Barcelona po përgatit një përforcim në qendër të sulmit për merkaton e kësaj vere, ndërsa drejtuesit katalanas kanë hartuar një listë me shtatë emra.

Klubi po kërkon një sulmues që do ta plotësonte skuadrën e Hansi Flickut pas largimeve të Robert Leëandoëskit dhe Ferran Torresit. Kjo listë është bërë aktive pasi Atletico Madridi refuzoi të hapte negociatat për Julian Alvarez.

Një nga kandidatët është Lautaro Martinez, kapiteni sulmues i Interit dhe pjesë e rëndësishme e projektit të Cristian Chivut. Megjithatë, mundësia që ai të largohet nga Italia vlerësohet thuajse e pamundur.

Emri tjetër në vëmendjen e Barcelonës është Viktor Gyokeres. Sulmuesi i Arsenalit u transferua te klubi londinez verën e kaluar dhe së fundmi festoi fitimin e Ligës Premier.

Si një prej alternativave kryesore për repartin ofensiv po konsiderohet edhe Luis Suarez. Për sulmuesin kolumbian të Sporting Lisbonës, klubi portugez kërkon një shumë prej 80 milionë eurosh.

Drejtuesit katalanas po vlerësojnë njëkohësisht edhe mundësinë e transferimit të Gabriel Jesus nga Arsenali ose Nicolas Jackson nga Chelsea. Të dy klubet angleze janë të gatshme t’i lënë lojtarët të largohen përpara përfundimit të afatit kalimtar të verës.

Për një rol alternativ në skemën e Flickut, Barcelona vazhdon të ndjekë edhe Georges Mikautadzen, sulmuesin që aktivizohet te Villarreali.

Emri i shtatë në listën e klubit është Nicolo Tresoldi, sulmuesi gjerman i Club Brugge.

Shkathtësia e Tresoldit do t’i jepte stafit teknik një zgjidhje më të përballueshme financiarisht për ta kompletuar skuadrën e Hansi Flickut para 1 shtatorit.

The post Barcelona shqyrton shtatë alternativa për përforcimin e sulmit, nga Lautaro te Gyokeres appeared first on Albeu.com.

Mundësia që Luis Suarez të transferohet te Barcelona është zbehur, të paktën përkohësisht, pasi klubi katalanas e vlerëson tepër të lartë klauzolën e largimit prej 80 milionë eurosh.

Gazetari Fabrizio Romano raporton se Barcelona nuk është e gatshme ta paguajë këtë shumë për të marrë shërbimet e sulmuesit kolumbian.

Ndërkohë, Sporting nuk synon të bëjë ulje nga çmimi i përcaktuar për lojtarin.

Klubi portugez pret që Suarez të qëndrojë në skuadër dhe ta vijojë aventurën e tij në Lisbonë, çka e vështirëson ndjeshëm realizimin e një kalimi te Barcelona.

Në këtë fazë, mospërputhja financiare ndërmjet dy klubeve përbën pengesën kryesore.

Tashmë, Barcelona duhet të zgjedhë mes ndryshimit të strategjisë për të gjetur një marrëveshje dhe tërheqjes përfundimtare nga gara për sulmuesin.

The post Barcelona stepet për Luis Suarezin, klauzola prej 80 milionë eurosh pengon transferimin appeared first on Albeu.com.

Hansi Flick ka pranuar që Barcelona të shqyrtojë transferimin e një tjetër sulmuesi, pasi afrimi i Julian Alvarez nga Atletico Madridi gjatë kësaj vere është hasur me vështirësi.

Tekniku i katalanasve e kishte përcaktuar sulmuesin e Atletico Madridit si objektivin kryesor dhe këmbëngulte për nënshkrimin e tij. Megjithatë, pengesat e vendosura nga Los Rojiblancos për realizimin e një marrëveshjeje të mundshme duket se e kanë shtyrë Flick të zbusë qëndrimin.

