Kosova e përfundoi pjesëmarrjen në Lojërat Mesdhetare Taranto 2026 me nëntë medalje: dy të arta, tri të argjendta dhe katër të bronzta. Ky është rezultati i saj më i mirë në historinë e kësaj gare, pas katër medaljeve në Tarragona 2018 dhe gjashtë në Oran 2022.

Për medalistët dhe trajnerët e tyre janë paraparë gjithsej 94,500 euro shpërblime. Nga kjo shumë, 70,500 euro vijnë nga vendimi i Qeverisë së Kosovës për mbështetje financiare, ndërsa 24,000 euro do të ndahen nga Komiteti Olimpik i Kosovës.

Sipas dy vendimeve, çdo medalje e artë shpërblehet me 13,000 euro për sportistin, çdo medalje e argjendtë me 7,000 euro dhe çdo medalje e bronztë me 4,000 euro.

Donjeta Sadiku në boks dhe Islam Selmani në karate, fitues të medaljeve të arta në Taranto, do të marrin nga 13,000 euro secili. Xhudistja Laura Fazliu do të përfitojë 7,000 euro për medaljen e argjendtë, kurse peshëngritësi Kianoush Rostami do të marrë gjithsej 14,000 euro për dy medaljet e argjendta.

Nga 4,000 euro do t’u ndahen edhe katër fituesve të medaljeve të bronzta në xhudo: Akil Gjakovës, Shpati Zekajt, Fatjona Kasapit dhe Flaka Loxhës.

Vendimi i MS-së dhe KOK-ut parasheh shpërblime edhe për trajnerët, në masën 50 për qind të shumës që merr medalisti përkatës. Kështu, trajneri i një fituesi të medaljes së artë përfiton 6,500 euro, ai i një medalisti të argjendtë 3,500 euro, ndërsa trajneri i një medalisti të bronztë 2,000 euro.

Për dy medaljet e argjendta të Kianoush Rostamit, shpërblimi i tij arrin në 14,000 euro. Sipas skemës së KOK-ut për medaljet, trajnerit përkatës i llogariten 7,000 euro për të dyja medaljet.

Shpërblimet vetëm për sportistët arrijnë në 63,000 euro. Kur përfshihen edhe ato të trajnerëve, shuma e përgjithshme sipas skemave të miratuara nga Qeveria dhe KOK-u bëhet 94,500 euro.

The post Taranto 2026: Sa do të marrin medalistët e Kosovës nga shpërblimet e Qeverisë dhe KOK-ut appeared first on Albeu.com.

Ministri i Sportit dhe Rinisë, Blerim Gashani, ka miratuar një mbështetje financiare të njëhershme prej 70,500 eurosh për sportistët dhe trajnerët kosovarë që fituan medalje në Lojërat Mesdhetare “Taranto 2026”. Shpërblimi është përcaktuar në varësi të llojit të medaljes.

Lajmin ministri e bëri të ditur përmes një postimi në Facebook, ku sqaroi se fondi do t’u ndahet sportistëve dhe trajnerëve si vlerësim për rezultatet e arritura në këtë aktivitet ndërkombëtar.

Sipas skemës së miratuar, fituesi i medaljes së artë do të përfitojë 10,000 euro, ndërsa trajneri i tij 5,000 euro. Për medaljen e argjendtë parashikohen 5,000 euro për sportistin dhe 2,500 euro për trajnerin, ndërsa medalja e bronztë shpërblehet me 3,000 euro për sportistin dhe 1,500 euro për trajnerin.

Gashani ka çmuar angazhimin dhe rezultatet e përfaqësuesve të Kosovës, duke theksuar se pas çdo medaljeje qëndrojnë puna dhe disiplina e sportistëve, por edhe krenaria që ajo i sjell vendit.

Ai ka nënvizuar gjithashtu se, në detyrën e ministrit, do të vijojë të angazhohet që arritjet e sportistëve të vlerësohen dhe të përkrahen nga institucionet. Në fund, ai u ka uruar sportistëve dhe trajnerëve suksese të mëtejshme.

