Burim Latifi, drejtor i përgjithshëm i SHA MEPSO, priti sot në trafostacionin e Ohrit Nicole Warns, të ngarkuarën me detyrën e ambasadores së SHBA-së në Maqedoninë e Veriut. Gjatë takimit, ai i paraqiti asaj zhvillimet më të fundit të projektit për ndërlidhjen energjetike me Shqipërinë.

Fokusi i vizitës ishte linja e transmetimit 400 kV Manastir–Elbasan, të cilën Latifi e cilësoi si një investim strategjik dhe të shumëpritur. Projekti synon të rrisë sigurinë energjetike dhe të zgjerojë shkëmbimin ndërkufitar të energjisë.

Sipas drejtorit të MEPSO-s, trafostacioni i Ohrit ndodhet pranë përfundimit të punimeve. Ndërkohë, ndërtimi i linjës së transmetimit po vijon me ritëm të mirë, duke shënuar progres të dukshëm në terren.

“Ndërlidhja me Shqipërinë nuk është vetëm një projekt infrastrukturor. Është një hap i rëndësishëm drejt rritjes së sigurisë energjetike, zgjerimit të shkëmbimit ndërkufitar dhe forcimit të integrimit rajonal”, deklaroi Latifi.

Latifi nënvizoi gjithashtu se MEPSO do të vijojë angazhimin për zgjerimin e infrastrukturës së transmetimit përmes projekteve të tjera strategjike. Në këtë kuadër përfshihen planet për ndërlidhje më të fuqishme me Kosovën dhe Bullgarinë, si edhe forcimi i lidhjes me Greqinë.

“Sa më shumë të jemi të ndërlidhur, aq më të sigurt jemi. Sa më shumë të jemi të integruar në nivel rajonal, aq më të qëndrueshëm dhe më rezistent jemi”, u shpreh ai.

Ai falënderoi Ambasadën e SHBA-së për partneritetin dhe mbështetjen e dhënë në realizimin e projekteve që synojnë ndërtimin e një rajoni më të fortë, më të sigurt dhe më të integruar në aspektin energjetik.

The post Në Ohër, Latifi i prezanton ambasadores amerikane ecurinë e projektit energjetik me Shqipërinë appeared first on Albeu.com.

VLEN i është përgjigjur deklaratave të BDI-së, duke kërkuar që drejtuesit e kësaj partie të mbajnë përgjegjësi për rezultatet e dobëta në zgjedhjet lokale, përpara se të kërkojnë zgjedhje të parakohshme.

Sipas VLEN-it, humbja në disa komuna me shumicë shqiptare nuk u shoqërua me asnjë përgjegjësi politike brenda BDI-së. Në reagim përmenden Ali Ahmeti, Bujar Osmani, Bajram Rexhepi dhe Faton Ahmeti, të cilët, sipas VLEN-it, vazhduan të qëndrojnë në poste të rëndësishme ose morën funksione të reja partiake, pavarësisht rezultatit të zgjedhjeve.

“Në BDI, me sa duket nuk ka përgjegjësi për humbjen, por humbësit shpërblehen”, thuhet në reagimin e VLEN-it.

Partia përmend edhe Haraçinën, Bogovinën, Tearcën, Strugën, Zhelinën, Sarajin dhe Dollnenin, duke pretenduar se pas humbjeve në këto komuna nuk pati dorëheqje dhe as riformatim të strukturave drejtuese të BDI-së.

VLEN vlerëson se thirrjet e BDI-së për legjitimitet dhe zgjedhje të parakohshme synojnë të mbajnë në fuqi të njëjtën strukturë politike, si dhe të krijojnë idenë se kjo parti mund të rikthehet në pushtet.

“BDI-ja e di shumë mirë se shqiptarët me votë i larguan nga të gjitha komunat me shumicë shqiptare”, thuhet në reagim, ku nënvizohet se një përballje tjetër me qytetarët do të sillte një humbje të re për BDI-në.

VLEN e mbyll qëndrimin e saj duke deklaruar se zgjedhjet e ardhshme do të sjellin verdiktin përfundimtar të qytetarëve ndaj asaj që e quan “një udhëheqjeje të pareformuar” të BDI-së.