Gazetari Gerard Romero raporton se trajneri i Barcelonës i ka dhënë klubit dritën jeshile për të tentuar transferimin e sulmuesit të Sportingut Lisbonës, Luis Suarez.

Kolumbiani shihet si një alternativë e mundshme, ndonëse bisedimet me klubin portugez pritet të mos jenë të lehta.

Gjatë sezonit 2025/26, 28-vjeçari regjistroi shifra të spikatura, me 38 gola të realizuar dhe nëntë asistime në të gjitha garat.

Sipas faqes së specializuar Transfermarkt, kartoni i Suarez vlerësohet në 30 milionë euro. Sidoqoftë, nëse vendos ta shesë, Sporting Lisbona nuk pritet ta lejojë të largohet për një shumë më të ulët se klauzola prej 80 milionë euro.

The post Flick jep miratimin për alternativën e Julian Alvarez appeared first on Albeu.com.

Mundësia e rikthimit të Luis Suarezit në kombëtaren e Uruguait është lënë e hapur nga Diego Forlan. Sulmuesi legjendar nuk ka luajtur për përfaqësuesen që prej Copa America 2024.

Paraqitja e fundit e 39-vjeçarit me fanellën e Uruguait ishte pikërisht në turneun e vitit 2024, të cilin skuadra e mbylli në vendin e tretë.

Me 69 realizime, Suarezi kryeson renditjen historike të golashënuesve të kombëtares uruguaiane. Pas tij ndodhen Edinson Cavani me 58 gola dhe Diego Forlan me 36.

Suarezi dhe Forlan kanë qenë bashkë në fushë gjatë një prej etapave më të lavdishme të futbollit të Uruguait. Ata ndihmuan kombëtaren të renditej e katërta në Kupën e Botës 2010, ndërsa një vit më pas triumfuan në Copa American 2011.

Forlan u shpall gjithashtu fitues i Topit të Artë në Botërorin 2010. Ai realizoi pesë gola dhe u rendit mes golashënuesve më të mirë të atij kompeticioni.

Pas fushatës zhgënjyese të Uruguait në Kupën e Botës nën drejtimin e Marcelo Bielsa, Forlan ka marrë përkohësisht postin e trajnerit. Ai ka bërë të qartë se nuk e përjashton mundësinë që Suarezi të bëhet sërish pjesë e skuadrës.

“Kam shumë besim tek Luis dhe një respekt të jashtëzakonshëm për të”, u shpreh Forlan.

“Përse jo, nëse mund të përzgjidhet dhe kemi mundësinë të afrojmë një futbollist si ai, që shënon, zotëron përvojë dhe e dëshmon këtë nga java në javë?”.

“Këtë do ta vlerësojmë më vonë. Askush nuk mund ta vërë në diskutim atë që përfaqëson Luis”, përfundoi ai.

Forlan do ta zhvillojë ndeshjen e tij të parë si drejtues i Uruguait kundër Japonisë më 24 shtator. Gjatë grumbullimit të shtator-tetorit, uruguaianët do të luajnë edhe përballë Koresë së Jugut.

Në anën tjetër, Suarezi vijon paraqitjet e shkëlqyera në MLS, ku këtë vit numëron 10 gola në 14 ndeshje. Sulmuesi ka deklaruar më herët se është i gatshëm të kthehet në Kombëtare për sfidat e ardhshme.

The post Luis Suarez mund të rikthehet te Uruguai pas më shumë se dy vitesh appeared first on Albeu.com.

Inter Miami po shqyrton mundësinë për të transferuar Neymarin në janar të vitit 2027, një lëvizje që do të mundësonte rikthimin e tij pranë Lionel Messit dhe Luis Suarezit, ish-bashkëlojtarët e tij te Barcelona.

Interesimi i klubit amerikan për yllin brazilian u bë publik fillimisht nga ish-futbollisti Felipe Melo, i cili foli për këtë mundësi përmes kanalit të tij.

