Në një lëvizje që kapi në befasi Fuqitë e Mëdha,  Kombet e Bashkaura, BE-në, NATO-n dhe G20, Shqipëria arriti të ndalojë luftën mes Izraelit dhe Hamasit.

Konflikti 70 vjeçar dhe lufta e përgjakshme mes Izraelit dhe Hamasit që rinisi më 7 tetor të këtij viti, do të mbeten kujtim i një të shkuare të hidhur.

Armëpushimi katër ditor është vetëm preludi i fundit të konfliktit të përgjakshëm.

Kryeministri i Shqipërisë, dje, në dy takime të veçanta, një me ambasdorët e Ligës Arabe dhe tjetrin me ambasadoren e Izraelit parashtroi vizionin e tij për të ardhmen: “Një Gaza pa Hamasin dhe Izraelin”

5 fjalë më të fuqishme se fuqia çdo lutje fetare që njeh rruzulli- janë magjia që ktheu luftën në paqe dhe konfliktin e përgjakshëm në bashkëjetesë paqësore.

Dega e ullirit e ofruar nga Kryeministri shqiptar- është pranuar nga të dy palët dhe Tirana nga një kryeqytet i Sportit dhe Rinisë, befas kthehet në Qendrën Universale të Paqes!

Ndërkohë që Komiteti i çmimit Nobel për paqen dhe revista Time Magazine ndihen të lehtësuar sepse e kanë që sot njeriun e vitit 2024, Uashingtoni, Brukseli, Pekini dhe Moska ndihen të lehtësuar,  por edhe të frustuar nga ky sukses diplomatik i nivelit Kisinger.

“Jemi të lehtësuar dhe të shokuar”- tha një zëdhënës i NATOs për suksesin e befasishëm të kryeministrit shqiptar.

“Kam bërë gabim që kam shkuar në Gaza dhe që kam thirrur disa herë Këshillin e Sigurimit për të ndalur luftën. Duhet të kisha shkuar në Tiranë dhe t’i lutesha kryeministrit Rama”- tha sekretari i Përgjithshëm i OKB-së Antonio Guterres.

Shqipëria e armatosur vetëm me sharmin e Kryeministrit arriti të bëj atë që nuk e ka bërë deri më sot as Presidenti i shtetit më të fuqishëm të Globit dhe as Papa i Romës: paqe në Lindjen e Mesme.

Ndonëse lajmi është pritur me hare si në botën arabe ashtu edhe në Perëndim, nuk mungojnë as teoritë konspirative. Në rrjetet sociale, po shkruhet se Kryeministri i Shqipërisë posedon aftësi magjike me të cilat i kthen armiqtë e betuar në miq për kokë dhe anasjelltas.

Për të mbështetur teorinë e tyre, konspiracionistët thonë se dy njerëz miq për kokë në Shqipëri (Sali Berishën dhe Lulzim Bashën) i ka kthyer në armiq të betuar…

Por mbështetësit e Kryeministrit Rama e hedhin poshtë këtë konstatim pasi, theksojnë ata, Kryeministri, siç e bëri të qartë edhe në Forumin e Paqes në Paris, është shumë i zënë me çështje rajonale si konflikti gjysëm i ngrirë Kosovë- Serbi, luftën në Ukrainë, varfërinë në Jemen dhe ngrohjen globale.

I pyetur për mundësinë e ringjalljes së shpejtë të  konfliktit në Ballkan, një zëdhënës i qeverisë shqiptare tha: “E pamundur. Nuk ka asnjë shans. Axhenda e Kryeministrit është e zënë me probleme në rajone të tjera të globit”.

The post Kryeministri shqiptar, magjistar i paqes appeared first on Albeu.com.

Kur bie shi dhe kur ka një vizitë të një shtetari të huaj Tirana kthehet në një parkim. Asgjë nuk lëviz. Edhe milingona më ambicioze ngec. Simfonia e borive, shoferëve të bezdisur dhe ulërimave të policëve të trafikut i japin qytetit pamjen e një pavioni.

Absolutisht që siguria kur ke vizita të nivelit të lartë merr prioritet, por jo duke bllokuar një qytet të tërë. Zgjidhja më e thjeshtë shihet te bllokimi i rrugëve. Mbyllen shkollat. Mbyllen bankat, mbyllen bizneset.

