Departamenti Special i Gjykatës Themelore në Prishtinë ka caktuar për 28 shtator 2026, në orën 09:30, seancën e shqyrtimit fillestar në mungesë për 21 të pandehur të akuzuar për “Krime lufte kundër popullsisë civile”. Seanca do të zhvillohet në Pallatin e Drejtësisë në Hajvali.

Rasti është i regjistruar me numrin PS.nr.48/25 dhe lidhet me aktakuzën e Prokurorisë Speciale të Republikës së Kosovës, e ngritur më 15 gusht 2025.

Të pandehurit në këtë çështje janë Zlatomir Peshiq, Mladen Cirkoviq, Radomir Markoviq, Dushko Adamoviq, Obrad Stevanoviq, Zhivko Trajkoviq, Goran Radosavleviq, Bogoljub Janiçeviq, Sllavisha Ivanoviq, Boshko Vukiqeviq, Sreten Popoviq, Nikolla Petroviq, Kërsmаn Jeliq, Lubisha Stojimiroviq, Bozhidar Deliq, Radojko Stefanoviq, Dragan Zhivanoviq, Milos Gjoshаn, Lubinko Cvetiq, Bozhidar Filiq dhe Milovan Kovаçеviq.

Akuzat ndaj tyre kanë të bëjnë me veprën penale “Krimet e luftës kundër popullsisë civile”, e përcaktuar në nenin 142 lidhur me nenin 22 të Ligjit Penal të ish-RSFJ-së dhe e paraparë aktualisht nga dispozitat përkatëse të Kodit Penal të Republikës së Kosovës.

Sipas njoftimit të Gjykatës, procedura do të zhvillohet pa praninë e të pandehurve, pasi ata kanë qenë të paarritshëm deri në momentin kur është ngritur aktakuza.

Gjykata u ka bërë thirrje të akuzuarve të paraqiten dhe të dorëzohen te organet e ndjekjes në Kosovë. Po ashtu, u është kërkuar personave që kanë të dhëna për vendndodhjen e tyre që informacionet t’ua përcjellin Policisë së Kosovës ose organeve të tjera kompetente.

Seanca do të mbahet në sallën nr. 16, në Objektin D, Kati I. Kryesuese e trupit gjykues është caktuar gjyqtarja Medie Bytyqi.

The post Gjykata cakton më 28 shtator 2026 shqyrtimin fillestar në mungesë për 21 të akuzuarit për krime lufte appeared first on Albeu.com.

Hetuesit e Drejtorisë për Hetimin e Krimeve të Luftës arrestuan të enjten një person në kuadër të hetimeve për rastin e krimeve të luftës në Zubin Potok. Arrestimi u krye me urdhër të Prokurorisë Speciale të Republikës së Kosovës (PSRK).

Lajmi u konfirmua nëpërmjet një komunikate të përbashkët të Policisë së Kosovës dhe Prokurorisë Speciale.

Sipas njoftimit, i arrestuari me inicialet R.K. dyshohet për veprën penale “Krime lufte kundër popullsisë civile”. Atij i është caktuar masa e ndalimit prej 48 orësh.

PSRK-ja njoftoi se, brenda afatit ligjor të parashikuar nga Kodi i Procedurës Penale, do t’i drejtohet Gjykatës Themelore në Prishtinë me kërkesë për caktimin e paraburgimit. Njëkohësisht, në bashkërendim me hetuesit policorë, do të vijojnë veprimet e nevojshme hetimore. Prokuroria Speciale dhe Policia e Kosovës ritheksuan përkushtimin e tyre për hetimin dhe ndjekjen penale të të gjithë personave që mund të kenë kryer krime gjatë luftës në Kosovë.

The post Prangoset në Zubin Potok R.K., i dyshuar për krime lufte appeared first on Albeu.com.

Vdekja e Ratko Mlladiqit ka rikthyer në debat figurën e ish-komandantit të Ushtrisë së Republikës Srpska, ndërsa deklaratat e zyrtarëve serbë kanë ushqyer përpjekjet për ta paraqitur atë si hero kombëtar. Kjo ndodh pavarësisht se Mlladiqi u dënua me burgim të përjetshëm për gjenocid, krime kundër njerëzimit dhe krime lufte.

