurti: Pakti politik është goditur rëndë, por mbetet ende në fuqi appeared first on Albeu.com.

Kryetari i Vetëvendosjes, Albin Kurti, deklaroi se pret që marrëveshja e arritur dje me LDK-në për çështjen e presidentit të zbatohet me sukses.

Ai bëri të ditur se sot do të zhvillohet edhe një mbledhje e brendshme e VV-së, ndërsa nuk komentoi qëndrimin e deputetit të LDK-së, Abdullah Hoti, i cili u shpreh kundër marrëveshjes.

“Tash kemi me shku në një aktivitet tjetër, e kemi edhe një mbledhje të brendshme edhe gjithçka shpresojmë të shkojë mbarë e mirë sepse po mundohemi për të mirë e po punojmë mbarë. Shkolla “Ilir Konushevci” sapo u përurua, ky është lajmi sot”, tha Kurti, raporton KosovaPress.

Ndërkohë, LDK-ja zhvilloi sot një mbledhje, gjatë së cilës marrëveshja e arritur një ditë më parë u miratua unanimisht.

The post Kurti: Shpresoj që marrëveshja me LDK-në për presidentin të ecë mirë appeared first on Albeu.com.

Kryetari i Komunës së Prishtinës, Përparim Rama, ka shprehur dyshime se marrëveshja e arritur mes Lëvizjes Vetëvendosje dhe LDK-së do të çojë deri te zgjedhja e presidentit të ri të Kosovës.

Pas dakordimit të LVV-së dhe LDK-së që profesori universitar dhe ish-gjyqtari i Gjykatës Kushtetuese, Bekim Sejdiu, të jetë kandidat i përbashkët për postin e presidentit, Rama deklaroi se ende nuk është i bindur për përfundimin e suksesshëm të procesit.

Ai tha se dëshiron formimin e institucioneve dhe vazhdimin e përparimit të vendit, por zhvillimet e dy viteve të fundit e bëjnë atë pesimist për arritjen e një marrëveshjeje që do të mundësonte zgjedhjen e kreut të shtetit.

Rama paralajmëroi se ekziston mundësia që marrëveshja të jetë edhe një strategji e kryeministrit në detyrë, Albin Kurti.

“Uroj që mos të jetë kjo dhe një lojë e Albin Kurtit. Dyshoj shumë që ka me u zgjedh presidenti, për fat të keq po them. E ka treguar tash e dy vjet që nuk është i interesuar për me kriju qeveri, pra nuk është dikush që don me qeverisë, është dikush që ka tendenca autokratike po them dhe nuk e shoh, nuk jam optimist. Uroj që po, uroj që të krijojmë qeveri, uroj që të kemi president, po jam shumë pesimist në bazë të rrjedhave tash e gati dy vjet”, deklaroi Rama.

I pyetur për kandidaturën e Bekim Sejdiut, Rama u shpreh se e mbështet zgjedhjen e presidentit nëse partitë janë pajtuar dhe nëse koalicioni ka numrin e nevojshëm të votave.

“Patjetër që po, kqyri, vendit i duhet presidenti dhe nëse partitë janë pajtuar edhe i kanë votat, patjetër që po. Neve na duhen institucione, na duhet me ec përpara, pra nuk mund të ndalemi”, theksoi ai.

The post Përparim Rama: Skeptic për zgjedhjen e presidentit pas marrëveshjes Kurti-Abdixhiku appeared first on Albeu.com.

Kreu i Partisë Demokratike të Kosovës, Bedri Hamza, ka komentuar marrëveshjen e re midis Lëvizjes Vetëvendosje dhe Lidhjes Demokratike të Kosovës për ta nominuar Bekim Sejdiun si kandidat për president, duke shprehur dyshime se a do të arrijnë ta sigurojnë shumicën e nevojshme.

Në një deklaratë për KosovaPress, Hamza u shpreh se megjithëse dy partitë i kanë matematikisht votat e mjaftueshme, mbetet për t’u parë nëse të gjithë përfaqësuesit e tyre do të jenë në seancë dhe do ta mbështesin këtë kandidaturë. Ai theksoi se kjo është një çështje e brendshme e atyre subjekteve politike.