Nëse transferimi do të konkretizohej, Neymari do të largohej nga Brazili pas përfundimit të periudhës së tij te Santosi. Pikërisht me këtë klub ai e nisi karrierën dhe riktheu në përdorim fanellën legjendare me numrin 10.

Një kalim te Inter Miami do ta ribashkonte brazilianin me Messin dhe Suarezin, me të cilët formoi në Barcelonë treshen e famshme sulmuese “MSN”. Të tre lojtarët fituan trofe të rëndësishëm dhe lanë gjurmë në një nga periudhat më të suksesshme të historisë së klubit katalanas.

Klubi nga Florida ka ndjekur prej kohësh një politikë të bazuar në afrimin e futbollistëve me famë botërore. Për këtë arsye, transferimi i Neymarit do të përputhej me planin ambicioz të Inter Miamit për ta shndërruar MLS-në në një destinacion të rëndësishëm për legjendat e futbollit.

Megjithatë, deri tani nuk ka një marrëveshje zyrtare. Bëhet fjalë vetëm për një mundësi të raportuar, ndërsa transferimi i Neymarit te Inter Miami mbetet ende i pakonfirmuar.

The post Neymari mund t’i bashkohet Inter Miamit në vitin 2027, ribashkim i mundshëm me Messin dhe Suarezin appeared first on Albeu.com.

Luis Suarez udhëhoqi Inter Miamin drejt fitores 3-2 në shtëpi ndaj Chicago Fire, në takimin hapës të sezonit të ri të Major League Soccer.

Rikthimi i MLS-së pas Kupës së Botës solli që në xhiron e parë një duel mes dy prej golashënuesve më të mirë. Inter Miami i Luis Suarezit (39 vjeç) priti Chicago Fire, skuadër me të cilën Robert Lewandowski (37 vjeç) zhvilloi ndeshjen e tij debutuese.

Megjithatë, sulmuesi uruguaian ia prishi debutimin në Amerikë Lewandowskit. Në paraqitjen e 100-të me Inter Miamin, Suarez realizoi dy golat e parë të vendasve dhe arriti kuotën e 50 golave për klubin.

Suarez barazoi rezultatin në 1-1 nga pika e penalltisë në minutën e 27-të. Më pas, në minutën e 51-të, ai shënoi një gol të bukur për ta kaluar Inter Miamin në epërsi 2-1.

Në minutën e 63-të, pas golit të tij të dytë, uruguaiani mori një goditje me shqelm në fytyrë. Kapiteni i Chicago Fire, Jack Elliott, fillimisht i largoi topin gjatë duelit dhe më pas e goditi Suarezin në fytyrë.

Për këtë ndërhyrje, Elliott u ndëshkua me karton të verdhë, ndërsa Suarez mbeti për pak çaste në fushë, duke shfaqur qartë dhimbjen nga goditja.

Sulmuesi u rikuperua shpejt dhe e vazhdoi lojën deri në përfundim të ndeshjes. Pas takimit, ai u përshëndet me Lewandowskin dhe të dy shkëmbyen fanellat.

The post Suarez hap sezonin e MLS-së me dy gola, ia zbeh debutimin Lewandowskit dhe goditet në fytyrë appeared first on Albeu.com.

Vendimi i FIFA-s për ta pezulluar me kusht ndëshkimin e sulmuesit amerikan Folarin Balogun, pas kartonit të kuq që mori në fazën e 1/16 së finales së Kupës së Botës 2026 kundër Bosnje dhe Hercegovinës, ka ndezur polemika të forta në botën e futbollit.

Si pasojë e këtij vendimi, Balogun pritet të jetë i gatshëm për ndeshjen çerekfinale me Belgjikën, ndërsa reagimet kanë qenë të shumta dhe të ashpra.

Rudi Garcia, trajneri i Belgjikës, e cilësoi këtë zhvillim si një “shaka të 1 Prillit”, ndërsa në rrjetet sociale kanë qarkulluar edhe aludime se ndryshimi i vendimit mund të jetë ndikuar nga ndërhyrje në nivele të larta politike.