Qëndrimet e shprehura pas vdekjes së tij kanë hapur diskutime të reja për mënyrën se si Serbia po e trajton trashëgiminë e Mlladiqit dhe për përpjekjet për ta larguar atë nga përgjegjësia për krimet e kryera gjatë luftës në Bosnje e Hercegovinë.

Pyetja që ngrihet është nëse ndarja nga jeta po përdoret për të forcuar narrativat nacionaliste dhe për ta zhvendosur Mlladiqin nga pozita e një personi të dënuar penalisht drejt një miti politik e kombëtar. Ekspertët paralajmërojnë se nderimi i një figure të dënuar për gjenocid nuk lidhet vetëm me të kaluarën, por mund të ndikojë edhe në të ardhmen, veçanërisht te brezat e rinj.

Për këtë çështje, për gazetën “Bota sot” kanë dhënë vlerësimet e tyre eksperti i sigurisë Drizan Shala dhe ish-hetuesi Agim Rexhepi.

Shala: Beogradi po përpiqet ta lidhë Mlladiqin me traditën ushtarake serbe

Drizan Shala thotë se deklaratat e zyrtarëve serbë nuk duhen parë si qëndrime të izoluara personale. Sipas ekspertit të sigurisë, ato pasqyrojnë mënyrën se si Beogradi po përpiqet ta vendosë figurën e Mlladiqit në raport me shtetin serb.

Shala i referohet deklaratës së ministrit të Drejtësisë së Serbisë, Nenad Vujiç, i cili e quajti Mlladiqin “gjeneral” dhe përmendi protokollet që lidhen me këtë status. Sipas tij, një qëndrim i tillë rikthen në vëmendje lidhjet ndërmjet Mlladiqit, Ushtrisë së Republikës Srpska dhe strukturave shtetërore të Serbisë.

“Fakti që ministri i Drejtësisë së Serbisë e quan Mlladiqin gjeneral dhe flet për protokollet përkatëse nuk duhet trajtuar si çështje thjesht ceremoniale. Kjo tregon përpjekjen për ta vendosur atë sërish në origjinën ushtarake të Serbisë dhe për ta paraqitur si pjesë të historisë së saj ushtarake. Për një kohë të gjatë, sa herë që përgjegjësia për luftën në Bosnje lidhej me Beogradin, ruhej një dallim ndërmjet Ushtrisë së Republikës Srpska dhe Ushtrisë së Serbisë. Mlladiqi drejtonte të parën, ndërsa Serbia përpiqej të mos identifikohej me veprimet e saj. Por kur bëhet fjalë për nderimin dhe prestigjin e tij, ky dallim po venitet”, deklaron Shala për “Bota sot”.

Ai vlerëson se kjo situatë përbën një paradoks që duhet analizuar, pasi përgjegjësia e Mlladiqit nuk mund të ndahet nga krimet për të cilat është dënuar nga drejtësia ndërkombëtare.

“Historia e Mlladiqit është e pandashme nga gjenocidi në Srebrenicë, terrori i ushtruar ndaj civilëve në Sarajevë, përndjekjet dhe krimet e tjera për të cilat ai është dënuar. Forcat që ai komandonte kryen krime të dokumentuara dhe të konfirmuara nga gjykatat ndërkombëtare. Për këtë arsye, rikthimi i tij nga një zyrtar i lartë serb në rolin e ‘gjeneralit’, i shoqëruar me referenca ndaj protokolleve shtetërore, nuk mund të konsiderohet vetëm një akt ceremonial. Ai ngre pikëpyetje për mënyrën se si Serbia po e trajton trashëgiminë e tij”, thekson ai.

Sipas Shalës, rasti duhet parë brenda kuadrit më të gjerë të narrativave nacionaliste që vazhdojnë të ndikojnë në rajon.

“Çështja nuk lidhet vetëm me mënyrën se si po trajtohet një person pas vdekjes, por me mesazhin që i përcillet shoqërisë. Nëse një njeri i dënuar për gjenocid paraqitet si figurë që duhet nderuar, atëherë po tentohet të ndryshohet perceptimi për krimet e tij. Përgjegjësia individuale rrezikon të zëvendësohet me mitin e heroit kombëtar. Ky është një rrezik i madh në një rajon ku plagët e luftës nuk janë shëruar plotësisht dhe ku narrativat nacionaliste vazhdojnë të kenë peshë”, shprehet Shala.