Duke folur për procesin e gjatë të bisedimeve, Hamza theksoi se PDK-ja nuk ka një qëndrim specifik ndaj kandidatit pasi nuk është propozim i tyre. Sidoqoftë, ai pranoi se zoti Sejdiu është një figurë që e njohin dhe e vlerësojnë angazhimin e tij të mëparshëm. Hamza sqaroi se partia e tij ka insistuar për një marrëveshje gjithëpërfshirëse politike, mirëpo tema e presidentit nuk ka qenë në tavolinën e diskutimeve, dhe PDK-ja do të vazhdojë rolin e saj opozitar në Kuvend, duke ofruar kritika e alternativa, por edhe mbështetje për nismat me interes kombëtar.

Lidhur me mundësinë që ndonjë deputet i PDK-së të votojë për Sejdiun, Hamza u tregua i prerë. Ai deklaroi se është i bindur në unitetin e grupit të tij parlamentar dhe nuk pret asnjë shmangie nga qëndrimet zyrtare të partisë. Ai rikonfirmoi se PDK nuk do të jetë pjesë e krijimit të institucioneve, me përjashtim të rastit kur flitet për pozitën e nënkryetarit.

Sot, LVV dhe LDK arritën konsensus për emrin e Bekim Sejdiut për postin e presidentit të Kosovës. Ndërkohë, Kuvendi i Kosovës ende nuk është konstituuar. Dy tentativat e kaluara kanë dështuar për shkak të moszgjedhjes së kryetarit të Kuvendit, duke bllokuar kështu përfundimin e procesit për Legjislaturën e 11-të.

Seanca konstituive mbetet në epiqendër të përplasjeve mes partive parlamentare dhe dështimi për ngritjen e institucioneve po e thellon krizën politike. Kryeministri në detyrë, Albin Kurti, ka kërkuar më shumë kohë për të negociuar një zgjidhje politike që do të mundësonte formimin e institucioneve të reja. Nga ana tjetër, Partia Demokratike e Kosovës dhe Aleanca po vazhdojnë aksionet e tyre për të detyruar mbajtjen e seancës konstituive.

The post Hamza pyet nëse LVV e LDK do ta kenë mbështetjen e plotë për Sejdiun, përjashton votat nga PDK appeared first on Albeu.com.

Marrëveshja e arritur mes Lëvizjes Vetëvendosje (LVV) dhe Lidhjes Demokratike të Kosovës (LDK) për kandidimin e Bekim Sejdiut në postin e presidentit është pritur si një hap pozitiv pas një periudhe të gjatë bllokimi institucional. Megjithatë, analistët vlerësojnë se zbatimi i saj ende mbetet i pasigurt.

Gjatë prezantimit të kandidaturës më 31 gusht, Sejdiu deklaroi se vendimi për ta pranuar postin lidhej me rrethanat politike në të cilat ndodhet Kosova.

Zgjedhjet parlamentare të mbajtura në qershor u zhvilluan pikërisht për shkak të mungesës së marrëveshjes mes partive për zgjedhjen e presidentit. Ato ishin zgjedhjet e treta që nga shkurti i vitit 2025.

Agon Maliqi, njohës i zhvillimeve politike në Kosovë, i tha Radios Evropa e Lirë (REL) se konsensusi mes dy partive për çështjen e presidentit duhet vlerësuar, veçanërisht pas rreth dy vjetësh paralizë politike dhe bllokade institucionale.

Megjithatë, Maliqi paralajmëroi se nuk ka arsye për optimizëm të tepruar, pasi marrëveshja mund të përballet me vështirësi gjatë zbatimit.

Dritëro Arifi e ka parë me kritikë mënyrën e zhvillimit të negociatave, duke e cilësuar procesin si të mbyllur dhe jotransparent.

Sipas Arifit, diskutimet janë zhvilluar pa informim publik, në një mënyrë që të krijonte përshtypjen e negociatave mes dy kompanive private për një tender ose projekt.

