Sipas Muçës, konflikti lidhet me një mosmarrëveshje për një pronë në zonën e Palasës. Ai pretendon se kishte shkuar për t’u sqaruar me biznesmenin Vasil Bedinaj lidhur me çështjen e pronësisë.

Muça deklaron se, pasi mbërriti në ambientet e hotelit ku ndodhej Bedinaj, situata u tensionua dhe se aty ndodheshin edhe persona të armatosur.

Sipas versionit të tij, në momentin kur ai dhe personat që e shoqëronin po largoheshin nga ambientet e hotelit, ndaj tyre është qëlluar me armë zjarri.

Biznesmeni ka akuzuar Bedinajn se kishte organizuar praninë e personave të armatosur, ndërsa pretendon se të shtënat kanë ndodhur pikërisht gjatë largimit të tyre nga vendngjarja.

Deklaratat e Muçës përbëjnë versionin e tij për ngjarjen, ndërsa rrethanat e plota të konfliktit dhe përgjegjësitë e personave të përfshirë pritet të përcaktohen nga hetimet e autoriteteve.

Reagimi i plote:

Ne lidhje me ngjarjen e fundit ku kam qene i perfshire dua te jap kete deklarate per mediat.

Kam heshtur deri tani, sepse në pozitën ku kam qenë e kam pasur të pamundur të flas dhe mendoj se publiku ka të drejtën ta dëgjojë të vërtetën drejtpërdrejt nga unë.

Që prej vitit 2019, kam vendosur të ndërmarr një investim në zonën e Palasës. Gjatë kësaj kohe, kam blerë në Palasë, nga shumë pronarë vendas, 97.000 m² tokë. Jam detyruar që, gjatë kësaj periudhe, pjesën më të madhe të tokës ta blej edhe nga dy herë.

Më datë 15.07.2021, kam aplikuar dhe kam marrë statusin e investitorit strategjik, mbështetur mbi një projekt të hartuar nga studioja ndërkombëtare EEA (Emre Arolat Architecture).

Në vitin 2022, mbi një pjesë të kësaj sipërfaqeje (26.000 m²), kam aplikuar për lejen e fazës së parë të ndërtimit të një hoteli me brand ndërkombëtar, me 5 yje.

Në vitin 2024, kam zbardhur lejen dhe kam filluar punimet për ndërtimin e këtij hoteli me brand ndërkombëtar.

Po në vitin 2024, kam bërë aplikim për fazën e dytë të këtij projekti.

Në mënyrë rastësore, nga rrjetet sociale, kam parë se ishte dhënë një leje në tokën që unë kam blerë dhe mbi të cilën ishte dhënë statusi i investitorit, sipas masterplanit të EEA Studio. Madje, po reklamohej për shitjen e njësive, apartamenteve apo vilave të ndryshme.

Pas kësaj, i jam drejtuar AZHT-së për të marrë më shumë informacion rreth kësaj çështjeje. Pas komunikimit që pata, më njoftuan se do të verifikoheshin të gjitha dokumentet e palëve dhe se, deri në momentin e përfundimit të verifikimit të dokumenteve, nuk do të kishte zbardhje të lejes së ndërtimit.

Pas rreth një ore, jam telefonuar nga shtetasi Vasil Bedinaj, i cili më kërkoi të mos i ekspozoja në AZHT pretendimet e mia mbi pronën time. Gjatë kësaj telefonate, u vendos që të takoheshim në Orikum, te hoteli i z. Bedinaj, për të diskutuar rreth kësaj situate. (Z. Bedinaj e kam njohur rreth një vit më parë, pasi ishte paraqitur në kantierin ku unë po ndërtoj në Palasë, duke kërkuar takim me mua në lidhje me disa pretendime që kishte për kufirin e pronës. Kur shkova atje, z. Bedinaj nuk ishte vetëm, por ishte i shoqëruar nga një numër i madh njerëzish të armatosur.)

Kështu, i shoqëruar nga familjarë të mi, kam shkuar, me ftesën e tij, në ambientet e biznesit të tij.

Pasi jemi takuar në Orikum dhe jemi ulur në tavolinë, sapo kam nisur t’i shpjegoj pretendimet e mia, z. Bedinaj e ka tensionuar situatën me pretendimet e veta, duke sharë dhe ofenduar.

Edhe pse nga kamerat që z. Bedinaj i ka servirur opinionit publik kjo nuk duket qartë, në këtë moment ai thirri njerëz të armatosur, të cilët ishin të pozicionuar në vende të ndryshme të ambienteve të tij.

Në këtë moment, situata ka degraduar dhe unë kam kuptuar se z. Bedinaj nuk më kishte thirrur për t’u sqaruar, por për të prodhuar skandalin e tij të radhës. Për këtë arsye, jam ngritur dhe kam ikur.