Rexhepi: Nderimi i Mlladiqit legjitimon ideologjinë që çoi në gjenocid

Ish-hetuesi Agim Rexhepi nënvizon se vdekja e Ratko Mlladiqit nuk prek as përgjegjësinë e tij penale, as faktet e përcaktuara nga drejtësia ndërkombëtare. Për të, shqetësimi kryesor qëndron te përpjekja për ta shndërruar një person të dënuar për gjenocid në simbol të nacionalizmit serb.

“Vdekja e Ratko Mlladiqit nuk e ndryshon as historinë, as vendimin e gjykatës. Përkundrazi, vendosja e figurës së tij sërish në qendër të narrativave nacionaliste tregon se beteja për të vërtetën historike dhe kujtesën e viktimave vazhdon. Mlladiqi nuk ishte vetëm një komandant ushtarak i një konflikti të kaluar. Ai u dënua me burgim të përjetshëm për gjenocid në Srebrenicë, krime kundër njerëzimit dhe krime lufte. Prandaj, përpjekja për ta kthyer nga i dënuar për gjenocid në ‘hero kombëtar’ nuk është thjesht një këndvështrim alternativ, por një tentativë për ta përmbysur kuptimin e historisë”, deklaron Rexhepi për “Bota sot”.

Rexhepi thotë se një narrativë e tillë e largon vëmendjen nga krimet konkrete dhe e zhvendos atë te pretendimet për “mbrojtjen e kombit”.

“Kur një kriminel lufte paraqitet si hero, viktimat trajtohen si pengesë për rrëfimin historik. Ky është një zhvillim tejet i rrezikshëm. Glorifikimi i Ratko Mlladiqit nënkupton glorifikimin e ideologjisë që prodhoi gjenocid. Vrasjet masive, dëbimet, terrori dhe krimet synohet të relativizohen duke u paraqitur si pjesë e një lufte për mbrojtjen e kombit. Por një komb nuk mbrohet përmes vrasjes së civilëve dhe patriotizmi nuk mund të përdoret si arsyetim për krime kundër njerëzimit”, shprehet ai.

Sipas ish-hetuesit, pasojat më të mëdha mund të shfaqen te brezat e rinj, të cilët mund të ndikohen nga përsëritja e këtyre mesazheve.

“Rreziku nuk kufizohet te grupet ekstremiste që mund ta nderojnë një figurë të tillë. Shqetësimi kryesor është që propaganda, e përsëritur vazhdimisht, ta bëjë një brez të ri ta shohë Mlladiqin jo si autor të krimeve të dokumentuara, por si mbrojtës të kombit. Falsifikimi i historisë shpesh nuk ndodh përmes mohimit të menjëhershëm të gjithçkaje, por përmes relativizimit gradual. Nëse të rinjtë mësohen ta perceptojnë si hero një person të dënuar për gjenocid, atëherë çështja nuk mbetet më vetëm te e kaluara, por ndikon edhe në mënyrën se si mund të kuptohen konfliktet dhe dhuna në të ardhmen”, thotë Rexhepi.

Në përfundim, Rexhepi thekson se Serbia dhe shoqëritë e rajonit duhet ta përballojnë të kaluarën pa romantizim dhe pa përdorur standarde të dyfishta.

“Pajtimi i qëndrueshëm nuk mund të ndërtohet pa të vërtetën, ndërsa paqja e qëndrueshme kërkon drejtësi. Po ashtu, një e ardhme evropiane nuk mund të ndërtohet duke nderuar persona të dënuar për gjenocid. Mlladiqi ka vdekur, por ideologjia që e vendosi në piedestal nuk zhduket vetvetiu. Ajo mund të mposhtet vetëm përmes së vërtetës, arsimit, drejtësisë, kujtesës dhe refuzimit të çdo përpjekjeje për ta paraqitur gjenocidin si heroizëm”, përfundon Rexhepi për “Bota sot”.

The post Pas vdekjes, Mlladiqi rikthehet si simbol nacionalist serb, ekspertët: Glorifikimi i tij rrezikon të shtrembërojë historinë appeared first on Albeu.com.

