Veprimtari Saim Tahiraj ka deklaruar përmes një postimi në Facebook se Manastiri i Deçanit nuk duhet të shfrytëzohet për synime politike. Sipas tij, trashëgimia kulturore e Kosovës dhe e vërteta historike duhen mbrojtur nga propaganda dhe përdorimi për interesa politike, e jo manastiri përmes një mbrojtjeje të imponuar nga jashtë.

Në reagimin e tij, Tahiraj tha se askush nuk duhet ta përkrahë politikën propagandistike që lidhet me këtë çështje. Ai kritikoi veçanërisht veprimet e qarqeve që, siç u shpreh, nën petkun e Islamit Politik cenojnë interesat shtetërore dhe kombëtare të Kosovës.

Sipas Tahirajt, politika shoviniste dhe hegjemoniste serbe ka zhvilluar prej dekadash një fushatë të organizuar, përmes së cilës trashëgimia fetare dhe kulturore e Kosovës është paraqitur si vetëm serbe. Ai vlerësoi se synimi ka qenë krijimi i një narrative politike rreth identitetit dhe pronësisë së kësaj trashëgimie, ndërsa shtoi se kjo propagandë, fatkeqësisht, ka ndikuar edhe në mënyrën se si çështja perceptohet nga një pjesë e faktorit ndërkombëtar.

Tahiraj theksoi se shqiptarët, pa marrë parasysh përkatësinë fetare të objekteve, kanë një histori të gjatë të ruajtjes dhe respektimit të tyre. Për Manastirin e Deçanit, ai kërkoi të merret parasysh edhe historia e familjeve shqiptare që, bazuar në dëshmitë dhe traditën e trashëguar ndër breza, kanë kontribuar në ndërtimin dhe mbrojtjen e tij.

Në këtë kontekst, ai përmendi familjen Buqaj nga Nokshiqi, familjen Humaj nga Baballoqi i Deçanit dhe familjen Demukaj nga Deçani. Tahiraj po ashtu tha se manastiri ishte ndërtuar nën kujdesin e arkitektit të madh shqiptar Fra Vita Buqaj.

Për këtë arsye, sipas tij, shqiptarët nuk duhet të paraqiten si të paaftë për të mbrojtur trashëgiminë e tyre fetare dhe kulturore. Ai nënvizoi se këto objekte janë ruajtur prej tyre përgjatë shekujve dhe se kjo përkujdesje do të vazhdojë edhe sot.

Tahiraj i bëri thirrje bashkësisë ndërkombëtare që ta vlerësojë Kosovën pa u ndikuar nga propaganda e vjetër serbomadhe. Sipas tij, nuk duhet lejuar që trashëgimia fetare dhe kulturore të vihet në funksion të politikave hegjemoniste apo të rrëfimeve që synojnë shtrembërimin e historisë.

Ai tha se ka ardhur koha që faktori ndërkombëtar të mos mashtrohet nga kjo propagandë dhe të pengojë përdorimin e objekteve fetare për objektiva politikë.

Në postim, Tahiraj deklaroi se tradita shqiptare nuk njeh shkatërrimin e objekteve të veta fetare. Përkundrazi, sipas tij, shqiptarët i kanë mbrojtur ato me përkushtim dhe fanatizëm, ndërsa edhe Manastirin e Deçanit e shohin si pjesë të trashëgimisë që meriton respekt dhe ruajtje.

Në përfundim, ai ritheksoi se Manastiri i Deçanit nuk duhet të kthehet në pretekst për politika hegjemoniste. Tahiraj kërkoi që historia të studiohet duke u mbështetur në fakte, trashëgimia të trajtohet me respekt dhe shqiptarëve t’u besohet ruajtja e asaj që kanë mbrojtur ndër shekuj.

The post Tahiraj: Manastiri i Deçanit të mos shndërrohet në justifikim për politika hegjemoniste appeared first on Albeu.com.

Duke nisur nga sot, përgjegjësitë në zonën përreth Manastirit të Deçanit kalojnë nga KFOR-i te Policia e Kosovës.

Njoftimi për këtë zhvillim është bërë nga Komuna e Deçanit.