Vlerësimet për Bekim Sejdiun

Për Agon Maliqin, përvoja e Bekim Sejdiut në diplomaci dhe drejtësi përputhet me përgjegjësitë që mbart posti i presidentit.

Megjithatë, ai shtron pikëpyetje mbi aftësinë e Sejdiut për t’u përballur me betejat politike që mund ta presin në këtë detyrë.

Maliqi vlerëson se mbetet e paqartë nëse Sejdiu do të jetë në gjendje t’u rezistojë presioneve të një pushteti ekzekutiv që, sipas tij, ka shfaqur prirje dominuese dhe kërkon nënshtrim nga institucionet. Ai shton se Sejdiu nuk ka një parti pas vetes, edhe pse lidhet, në njëfarë mënyre, me orbitën e LDK-së.

Dritëro Arifi thekson se vetëm karriera profesionale nuk mjafton për të përcaktuar nëse dikush është i përshtatshëm për postin e presidentit.

Ai shprehet se Bekim Sejdiu mund të jetë një person dhe akademik shumë i mirë, por kjo nuk do të thotë automatikisht se është edhe politikan i shkëlqyer.

Arifi kërkon që kandidati t’i bëjë publike qëndrimet e tij për çështje strategjike, si përfshirja në projektet e gazit amerikan, dialogu strategjik me Shtetet e Bashkuara të Amerikës, si dhe marrëveshjet e Brukselit dhe Ohrit në kuadër të dialogut Kosovë-Serbi.

Pjesëmarrja në projektet rajonale të gazit, të mbështetura nga SHBA-ja, është kërkuar më herët nga partitë opozitare dhe nga Ambasada amerikane në Prishtinë. Deri tani, Qeveria në detyrë e drejtuar nga Albin Kurti nuk ka ndërmarrë një hap të tillë.

Po ashtu, vitin e kaluar, Shtetet e Bashkuara e pezulluan nisjen e dialogut strategjik me Kosovën. Uashingtoni iu referua shqetësimeve për veprimet e Qeverisë së Kurtit, të cilat, sipas tij, kishin shtuar tensionet dhe paqëndrueshmërinë.

Dilemat brenda LDK-së

Një pengesë e rëndësishme për zgjedhjen e Sejdiut mund të jenë mospajtimet brenda LDK-së dhe sigurimi i numrit të nevojshëm të votave në Kuvend.

Maliqi thotë se matematika parlamentare e vendos LDK-në në pozitë të vështirë, duke qenë se partia mund të ketë nevojë për mbështetje edhe nga deputetë jashtë grupit të saj.

Sipas tij, sfida nuk lidhet vetëm me gjetjen e votave.

Maliqi e sheh si rrezik edhe mundësinë që Gjykata Kushtetuese ta zhvlerësojë procesin, pasi përbërja aktuale e Kuvendit ndodhet në një situatë të paqartë nga pikëpamja juridike.

Kjo vërejtje lidhet me afatin kushtetues për konstituimin e Kuvendit. Në një aktgjykim të vitit të kaluar, Gjykata Kushtetuese përcaktoi se organi ligjvënës duhet të konstituohet brenda 30 ditësh nga certifikimi i rezultateve.

Ky afat tashmë është tejkaluar, ndërsa LVV-ja e Albin Kurtit pretendon se periudha prej 30 ditësh duhet të llogaritet nga 6 gushti, kur nisi seanca konstituive.

Partia Demokratike e Kosovës dhe Aleanca kanë mbajtur qëndrimin se afati i përcaktuar nga Kushtetuta është shkelur.

Edhe Dritëro Arifi paralajmëron se përçarjet brenda LDK-së mund ta dëmtojnë marrëveshjen, veçanërisht për shkak të qëndrimit të deputetëve që kanë kritikuar Qeverinë e Albin Kurtit dhe LVV-në.

Arifi e konsideron marrëveshjen si një dakordim të arritur për t’i siguruar një zyrë një personi dhe për t’ia vazhduar qeverisjen Kurtit, pa një qëndrim të qartë politik dhe institucional nga LDK-ja.

Çfarë ndodh nëse Sejdiu nuk zgjidhet president?