Gjykata Themelore në Prishtinë, përkatësisht Departamenti Special, ka njoftuar se më 15.09.2026, në orën 09:00, do të zhvillohet seanca e shqyrtimit fillestar në çështjen penale PS.nr.66/2023. Seanca do të mbahet në objektin D të Pallatit të Drejtësisë në Hajvali dhe do të drejtohet nga kryetarja e trupit gjykues, Violeta Namani-Hajra.

Rasti lidhet me aktakuzën e Prokurorisë Speciale të Republikës së Kosovës, PPS.nr.60/2010, të datës 23.12.2024, e cila ka të bëjë me të pandehurit Momir Stojanoviq, Sreten Çamoviq, Nikolla Miqunoviq, Millovan Kovaçeviq, Sergej Peroviq, Verolub Zhivkoviq, Millan Kotur, Radomir Çoliq, Danillo Zeçeviq, Dragutin Josifoviq, Franko Simatoviq, Momçillo Stanojeviq, Vllatko Vukoviq, Ilija Todorov, Stevo Kaponja, Dragan Zhivanoviq, Millosh Gjoshаn, Predrag Stojanoviq, Dimitrije Rashoviq, Millosh Shqepanoviq, Aleksandar Pekoviq, Zhivko Vuksanoviq, Millutin Novakoviq, Sokol Abazi, Novica Stankoviq, Misho Popoviq, Millan Noviqeviq, Nenad Rajiçeviq, Muharrem Ibraj, Millan Slavkoviq, Dragan Isailloviq, Sasha Antiq, Zllatko Odak, Savo Llekiq, Dragan Raciq, Milladin Novakoviq, Dragan Pekoviq, Njegosh Prashçeviq, Zoran Mirkoviq, Dushan Prashçeviq, Ranko Vukadinoviq, Momçillo Stijoviq, Dushan Nedoviq, Gjokica Mihajlloviq, Mirash Gegoviq, Aleksandar Miqunoviq, Llazar Drashkoviq, Mihill Abazi, Momçillo Novakoviq, Marko Abramoviq, Smajl Beqiri, Momçillo Pantiq dhe Predrag Miqunoviq.

Ata akuzohen për veprën penale të Krimeve të Luftës kundër popullsisë civile, të paraparë në nenin 142, në lidhje me nenin 22 të Ligjit Penal të ish Republikës Socialiste Federative të Jugosllavisë. Sipas legjislacionit aktual, vepra është e inkriminuar në nenet 144, 145, 146 dhe 147, në lidhje me nenin 31 të Kodit Penal të Republikës së Kosovës (KPRK).

Sipas kërkesës së Prokurorisë Speciale të Republikës së Kosovës, procedura gjyqësore do të zhvillohet në mungesë të të pandehurve, pasi ata nuk kanë qenë të qasshëm deri në momentin e ngritjes së aktakuzës.

Gjykata u ka bërë thirrje personave të akuzuar që të paraqiten dhe të dorëzohen pranë organeve të ndjekjes së Republikës së Kosovës.

Njëkohësisht, të gjithë ata që kanë të dhëna të rëndësishme për vendndodhjen e të akuzuarve ftohen që t’ua përcjellin këto informacione Policisë së Kosovës ose institucioneve të tjera kompetente.

Aktakuza dhe ftesat për seancën janë vënë në dispozicion në ueb-faqen e gjykatës dhe në Gazetën Zyrtare.

Gjykata Themelore në Prishtinë ka bërë të ditur se do ta njoftojë opinionin publik edhe për zhvillimet e ardhshme në lidhje me këtë çështje penale.

The post Më 15 shtator mbahet seanca fillestare për 55 personat e akuzuar për krime lufte appeared first on Albeu.com.

Ambasada e Mbretërisë së Bashkuar në Kosovë ka shprehur mbështetjen për familjet e personave që rezultojnë ende të zhdukur nga lufta e viteve 1998-1999, duke theksuar nevojën për t’u dhënë përgjigje pas shumë vitesh pasigurie.