The post VLEN: BDI-ja ka humbur përballjen me shqiptarët, ndërsa zgjedhjet e ardhshme do ta konfirmojnë fundin appeared first on Albeu.com.

Zëvendësministri i Mbrojtjes, Admir Shabani, ka komentuar diskutimet mbi listën preliminare të kandidatëve për pranimin e kadetëve në Akademinë ushtarake. Ai ka sqaruar se kjo listë përfaqëson vetëm një etapë të ndërmjetme të procesit dhe nuk duhet ngatërruar me listën përfundimtare të të pranuarve.

Shabani ka vlerësuar se çdo parashikim për rezultatin final të konkursit, përpara se procedurat të përfundojnë, është i nxituar. Sipas tij, rritja e pjesëmarrjes së të rinjve shqiptarë në sistemin e mbrojtjes mbetet një objektiv i rëndësishëm, ndërsa që pas hapjes së konkursit janë zhvilluar aktivitete për informimin dhe nxitjen e aplikimeve nga të rinjtë.

“Brenda afatit të paraparë vetëm dy kandidatë shqiptarë u paraqitën dhe dorëzuan dokumentacionin përkatës”, ka deklaruar zv/ministri Shabani.

Ai ka theksuar se çështja nuk mund të analizohet vetëm duke numëruar kandidatët shqiptarë në listën paraprake. Sipas tij, duhet shqyrtuar edhe arsyeja përse interesi i të rinjve për të ndjekur profesionin ushtarak vazhdon të jetë i kufizuar.

Institucionet, sipas Shabanit, duhet të ndërmarrin hapa për ta bërë këtë profesion më joshës, duke ofruar mundësi për arsimim, avancim profesional, kushte moderne pune dhe një rrugë të qartë karriere.

Ai ka bërë të ditur se promovimi i Akademisë ushtarake dhe informimi për mundësitë e karrierës në Ministrinë e Mbrojtjes dhe Armatë do të vijojnë edhe gjatë periudhës së ardhshme.

“Synimi ynë është që në gjeneratat e ardhshme të kemi një numër dukshëm më të madh të kandidatëve shqiptarë të interesuar dhe cilësorë, të cilët, mbi bazën e kritereve të përcaktuara dhe rezultateve të tyre, do të bëhen pjesë e sistemit”, ka thënë ai.

Në përmbyllje, zëvendësministri ka kërkuar që diskutimi për përfaqësimin të mos mbetet vetëm në nivelin e akuzave politike. Ai ka nënvizuar nevojën për angazhim të drejtpërdrejtë në motivimin e të rinjve për të aplikuar dhe për të ndërtuar karrierë në institucionet e mbrojtjes.

“Nuk do të premtojmë vetëm shifra në letër. Do të krijojmë mundësi, do të motivojmë të rinjtë dhe do të punojmë për rezultate konkrete që do të shihen në gjeneratat që vijnë”, përfundon reagimi.

The post Admir Shabani: Përfshirja shqiptare në mbrojtje kërkon masa konkrete, jo vetëm shifra appeared first on Albeu.com.

Në vendkalimin kufitar të Tabanocit, në drejtim të Serbisë, autoritetet kanë instaluar tetë korsi të dedikuara për verifikimin dhe arkëtimin e sanksioneve ndaj makinave me regjistrim të huaj, të kapura nga rrjeti i monitorimit “Qyteti i Sigurt”.

Ky veprim u ndërmor pas kaosit të shkaktuar në kufi, ku kontrollet e reja për mjetet me targa ndërkombëtare gjeneruan radhë të zgjatura dhe vonesa të mëdha. Referuar burimeve në vendngjarje, i gjithë procesi i verifikimit dhe pagesës së gjobës në doganë merr deri në 15 minuta për çdo shofer.

Sapo platforma identifikon një shkelje të pashlyer, makina ndalohet në dalje dhe pronari është i detyruar të mbulojë detyrimin përpara se të lejohet të largohet nga territori maqedonas.

Për t’iu shmangur radhëve të gjata, Ministria e Brendshme ka vënë në dispozicion një shërbim online për qytetarët e huaj. Përmes tij, ata mund të verifikojnë nëse automjeti i tyre figuron me ndonjë shkelje në sistemin “Qyteti i Sigurt”, të aksesojnë njoftimin e pagesës dhe ta shlyejnë atë në mënyrë digjitale.