Kushtetuta e Kosovës përcakton se, nëse Bekim Sejdiu dhe kundërkandidati i tij, cilido qoftë ai, nuk marrin votat e nevojshme në tri rundet e votimit, Kuvendi shpërndahet dhe vendi shkon në zgjedhje të reja.

Agon Maliqi beson se në një situatë të tillë zgjedhjet e parakohshme nuk do të mund të shmangeshin.

Dritëro Arifi, ndërkaq, paralajmëron se dështimi i zgjedhjes së presidentit do ta thellonte edhe më tej krizën institucionale në Kosovë. Sipas tij, vendi aktualisht ndodhet jashtë çdo ekuacioni diplomatik.

LVV-ja e Albin Kurtit siguroi 53 mandate në zgjedhjet e qershorit. Bashkë me deputetët e komuniteteve joshumicë, kjo parti ka të paktën 61 vota, numër që mjafton për konstituimin e Kuvendit dhe krijimin e Qeverisë së re.

Procedura për zgjedhjen e presidentit kërkon praninë e të paktën 80 deputetëve në sallë. Kuvendi i Kosovës ka gjithsej 120 ulëse.

Nëse 18 deputetët e LDK-së i bashkohen LVV-së, numri i votave arrin në të paktën 81. Ky rezultat do të mjaftonte për zgjedhjen e presidentit, nëse gjatë votimit do të ishin të pranishëm të paktën 80 deputetë.

Megjithatë, ish-kryeministri Avdullah Hoti, një prej deputetëve të LDK-së, ka deklaruar publikisht se është kundër kandidaturës së Sejdiut.

Partia Demokratike e Kosovës dhe Aleanca kanë bërë të ditur më herët se do të qëndrojnë në opozitë. Aleanca ka paraqitur gjashtë kërkesa dhe ka deklaruar se do t’i japë shtatë votat e saj për formimin e institucioneve nëse LVV-ja i përmbush ato.

Kandidatura e Sejdiut u bë publike pas disa raundeve negociatash mes LVV-së dhe LDK-së. Fillimisht, dy partitë diskutuan për bashkëqeverisje, por ato bisedime dështuan. Më pas, negociatat u kufizuan vetëm te çështja e zgjedhjes së presidentit.

Nëse siguron mbështetjen e nevojshme në Kuvend, Bekim Sejdiu do të jetë presidenti i gjashtë i Kosovës. / REL

The post Kandidatura e Bekim Sejdiut për president, konsensus i brishtë mes LVV-së dhe LDK-së appeared first on Albeu.com.

Arbërie Nagavci, pjesëtare e kryesisë së Lëvizjes Vetëvendosje, e ka konsideruar si një moment të rëndësishëm për politikën dhe institucionet dakordimin e arritur me Lidhjen Demokratike të Kosovës për ta mbështetur Bekim Sejdiun në postin e Presidentit të Kosovës.

Përmes një postimi në Facebook, Nagavci pranoi se bisedimet kanë qenë sfiduese, por theksoi se rezultati i tyre përbën një njoftim pozitiv për vendin.

Ajo nënvizoi se, për herë të parë, palët kanë rënë dakord për një figurë të përbashkët, çka tregon se kompromisi dhe serioziteti institucional janë të realizueshëm kur e mira e përgjithshme kalon përpara përllogaritjeve partiake.

Nagavci vuri në dukje se në këtë çast, prioritet absolut është krijimi i shpejtë i institucioneve të rregullta dhe të besueshme, duke shpresuar se zgjedhja e kreut të ri të shtetit do të mbyllet me sukses.

Ajo e përshkroi Bekim Sejdiun si një personalitet me integritet, që mund të shërbejë si urë bashkimi përtej përçarjeve politike.

Në përfundim, Nagavci shprehu besimin se ky mirëkuptim mes dy forcave politike do të ndihmojë në daljen nga bllokada institucionale dhe se i gjithë procesi do të përfundojë shpejt, në dobi të Kosovës dhe popullit të saj.

The post Nagavci vlerëson marrëveshjen me LDK-në: Një hap larg ngërçit institucional appeared first on Albeu.com.