Në reagimin e saj, komuna thekson se, gjatë të gjitha takimeve dhe komunikimeve zyrtare me institucionet dhe nivelet e sigurisë në Republikën e Kosovës, ka deklaruar vazhdimisht se Deçani është komunë e qetë dhe e sigurt, si dhe model i bashkëjetesës dhe respektimit të të drejtave të çdo qytetari.

Sipas njoftimit, vendimi i marrë sot nga KFOR-i për t’ia kaluar Policisë së Kosovës përgjegjësitë e sigurisë në hapësirën rreth Manastirit të Deçanit e konfirmon këtë realitet. Komuna e cilëson këtë si një hap me rëndësi në normalizimin e situatës dhe në forcimin e përgjegjësive të institucioneve vendore të sigurisë.

Komuna e Deçanit ka shprehur mirënjohje të thellë ndaj KFOR-it, NATO-s dhe të gjitha shteteve anëtare, të cilat kanë shërbyer dhe vazhdojnë të shërbejnë në Deçan dhe në Republikën e Kosovës. Ajo ka vlerësuar punën e jashtëzakonshme, angazhimin dhe kontributin e tyre të çmuar për ruajtjen e sigurisë dhe paqes.

Në fund të njoftimit thuhet se populli i Kosovës do t’u mbetet gjithmonë mirënjohës për rolin e tyre në ndërtimin dhe ruajtjen e paqes në vend.

The post Policia e Kosovës merr nga KFOR-i përgjegjësitë për zonën rreth Manastirit të Deçanit appeared first on Albeu.com.

Dioqeza e Rashkës dhe Prizrenit e Kishës Ortodokse Serbe në Kosovë ka bërë të ditur se në Zonën e Veçantë të Mbrojtur të Manastirit të Deçanit kanë nisur sërish ndërhyrjet në rrugën e transitit ndërkombëtar Deçan-Plavë. Komuna e Deçanit, ndërkaq, deklaroi se aktivitetet kishin të bënin vetëm me mirëmbajtjen e rrugës.

Sipas Dioqezës, as ajo dhe as Manastiri i Deçanit nuk kishin marrë njoftim paraprak për zhvillimin e këtyre punimeve. Po ashtu, atyre nuk u ishte paraqitur dokumentacioni i projektit dhe nuk u ishte dhënë asnjë sqarim për qëllimin, përmasat apo bazën ligjore të ndërhyrjeve.

Kryetari i Komunës së Deçanit, Bashkim Ramosaj, sqaroi se përgjatë dy ditëve ishte realizuar mirëmbajtja e segmentit në fjalë. Sipas tij, puna përfshiu mbushjen e gropave, pastrimin e barit dhe shkurreve, si dhe largimin e pluhurit të mbledhur përgjatë rrugës.

Ramosaj bëri të ditur se aktiviteti tashmë ka përfunduar. Ai tha gjithashtu se komuna kishte ndërmarrë punime të tilla edhe më parë, në bazë të marrëveshjes me igumenin e Manastirit të Deçanit, Sava Janjiq.

“U kërkoj të gjithëve mirëkuptim dhe që nevoja për mirëmbajtjen e kësaj pjese të rrugës të shihet në mënyrën e duhur, duke u përmbajtur nga vlerësimet dhe kualifikimet që nuk e pasqyrojnë gjendjen reale”, deklaroi Ramosaj.

Më 29 korrik, Kisha Ortodokse Serbe në Kosovë njoftoi se Këshilli për Zbatim dhe Monitorim nuk kishte marrë informacion për rinisjen e punimeve pranë Manastirit të Deçanit. Në përbërjen e këtij këshilli janë dy ministra të Qeverisë së Kosovës dhe mitropoliti serb, Teodosije, ndërsa në veprimtarinë e tij përfshihen edhe drejtuesit e misioneve në Kosovë të Bashkimit Evropian dhe Organizatës për Siguri dhe Bashkëpunim në Evropë (OSBE).

Dioqeza e Rashkës dhe Prizrenit shprehu shpresën që Policia e Kosovës dhe institucionet e tjera përgjegjëse të sqarojnë menjëherë “se kush i ka urdhëruar dhe miratuar punimet, do të verifikojnë bazën e tyre ligjore dhe do të ndërmarrin të gjitha masat që janë në kompetencën e tyre për të siguruar respektimin e ligjit, rendit juridik dhe regjimit të Zonës së Veçantë të Mbrojtur, si dhe për të ndërprerë punimet e nisura”.