Në reagimin e saj, Ambasada Britanike ka vlerësuar veprimet e institucioneve të Kosovës në komunën e Zubin Potokut, ku po kryhet nxjerrja e mbetjeve mortore, si edhe ekzaminimet mjeko-ligjore dhe testet e ADN-së për identifikimin e tyre.

“Mbretëria e Bashkuar qëndron pranë familjeve të atyre që ende janë të zhdukur nga konflikti i viteve 1998-1999 dhe mbështet përpjekjet për të gjetur përgjigje për ta pas shumë vitesh pasigurie. Ne mirëpresim punën e autoriteteve të Kosovës për nxjerrjen e mbetjeve mortore në komunën e Zubin Potokut dhe kryerjen e ekzaminimeve forenzike dhe testeve të ADN-së për identifikimin e mbetjeve”, thuhet në reagimin e Ambasadës Britanike.

The post Ambasada Britanike mbështet familjet e të zhdukurve dhe procesin e identifikimit në Zubin Potok appeared first on Albeu.com.

Ministri i Punëve të Brendshme i Serbisë, Ivica Daçiq, ka bërë të ditur se autoritetet serbe kanë arrestuar një person, nën dyshimin se ka kryer krime lufte kundër popullatës civile në Kosovë gjatë vitit 1999.

Sipas Daçiqit, i dyshuari është një 47-vjeçar me inicialet D.M., i cili u ndalua në pikën kufitare të Batrovcit. Ndaj tij është caktuar masa e paraburgimit për një muaj.

Përmes një njoftimi, Daçiq deklaroi se ekziston dyshimi i bazuar që i arrestuari ka kryer vepër penale kundër popullsisë civile, në dëm të pjesëtarëve të dy familjeve, në qershor të vitit 1999, në fshatin Bec të komunës së Gjakovës.

Megjithëse ministri serb publikoi vetëm inicialet e të ndaluarit, avokati nga Kosova, Arianit Koci, kishte njoftuar një ditë më herët se bëhej fjalë për Dugagjin Maxhunin, 47 vjeç, nga Beci i Gjakovës.

Radio Evropa e Lirë ka kërkuar informacione për rastin nga Ministria për Punë të Jashtme dhe Diasporë, por deri tani nuk ka marrë përgjigje.

Në përgjigje të interesimit të Radios Evropa e Lirë, Organizata e Veteranëve të Ushtrisë Çlirimtare të Kosovës konfirmoi se Dugagjin Maxhuni gjendet në listën e personave që e gëzojnë statusin e veteranit.

Autoritetet serbe kanë arrestuar në vazhdimësi shtetas të Kosovës, duke i akuzuar për krime të pretenduara të luftës të kryera në Kosovë gjatë viteve 1998-’99.

Edhe në Kosovë, gjatë viteve të fundit, janë ndaluar dhjetëra serbë nën dyshimet për krime lufte. Disa prej këtyre rasteve janë mbyllur me aktgjykime dënuese.

Rasti i Maxhunit përbën arrestimin e dytë që Serbia ka kryer gjatë gushtit për pretendime që lidhen me krimet e luftës në Kosovë. Më 2 gusht, një burrë ishte arrestuar në kufirin ndërmjet Serbisë dhe Hungarisë.

Avokati Koci kishte deklaruar se personi i ndaluar në atë rast ishte Mentor Mustafa, shtetas i Kosovës, 44 vjeç, nga Novobërda. Edhe ndaj tij ishte vendosur masa e paraburgimit prej një muaji.

The post Serbia cakton një muaj paraburgim për Dugagjin Maxhunin, nën pretendimet për krime lufte appeared first on Albeu.com.

Varrezat masive që vazhdojnë të zbulohen në Kosovë po nxjerrin sërish në pah përmasat e krimeve të kryera kundër shqiptarëve gjatë luftës së viteve 1998–1999.

Dëshmitë e reja të siguruara në këto lokacione dokumentojnë historinë e rëndë të vrasjeve, zhdukjeve dhe veprave të tjera të rënda që forcat serbe kryen ndaj popullsisë civile.

Sipas ekspertëve të drejtësisë dhe krimeve të luftës, këto prova kanë rëndësi të madhe për nisjen e ndjekjeve penale dhe për zbardhjen e plotë të së vërtetës. Megjithatë, për shkak të mandatit të kufizuar të Dhomave të Specializuara të Kosovës, vazhdon të mbetet e paqartë nëse këto raste mund të trajtohen nga kjo gjykatë.