Biseda mes kryetarit të Lëvizjes Vetëvendosje, Albin Kurti, dhe kreut të LDK-së, Lumir Abdixhiku, për kriteret dhe profilin e presidentit të ardhshëm të Kosovës ka rikthyer diskutimet mbi mundësinë e një dakordësie politike mes dy partive.

Ky zhvillim vjen në një periudhë kur vendi ndodhet në ngërç institucional. Fakti që dy liderët kanë shqyrtuar edhe mundësinë e diskutimit për emra konkretë në takimet e ardhshme shihet si një sinjal se mund të krijohet hapësirë për kompromis.

Megjithatë, mbetet e paqartë nëse bëhet fjalë vetëm për një procedurë konsultimi apo nëse LVV-ja dhe LDK-ja po përpiqen të ndërtojnë një marrëveshje konkrete.

Për këto zhvillime, “Bota sot” ka marrë një vlerësim nga profesori Nijazi Halili.

Halili e konsideron takimin Kurti–Abdixhiku të rëndësishëm në aspektin politik, veçanërisht për shkak të situatës institucionale në të cilën gjendet Kosova.

Sipas tij, kalimi i diskutimit nga parimet e përgjithshme te kriteret dhe profili i presidentit të ardhshëm, si dhe paralajmërimi për shqyrtimin e emrave konkretë, dëshmojnë se komunikimi mes palëve ka tejkaluar nivelin formal.

Profesori tha se takimi duhet parë si një zhvillim me peshë politike dhe jo si një kontakt i zakonshëm procedural. Ai vlerësoi se diskutimi për kriteret dhe profilin e presidentit, së bashku me mundësinë e shqyrtimit të emrave në takimet e ardhshme, tregon se dialogu mes dy subjekteve ka hyrë në një fazë më konkrete.

Megjithatë, ai theksoi se është ende herët të flitet për një marrëveshje politike të përmbyllur mes LVV-së dhe LDK-së.

Sipas Halilit, momenti vendimtar do të jetë përballja me çështjen e kandidatit konkret dhe sigurimi i votave të nevojshme në Kuvend.

Ai nënvizoi se takimi përbën një sinjal pozitiv dhe një hap në drejtim të kompromisit, por nuk mund të konsiderohet ende si një marrëveshje e konsoliduar. Marrëveshja e vërtetë, sipas tij, do të provohet vetëm kur palët të dakordohen për një emër dhe të sigurojnë mbështetjen parlamentare.

Halili beson se një kandidat konsensual është i mundshëm, por realizimi i tij varet nga gatishmëria e të dyja partive për ta vendosur interesin institucional mbi atë partiak.

Si element që mund të ndihmojë në arritjen e kompromisit, profesori përmendi edhe qëndrimin e LDK-së se presidenti nuk duhet të jetë një figurë e lidhur thjesht me një parti, por një person me respekt më të gjerë dhe me aftësi për të përfaqësuar unitetin politik.

Ai u shpreh se deklarimet publike të Lumir Abdixhikut, sipas të cilave LDK-ja nuk kërkon një president partiak, por një figurë të respektuar që përfaqëson unitetin politik, mund të shërbejnë si bazë për një marrëveshje.

Por çfarë cilësish duhet të ketë presidenti i ardhshëm i Kosovës?

Sipas profesorit, kandidati duhet të ketë integritet, autoritet publik, orientim të qartë euroatlantik dhe respekt për Kushtetutën. Mbi të gjitha, ai duhet të jetë në gjendje të përfaqësojë unitetin e qytetarëve dhe jo interesat e vetëm një subjekti politik.

Halili shtoi se debati nuk duhet të përqendrohet vetëm te partia që do ta propozojë presidentin, por te kandidati që mund të fitojë besim më të gjerë institucional dhe shoqëror.

Në këtë kuadër, një marrëveshje e mundshme mes LVV-së dhe LDK-së mund të ndihmojë në kapërcimin e ngërçit institucional, nëse partitë arrijnë të pajtohen për një kandidat dhe të sigurojnë votat e nevojshme në Kuvend.