Ligji për zonat e veçanta të mbrojtura u miratua në Kosovë më 2008, duke u mbështetur në Planin e Ahtisaarit. Synimi i tij është mbrojtja e Kishës Ortodokse Serbe në Kosovë dhe e pronës së saj.

Përmes këtij ligji sigurohet mbrojtja e manastireve, kishave dhe objekteve të tjera fetare që i përkasin Kishës Ortodokse Serbe në Kosovë. Ai përfshin gjithashtu vende të tjera me vlerë kulturore e historike, të cilat kanë rëndësi të posaçme për komunitetin serb.

Për shkak se kalon nëpër Zonën e Mbrojtur, ndërtimi i magjistrales Deçan-Plavë është pezulluar disa herë deri tani. Megjithatë, përmes Këshillit për Zbatim dhe Monitorim, në vitin 2020 u arrit pajtimi që rreth Manastirit të Deçanit të ndërtohej një trase anashkaluese. Ky mekanizëm përbëhet nga përfaqësues të Qeverisë së Kosovës, Kishës Ortodokse Serbe dhe komunitetit ndërkombëtar.

Avdullah Hoti, në atë kohë kryeministër i Kosovës, kishte thënë se marrëveshja erdhi pas diskutimeve konstruktive që kishin zgjatur disa muaj.

Për rastin reagoi edhe Lista Serbe, forca kryesore politike e serbëve në Kosovë, e cila mbështetet nga Beogradi. Sipas saj, çdo veprim i kryer jashtë ligjit dhe procedurave të përcaktuara për ruajtjen e trashëgimisë shpirtërore e kulturore përbën “cenim të drejtpërdrejtë të rendit juridik dhe rrezikon më shumë sigurinë dhe mbijetesën e trashëgimisë së Kishës Ortodokse Serbe në Kosovë”.

“I bëjmë thirrje të gjitha institucioneve kompetente, si dhe përfaqësuesve ndërkombëtarë që janë garantues të zbatimit të mekanizmave ligjorë ekzistues, të reagojnë urgjentisht, të ndërpresin të gjitha aktivitetet që nuk janë në përputhje me regjimin e Zonës së Veçantë të Mbrojtur dhe të sigurojnë zbatimin e plotë të ligjit”, thuhej në reagimin e Listës Serbe.

Thirrje për ndërprerjen e menjëhershme të punimeve iu drejtua përfaqësuesve ndërkombëtarë në Kosovë edhe nga Zyra për Kosovën e Qeverisë së Serbisë.

Kjo zyrë i cilësoi aktivitetet si pjesë të dukshme të “një politike më të gjerë të presionit sistematik ndaj Kishës Ortodokse Serbe dhe besimtarëve të saj”. Ajo pretendoi se pikërisht për këtë arsye punimet po kryhen pa dijeninë dhe pa miratimin e Dioqezës Rashkë-Prizren dhe Manastirit të Deçanit.

Në deklaratën e saj u tha gjithashtu se, kur bëhet fjalë për pronën dhe të drejtat e garantuara të Kishës Ortodokse Serbe në Kosovë, nuk po zbatohen as rregulloret e miratuara në Prishtinë.

Manastiri mesjetar i Deçanit në Kosovë u vizitua së fundmi nga pastori Mark Burns, këshilltar joformal i presidentit amerikan, Donald Trump, për çështjet shpirtërore. Në një deklaratë për Radion Evropa e Lirë, ai tha se Departamentit amerikan të Shtetit do t’ia përcillte vërejtjet e tij për gjendjen e Kishës Ortodokse Serbe dhe liritë fetare.

Më vonë, Burns shkroi në platformën sociale X se Departamenti amerikan i Shtetit kishte filluar bisedime diplomatike me Serbinë “për ta mbajtur Kosovën përgjegjëse për trajtimin e keq të të krishterëve, përfshirë edhe besimtarët e Kishës Ortodokse Serbe”.

Çështja e lirive fetare është përfshirë edhe në Marrëveshjen për Normalizimin Ekonomik mes Kosovës dhe Serbisë, të njohur si Marrëveshja e Uashingtonit. Dokumenti u nënshkrua në Shtëpinë e Bardhë në shtator të vitit 2020, gjatë mandatit të parë presidencial të Trumpit.