Imagjino të paralizohet Parisi apo Roma se shkon për vizitë kryeministri i Shqipërisë. Kulla Eifel? Mbyllur për arsye sigurie. Koloseu – shiheni një herë tjetër se kemi vizitë shtetërore në Romë.

Me stilin tonë të menaxhimit të Vizita e të nivelit të lartë, Brukseli ku ka çdo ditë samite të BE -se e Nato-s do të futej ne kolaps total. Me kaq vizita të nivelit të lartë Izraeli nuk do të kishte telashe këto ditë me raketat e Hamasi, por me trafikun në Tel Aviv..

A ka zgjidhje?

Po sikur të investohej aty ku po investohet ditë e nate… në aeoport dhe ta kthenim Rinasin në një vend madhështor eventesh?  Aty pret e përcjell dhe nuk bllokon një qytet të tërë.

Një sallë e madhe, një kinema ku shfaqen arritjet e Shqipërisë, qilima të kuq që nga avioni e deri në sallën e pritjeve, fishek – zjarrë dhe valltarë, një spektakël i vërtetë.

Shqipëri kështu kthehet në një one-stop shop gjigand dhe model për gjithë botën. Kështu ulim ndotjen në atmosferë dhe kontribuojmë konkretisht edhe në luftën ndaj ngrohjes globale.

Aeroporti kthehet në një vitrinë fantastike për vendin dhe ne të tjerët këtej vazhdojmë me rutinën e përditshme duke shkuar në punë, në shkollë, ose thjesht duke shëtitur në pyjet orbitalë.

Me një investim modest me një ofertë të pa kërkuar mundet që Shqipëria të shtojë në listën e atraksioneve krahas plazheve magjikë të jugut dhe alpeve të veriut edhe aeroportin “one stop shop”.

Kështu edhe jeta e qindra mijëra njerëzve nuk kthehet në një sfond për vizitat zyrtare dhe të gjithë dalim të fituar. Si ne, si mysafirët e nderuar fitojmë atë që mendojmë se e kemi me okë..- kohën.

Zgjidhjen e kemi në dorë- ose të vijojmë jetën me trafikun e përditshëm ose të kthejmë Tiranën e dashur në një parkim gjigand.

The post Kur qyteti kthehet në parkim appeared first on Albeu.com.

Nëse do t’i besojmë policisë shqiptare, Behar Bajri, person në kërkim për vrasje dhe tentativë vrasje, një nga personazhet kyç të operacionit “Metamorfoza” është mbajtur nën vëzhgim për dy javë në Paris nga policia shqiptare dhe arrestimi i tij është bërë si pasojë e një “operacioni të përbashkët me francezët.

Po t’i referohesh ministrit të Brendshëm, suksesi i takon oficerëve të përfshirë që meritojnë përgëzime “për profesionalizmin e lartë dhe mbi të gjitha për sigurinë e plotë të informacionit sensitiv deri në finalizimin e operacionit. “Vetëm përpara”

Në këtë vend mund të ketë munguar guximi për t’u përballur me krimin dhe të vërtetën, por asnjëherë guximi për të gënjyer nuk ka arritur majat e komunikatave të policisë. Dhe nuk është hera e parë. Dhe nuk bëhet fjalë për gënjeshtra nga halli!

Nëse i referohesh njoftimeve këtu Bajri është kapur në lokal. Francezët thonë e kanë kapur në banesë. Sipas “policisë” këtu është kapur në Paris. Sipas policisë franceze është kapur në Strasburg. Sipas ministrti shqiptar Bajri është kapur nga “operacioni i përbashkët” ku kanë dhënë kontribut edhe oficerët tanë, sipas francezëve është kapur nga “brigada e personave në kërkim” të Strasburgut.

Madje francezët në njoftimin e tyre japin edhe mbiemrin që përdor tani i kërkuari: Brajoviç.

Policia jonë e kishte Bajrin këtu, nuk e gjeti dot. U iku. Por e paskan vëzhguar dhe lokalizuar në Francë! Dhe e arrestuan edhe falë “inteligjencës policore”.

Ministri është i ri në detyrë dhe duhet t’i thotë dikush (nëse ka mbetur ndonjë që nuk gënjen aty) se policia jonë nuk mund të bëjë operacion jashtë Shqipërisë, aq më tepër në një vend të BE-së, aq më tepër në Francë.

Operacionet e përbashkëta bëhen vetëm me miratimin e prokurorëve përkatës të dy vendeve.