Vlerësimet juridike theksojnë se përgjegjësia për veprat e kryera gjatë luftës duhet të kërkohet përmes mekanizmave kompetentë vendorë dhe ndërkombëtarë, pasi krimet e luftës dhe krimet kundër njerëzimit nuk parashkruhen.

Zbulimi i lokacioneve të reja me varreza masive po e shton kërkesën për hapjen e arkivave dhe sqarimin e fatit të mijëra viktimave të luftës. Në të njëjtën kohë, familjet e personave të pagjetur vazhdojnë të kërkojnë drejtësi dhe përgjegjësi penale si për kryerësit, ashtu edhe për urdhërdhënësit e krimeve.

Avokati dhe juristi Ardian Bajraktari vlerëson se krimet e masakrës së Dubravës duhet të hetohen dhe trajtohen nga institucionet e drejtësisë në Kosovë, përfshirë mundësinë që të dyshuarit të gjykohen në mungesë.

Në një prononcim për “Bota sot”, Bajraktari ka treguar se një person që i mbijetoi masakrës së Dubravës kishte dorëzuar më herët kallëzim penal në Prokurorinë e Specializuar, duke kërkuar që të vlerësohej nëse këto raste përfshihen në juridiksionin e saj.

Ai ka deklaruar se deri tani nuk është publikuar asnjë informacion që do të tregonte nëse kallëzimi penal i paraqitur nga i mbijetuari është shqyrtuar.

Sipas Bajraktarit, mungesa e të dhënave publike për trajtimin e kallëzimit e bën të nevojshme ndërmarrjen e veprimeve konkrete nga institucionet e Kosovës për zbardhjen e krimeve.

Juristi ka theksuar se këto raste duhet të procedohen nga organet vendore, duke përfshirë edhe gjykimin në mungesë, mundësi që tashmë parashikohet nga Kodi i Procedurës Penale.

Masakra e Dubravës konsiderohet ndër ngjarjet më të rënda të luftës në Kosovë. Familjarët e viktimave dhe të mbijetuarit vazhdojnë të kërkojnë që autorët e saj të identifikohen dhe të mbajnë përgjegjësi penale.

Profesori Muhamet Racaj, në një deklaratë për “Bota Sot”, e ka cilësuar zbulimin e varrezave masive në Kosovë si provë të pakundërshtueshme të krimeve të rënda të luftës dhe krimeve kundër njerëzimit të kryera gjatë viteve 1998–1999 nga forcat ushtarake, policore dhe paramilitare serbe.

Sipas tij, çdo varrezë e re masive që zbulohet e fuqizon më tej të vërtetën historike dhe juridike mbi politikën sistematike të spastrimit etnik të zbatuar nga regjimi i atëhershëm i Serbisë.

Racaj ka sqaruar se këto krime nuk hyjnë në juridiksionin e Dhomave të Specializuara të Kosovës. Ai ka argumentuar se mandati i kësaj gjykate kufizohet në hetimin dhe gjykimin e veprave të caktuara që lidhen me pretendimet ndaj ish-pjesëtarëve të Ushtrisë Çlirimtare të Kosovës, ndaj krimet e forcave serbe nuk mund të procedohen prej saj.

Megjithatë, profesori ka nënvizuar se kufizimi i juridiksionit të Dhomave të Specializuara nuk i përjashton autorët e këtyre krimeve nga përgjegjësia.

Sipas Racajt, provat e reja që sigurohen nga varrezat masive duhet të përdoren për ngritjen e aktakuzave pranë mekanizmave kompetentë kombëtarë dhe ndërkombëtarë.

Ai ka rikujtuar se as krimet e luftës dhe as krimet kundër njerëzimit nuk parashkruhen, çka do të thotë se autorët mund të ndiqen penalisht pavarësisht numrit të viteve që kanë kaluar.

Në përfundim, Racaj ka kërkuar që bashkësia ndërkombëtare ta rrisë presionin ndaj Serbisë për hapjen e arkivave ushtarake dhe policore, përcaktimin e vendndodhjes së të gjitha varrezave masive dhe dorëzimin e përgjegjësve para drejtësisë.