Megjithatë, historia e Kupës së Botës tregon se FIFA, në shumë raste të tjera, nuk ka bërë asnjë lëshim edhe kur në qendër kanë qenë yjet më të mëdhenj të futbollit.

Më poshtë janë 11 futbollistë të njohur që, pavarësisht përpjekjeve dhe apelimeve të federatave të tyre, u detyruan të mungonin në ndeshje vendimtare.

Leonardo (Brazili) – Botërori 1994

Braziliani u ndëshkua me karton të kuq në ndeshjen e 1/16 së finales kundër SHBA-së, pasi goditi me bërryl Tab Ramos dhe i shkaktoi frakturë në mollëz.

Federata braziliane mbrojti idenë se Leonardo thjesht po përpiqej të shkëputej nga kapja e kundërshtarit, por FIFA jo vetëm që e la në fuqi kartonin, por e dënoi edhe me katër ndeshje pezullim.

Për pasojë, ai mungoi në çerekfinale, në gjysmëfinale dhe në finalen e atij turneu.

Alessandro Costacurta (Italia) – Botërori 1994

Mbrojtësi i Italisë u ndëshkua me kartonin e dytë të verdhë në gjysmëfinalen ndaj Bullgarisë, pasi ndërhyri me faull ndaj Hristo Stoichkov.

Italianët kërkuan rishqyrtim të rastit, por FIFA nuk pranoi as ta marrë në konsideratë. Kështu, Costacurta e humbi finalen kundër Brazilit, ku Italia u mund pas penalltive.

Patrick Kluivert (Holanda) – Botërori 1998

Sulmuesi i Holandës u përjashtua me të kuq në takimin hapës përballë Belgjikës, pasi goditi me bërryl Lorenzo Staelens.

Federata holandeze argumentoi se futbollisti ishte provokuar rëndë, por FIFA vendosi ta pezullojë për tre ndeshje. Kluivert u kthye vetëm në çerekfinale, ku gjeti rrugën e rrjetës kundër Argjentinës.

Zinedine Zidane (Franca) – Botërori 1998

Francezi u ndëshkua pasi shkeli me dashje mbi Said Al-Owairan gjatë fazës së grupeve.

FIFA e la jashtë për dy ndeshje, çka bëri që Zidane të mungonte ndaj Danimarkës dhe Paraguait. Ai u rikthye në çerekfinale dhe më vonë realizoi dy herë në finalen me Brazilin.

Laurent Blanc (Franca) – Botërori 1998

Ky mbetet një nga kartonët e kuq më polemikë në historinë e Botërorëve. Blanc u përjashtua në gjysmëfinalen me Kroacinë pas një kontakti të lehtë me Slaven Bilic, i cili simuloi rëndë.

Edhe pse Franca protestoi dhe pamjet televizive ngritën dyshime të forta, FIFA nuk ndryshoi vendim dhe Blanc mbeti jashtë finales kundër Brazilit.

Ronaldinho (Brazili) – Botërori 2002

Në çerekfinalen e famshme me Anglinë, Ronaldinho dha asist, shënoi një gol spektakolar nga goditja e lirë dhe më pas mori karton të kuq pas një ndërhyrjeje ndaj Danny Mills.

Brazili kërkoi heqjen e pezullimit me argumentin se ndërhyrja nuk kishte qenë e qëllimshme, por FIFA mbajti të njëjtin qëndrim. Ronaldinho mungoi në gjysmëfinalen kundër Turqisë.

Michael Ballack (Gjermania) – Botërori 2002

Mesfushori gjerman u ndëshkua me karton të verdhë në gjysmëfinalen përballë Koresë së Jugut pas një faulli taktik, duke plotësuar limitin e kartonëve.

Ndonëse më pas shënoi golin e suksesit, Ballack nuk luajti në finalen me Brazilin.