Duke dalë nga ambientet e z. Bedinaj, njerëzit që ai thirri qëlluan me armë ndaj nesh. Për sa më sipër, kërkoj nga Policia e Shtetit zbardhjen e kësaj ngjarjeje dhe identifikimin e plotë të grupit të qitësve.

Jam çuditur shumë që, gjatë kësaj situate, z. Bedinaj kishte qetësinë dhe përkujdesjen që, në të gjitha mediat mbi të cilat kishte ndikim, të shpërndante lajme të rreme, sipas të cilave unë i kisha vendosur gjobë, si dhe të shpërndante pamjet filmike nga këndet që ai dëshironte.

Kam mësuar këto ditë se nuk është hera e parë që z. Bedinaj manipulon opinionin publik për përplasjet e tij. Këtë gjë ka tentuar ta bëjë edhe në rastin tim.

Çuditërisht dhe paradoksalisht, të vetmit që e kanë besuar këtë gjë kanë qenë punonjësit e Policisë së Shtetit, të cilët më kanë mbajtur të ndaluar për 72 ore me akuzën e gjobëvënies ndaj z. Bedinaj.

Unë nuk mund të flas për veten time, pasi nuk e kam bërë kurrë më parë, sepse kam besuar se për njerëzit flasin punët dhe veprat e tyre.

Besoj se opinioni publik është i njohur me punët, brandet dhe kompanitë që kemi krijuar brenda dhe jashtë vendit.

Modestisht, mund të them se jam krijues dhe zhvillues i një konglomerati kompanish që operojnë në 4 kontinente, duke përfshirë Shtetet e Bashkuara, Indinë, si dhe vende si Italia,Senegali, Tunizia, Egjipti dhe, sigurisht, Ballkani, me një qarkullim vjetor multimilionësh.

Në këtë kontekst, fantazia e gjobës ndaj një personi me pantallona të shkurtra, i cili rrihet çdo vit me ndonjë turist, polic apo plazhist, është një fantazi dashakeqe e një grupi personash që mendojnë se, duke vjedhur pronat e të tjerëve, mund të bësh edhe para, të dalësh edhe burrë i mirë dhe të quhesh biznesmen.

Në fund, jam i gatshëm t’i vendos në dispozicion opinionit publik dhe mediave çdo dokument për të cilin kam shkruar në këtë reagim.

The post Reagon Luan Muça: Shkova për sqarim për pronën në Palasë, na pritën persona të armatosur appeared first on Albeu.com.

Skena e kësaj të enjteje në bregdetin e Vlorës mund t’i përkiste fare mirë ndonjë filmi aksion të dorës së dytë. Kamerat e sigurisë kanë fiksuar disa automjete që mbërrijnë pranë resortit të biznesmenit Vasil Bedinaj tek Regina Palm. Prej tyre zbresin më shumë se 10 persona të armatosur dhe pak më vonë Policia e Vlorës vihet në alarm. Shiko videon më poshtë:

Policia nuk u fut në detaje mbi shkaqet që çuan në përplasjen mes Luan Muçës dhe Vasil Bedinajt në Vlorë këtë të enjte, pasi motivet e ngjarjes janë ende për t’u sqaruar.

“Rreth orës 11:30, pronari i një resorti në Vlorë ka njoftuar Policinë se persona të armatosur po konfliktoheshin me të”, thuhet në njoftimin zyrtar.

Ajo që dihet me saktësi është se në afërsi të Pusit të Mezinit, policët që lajmëroi biznesmeni vlonjat Vasil Bedinaj kanë konstatuar një automjet që lëvizte me shpejtësi dhe janë vënë në ndjekje të tij. Si pasojë e shpejtësisë makina është përmbysur në rrugë dhe dy prej personave që udhëtonin aty kanë përfunduar në spital.

“Drejtuesi i këtij automjeti ka humbur kontrollin dhe është aksidentuar. Në automjet janë konstatuar 3 shtetas, 2 prej të cilëve janë dëmtuar si pasojë e aksidentit, ndërsa tjetri nuk ka probleme shëndetësore”, njoftoi Policia.

Brenda makinës policia tha se kishte gjetur një pistoletë, duke konfirmuar faktin se situata në hotel Regina, ku ishin takuar më herët dy biznesmenët ka qenë e tensionuar.

Versioni i parë që qarkulloi menjëherë pas ngjarjes ishte ai i Vasil Bedinajt. Sipas raportimeve që i referohen dëshmisë së tij në polici, biznesmeni ka pretenduar se është përballur me një skemë të pastër gjobëvënieje: një grup personash të armatosur i kishte kërkuar 5 milionë euro, duke i vendosur edhe një ultimatum.

“5 milionë euro gjobë, ndryshe zhduku nga Shqipëria”, raportohet të ketë deklaruar Bedinaj në Polici.

Por disa orë më vonë doli një version tjetër, që e ndërlikon historinë. Sipas këtij versoni të dytë, biznesmeni Luan Muça, pronari i Delta-s ka qenë vetë i pranishëm në hotel dhe është takuar me Bedinajn për t’u sqaruar në lidhje me një investim në Palasë.