Muhamet Racaj ka përfunduar deklaratën e tij për “Bota sot” duke theksuar se pajtimi i sinqertë nuk mund të arrihet pa drejtësi, ndërsa një paqe e qëndrueshme në Ballkan nuk mund të ndërtohet pa zbardhjen e plotë të së vërtetës.

The post Varrezat masive dëshmojnë krimet serbe në Kosovë, ndërsa përgjegjësit ende nuk janë përballur me drejtësinë appeared first on Albeu.com.

Varrezat masive që po zbulohen vazhdimisht në Kosovë kanë risjellë në qendër të vëmendjes përmasat e krimeve ndaj shqiptarëve gjatë luftës së viteve 1998–1999.

Dëshmitë e nxjerra nga secili prej këtyre lokacioneve zbulojnë episode të rënda vrasjesh, zhdukjesh dhe krimesh të tjera të kryera nga forcat serbe kundër popullsisë civile.

Sipas ekspertëve të drejtësisë dhe krimeve të luftës, këto prova mund të shërbejnë si bazë e rëndësishme për procedura penale dhe për ndriçimin e plotë të së vërtetës. Megjithatë, për shkak të mandatit të kufizuar të Dhomave të Specializuara të Kosovës, vazhdon të mbetet e paqartë nëse këto raste mund të trajtohen prej kësaj gjykate.

Vlerësimet juridike theksojnë se përgjegjësia për krimet e luftës duhet të kërkohet nëpërmjet institucioneve kompetente vendore dhe ndërkombëtare, duke qenë se krimet e luftës dhe krimet kundër njerëzimit nuk parashkruhen.

Gjetja e varrezave të tjera masive ka shtuar kërkesat për hapjen e arkivave dhe për sqarimin e fatit të mijëra viktimave të luftës. Familjet e personave të pagjetur vazhdojnë të kërkojnë drejtësi, ndërsa insistojnë që autorët dhe urdhërdhënësit të japin llogari para organeve të drejtësisë.

Bajraktari: Kallëzimi penal i një të mbijetuari të Dubravës në Prokurorinë e Specializuar ende pa rezultat publik

Avokati dhe juristi Ardian Bajraktari konsideron se krimet e masakrës së Dubravës duhet të hetohen e trajtohen nga institucionet e drejtësisë në Kosovë. Sipas tij, ndaj të dyshuarve mund të shqyrtohet edhe zhvillimi i gjykimeve në mungesë.

Në një prononcim për “Bota sot”, Bajraktari ka treguar se një i mbijetuar i masakrës së Dubravës kishte dorëzuar më herët kallëzim penal në Prokurorinë e Specializuar, duke kërkuar që të vlerësohej nëse rasti përfshihej në juridiksionin e saj.

Ai ka deklaruar se kallëzimi është paraqitur kohë më parë për të përcaktuar kompetencën e Prokurorisë së Specializuar mbi këto raste, por deri tani nuk është publikuar asnjë informacion nëse është shqyrtuar.

Për Bajraktarin, mungesa e të dhënave publike rreth fatit të kallëzimit e bën të nevojshme ndërmarrjen e veprimeve konkrete nga institucionet e Kosovës për zbardhjen e krimeve.

Ai vlerëson se rastet duhet të kalojnë në trajtim nga drejtësia kosovare, përfshirë mundësinë e gjykimit në mungesë, procedurë që tashmë lejohet nga Kodi i Procedurës Penale.

Masakra e Dubravës llogaritet ndër ngjarjet më të rënda të luftës në Kosovë. Familjarët e viktimave dhe të mbijetuarit vazhdojnë të kërkojnë drejtësi dhe përgjegjësi penale për personat që i kryen krimet.

Racaj: Krimet e forcave serbe nuk parashkruhen, nevojitet presion ndërkombëtar për të zbardhur të vërtetën

Profesori Muhamet Racaj ka thënë për “Bota Sot” se varrezat masive të zbuluara në Kosovë përbëjnë prova të pakundërshtueshme të krimeve të rënda të luftës dhe krimeve kundër njerëzimit, të kryera gjatë viteve 1998–1999 nga forcat ushtarake, policore dhe paramilitare serbe.

