majmuni kiko Archives - Albeu.com

Kiko shpall analistët dhe psikoanalistët atraksion turistik

E S — Fri, 14 Jul 2023 13:26:35 +0000

Nga Lutfi Dervishi

Dritat e një jahti që llamburinin bregdetit të Sarandës, tërhoqën vëmendjen e majmunit Kiko që priste agun e mëngjesit në Ksamil. Pas ankorimit të jahtit luksoz Kiko u afrua t’i uronte mirëseardhjen mysafirëve të rinj që u prezantuan si biznesmenë amerikanë.

Interesi i tyre për ekonominë shqiptare ishte më i madh se për perlat turistike të jugut.

“Mos u hutoni nga resortet, pallatet dhe kullat punëdhënësit më të mëdhenj në këtë vend nuk janë ato, por televizionet dhe kafenetë. Në televizion punojnë analistët dhe në kafene psikoanalistët”, tha Kiko.

“Nuk e kuptoj këtë!”, – pyeti një biznesmen amerikan që nuk e hiqte puron nga goja.

Kiko nuk nguroi të servirte menjëherë përgjigjen:

“E thjeshtë, këtu ka dhjetëra televizione, mijëra portale dhe miliona llogari në rrjetet sociale. Shqiptarët duan që lajmi të mos jetë i njëjtë kudo sepse bëhet monotoni. Një TV p.sh thotë se X zyrtar ka vjedhur, por tjetri thotë se ka mbrojtur interesin publik. Pra secili televizion jep lajmet e veta në këndvështrimin e vet. Ju këtë e quani “pavarësi editoriale”.

Televizionet nuk janë si ato tek ju ku brenda një nate njeriu mund të shohë filma, programe argëtuese, programe për fëmijë, programe edukative, udhëtimi, teknologji, shkencë, variete, programe historike dhe kulturore, sport, muzikë.

Jo, televizionet këtu ofrojnë “aktualitet” ku mjaftojnë katër karrige dhe 1 kamera.

Programet këtu janë biseda me disa njerëz të moshave, feve, profesioneve të ndryshme, emëruesi i të cilëve është dëshira për të folur për çdo gjë, por sidomos për përralla, për histori, për gjë a gjëza, për fantazi, për fall,.. janë emisione ku parashikohet e shkuara dhe analizohet e ardhmja. Të ftuarit quhen specialistë, ekspertë ose thjesht… analistë”, tha Kiko duke shpërndarë shikimin e tij tek secili nga biznesmenët që ja kishin ngulur sytë mu si viçi që ka ngatërruar derën e stallës.

Po kafenetë pse janë punëdhënës më të mëdhenj në këtë vend? Tek ne një kafene shërbehet nga një banakier, kamarier dhe pastrues”, pyeti një prej mysafirëve amerikanë.

“Mos u nxito i nderuar”, – ndërhyri Kiko. “Ashtu si makina nuk lëviz dot pa karburant, ashtu edhe shqiptari nuk lëviz dot pa kafe.

Në kafe punojnë psikanalistët. Atje te ju psikanalisti është një njeri që paguhet për të dëgjuar hallet e tjetrit ndërsa këtu te ne të gjithë janë hallexhinj dhe psikanalistë. Njerëz që nga mëngjesi deri në mbrëmje zbrazin hallin te njëri-tjetri. Dhe nëse psikanalisti te ju të bën një faturë që të ngrihen qimet e kokës, këtu te ne ky shërbim jepet FALAS.

Këtu jo vetëm që të dëgjojnë hallin, por edhe ta qajnë atë. Nën shembullin e kafeneve vetë i pari i vendit u ka dhënë porosi zyrtarëve: Nëse nuk u zgjidhni hallin njerëzve, të paktën dëgjojani”, tha Kiko.

“Mbase ky vend ka nevojë për investime të huaja për të rritur produktivitetin, dhe për të diversifikuar “krahun e punës”- sugjeroi një prej turistëve.