Postimi i ministrit Gashani

Sot kam miratuar mbështetjen financiare në shumën e përgjithshme prej 70,500 eurosh për sportistët dhe trajnerët tanë, në vlerësim të rezultateve dhe medaljeve të fituara në Lojërat Mesdhetare “Taranto 2026”.

Kjo ndihmë financiare e njëhershme është ndarë sipas medaljeve të fituara:

Medalja e artë: 10,000 euro për sportistin dhe 5,000 euro për trajnerin.

Medalja e argjendtë: 5,000 euro për sportistin dhe 2,500 euro për trajnerin.

Medalja e bronztë: 3,000 euro për sportistin dhe 1,500 euro për trajnerin.

Me punën, disiplinën dhe rezultatet e tyre, sportistët tanë vazhdojnë ta përfaqësojnë me dinjitet Republikën e Kosovës në arenën ndërkombëtare. Çdo medalje është dëshmi e përkushtimit të tyre dhe një burim krenarie për vendin.

Si Ministër i Sportit dhe Rinisë, do të vazhdoj të angazhohem që rezultatet e larta sportive të marrin vlerësimin dhe mbështetjen institucionale, duke ofruar motivim, kushte dhe mundësi sa më të mira për sportistët e trajnerët tanë në rrugëtimin drejt arritjeve të reja.

Urime sportistëve dhe trajnerëve tanë për rezultatet e arritura dhe faleminderit për përfaqësimin dinjitoz të Kosovës!

The post Gashani tregon fondin prej 70,500 eurosh për sportistët dhe trajnerët e Kosovës pas medaljeve në “Taranto 2026 appeared first on Albeu.com.

Me përfundimin e ceremonisë së mbylljes së Lojërave Mesdhetare “Taranto 2026”, flamuri zyrtar i këtij eventi iu dorëzua Kosovës, e cila do të organizojë edicionin e ardhshëm në Prishtinë, në vitin 2030.

Pranimin e flamurit e bëri kryetari i Prishtinës, Përparim Rama, duke shënuar nisjen zyrtare të përgatitjeve për Lojërat Mesdhetare “Prishtina 2030”.

Në prani të më shumë se 20 mijë tifozëve në stadium, flamuri i Kosovës u vendos pranë flamurit të Italisë dhe atij të Lojërave Mesdhetare.

Basketbollisti Adhurim Alijaj ia dorëzoi flamurin Kosovës, ndërsa ceremonia vijoi me ngritjen e tij dhe ekzekutimin e himnit shtetëror të Kosovës.

Publiku ndoqi gjithashtu videon prezantuese të “Prishtina 2030”, e cila promovoi Kosovën dhe kryeqytetin e saj si vendin pritës të edicionit të ardhshëm të Lojërave Mesdhetare.

Pak para momentit të dorëzimit, flamuri i Kosovës u mbajt në ceremoninë përmbyllëse të “Taranto 2026” nga karateisti Islam Selmani dhe karateistja Fortesa Orana.

Në stadium morën pjesë edhe përfaqësuesit e Komitetit Olimpik të Kosovës, të kryesuar nga presidenti Ismet Krasniqi.

The post Nga “Taranto 2026” drejt “Prishtina 2030”: Kosova merr stafetën e Lojërave Mesdhetare appeared first on Albeu.com.

Delegacioni i Kosovës parakaloi në ceremoninë përmbyllëse të Lojërave Mesdhetare “Taranto 2026”, duke mbyllur një edicion të veçantë për sportin kosovar.

Gjatë ceremonisë, flamuri i Kosovës u mbajt nga karateistët Islam Selmani dhe Fortesa Orana, si një moment simbolik pas paraqitjes së suksesshme të ekipit në këto gara.

Në “Taranto 2026” Kosova u përfaqësua nga 163 sportistë. Nëntë prej tyre fituan medalje, duke vendosur një rekord të ri në historinë e pjesëmarrjeve kosovare në Lojërat Mesdhetare.

Mes sportistëve që siguruan medalje ishin edhe dy kampionë. Islam Selmani fitoi medaljen e artë në karate, ndërsa boksierja Donjeta Sadiku u shpall gjithashtu fituese e medaljes së artë.