Gjatë krijimit të llogarisë në platformë, përdoruesi duhet të skanojë ose fotografojë pasaportën dhe të shtypë targën e mjetit me të cilin udhëton në vend.

Kjo masë u lejon shoferëve të huaj të njoftohen paraprakisht për ndëshkimet e regjistruara dhe të shlyejnë borxhet pa u detyruar të ndalojnë e të presin në pikën kufitare.

Platforma e mbikëqyrjes “Qyteti i Sigurt” aktivizon kamerat për regjistrimin automatik të shkeljeve rrugore, dhe tani mekanizmi i skanimit në dalje të shtetit është plotësisht funksional për makinat me targa jo-maqedonase.

Si pasojë e aplikimit të kësaj procedure të re, zyrtarët kanë rritur kapacitetet në Tabanoc, me synim përshpejtimin e procedurës së pagesës dhe kontrollit të gjobave, duke parandaluar kështu përsëritjen e radhëve kilometrike të shfaqura në ditët e mëparshme.

The post Tetë korsi të reja në Tabanoc: Pa shlyer gjobën, asnjë automjet me targa të huaja nuk del nga Maqedonia e Veriut appeared first on Albeu.com.

Një rast i pazakontë është regjistruar në lagjen Karposh të Shkupit, ku një automjet ka qëndruar i parkuar në rrugë edhe gjatë zhvillimit të punimeve për asfaltim.

Megjithëse ekipet kishin nisur shtrimin e asfaltit, pronari nuk e zhvendosi makinën. Për këtë arsye, punëtorët u detyruan ta asfaltonin rrugën rreth automjetit, duke lënë të pambuluar me asfalt hapësirën poshtë tij.

Fotot dhe pamjet nga kjo situatë u shpërndanë gjerësisht në rrjetet sociale, ndërsa qytetarët kanë shprehur habinë e tyre për faktin që makina ndodhej ende në mes të rrugës gjatë punimeve.

The post Karposh, makina mbetet e parkuar gjatë asfaltimit: punëtorët shtrojnë rrugën përreth saj appeared first on Albeu.com.

Kreu i Bashkisë së Pustecit, Pali Kolefski, kërkoi ndjesë për situatën, ndërsa sqaroi se Bashkia e Pustecit nuk ishte organizatore e aktivitetit, por vetëm e ftuar.

“Të them të drejtën, para se të zhvillohej ky aktivitet, kam kërkuar nga organizatorët, konkretisht nga kryetari i shoqatës së VMRO-së në Shqipëri, programin zyrtar. Më kanë thënë se do të kishte këngë dhe valle tradicionale maqedonase dhe se aktiviteti do të hapej me himnin maqedonas.

I kam kërkuar që, në momentin që do të ekzekutohej himni maqedonas, patjetër të ishte edhe himni shqiptar, sepse kështu duhet të ndodhë në çdo pritje apo ceremoni zyrtare. Ne jemi shtetas shqiptarë, jetojmë këtu dhe duhet të respektohet himni”, u shpreh Kolefski.

The post Injorimi i himnit shqiptar gjatë vizitës së Mickoskit në Pustec, kryebashkiaku: Nuk e organizuam ne appeared first on Albeu.com.

Një banor 28-vjeçar i Shkupit është bërë pre e një sulmi fizik, ndërsa më pas ai dhe familja e tij janë kërcënuar. Ngjarja lidhet me një konflikt të mëparshëm për një marrëdhënie mes debitori dhe kreditori, ndërsa policia ka paraqitur kallëzim penal ndaj tre personave.

Sipas njoftimit të Ministrisë së Punëve të Brendshme, rasti është regjistruar më 17 gusht, rreth orës 15:20, në zonën e Komunës së Aerodromit në Shkup.

Nën dyshimin për kryerjen e veprave penale “zhvatje” dhe “dhunë”, të parashikuara në nenet 258 dhe 386 të Kodit Penal, janë V.A. (26), D.A. (27) dhe S.S., të tre nga Shkupi.

Hetimet fillestare tregojnë se përplasja ka buruar nga një detyrim i pazgjidhur më herët mes palëve në cilësinë e debitorit dhe kreditorit. Dyshohet se të akuzuarit e kanë dhunuar 28-vjeçarin dhe më pas kanë ushtruar kërcënime ndaj tij dhe familjes së tij.