Kiko rrudhi akoma e më shumë fytyrën dhe pasi mbllaçiti një banane të vogël tha: “Po futesh në një temë tjetër, të gjerë e të gjatë po aq sa jahti juaj. Këtu dikur kanë ndërtuar komunizimin me forcat e veta, sot po rreken të ndërtojnë kapitalizmin me forcat e veta”. /albeu.com

The post Kiko shpall analistët dhe psikoanalistët atraksion turistik appeared first on Albeu.com.

(17) Kiko, lojërat e fatit, janë fati i Shqipërisë!

admin — Wed, 31 Aug 2022 20:52:49 +0000

Majmuni Kiko e priti me shumë qetësi lajmin për rikthimin e basteve në Shqipëri. “Njerëzit kanë nevojë më shumë për një gram fat sesa për një kilogram flori”, tha Kiko duke kruar kokën. Koha e gjatë e qëndrimit në Shqipëri e kishte bindur se fati është motorri që vë në lëvizje fantazinë e shqiptarit. Dhe fatin nuk ka ligj që e ndalon.

Shumë gabim ka bërë qeveria që më 2013 ndaloi bastet dhe lojërat e fatit! Atëherë operacionin e quajti “Fundi i marrëzisë”. Sot gjërat kanë ndryshuar. Eshtë koha që marrëzia të marrë fund. Në çdo vend të Ballkanit të Hapur lejohen bastet. Operacioni i ri duhet quajtur: Open Ballkan- Reopen Baste!

Qeveria nuk u konsultua as me grupet e interesit as me popullin kur i mbylli bastet. Po të ishte konsultuar, ose më saktë të kishte menduar sado pak do të skuqej deri në rrëzë të veshit për marrëzinë e mbylljes së basteve. Mund të bësh çdo betejë dhe kjo qeveri po i kalon mandatet nga njëra betejë në tjetrën, por nuk mund të bësh betejë me fatin – tha Kiko dhe vendosi dy putrat mbi krye!

A nuk janë shqiptarët që thonë: Ky paska qenë fati im! Kështu paska qenë e shkruar…! Çfarë fati paske patur? A nuk urojnë shqiptarët paç fatin e ….?

Po t’i heqësh fatin shqiptarit e bën fatalist. Nuk thonë kot që fati i madh nuk ka nevojë për shpjegime. Fati pranohet nuk gjykohet! Por çfarë ndodhi? U arrit deri aty sa u kërkua shpjegime për fatin. Kulmi! Dhjetëra prokurorë dhe gjyqtarë në mënyrë kriminale u morën në pyetje vetëm pse kishinfat. Njëri thoshte kam fituar 100 mijë dollarë në kazino, tjetri 150 mijë dhe prap i hoqën nga puna. Të paktën gjysma e gjyqtarëve dhe prokurorëve të pavetuar nuk do të ndëshkohen më se kanë patur fat dikur dhe kanë fituar në bixhoz.

Fati i madh nuk do shpjegime – përsëriti Kiko, ndryshe si do të shpjegohet që disa njerëz krejt të rëndomtë dhe pa asnjë cilësi janë ministra dhe drejtorë të rëndësishëm? Eshtë çështje fati! Si shpjegohet që disa njerëz që duhet të ishin diku tjetër janë bërë deputetë? Eshtë çështje fati dhe pikë. Si shpjegohet që disa njerëz të rëndomtë janë bërë investitorë strategjik dhe oligarkë?

Eshtë çështje fati dhe dy pika. Si shpjegohet që qeveritarët këtu janë më të pasur se biznesmenët? Eshtë thjesht fat dhe këtu vendosim tre pika…
Po pse pak njerëz të zot ka ky vend? Ka plot, njerëz të zot, të mençur, të plotësuar që i kanë të gjitha, por thjesht i mungon pak fat. Fat që për 9 vite qeveria u mundua ta bllokonte me ligj.

