Burnley dhe Bristol City do të përballen sot në orën 16:00, në ndeshjen e vlefshme për javën e 5-të të Championship-it anglez, kategoria e dytë për nga rëndësia pas Premier League. Në këtë takim pritet të përplasen edhe dy futbollistët shqiptarë, Armando Broja dhe Lorent Tolaj.

Largimi i Flemming i ka krijuar Brojës më shumë mundësi për të fituar hapësirë te Burnley dhe për të dëshmuar vlerat e tij. Në anën tjetër, Tolaj është ambientuar shpejt te Bristol City, duke regjistruar një gol dhe një asist në dy ndeshjet e fundit.

Përballja e sotme mund të ketë peshë të rëndësishme për të dy lojtarët. Nëse sulmuesi nga Malësia e Madhe shënon dhe ndihmon ekipin e tij të dalë nga kriza e rezultateve, e cila përbëhet nga 2 humbje dhe 2 barazime në kampionat, ai mund të fitojë besimin e trajnerit për vazhdimësinë. Një paraqitje e tillë do të ishte gjithashtu një sinjal pozitiv për Rolando Maran të Kombëtares, në prag të ndeshjeve të Ligës së Kombeve në fund të shtatorit.

Ndërkohë, një tjetër paraqitje vendimtare e Tolajt, veçanërisht në duelin e drejtpërdrejtë me Brojën, mund ta shtyjë më shumë Federatën tonë të ndërmarrë hapa konkretë për të bindur sulmuesin e Bristol City. Lorent Tolaj është 24 vjeç dhe mund të zgjedhë mes Zvicrës, Shqipërisë dhe Kosovës.

The post Burnley–Bristol City, dueli i sotëm që vendos përballë Armando Brojën dhe Lorent Tolajn appeared first on Albeu.com.

Lorent Tolaj ka nisur të lërë gjurmë te Bristol City në Championship-in anglez. Në vetëm 4 paraqitje me skuadrën e re, sulmuesi shqiptar 24-vjeçar ka regjistruar 1 gol dhe 1 asist, duke qenë përcaktues me kontributin e tij në 2 ndeshjet e fundit.

Paraqitjet e deritanishme po e justifikojnë investimin prej 4.7 milionë eurosh që Bristol City i pagoi Plymouth për sulmuesin shqiptar. Megjithatë, forma e tij e mirë mund t’i ndërlikojë planet e Kombëtares shqiptare.

Ecuria bindëse e Tolajt ka rritur ndjeshëm vëmendjen edhe në kampet e Zvicrës dhe Kosovës. Qendërsulmuesi mund të zgjedhë të përfaqësojë Zvicrën, Kosovën ose Shqipërinë, ndërsa profili i tij do t’u shërbente shumë kuqezinjve, veçanërisht duke pasur parasysh se lojtarë me karakteristika të ngjashme janë drejt fundit të karrierës, si Rey Manaj, 29 vjeç, dhe Mirlind Daku, 28 vjeç.

Nëse 24-vjeçari ruan ritmin aktual ose vijon të përmirësohet më tej, konkurrenca mes këtij “trekëndëshi” përfaqësuesesh për shërbimet e tij pritet të bëhet edhe më e fortë.

The post Shkëlqen menjëherë te Bristol City, 24-vjeçari shqiptar ndez garën mes Shqipërisë, Kosovës dhe Zvicrës appeared first on Albeu.com.