Dy medalje të argjendta iu shtuan bilancit të Kosovës nga xhudistja Laura Fazliu dhe peshëngritësi Kianoush Rostami. Sportisti nga Irani, Rostami, fitoi dy medalje të argjendta duke garuar nën përfaqësimin e Kosovës.

Katër medalje të bronzta u fituan në sportin e xhudos. Akil Gjakova, Shpati Zekaj, Fatjona Kasapi dhe Flaka Loxha u ngjitën në podium, duke kontribuar në rezultatin e përgjithshëm të delegacionit.

Bilanci përfundimtar i Kosovës në “Taranto 2026” ishte dy medalje të arta, dy të argjendta dhe katër të bronzta. Ky rezultat shënoi rekord për numrin e sportistëve kosovarë që fituan medalje.

Në ceremoninë e hapjes së Lojërave Mesdhetare, flamuri i Kosovës ishte mbajtur nga boksierja Donjeta Sadiku dhe taekëondisti Bleron Ademi.

Rezultatet e arritura në “Taranto 2026” shënojnë një tjetër zhvillim të rëndësishëm për sportin kosovar. Paraqitja në disiplina të ndryshme tregon rritjen dhe konsolidimin e Kosovës në skenën ndërkombëtare të sportit.

The post Kosova përmbyll “Taranto 2026” dhe merr flamurin e Lojërave të ardhshme Mesdhetare appeared first on Albeu.com.

Ekipi i Kosovës e ka mbyllur pjesëmarrjen në Lojërat Mesdhetare ‘Taranto 2026’ me gjithsej nëntë medalje: dy të arta, tri të argjendta dhe katër të bronzta.

Ky bilanc përbën rekord të ri për Kosovën, e cila kishte fituar katër medalje në ‘Tarragona 2018’ dhe gjashtë në ‘Oran 2026’.

Donjeta Sadiku në boks dhe Islam Selmani në karate siguruan medaljet e arta. Xhudistja Laura Fazliu fitoi medalje të argjendtë, ndërsa dy të tjera të së njëjtës ngjyrë u morën nga peshëngritësi Kianoush Rostami.

Katër medaljet e bronzta i sollën xhudistët Akil Gjakova, Shpati Zekaj, Fatjona Kasapi dhe Flaka Loxha.

Për Komitetin Olimpik të Kosovës, nëntë medaljet konsiderohen rezultat i suksesshëm, ndonëse pritje për arritje kishte edhe në taekwondo, atletikë dhe në disiplinat ekipore: futboll, basketboll 3X3, hendboll dhe volejboll për meshkuj.

Ceremonia përmbyllëse do të zhvillohet sonte, të enjten. Gjatë saj, flamuri do t’i kalojë Kosovës, e cila do të jetë mikpritëse e edicionit të ardhshëm të Lojërave Mesdhetare, Prishtina 2030.

The post Kosova përfundon pjesëmarrjen në ‘Taranto 2026’ me rekord historik prej nëntë medaljesh appeared first on Albeu.com.

Kosova U18 në konkurrencën e femrave ka barazuar 1-1 me Slloveninë në ndeshjen e tretë të Lojërave Mesdhetare “Taranto 2026”.

Skuadra kosovare e nisi takimin në mënyrën më të mirë të mundshme, duke kaluar në avantazh që në minutën e gjashtë. Adela Sinani ishte ajo që shënoi për 1-0.

Epërsia e “Dardaneve” të reja zgjati deri në minutën e 26-të, kur Lana Kavas riktheu baraspeshën për Slloveninë. Pjesa e parë u mbyll me rezultatin 1-1.

Gjatë fraksionit të dytë, të dyja ekipet krijuan raste për të kaluar sërish në epërsi, por asnjëra nuk ia doli të realizonte golin e fitores. Në fund, ndeshja përfundoi me ndarjen e pikëve.

Ky ishte rezultati i parë pozitiv i Kosovës U18 në këtë edicion të Lojërave Mesdhetare. Në dy paraqitjet e mëparshme, ajo ishte mposhtur nga Portugalia dhe Maroku.

Pas barazimit, Kosova grumbulloi një pikë, ndërsa pozita përfundimtare në grup dhe fati i mëtejshëm në “Taranto 2026” do të përcaktohen në vazhdim.