Gjatë veprimeve të ndërmarra, policia ka ndaluar V.A. dhe D.A., ndërsa për S.S. është nxjerrë urdhër qendror kërkimi.

Autoritetet kanë mbledhur gjithashtu prova materiale që lidhen me rastin. Dy personat e arrestuar janë dërguar përpara gjyqtarit të procedurës paraprake.

Pas shqyrtimit, gjykata caktoi 30 ditë arrest shtëpiak për V.A., ndërsa ndaj D.A. vendosi masa paraprake. Për S.S. u caktua paraburgim në mungesë.

Rasti po trajtohet nga Njësia për Krime të Dhunshme pranë SPB Shkup, në bashkëpunim me Prokurorinë Publike të Shkupit.

Të dyshuarit gëzojnë prezumimin e pafajësisë deri në marrjen e një vendimi të formës së prerë nga gjykata.

The post Sulmohet dhe kërcënohet me familjen një 28-vjeçar në Shkup, tre persona hetohen për zhvatje dhe dhunë appeared first on Albeu.com.

Pas ditëve me diell dhe paqëndrueshmëri të herëpashershme, Maqedonia po përballet me një valë të fortë të nxehti, e cila gjatë fundjavës pritet të shtrihet në të gjithë vendin.

Sot mbizotëroi mot i kthjellët dhe i ngrohtë, ndërsa vranësirat ishin të pakta deri mesatare.

Nesër do të vijojë moti me diell dhe temperatura të larta, me vranësira lokale të pakta ose mesatare. Gjatë pasdites, në zonat malore pritet shtim i vranësirave, duke krijuar mundësi për reshje të shkurtra dhe bubullima të rralla. Era do të jetë e dobët deri mesatare dhe do të fryjë nga veriperëndimi. Edhe në Shkup parashikohet mot me diell e i ngrohtë, shoqëruar me vranësira të pakta deri mesatare.

Që nga e enjtja nis një periudhë kryesisht e qëndrueshme dhe shumë e ngrohtë. Temperaturat minimale do të lëvizin nga 12°C deri në 21°C, ndërsa ato maksimale do të shkojnë nga 33°C në 39°C. Në këtë ditë do të fryjë erë e lehtë deri mesatare nga juglindja.

Të premten, më 21 gusht, pritet një tjetër rritje e temperaturave. Minimalet do të regjistrohen nga 13°C deri në 22°C, ndërsa temperaturat maksimale gjatë ditës do të variojnë nga 34°C deri në 40°C.

Rritja do të vijojë edhe të shtunën, më 22 gusht, kur temperaturat minimale do të jenë nga 14°C deri në 23°C. Gjatë ditës, maksimalet do të lëvizin nga 35°C deri në 41°C.

Pavarësisht kësaj, priten edhe kushte të paqëndrueshme të shoqëruara me erëra të forta, reshje të rrëmbyeshme dhe stuhi. Në disa pjesë të vendit, temperaturat gjatë fundjavës mund të kalojnë 40 gradë Celsius.

The post Vala e të nxehtit përfshin Maqedoninë, temperaturat në fundjavë arrijnë deri në 41°C appeared first on Albeu.com.

Ministri i Punëve të Brendshme, Pançe Toshkovski, theksoi së fundmi se sistemi “Safe City” nuk bën dallime dhe se çdo automjet që lëviz në rrugët e Maqedonisë, me targa vendore apo të huaja, do të regjistrohet nga kamerat e shpejtësisë dhe nuk do të ketë asnjë përjashtim.

Këto deklarata po marrin formë konkrete sot në vendkalimin kufitar Tabanoc, ku janë krijuar kolona të gjata makinash të drejtuara nga shtetas të huaj. Ata presin për të shlyer gjobat për kundërvajtje në trafik, të cilat janë dokumentuar nga i njëjti sistem.

Ai shtoi se çdo person që shkel rregullat e komunikacionit rrugor në Maqedoni do të ndëshkohet, pavarësisht nga shteti i origjinës, dhe se askush nuk mund t’i shmanget sanksioneve të vendosura nga “Safe City”.