Me këtë gënjeshtër të nxitur sa nga tradita aq edhe nga vrulli për të postuar “lajme pozitive” në facebook, mund të marrin në qafë policët shqiptare (që pretendojnë se kanë marrë pjesë në operacion). Prokurori francez ka të drejtë të kërkojë identitetin e tyre dhe t’i arrestojë për shkelje të sovranitetit juridik.

Nëse ky do të ishte një rast i vetëm mund të ‘justifikohej” me zellin e policisë për t’i dhënë lajme të mira ministrit të ri.

Për fat të keq, gënjeshtra në komunikimin e policisë me publikun është bërë ves. Dhe nuk po ndalem këtu te gënjeshtra që lidhen me krime të kryera nga policia në Shqipëri, por me disa raste ku implikojnë partnerët dhe përdorin edhe togëfjalëshin “inteligjencë policore”

Pesë ditë pas 1 Prillit të këtij viti policia në rastin e ndalimit të Elio Bitirit tha se është “operacion i përbashkët” madje guxoi t’i vinte emrin e qytetit ku u ndalua Leiden. E vërteta është se Bitri u arrestua nga polica hollandeze gjatë një kontrolli rutinë të policisë rrugore.

Vjet në qershor, në rastin e ndalimit të Kasandër Nogës në Vienë, – person i kërkuar nga Belgjika u tha operacion shqiptaro-belgo-austriak dhe që Nogën e arrestuan belgët. Në fakt Noga u arrestua nga policia austriake, pas njoftimit të marrë nga policia belge.

Pyetja është çfarë fitojnë me këto gënjeshtra të trasha? Nëse mendojnë se fitojnë besimin virtual të torallakëve -patronazhist- militant dhe turli idiotësh në facebook që shkruajnë “mbrekulli, bravo, etj etj” janë në rregull. Por i kanë vënë vetes një pikëpyetje të madhe para partnerëve ndërkombëtarë. Për këta të fundit është e pa imagjinueshme të shesësh si të vërteta gjëra që nuk kanë ndodhur në realitet.

Nëse në dikastere të tjera ka fituar qytetarinë propaganda, inspektimet, gënjeshtat e vogla, tek Rendi nuk mund të gënjesh kaq trashë. Eshtë fyese.

Dhe pa ndëshkuar gënjeshtarët nuk do të ndreqet as imazhi i policisë dhe aq më pak puna e saj.

Kur gënjejnë edhe kur nuk kanë hall, imagjino ç’bëjnë kur i zë halli. Në fakt e kanë treguar.

The post Gënjejnë edhe kur nuk kanë hall…. appeared first on Albeu.com.

Policia shqiptare arriti sot të neutralizojë një linjë të kontrabandës përmes aksionit të koduar  “fake work”.

Në koordinim me partnerët ndërkombëtarë, duke përdorur metodat speciale të hetimit dhe shërbimet inteligjente, agjentët e policisë arritën sot të vënë në pranga dy shtetas dhe të shpallin në kërkim tre të tjerë për kontrabandën e rrobave të përdorura nga Belgjika në Shqipëri.

Në cilësinë e provës materiale u sekuestruan 5455 kilogram e 374.2 gram rroba të përdorura. Dosja e cila përmban 34 orë përgjime iu përcoll prokurorisë për hetime të mëtejshme.

“Ky është një mesazh i qartë dhe i prerë që i dërgohet krimit të organizuar, tha një oficer i policie në kushtet e anonimatit për shkak të rrezikshmërisë së lartë që paraqet hetimi i kësaj çështje.

Nëse trafikantët do të mundnin të hidhnin në treg mallin e tyre, arkës së shtetit do t’i mungonin plot 14 mijë e dy qind lekë dhe duke patur parasysh forcimin e pandalshëm të lekut ndaj euros, dollarit e gjithë valutave të huaja të marra së bashku, dëmi është jashtëzakonisht i lartë- tha prokurori i gatshëm që kreu veprimet e para proceduriale

Aksioni i sotëm, shihet nga vëzhguesit vendorë, si një përpjekje e policisë për t’i treguar ministrit të ri, që pavarësisht temperaturave të larta, gadishmëria e strukturave të rendit mbetet në shkallën maksimale.

Lajmi gjeti pasqyrim të gjerë në shtypin e ditës. Mediat i vunë rëndësi faktit se policia ndihet më e motivuar pas motos së shpallur: “zero tolerancë ndaj paligjshmërisë”

Pyetja e  një gazetari se nëse bëhet fjalë për rroba të thara, të lagura, të lara apo të palara, nuk mori përgjigje për shkak të “sekretit hetimor”.

