Thomas Muller ka rikthyer në vëmendje mundësinë e transferimit te Manchester United në vitin 2015, duke folur për këtë çështje në podkastin “The Late Run”.

Asokohe, skuadra angleze drejtohej nga Louis van Gaal, i cili e njihte shumë mirë sulmuesin gjerman që nga koha e tij në Mynih. Trajneri holandez e kishte pranuar më vonë se dëshironte ta merrte Mullerin në “Old Trafford”.

Manchester United paraqiti një ofertë që e kalonte shifrën e 100 milionë eurove, por Bayern Munich vendosi të mos e shiste lojtarin. Megjithatë, vetë Muller pranon se largimi nga klubi bavarez nuk ishte një skenar i pamundur.

“E mendova seriozisht mundësinë e largimit, veçanërisht sepse trajneri im i parë, Louis van Gaal, ndodhej te United. Por njëkohësisht u ndjeva i lumtur që Bayerni e refuzoi ofertën”, deklaroi fillimisht Muller.

Sipas tij, vendimi i klubit ishte një dëshmi e fortë besimi. “Për mua, ishte një shenjë e madhe vlerësimi që ata nuk pranuan një ofertë prej më shumë se 100 milionë eurosh dhe thanë: ‘Në rregull, ti je lojtari ynë’”.

Van Gaal kishte luajtur një rol të rëndësishëm në zhvillimin e Mullerit, i cili nën drejtimin e tij ishte konsoliduar në formacionin e Bayernit disa vite më herët. Në vitin 2015, lojtari ishte 25 vjeç dhe tashmë kishte fituar Kupën e Botës.

“Në fund, gjithçka varet nga mënyra se si ndihesh te klubi ku je. Unë isha mirë te Bayern, por oferta ishte jashtëzakonisht e rëndësishme. Për më tepër, ekzistonte mundësia të punoja sërish me mentorin tim. Isha në të 20-at dhe mendova se ndoshta kisha ardhur në pikën për të luajtur në Ligën Premier”, shtoi 37-vjeçari.

Muller foli gjithashtu për pasiguritë që kishte përjetuar në fillimet e karrierës. “Kur je 20 vjeç dhe ende po përpiqesh të sigurosh vendin tënd, nuk ke besim absolut te vetja. Edhe pas një sezoni të parë të shkëlqyer, vazhdon të pyesësh veten: A mund ta bëj përsëri? A jam vërtet kaq i mirë?”.

“Dyshimet janë gjithmonë aty. Në atë periudhë mendoja se isha gati, por sërish u ndjeva i kënaqur që Bayerni zgjodhi të thoshte jo”, vijoi ai.

Për Mullerin, qëndrimi në Mynih kishte disa avantazhe të qarta. “Te Bayern ke pothuajse gjithçka. Përballesh me konkurrencë të madhe, merr pjesë në Ligën e Kampionëve çdo vit, jeton në një qytet fantastik dhe luan për klubin numër një në Gjermani. Si futbollist i kombëtares gjermane, je vazhdimisht në qendër të vëmendjes”.

“Më ka pëlqyer gjithmonë të jem në atë pozicion, të përballoj presionin dhe të mbaj më shumë përgjegjësi ndaj tifozëve se të tjerët”, përfundoi Muller.

Çështja e kalimit te Manchester United u mbyll disa muaj më vonë. Në dhjetor 2015, Muller rinovoi kontratën me Bayernin deri në vitin 2021 dhe më pas fitoi edhe një tjetër trofe të Ligës së Kampionëve.

The post Mendoja se isha gati për Ligën Premier”, Thomas Muller rrëfen ofertën mbi 100 milionë euro të refuzuar nga Bayerni appeared first on Albeu.com.