Pra konflikti nuk ka lindur nga hiçi. Në mes është një mosmarrëveshje për pronën në Palasë, ku Muça po zhvillon një projekt turistik. Sipas këtij versioni, Bedinaj së bashku me persona të tjerë pretendohet se ka kërkuar një përqindje të pronës meqënëse ai ka një pronë aty pranë dhe disponon edhe daljen e rrugës. Duket se Muça e ka kundërshtuar. Takimi i kësaj të enjteje do të duhej të shërbente pikërisht për sqarimin e konfliktit.

Kompania Delta e Luan Muçës rezulton përfituese e statusit të investitorit strategjik për fazën e parë të projektit “Delta Falaise Resort & Village”. Projekti turistik shtrihet në zonën mes Palasës dhe Dhërmiut dhe është parashikuar si një kompleks hotelesh dhe vilash. Të dhënat publike e identifikojnë Luan Muçën si administrator të Delta-s dhe kompaninë si përfituese të statusit strategjik për këtë projekt.

Ndërkohë personat që e shoqëronin Muçën në takim, janë punonjës të kompanisë private “SëAT Security”, e kontraktuar për sigurinë e bizneseve të tij. Me pak fjalë, takimi mendohet se ka qenë për t’u sqaruar, por situata duhet të jetë përshkallëzuar deri në thirrjen e policisë.

Ende mungon versioni i plotë i Policisë për ngjarjen. Në njoftimin e parë, blutë e Vlorës janë treguar jashtëzakonisht të kujdesshëm. Nuk konfirmojnë gjobën prej 5 milionë eurosh, por as nuk përmendin konfliktin e pronës dhe nuk kanë identifikuar publikisht protagonistët dhe nuk ka përcaktuar se kush kërcënoi kë.

“Është ngritur një grup i posaçëm hetimor, i cili, në drejtimin e Prokurorisë, po punon për zbardhjen e dinamikës së ngjarjes dhe identifikimin e të gjithë shtetasve të përfshirë”, është formula zyrtare.

Kuptohet se policëve u duhet të tregohen shumë të kujdesshëm në këtë rast. Biznesi i madh ka ndikim të fuqishëm politk, ndaj një fjalë më shumë mund t’i hapë probleme policisë./Lapsi.al

The post VIDEO/ Dy versionet që qarkullojnë për përplasjen mes biznesmenëve Luan Muça dhe Vasil Bedinaj në Vlorë appeared first on Albeu.com.

Zanafilla e konfliktit dhe përplasja fizike
Sipas burimeve policore, ngjarja është regjistruar rreth orës 12:30, ndërsa shkak për këtë përplasje dyshohet të jetë një konflikt pronësie për një sipërfaqe toke pranë hotelit. Punonjës të kompanisë “Swat Security” dhe persona të tjerë të lidhur me Luan Muçën, janë paraqitur të armatosur në ambientet e hotelit “Regina”, ku janë përfshirë në një konfrontim fizik me përfaqësues të palës tjetër, Bedinaj. Pas konfliktit fillestar, autorët janë larguar me shpejtësi nga vendngjarja.

Ndjekja e rrezikshme dhe të shtënat me armë
Konflikti ka eskaluar menjëherë në një ndjekje të rrezikshme me automjete. Palët e përfshira kanë ndjekur njëra-tjetrën drejt rrethrrotullimit të Orikumit dhe më pas në drejtim të bypass-it.

Gjatë kësaj ndjekjeje:

Një automjet tip “Range Rover” është përmbysur nga shpejtësia, duke lënë të aksidentuar tre persona të cilët janë transportuar me urgjencë drejt spitalit.

Gjatë kontrollit në automjetin e aksidentuar, uniformat blu gjetën dhe sekuestruan një armë zjarri tip pistoletë.

Raportohet se gjatë arratisë, anëtarë të grupit të Bedinajt kanë qëlluar me armë zjarri në ajër.

Në një tjetër mjet të kontrolluar nga policia në qytetin e Fierit, janë konstatuar dy predha plumbash në brendësi.

Zgjerimi i hetimeve
Hetuesit kanë gjetur njolla gjaku në njërin prej automjeteve të sekuestruara, detaj ky që ka ngritur dyshimet për një tjetër person të plagosur gjatë përplasjes. Aktualisht, policia po kryen verifikime në spitalet e Vlorës, Fierit dhe Tiranës për të identifikuar persona të paraqitur me plagë të dyshimta. Gjithsesi, ekspertët nuk përjashtojnë mundësinë që gjaku të jetë shkaktuar nga prerjet prej xhamave të thyer të automjeteve të përfshira në aksident.

The post Përplasje me armë mes biznesmenëve në Vlorë: Shpallet në kërkim ish-deputeti Bujar Muça appeared first on Albeu.com.