Në vrullin e pritjeve entuziaste të sportisteve kampionë si Luiza Gegës që tek e fundit vraponte dhe nuk është se bëri ndonjë shpike, apo të atij boksierit që mori grushta më shumë se sa dha, pse të mos mikpresim shqiptarët kampione europe në baste dhe lojëra fati? U bëjmë pritje madhëshore, i bëjmë kolonelë nderi, qytetarë nderi dhe i shpallim edhe krenari kombëtare.

Në këto kohë krize vendi nuk ka nevojë për llafe e mend, por ka nevojë për para. Pikë. Para ka plot, por po bllokohet nga të gjitha anët. BE thotë mos shisni pasaporta të arta. BE thotë mos bëni amnisti fiskale. Po BE thotë luftoni paratë e krimit.Paraja nuk ka atdhe. Paraja nuk ka ngjyrë! Paraja nuk mban erë- thonin romakët. Por burokratët në BE e kanë harruar.

Me lojërat e fati dhe kazinotë paraja do të respektohet si kurrë më parë. Supozojmë se një njeri ka para të madhe në dorë, por pengohet të investojë. Atëherë që nesër ai thërret në ndihmë fatin dhe fiton në kumar. Kazinoja ka nevojë të “humbë” para, lojtarët kampionë kanë nevojë të fitojnë para. Ja ku jemi në një situatë ku fitojnë të gjithë.

Majde Kiko propozoi që bixhozi të futet në tekstet mësimore që të garantohet e ardhmja e vendit.
Për gjithë ata që bëjnë moral për çështjen e fatit Kiko u kujton një fragment të poezisë së famshme të Kiplingut. “Nëse…”

“Në mundsh fitoret që ke korrur t’i flijosh
si në kumar, në një të vetme lojë,
të rrezikosh, të humbasësh e prapë t’ia fillosh,
dhe humbjen kurrë të mos e zesh në gojë…

Këto vargje duhen futur në provimet e maturës dhe duhen shkruar në malin e Shpiragut ta shohin të gjithë shqiptarët se çfarë është kumari apo bixhozi siç i thonë me përçmim disa njerëz që nuk e kuptojnë vlerën e parasë në kohë krize.

Megjithatë nga zhvillimet e ditës Kikos i mbeti një pyetje pa përgjigje: këta duan të kthejnë bastet për të ndihmuar sportin apo duan t’i kthejnë bastet në sport kombëtar?

The post (17) Kiko, lojërat e fatit, janë fati i Shqipërisë! appeared first on Albeu.com.

(4) Majmuni Abu i përgjigjet Majmunit Kiko

admin — Tue, 19 Jul 2022 15:37:59 +0000

Nga Lutfi Dervishi

Republikë Bananesh apo Republike Majmunësh?!

Letër e hapur drejtuar opinionit publik

Thellësisht i prekur nga mesazhet e shumta të solidaritetit në këto ditë të vështira për mua,i habitur dhe i indinjuar nga akuza që më erdhi nga majmuni Kiko, një gangster i njohur për sjellje të pa denjë në shoqëri, një majmun që në kulmin e sezonit turistik kërkon të njollosë imazhin e vendit duke rrahur policët dhe zbuar turistët e huaj, po ju shkruaj me lot në sy dhe me putrën që më dridhet duke shpresuar që organet e drejtësisë do të bëjnë punën e tyre.

Nuk ju drejtova SPAK-ut siç bëri majmuni Kiko, sepse jam i mendimit që prokurorët nuk duhet të punojnë nën presion.

Unë jam që secili institucion të bëj punën e tij. Nëse secili merret me punët e veta jetëgjatësia te shqiptarët do t’i kalojë 100 vite!

Unë jetën time e kam publike. Asnjëherë nuk jam fshehur. Jam influencer që me daljet e mia televizive dhe në instagram e tik tok nxjerr bananen e përditshme me djersën e ballit. Në sajë të ndikimit të imazhit tim konsumi bananes në Shqipëri ka kaluar mesataren e konsumit të çdo vendi të BE-se. Të paktën në këtë pikë Shqiperia renditet më dinjitet në familjen e vendeve të Unionit. Për këtë arsye hedh poshtë me neveri akuzën se unë synoj ta kthej Shqipërinë në Republikë Bananesh.