“Jemi në fazën e avancuar të hetimeve, por ende presim të dhënat e mostrave nga një laborator i një vendi partner”- bëri të ditur një zëdhënës i policisë.

Ai shtoi se celularët e trafikantëve të  rrobave të përdorura janë dërguar për t’u zbërthyer në një laborator të specializuar në Izrael.

Pas suksesit të arritur në luftën ndaj trafikut ndërkombëtar të drogërave të forta, ndërtimeve të paligjshme, kanabizimit,  krimit të organizuar dhe krimit të rrugës, ishte e natyrshme që do t’i vinte radha edhe tregtisë së rrobave të vjetra- tha një ekspert i sigurisë në një studio televizive të një prej 15 televizioneve që japin lajme 24 orë.

“Pritet, vijoi eksperti, që goditjet e policisë të intensifikohen, veçanërisht në krimin e dhënies se rryshfetit ndonjë infermieri apo mjeku. Po ashtu do të shtohen gjobat ndaj këmbësorëve që nuk ecin në vijat e bardha, duke u bërë shkak që shoferët që përdorin “të bardhën” të shkaktojnë aksidente me pasoja të rënda.

Pas suksesit të njohur të operacionit “Forca e ligjit”, operacioni i sotëm “fake ëork” ka rritur ndjeshëm besimin e publikut te policia, besim që ishte lëkundur pas një episodi të shkëputur në Fushë Krujë, ku familjar të një deputeti, goditën dy qytetarë për shkakun e vetëm se “kishin shqetësuar policinë me një denoncim”.

“Me operacionin e sotëm, policia që duam po dëshmon me vepra dhe jo me fjalë, me aksione konkrete dhe jo me propagandë se është ngjitur në nivelin e simotrave të saj europiane dhe më gjerë dhe Shqipëria është një hap tjetër më pranë integrimit europian”- tha një deputet i shumicës në mbledhjen e komisionit të sigurisë në Kuvend, të thirrur posaçërisht për këtë çështje.

Nga ana e vet policia siguroi se operacione të tilla, do të vijojnë dhe do të intensifikohen.

The post Policia ç’monton kontrabandën e …rraqeve! appeared first on Albeu.com.

Për rritjen e tensioneve në Veri të Kosovës, Komisioni Europian mori sot masa ndëshkuese ndaj Kosovës., duke pezulluar fondet, takimet e nivelit të lartë….

Kjo vjen për shkak se:

Shqiptarët në Kosovë dhunuan trupat e KFOR-it duke kaluar vijën e kuqe.

Trupat speciale të Kosovës rrëmbyen tre policë në Serbi duke kaluar vijën e kuqe për herë të dytë brenda një jave.

Kosova ka destabilizuar Serbinë duke ndikuar mbi minoritetin shqiptar në Serbi.

Kosova ka nxitur minoritetin shqiptar në Serbi për të bojkotuar institucionet dhe zgjedhjet.

Kosova kërkon me forcë asosacionin e komunave shqiptare, për të përsëritur historinë e gozhdës së Nastradinit në Ballkan.

Kosova me ambiciet e veta territoriale, po nxit forcat recesioniste në Bosnjë.

Kosova nuk e njeh Serbinë dhe Kryeministri i Kosovës nuk nënshkruan marrëveshjet e imponuara nga ndërmjetësit e BE dhe SHBA-së. Rasti më i fundit, Marrëveshja e Ohrit.

Kosova nuk heq dorë nga lobimi për ç’njohjen e Serbisë.

Kosova bllokon anëtarësimin e Serbisë në institucione ndërkombëtare

Kosova mban lidhje të ngushta me Moskën nuk dënon agresionin rus në Ukrainë dhe luan me katër porta sa i përket të ardhmes së vet.

Kosova ende nuk ka mbyllur zyrën që Vagner ka hapur në Prishtinë për të rekrutuar mercenarë për të luftuar kundër Ukrainës.

Ndërkohë Serbia një demokraci vibrante, me një qeveri e cila udhëhiqet nga një njeri që ka vuajtur në burgjet e Millosheviqit, dhe ka një axhendë të qartë antikorrupsion po luan rol konstruktiv dhe po vuan padrejtësisht veprimet destabilizuese të Kosovës.

The post Arsyet pse sot KE ndëshkoi Kosovën appeared first on Albeu.com.