Rasti i tij ndikoi më vonë që FIFA të ndryshonte rregulloren dhe t’i fshinte kartonët pas çerekfinaleve.

Deco (Portugalia) – Botërori 2006

Në sfidën famëkeqe Portugali-Holandë, të njohur si “Beteja e Nurembergut”, Deco u përjashtua pas kartonit të dytë të verdhë për vonesë loje.

Federata portugeze pretendoi se arbitri e kishte humbur kontrollin e ndeshjes, por FIFA e hodhi poshtë apelimin. Deco mungoi në çerekfinalen kundër Anglisë.

Luis Suarez (Uruguai) – Botërori 2010

Në çerekfinalen ndaj Ganës, Suarez ndali topin me dorë mbi vijën fatale në minutën e 120-të.

Ai u përjashtua dhe nuk luajti në gjysmëfinalen përballë Holandës. FIFA nuk e fali pezullimin dhe madje mori në shqyrtim edhe mundësinë e një dënimi më të rëndë.

Thiago Silva (Brazili) – Botërori 2014

Kapiteni i Brazilit mori kartonin e dytë të verdhë në turne pas një pengimi të panevojshëm ndaj portierit David Ospina.

Federata Braziliane kërkoi anulimin e ndëshkimit, duke theksuar se kontakti ishte minimal, por FIFA e refuzoi kërkesën. Thiago Silva mungoi në gjysmëfinalen historike me Gjermaninë, ku Brazili u mund 7-1.

Jerome Boateng (Gjermania) – Botërori 2018

Boateng u përjashtua me kartonin e dytë të verdhë në fitoren dramatike ndaj Suedisë.

Gjermania apeloi duke argumentuar se kartoni i dytë ishte i ashpër, por FIFA nuk e ndryshoi vendimin. Pa Boateng, kampionët në fuqi u eliminuan pas humbjes 2-0 ndaj Koresë së Jugut.

Rasti i Garrinchës, përjashtimi historik

Përpara Balogun, historia kishte regjistruar vetëm një precedent të ngjashëm.

Në Botërorin e vitit 1962, Garrincha u përjashtua në gjysmëfinalen kundër Kilit. Në atë kohë, kartonët e kuq nuk përdoreshin fizikisht dhe pezullimet përcaktoheshin nga komisioni disiplinor.

Brazili ndërmori një fushatë të madhe për ta shpëtuar yllin e vet. Politikanë, tifozë kilianë dhe figura të tjera kërkuan faljen e tij, ndërsa raporti vendimtar i gjyqtarit anësor nuk mbërriti asnjëherë në komision.

Për shkak të mungesës së provave të plota, FIFA vendosi ta lejonte Garrinchën të luante në finale.

Për më shumë se gjashtë dekada, ky mbeti i vetmi rast kur një karton i kuq u fal para një finaleje të Kupës së Botës.

Vendimi më i fundit për Folarin Balogun e ka rikthyer sërish në qendër të vëmendjes këtë precedent historik dhe ka hapur debat të gjerë mbi mënyrën se si FIFA i zbaton rregullat disiplinore në turneun më të madh të futbollit.

The post Nga Zidane te Suarez, 11 emra të mëdhenj që munguan në duele vendimtare, në të kundërt të Balogun appeared first on Albeu.com.

I pyetur se cili “numër nëntë” e impresionon më së shumti në skenën botërore, veterani uruguaian përmendi disa futbollistë të caktuar dhe shpjegoi arsyet pse i vlerëson.

“Janë dy ose tre. Haaland është një ‘numër nëntë’ vdekjeprurës në zonë, megjithëse skuadra duhet të luajë sipas pikave të tij të forta”, u shpreh fillimisht Suarez.

Më pas, ai theksoi se pëlqimi i tij personal shkon për Harry Kane. “Personalisht, unë preferoj Harry Kane. Ai lidhet shumë më mirë me pjesën tjetër të ekipit. Ai bën lëvizje ndërsa parashikon vrapimet e shokëve të tij të ekipit; ai e kupton lojën ndryshe. I vlerësoj shumë këto lloj detajesh”.