Ndër të tjera, dokumenti përcakton angazhimin e të dyja palëve për respektimin e lirive fetare. Kjo përfshin rifillimin e dialogut ndërfetar, ruajtjen e objekteve fetare dhe zbatimin e vendimeve gjyqësore që i ofrojnë mbrojtje Kishës Ortodokse Serbe.

Kosova dhe Serbia u pajtuan në vitin 2023 edhe për Aneksin e zbatimit të Marrëveshjes për rrugën drejt normalizimit të marrëdhënieve. Në këtë aneks përmendet formalizimi i statusit të Kishës Ortodokse Serbe dhe thuhet se “Kosova duhet të sigurojë një nivel shtesë të mbrojtjes për objektet dhe trashëgiminë e Kishës Ortodokse Serbe në Kosovë”.

Edhe pse Marrëveshja për rrugën drejt normalizimit të marrëdhënieve nuk është firmosur, Bashkimi Evropian, që ndërmjetëson dialogun Kosovë-Serbi, ka thënë se dokumenti ka fuqi juridikisht detyruese për të dyja palët.

The post Punimet pranë Manastirit të Deçanit nxisin reagimin e Kishës, Komuna i quan mirëmbajtje të rrugës appeared first on Albeu.com.

Manastiri i Shën Katerinës, në rrëzë të malit Sinai të Egjiptit, u themelua në shekullin e 6-të dhe është manastiri më i vjetër i krishterë që përdoret ende për funksionin e tij origjinal, thotë UNESCO, e cila e ka listuar zonën si një vend të Trashëgimisë Botërore.

I nderuar nga të krishterët, myslimanët dhe hebrenjtë, manastiri ndodhet në vendin ku sipas traditës biblike, Moisiu mori ‘Dhjetë Urdhëresat’.

Por javën e kaluar, një vendim gjykate egjiptiane, i parë nga Reuters, urdhëroi murgjit ortodoksë të lironin disa parcela toke që murgjit i kanë përdorur për vite me radhë, duke përfshirë vreshta dhe kopshte ngjitur me kompleksin e manastirit, me arsyetimin se ato ishin sekuestruar në mënyrë të paligjshme, duke shkaktuar një stuhi diplomatike midis Kajros dhe Athinës, lidhur me statusin e vendit.

“Ne ramë dakord që në të ardhmen e afërt të punojmë për mbrojtjen e të drejtave të manastirit, si dhe statusin e tij ligjor”, tha Ministri i Jashtëm Grek, George Gerapetritis, pasi u takua me homologun e tij egjiptian, Badr Abdelatty, në Kajro.

“Si Egjipti ashtu edhe Greqia synojnë të ecin përpara, bazuar në traditën e gjatë dhe statusin tashmë të vendosur të një manastiri emblematik për karakterin e tij ortodoks grek të adhurimit”.

Abdelatty tha se vendimi ruan vlerën e thellë shpirtërore dhe qëndrimin fetar të manastirit, dhe konfirmoi se murgjit do të vazhdojnë të kenë qasje dhe të përdorin manastirin dhe vendet e tij fetare dhe historike, sipas një deklarate të ministrisë së jashtme.

Me një histori të gjatë të marrëdhënieve diplomatike, Greqia dhe Egjipti kanë thelluar bashkëpunimin në vitet e fundit .
Shën Katerina është një kompleks i gjerë dhe sipas traditës u ndërtua rreth një kaçubeje që digjej, ku thuhet se Zoti i foli Moisiut, siç përshkruhet në Librin e Eksodit. Biblioteka e saj është një nga më të gjerat në botë, duke përmbajtur disa nga dorëshkrimet më të hershme të krishtera në botë./ Reuters.

The post Pjesë e UNESCO-s/ Egjipti dhe Greqia bien dakord të mbrojnë statusin e manastirit të Malit Sinai appeared first on Albeu.com.

Përfaqësuesi i Përhershëm i Greqisë, Giorgos Koumoutsakos, u takua dme zv/drejtorin e përgjithshëm të UNESCO-s, Ernesto Ottone, përgjegjës për Çështjet Kulturore, si dhe me zyrtarë të Qendrës së Trashëgimisë Kulturore.