Ndërsa nëse bisedimet nuk shkojnë përtej përcaktimit të kritereve dhe nuk prodhojnë një dakordësi për emër konkret, atëherë ato mund të mbeten vetëm deklarative dhe pa rezultat praktik.

Profesori vlerësoi se zhvillimet e tanishme krijojnë një mundësi të rëndësishme për kompromis politik, por rezultati përfundimtar do të varet nga gatishmëria e Albin Kurtit dhe Lumir Abdixhikut për të ndërmarrë hapin vendimtar.

Halili përfundoi se Kosova ka nevojë për funksionim normal institucional dhe nuk mund ta zgjasë më tej krizën politike. Nëse palët bëjnë kompromisin përfundimtar, situata mund të shërbejë si pikënisje për tejkalimin e ngërçit; në të kundërt, rrezikon të mbetet një tjetër përpjekje politike e pasuksesshme.

The post Takimi Kurti–Abdixhiku, hap drejt kompromisit për presidentin e Kosovës? Ja skenari i profesorit appeared first on Albeu.com.

Albin Kurti dhe Lumir Abdixhiku kanë zhvilluar diskutime lidhur me kriteret që duhet të përmbushë presidenti i ri i Kosovës.

Gjatë komunikimit të tyre, të dy liderët kanë shprehur gatishmëri për arritjen e një marrëveshjeje. Ata janë pajtuar se kreu i shtetit duhet të jetë një figurë e respektuar, me meritë dhe e aftë të garantojë unitetin e stabilitetin e institucioneve.

Kurti tha se vendi ka nevojë për një president ose presidente meritore dhe kushtetuese, që pasqyron vlerat e shoqërisë, ka dhënë kontribut për popullin dhe ka një profesion të caktuar. Sipas tij, një figurë e tillë nuk do të krijonte dilema për rolin, funksionin dhe detyrën që do ta ushtronte gjatë pesë vjetëve të ardhshme.

Abdixhiku bëri të ditur se LDK-ja nuk po kërkon asgjë në këmbim, por synon zgjedhjen e një presidenti dinjitoz dhe ruajtjen e stabilitetit institucional. Ai deklaroi se Kosova nuk ka nevojë për një president të parëndësishëm, por për një person të respektuar, i cili do ta ushtronte me dinjitet funksionin më të lartë shtetëror, duke shtuar se vendi ka figura të tilla.

Tahiraj: Fillimin e këtyre bisedimeve e përshëndes dhe uroj që kësaj radhe të sjellin një marrëveshje konkrete dhe të mundësojnë formimin e institucioneve të shtetit

Analisti Saim Tahiraj, në një prononcim për “Bota sot”, e sheh me skepticizëm mundësinë e një marrëveshjeje ndërmjet palëve. Ai paralajmëroi se dialogu mund të jetë pjesë e lojërave politike që synojnë komprometimin dhe dobësimin e mëtejshëm të LDK-së, ndonëse theksoi se krijimi i institucioneve është i domosdoshëm për Kosovën.

Tahiraj e përshëndeti nisjen e bisedimeve dhe shprehu shpresën që ato të prodhojnë një marrëveshje konkrete, e cila do të mundësonte formimin e institucioneve shtetërore. Sipas tij, Kosova nuk mund të qëndrojë pafundësisht me institucione të bllokuara, pasi funksionalizimi i tyre është i nevojshëm për normalitetin e shtetit, stabilitetin politik dhe përballimin e sfidave të shumta.

Megjithatë, ai tha se mbetet skeptik për arritjen e një marrëveshjeje, pavarësisht detyrimit që liderët politikë kanë ndaj shtetit. Tahiraj shprehu dyshimin se takimet mund të shërbejnë më shumë si pjesë e kalkulimeve politike kundër LDK-së sesa si përpjekje e sinqertë për të gjetur një zgjidhje të nevojshme për Kosovën.

Tahiraj vlerëson se Kosova aktualisht është më pranë zgjedhjeve të reja sesa një marrëveshjeje politike. Ai kritikoi interesat dhe llogaritjet partiake, duke kërkuar që shteti të vendoset mbi partinë, pushtetin dhe interesat personale.