Suarez foli edhe për Darwin Nunez, duke nënvizuar se uruguaiani duhet së pari të punojë te qasja e tij mendore. “Dhe pastaj është Darwin [Nunez]. Gjëja e parë që duhet të bëjë është të ndryshojë mentalitetin e tij dhe ta forcojë atë, sepse sipas mendimit tim, ai zotëron cilësi të jashtëzakonshme”.

Ai shtoi se largimi i Nunez nga Liverpooli ishte një zgjedhje e vetë lojtarit, por beson se ai ka potencialin për t’u rikthyer në nivele shumë të larta. “Ai mori vendimin për t’u larguar nga Liverpooli, por unë e shoh atë si një lojtar që mund të kthehet në një nivel shumë të lartë. Nëse ai arrin potencialin e tij maksimal, ai është një sulmues që do ta shijoj shumë ta shikoj. Ai është i shpejtë, i fortë dhe i fuqishëm…”.

Në fund, legjenda e sulmit theksoi se Nunez ka ende hapësirë për përmirësim. “Ka aspekte të lojës së tij që ai ende mund t’i përmirësojë, por është i ri dhe ende ka vend për t’u rritur”, përfundoi sulmuesi legjendar.

The post Luis Suarez veçon Kane, Haaland dhe Nunez mes sulmuesve më të spikatur të futbollit botëror appeared first on Albeu.com.

Sulmuesi i Inter Miamit tha se e përjeton me vështirësi faktin që po e ndjek ekipin nga jashtë, pasi dëshira për të dhënë ndihmë mbetet ende shumë e madhe.

“Ndjehem i pafuqishëm sepse nuk ka asgjë që mund të bëj. Kam adrenalinë dhe dëshirë për ta ndihmuar ekipin, por tani për tani vetëm po e shikoj”.

Ai tregoi gjithashtu se nuk e ka aspak të lehtë të shohë reagimet e futbollistëve pas këtyre rezultateve.

“Kur i shoh emocionet dhe zhgënjimin e djemve, nuk është e lehtë. U thashë të qëndrojnë të fortë — do ta kalojnë edhe këtë situatë”.

Suarez u ndal edhe te puna e përzgjedhësit Marcelo Bielsa, duke nënvizuar se çdo trajner ka qasjen e vet në drejtimin e skuadrës.

“Puna e Bielsas? Çdo trajner ka stilin e tij. Tani është e rëndësishme të luajmë sa më mirë kundër Spanjës. Nuk do të doja që gjithçka të vendosej në një ndeshje të vetme, por kjo është situata”, shtoi ai.

Deri tani, Uruguai nuk ka arritur ende të marrë një fitore në këtë Botëror, pasi ka barazuar 1-1 me Arabinë Saudite dhe 2-2 me Kepin e Gjelbër.

Në ndeshjen e tretë, e cila do të jetë vendimtare për fazën e grupeve, uruguaianët do të luajnë ndaj Spanjës, në një përballje që mund të vendosë fatin e tyre në këtë turne.

The post Luis Suarez flet me zhgënjim për formën e Uruguait: “Ndihem i pafuqishëm, sepse nuk mund të bëj asgjë” appeared first on Albeu.com.

Ish-ylli i Liverpulit dhe Barcelonës, që tani luan për Inter Miamin në MLS, është golashënuesi më i mirë i të gjitha kohërave të Uruguait, me 69 gola në 142 ndeshje të luajtura në 17 vjet.

Suarez bëri debutimin e tij për ekipin kombëtar më 8 shkurt 2007 në një fitore 3–1 kundër Kolumbisë. Me kombëtaren mori pjesë në katër edicione të Kupës së Botës.

The post Luis Suarez tërhiqet nga kombëtarja e Uruguait appeared first on Albeu.com.