Koumoutsakos ngriti çështjen e shndërrimit të Manastirit të Chorës në xhami dhe cenimit të karakterit të një monumenti të UNESCO-s, i cili është me vlerë të pashoqe kulturore dhe është pjesë e vlefshme e trashëgimisë së njerëzimit.

Sipas informacioneve, ai shprehu shqetësimet e forta greke për efektet e këtij vendimi në lidhje me përkeqësimin dhe ndryshimin e vetë monumentit, si dhe të trashëgimisë kulturore jomateriale, bartës i së cilës ai ka qenë prej shekujsh.

The post Sërish përplasje mes Athinës dhe Ankarasë/ Greqia kërkon ndërhyrjen e UNESCO-s për shndërrimin e Manastirit “Chora” në xhami appeared first on Albeu.com.

Në një komunikatë të përbashkët, shefat e misioneve të Shteteve të Bashkuara, Gjermanisë, Francës, Italisë, Mbretërisë së Bashkuar dhe Bashkimit Evropian kujtuan se vendimi për pronat e manastirit, rreth 90 kilometra në perëndim të Prishtinës, ishte marrë në maj të vitit 2016.

“Pavarësisht këtij vendimi juridik dhe kërkesave pasuese, vendimi i Gjykatës nuk është zbatuar ende shtatë vjet më vonë”, thuhet në komunikatë në të cilën nënvizohet se këto shtete janë të bashkuara në mbështetje të së ardhmes demokratike dhe evropiane të Kosovës.

Duke theksuar siç thuhet mbështetjen për të ardhmen demokratike dhe evropiane të Kosovës, diplomatët thanë se zbatimi i këtij vendimi është i lidhur me rrugën përpara të Kosovës drejt anëtarësimit në institucione euro-atlantike.

“Sundimi i ligjit dhe respektimi i pavarësisë së gjyqësorit janë detyrime për të gjitha qeveritë e zgjedhura në mënyrë demokratike dhe parakushte të domosdoshme për integrimin e Kosovës në institucionet evropiane dhe euroatlantike, duke përfshirë përparimin e mëtejmë në aplikimin e Kosovës për anëtarësim në Këshillin e Evropës. Vonesa e mëtejme është vetëm pengesë për këtë përparim”.

Vendimi i gjykatës Kushtetuese është përfundimtar dhe nuk mund të kthehet prapa ndërsa e detyron komunën e Deçanit që t’i kryej procedurat për njohjen e pronës në emër të Manastirit të Deçanit.

Drejtuesit e komunës së Deçanit, nuk pajtohen me vendimin e Gjykatës Kushtetuese pasiqë sipas tyre pronat përreth manastirit janë të dy ndërmarrjeve publike dhe se gjykata ka fuqizuar një marrëveshje të vitit 1997, kur administrata serbe i kishte kaluar në pronësi të manastirit ato toka.

Në muajin shtator të vitit 2021, Gjykata Kushtetuese e Kosovës tha se e ka njoftuar kryeprokurorin e Shtetit, për moszbatimin e vendimit të saj.

Autoritetet në Kosovë kanë bërë thirrje për zgjidhjen e kësaj çështjeje përmes dialogut e marrëveshjes në mes të udhëheqësve fetar dhe popullatës lokale./VOA

The post “Vendimi për pronat e Manastirit të Deçanit”, Quint: Parakusht për integrimin e Kosovës në institucionet euroatlantike appeared first on Albeu.com.

Një komunikatë të tillë e kanë lëshuar edhe sot, duke shënuar kështu herën e katërt që e bëjnë thirrjen e njëjtë brenda mandatit të Qeverisë Kurti.

Lidhur me këtë kërkesë të përsëritur të QUINT-it ka folur kreu i Komunës së Deçanit, Bashkim Ramosaj. Ramosaj ka thënë se përgjigje për këtë çështje duhet të japë Qeveria e Kosovës.

“Për këtë Qeveria të japë përgjigje. Për qytetarët e Deçanit dhe për mu personalisht është vendim i padrejtë. Është çështje e Qeverisë’’, ka thënë ai për Periskopin./express

The post Kreu i Deçanit: Qeveria t’i japë përgjigje QUINT-it për Manastirin appeared first on Albeu.com.