The post Dardanet” e reja ndajnë pikët me Slloveninë në Lojërat Mesdhetare appeared first on Albeu.com.

Delegacioni i Kosovës e ka nisur pjesëmarrjen në Lojërat Mesdhetare Taranto 2026 me emocione të veçanta, ndërsa kënga “Mora fjalë” është bërë pjesë e atmosferës që shoqëron sportistët kosovarë në Itali.

Ky edicion i Lojërave Mesdhetare zhvillohet në Itali nga 21 gushti deri më 3 shtator, me garues nga vendet e Mesdheut.

Kosova në këtë ngjarje përfaqësohet nga 163 sportistë, prej të cilëve 87 meshkuj dhe 76 femra. Ata do të garojnë në 21 sporte të ndryshme, duke shënuar pjesëmarrjen më të madhe të vendit në një aktivitet ndërkombëtar shumësportësh.

Që prej ditëve të para në Taranto, kënga e njohur e interpretuar nga Shkurte Fejza është dëgjuar në hapësirat ku qëndrojnë dhe lëvizin sportistët kosovarë, si edhe pranë ambienteve të garave.

Prania e saj ka krijuar një atmosferë të veçantë, duke përcjellë emocionet, krenarinë dhe lidhjen e delegacionit me Kosovën.

“Mora Fjalë” është shndërruar kështu në kolonën zanore të qëndrimit të delegacionit kosovar në Taranto, duke i dhënë një karakter të veçantë pjesëmarrjes së tij në këtë event ndërkombëtar.

Një paraqitje dinjitoze u vu re edhe gjatë ceremonisë së hapjes, ku sportistët dhe stafi i Kosovës parakaluan me krenari dhe u pritën me ovacione të mëdha nga të pranishmit.

Pas përfundimit të ceremonisë, fokusi kalon te garat. Sportistët kosovarë synojnë rezultate sa më të mira dhe medalje, në mënyrë që pjesëmarrja rekord e Kosovës në Taranto 2026 të shoqërohet edhe me suksese sportive.

The post Kosova nis rrugëtimin në Taranto 2026 mes jehonës së “Mora fjalë” dhe një parakalimi krenar appeared first on Albeu.com.

Në Lojërat Mesdhetare Taranto 2026, Kosova do të paraqitet me delegacionin më të madh që ka pasur ndonjëherë në historinë e pjesëmarrjeve të saj në këtë ngjarje shumë-sportëshe, ka njoftuar Komiteti Olimpik i Kosovës (KOK).

Delegacioni kosovar do të përbëhet nga 163 sportistë, përkatësisht 87 meshkuj dhe 76 femra. Ata do të konkurrojnë në 21 sporte, me objektivin që ta përfaqësojnë vendin në mënyrë sa më të denjë në arenën ndërkombëtare.

Ky edicion do të shënojë gjithashtu debutimin e Kosovës në katër sporte ekipore. Në futboll do të paraqiten ekipi U21 i meshkujve dhe ai U19 i femrave, ndërsa në volejboll Kosova do të konkurrojë në të dyja konkurrencat. Përfaqësim me meshkuj dhe femra do të ketë edhe në hendboll, si dhe në basketbollin 3×3 në të dyja kategoritë.

Kosova shkon në Taranto pas rezultateve të shënuara në dy edicionet e fundit të Lojërave Mesdhetare, në të cilat ka siguruar gjithsej 10 medalje, nëntë prej tyre në xhudo dhe një në boks.

Garat e Lojërave Mesdhetare Taranto 2026 janë planifikuar të zhvillohen nga 21 gushti deri më 3 shtator. Për Kosovën, një domethënie të posaçme do të ketë ceremonia përmbyllëse.

Gjatë kësaj ceremonie, Kosovës do t’i dorëzohet zyrtarisht flamuri i Lojërave Mesdhetare, pasi vendi do të marrë rolin e mikpritësit të edicionit pasues, Prishtina 2030.

The post Kosova me numër rekord sportistësh në Lojërat Mesdhetare Taranto 2026 appeared first on Albeu.com.