Unë kam fakte dhe do t’i provoj botërisht se është majmuni Kiko qe me majmunllëqet e tij e ka kthyer Shqipërinë në Republikë Majmunësh.

Me aktivitetin e tij dhe me modelin që ka krijuar ai majmunllëqet i ka ngritur në sistem dhe është kthyer në model për shoqërinë shqiptare.

Fakte:

1.Nëse një njeri hap biznesin e kafesë- të nxitur nga majmunllëku- 10 mijë të tjerë hapin po kafene. Kjo e ka kthyer Shqipërinë në një vend ky gjysma e popullsisë shet kafe dhe gjysma tjetër pi kafe. Shqipëria referuar EuroStat ka numrin më të madhe të bareve në Europë. Kjo është drejtpërdrejt e lidhur me ndikimin e majmunit Kiko.

Edhe në fushën e medias ku unë akuzohem se ushtroj ndikim, vijojnë majmunllëqet! Nëse një njeri hap një portal lajmesh, 800 të tjerë e imitojnë si majmun dhe hapin 800 portale me lajme, në një vend që ka apo nuk ka 10 lajme në ditë!
Nëse dikush ka sukses në farmacinë që ka hapur, dhjetera e qindra pas tij nuk do të vrasin mendjen për diçka, por si majmunë do të hapin farmaci duke e kthyer Shqipërinë në vendin që ka më shumë farmaci se ushqimore.
Nëse një oligark i nderuar apo investitor strategjik nis dhe bën një fshat turistik, dhjetëra të tjerë e imitojnë si majmun të parin dhe ndërtojnë vargan fshatra turistikë në bregdet.
Nëse një biznesmen i nderuar pastron paratë duke ndërtuar një pallat apo një kullë, dhjetëra të tjerë ngrihen dhe imitojnë si majmun sipërmarrësin e nderuar.
Nëse një zyrtar i qeverisë ka idenë gjeniale që një rrugë duhet ndarë në shumë lote që të mos marrin pjesë kompani të huaja në tender, edhe zyrtarët e tjere, nuk vrasin mendjen për ide novatore, por bëjnë të njëjtën gjë për gjithë rrugët publike!
Nëse një kriminel me precedent penal arrin të bëhet deputet i nderuar apo kryetar bashkie, dhjetëra të tjerë pas tij imitojnë suksesin e të parit dhe bëhen deputet apo kryetar bashkie.
Ishte një ide gjeniale për të mbledhur lekë pa u lodhur duke vendosur traun në rrugen e Kombit. Në vend që zyrtarët të vrasin mendjen për ide kreative se si të mbledhin lekë, majmunojnë duke imituar propozimin e pare: të vendosim tra në çdo rrugë.
A e keni vënë re i nderuar publik se “majmunllëqet e Kikos” kanë depërtuar deri lart, lart fare, atje në qeveri?! A e keni venë re se si ministrat dhe deputët imitojnë të madhin fare?! E imitojnë në gjeste, në shprehje, në mimikë, në të folur, në të ecur.
Majmuni Kiko me majmunlleqet e tij ka vrarë më shumë se shpresën në këtë vend, ka vrarë kreativitetin!

Të nderuar,

Unë hedh poshtë me neveri shpifjet se paskam tentuar të ngre këtu Republikën e Bananeve.

Eshtë në dorën tuaj të gjykoni (shpresoj bazuar në fakte dhe prova) nëse Shqipëria, atdheu ynë i dashur, po bëhet Republikë Bananesh apo Republikë Majmunësh?!

Përunjësisht

Majmuni Abu

Porti i Durresit, pranë Ures Dajlanit

Majmuni Ab

The post (4) Majmuni Abu i përgjigjet Majmunit Kiko appeared first on Albeu.com.