Sipas tij, nëse interesi shtetëror do të ishte realisht mbi interesat partiake e personale, arritja e marrëveshjes do të ishte shumë më e lehtë. Ai tha se deri tani janë parë më shumë kalkulime politike sesa përgjegjësi shtetërore dhe paralajmëroi se zgjedhjet e reja do të përbënin dëm të madh për vendin.

Analisti shtoi se liderët duhet ta kuptojnë se Kosova ka nevojë për institucione funksionale dhe jo për kalkulime të tjera politike. Sipas tij, vendi rrezikon të dëmtohet edhe më shumë nga kriza institucionale nëse interesi shtetëror nuk vendoset mbi atë partiak e personal.

Jakupi: Nga ky takim do të pritej mbi të gjitha konkretizim, jo vetëm shkëmbim qëndrimesh

Analisti politik Zejnullah Jakupi e konsideron takimin ndërmjet Albin Kurtit dhe LDK-së një mundësi të rëndësishme për zhbllokimin e krizës institucionale, por nuk e sheh atë domosdoshmërisht si një moment vendimtar.

Jakupi theksoi se rëndësia e takimit lidhet me rikthimin e dialogut të drejtpërdrejtë në një kohë kur kriza institucionale po thellohet dhe mosbesimi politik është i lartë. Sipas tij, fakti që LDK-ja ka pranuar të bisedojë me Kurtin, ndërsa ka refuzuar takimin e thirrur nga ushtruesja e detyrës së presidentes, tregon se ende ekziston mundësia e komunikimit politik.

Sipas tij, nga takimi duhet të pritet konkretizim dhe jo vetëm shkëmbim qëndrimesh. Prioriteti i palëve duhet të jetë gjetja e një formule për funksionalizimin e institucioneve, veçanërisht krijimi i një dakordimi për zgjedhjen e presidentit konsensual.

Jakupi u bëri thirrje partive politike që interesin institucional ta vendosin mbi kalkulimet afatshkurtra partiake. Ai sqaroi se kjo nuk nënkupton heqjen dorë nga interesat dhe programet e subjekteve, por kuptimin se bllokada prek jo vetëm një parti, por funksionimin e shtetit, ekonominë, marrëdhëniet me partnerët ndërkombëtarë dhe besimin e qytetarëve.

Ai paralajmëroi se zgjatja e krizës mund ta shndërrojë atë nga një krizë politike në një krizë kushtetuese e ligjore, me pasoja për vendin.

Jakupi theksoi se çdo marrëveshje ndërmjet Kurtit dhe LDK-së duhet të jetë e qartë, transparente dhe të shoqërohet me garanci për të gjitha palët. Sipas tij, ajo nuk duhet të shihet vetëm si një përpjekje për shmangien e zgjedhjeve të reja.

Ai vlerësoi se LDK-ja tashmë ka bërë një hap duke hequr dorë nga kërkesa që vetë ta caktojë emrin e presidentit, me arsyetimin se Kosova duhet të dalë nga kriza.

Analisti tha se takimi mund të shërbejë si pikënisje reale për zgjidhjen e situatës, nëse palët marrin pjesë me vullnet për kompromis dhe me propozime konkrete. Në rast të kundërt, ai paralajmëroi se vendi mund të mbetet në të njëjtin cikël të përplasjeve politike dhe të shkojë drejt zgjedhjeve të reja.

Sipas Jakupit, përgjegjësia u takon të gjitha partive, ndërsa qytetarët kanë nevojë për institucione funksionale dhe jo për një tjetër raund akuzash. Ai tha se kriza mund të tejkalohet përmes dialogut dhe kompromisit nëse ekziston një minimum vullneti politik; përndryshe, Kosova rrezikon një përplasje të re politike dhe zgjedhje të reja, çka do ta shtynte edhe më tej zgjidhjen e problemit.

The post Kurti dhe Abdixhiku diskutojnë për presidentin, por analistët nuk presin marrëveshje të shpejtë appeared first on Albeu.com.