Sipas tij, çdo varrezë e re masive që zbulohet e përforcon të vërtetën historike dhe juridike për politikën sistematike të spastrimit etnik, të zbatuar nga regjimi i atëhershëm i Serbisë.

Racaj ka sqaruar se këto krime nuk hyjnë në kompetencën e Dhomave të Specializuara të Kosovës. Ai ka argumentuar se mandati i kësaj gjykate kufizohet në hetimin dhe gjykimin e veprave të caktuara që lidhen me pretendimet ndaj ish-pjesëtarëve të Ushtrisë Çlirimtare të Kosovës.

Për këtë arsye, sipas profesorit, Dhomat e Specializuara nuk mund t’i gjykojnë krimet e kryera nga forcat serbe.

Racaj ka nënvizuar se kufizimi i juridiksionit të kësaj gjykate nuk do të thotë se autorët duhet t’i shpëtojnë përgjegjësisë. Përkundrazi, provat e reja të siguruara nga varrezat masive duhet të përdoren për ngritjen e aktakuzave pranë mekanizmave kompetentë kombëtarë dhe ndërkombëtarë.

Ai ka rikujtuar se krimet e luftës dhe krimet kundër njerëzimit nuk i nënshtrohen parashkrimit. Si rrjedhojë, autorët mund të ndiqen penalisht pavarësisht numrit të viteve që kanë kaluar.

Në përfundim, Muhamet Racaj ka kërkuar angazhim më të fuqishëm të bashkësisë ndërkombëtare ndaj Serbisë, me qëllim zbardhjen e fatit të viktimave të luftës dhe nxjerrjen e përgjegjësve para drejtësisë.

Ai ka kërkuar që ndaj Serbisë të ushtrohet më shumë presion për hapjen e arkivave ushtarake dhe policore, për gjetjen e vendndodhjes së të gjitha varrezave masive dhe për dorëzimin e autorëve para organeve të drejtësisë. Racaj ka përfunduar për “Bota sot” se pa drejtësi nuk mund të arrihet pajtim i sinqertë, ndërsa pa zbardhjen e plotë të së vërtetës nuk mund të ketë paqe të qëndrueshme në Ballkan.

The post Varrezat masive dëshmojnë krimet serbe në Kosovë, por drejtësia vonon: A do të gjykohen përgjegjësit? appeared first on Albeu.com.

Policia e Kosovës ka bërë publike pamjet e ndalimit të personit me inicialet J.R., i dyshuar për kryerjen e krimeve të luftës.

Materiali filmik u shpërnda nga Policia e Kosovës përmes një postimi në Facebook, pasi Gjykata Themelore në Prishtinë vendosi më 3 gusht caktimin e masës së paraburgimit prej një muaji për të dyshuarin.

Gjykata e argumentoi vendimin me rrezikun se, në rast se do të qëndronte i lirë, i pandehuri mund të ndikonte te provat dhe dëshmitarët, duke vështirësuar zhvillimin normal të procedurës penale.

The post Policia publikon pamjet e arrestimit të personit të dyshuar për krime lufte appeared first on Albeu.com.

Prokuroria Speciale e Kosovës po merr në pyetje serbin e tretë të ndaluar një ditë më parë në Komunën e Zubin-Potokut, në kuadër të hetimeve për rastin “Krime të luftës”.

Ndërkohë, ndaj tij po zhvillohet seanca për përcaktimin e masës së paraburgimit, pasi dyshohet për kryerjen e veprës penale “Krime lufte kundër popullsisë civile”.

Arrestimi i të dyshuarit erdhi pas një pune intensive hetimore të kryer nga Prokuroria Speciale.

Në fshatin Kalludër e Vogël të Zubin-Potokut kanë nisur gërmimet, pasi dyshohet se aty ndodhen trupat e 23 personave të njohur si “grupi i intelektualëve” nga rajoni i Mitrovicës. Ata ishin rrëmbyer më 19 prill 1999.

Edhe pas 27 vjetësh, rrethanat dhe fati i tyre nuk janë zbardhur plotësisht.

The post Zhvillohet seanca për masën e paraburgimit ndaj serbit të arrestuar në Zubin Potok appeared first on Albeu.com.