Në fillim të këtij viti, kur u vu në funksion “Qyteti i Sigurt”, ishte bërë e ditur se automjetet me targa të huaja që kryejnë shkelje nuk do të ndalohen në momentin e daljes nga vendi. Megjithatë, drejtuesit e tyre do të marrin një njoftim zyrtar se nuk do të mund të rihyjnë në Maqedoni pa e paguar më parë gjobën.

The post Safe City” pa tolerancë: Radhë të huajsh në Tabanoc për të paguar gjobat e shpejtësisë appeared first on Albeu.com.

Deputetja e VLEN-it, Saranda Imeri Stafai, ka reaguar ndaj qëndrimeve të Bujar Osmanit nga BDI-ja, i cili përmes një statusi të gjatë kritikoi funksionimin e VLEN-it dhe pretendoi se kjo strukturë është kthyer në një mekanizëm institucional për politika me karakter maqedonas.

Sipas Stafait, Osmani po e interpreton bashkëpunimin politik si shenjë dobësie. Ajo vlerëson se krijimi i aleancave mes forcave politike për të prodhuar ndryshim është një veprim i zakonshëm dhe legjitim në një sistem demokratik.

“Bujar, problemi yt është se po përpiqesh ta shesësh bashkëpunimin politik si dobësi, ndërsa në demokraci bashkimi i forcave për të sjellë ndryshim quhet mandat politik”, ka shkruar Stafai.

Ajo rikujton se VLEN-i u themelua nga bashkimi i forcave shqiptare me synimin e qartë për t’i dhënë fund monopolit shumëvjeçar të BDI-së dhe për të sjellë një ndryshim në skenën politike.

Stafai i konsideron kontradiktore kritikat e Osmanit ndaj bashkëpunimit të VLEN-it me VMRO-DPMNE-në, duke theksuar se edhe BDI-ja ka qeverisur për një periudhë të gjatë në koalicion me parti maqedonase.

“Bashkëpunimi nuk është tradhti kur e bën BDI-ja, por ama qenka varësi kur e bëjnë të tjerët”, është shprehur deputetja e VLEN-it.

Në vijim, ajo ka përmendur edhe disa prej çështjeve për të cilat Bujar Osmani është kritikuar gjatë veprimtarisë së tij politike dhe diplomatike. Ndër to, Stafai rendit planin 9-pikësh për Kosovën, të paraqitur nga Osmani kur ishte në krye të OSBE-së, si dhe pritjen në Shkup të ministrit të Jashtëm rus Sergej Lavrov, gjatë samitit të OSBE-së.

“Dhe sot na flet për ‘rrezikun serb’ dhe për orientimin e VLEN-it?”, ka shkruar ajo.

Deputetja e VLEN-it ka akuzuar gjithashtu BDI-në për afrimin me Beogradin gjatë kohës që kjo parti ishte në pushtet. Në këtë kuadër, ajo ka përmendur edhe takimin e Ali Ahmetit me presidentin serb Aleksandar Vuçiç.

Stafai ka deklaruar se VLEN-i nuk e paraqet veten si një forcë pa të meta, por se detyrimi i tij është të qeverisë, të arrijë rezultate dhe të ndreqë gabimet e bëra.

“VLEN-i nuk ka nevojë të jetë perfekt. Ka nevojë të qeverisë, të japë rezultate dhe të korrigjojë gabimet”, ka theksuar ajo.

Në përfundim të reagimit, Stafai ka akuzuar BDI-në se vazhdon të pretendojë se është e vetmja forcë politike me të drejtë të flasë në emër të shqiptarëve.

“Legjitimiteti shqiptar nuk është pronë e BDI-së. As nuk është trashëgimi politike e Ali Ahmetit. Legjitimitetin e japin shqiptarët me votën e tyre. Dhe këtë herë shqiptarët folën”, ka deklaruar deputetja e VLEN-it.

Reagimi është mbyllur me një sulm të drejtpërdrejtë ndaj Osmanit, të cilit Stafai i është referuar për rezultatin në zgjedhjet lokale: “Dhe në fund, më së paku mund të flasësh ti që humbe pa balotazh.”

Në postscriptum, ajo e ka ironizuar Osmanin me shprehjen: “Bujari i PDSH-së!”

The post Saranda Imeri Stafai i përgjigjet Bujar Osmanit: Legjitimiteti shqiptar fitohet me votë, nuk i përket BDI-së appeared first on Albeu.com.