Delegacioni i Kosovës e ka nisur pjesëmarrjen në Lojërat Mesdhetare Taranto 2026 me emocione të veçanta, ndërsa kënga “Mora fjalë” është bërë pjesë e atmosferës që shoqëron sportistët kosovarë në Itali.

Ky edicion i Lojërave Mesdhetare zhvillohet në Itali nga 21 gushti deri më 3 shtator, me garues nga vendet e Mesdheut.

Kosova në këtë ngjarje përfaqësohet nga 163 sportistë, prej të cilëve 87 meshkuj dhe 76 femra. Ata do të garojnë në 21 sporte të ndryshme, duke shënuar pjesëmarrjen më të madhe të vendit në një aktivitet ndërkombëtar shumësportësh.

Që prej ditëve të para në Taranto, kënga e njohur e interpretuar nga Shkurte Fejza është dëgjuar në hapësirat ku qëndrojnë dhe lëvizin sportistët kosovarë, si edhe pranë ambienteve të garave.

Prania e saj ka krijuar një atmosferë të veçantë, duke përcjellë emocionet, krenarinë dhe lidhjen e delegacionit me Kosovën.

“Mora Fjalë” është shndërruar kështu në kolonën zanore të qëndrimit të delegacionit kosovar në Taranto, duke i dhënë një karakter të veçantë pjesëmarrjes së tij në këtë event ndërkombëtar.

Një paraqitje dinjitoze u vu re edhe gjatë ceremonisë së hapjes, ku sportistët dhe stafi i Kosovës parakaluan me krenari dhe u pritën me ovacione të mëdha nga të pranishmit.

Pas përfundimit të ceremonisë, fokusi kalon te garat. Sportistët kosovarë synojnë rezultate sa më të mira dhe medalje, në mënyrë që pjesëmarrja rekord e Kosovës në Taranto 2026 të shoqërohet edhe me suksese sportive.

The post Kosova nis rrugëtimin në Taranto 2026 mes jehonës së “Mora fjalë” dhe një parakalimi krenar appeared first on Albeu.com.

Ministri në detyrë i Rinisë dhe Sportit, Blerim Gashani, prezantoi para Asamblesë së Përgjithshme të Komitetit Ndërkombëtar të Lojërave Mesdhetare (ICMG) ecurinë e përgatitjeve të Kosovës për organizimin e Lojërave Mesdhetare Prishtina 2030.

Gjatë raportimit, ai foli për punën e zhvilluar deri tani dhe rezultatet e arritura në kuadër të përgatitjeve për këtë ngjarje të rëndësishme sportive ndërkombëtare.

Përfaqësuesit e vendeve anëtare u njohën me hapat e ndërmarrë nga Kosova përmes materialeve vizuale, statistikave dhe të dhënave konkrete lidhur me organizimin e Lojërave.

Raportimi u zhvillua në kuadër të agjendës së rregullt të Asamblesë së Përgjithshme të ICMG-së, ku vendet nikoqire paraqesin përparimin dhe zhvillimet në përgatitje të edicioneve të ardhshme të Lojërave Mesdhetare.

Gjatë prezantimit ndodhi edhe një incident diplomatik. Delegacioni i Serbisë u largua nga salla në shenjë proteste dhe kundërshtimi, teksa po paraqiteshin përgatitjet e Kosovës për Prishtina 2030.

Megjithatë, largimi i delegacionit serb nuk e ndërpreu raportimin. Prezantimi vijoi dhe ekipi përgjegjës për organizimin e Prishtina 2030 paraqiti progresin e bërë deri më tani.

Kosova synon që gjatë katër viteve të ardhshme të përfundojë përgatitjet infrastrukturore dhe organizative, në mënyrë që të jetë gati për organizimin e Lojërave Mesdhetare në vitin 2030. /Kosovapress/

The post Delegacioni i Serbisë largohet nga salla gjatë prezantimit të Kosovës për Prishtina 2030 appeared first on Albeu.com.

Asambleja e Përgjithshme Zgjedhore e Komitetit Ndërkombëtar të Lojërave Mesdhetare zhvillohet sot në Taranto të Italisë. Ky takim ka rëndësi të veçantë edhe për Kosovën, e cila është duke u përgatitur për organizimin e Lojërave Mesdhetare “Prishtina 2030”.

Kosova do të marrë pjesë në mënyrë aktive në diskutimet për të ardhmen e Lojërave Mesdhetare gjatë kësaj asambleje, ku pritet të zgjidhet presidenti i ri për mandatin e ardhshëm. Ministri në detyrë i Rinisë dhe Sportit, Blerim Gashani, pritet të paraqesë një raport mbi punën dhe përgatitjet për organizimin e “Prishtina 2030”.

Prezantimi i Gashanit para drejtuesve të ICMG-së dhe përfaqësuesve të komiteteve olimpike zhvillohet në një periudhë me rëndësi për Kosovën. Përmes organizimit të kësaj ngjarjeje të madhe sportive ndërkombëtare, vendi synon të tregojë aftësitë e tij për ta mirëpritur atë.

Takimi i sotëm i krijon Kosovës edhe mundësinë që t’i njohë drejtuesit e rinj të ICMG-së me përparimin e arritur deri tani, si dhe me masat që parashikohet të ndërmerren gjatë viteve të ardhshme për përgatitjen e Prishtinës për Lojërat Mesdhetare të vitit 2030.

The post Asambleja e ICMG-së zhvillohet sot në Taranto, Kosova paraqet ecurinë e përgatitjeve për “Prishtina 2030 appeared first on Albeu.com.

Kosova do të përfaqësohet me 163 sportistë në Lojërat Mesdhetare “Taranto 2026”, ndërsa nderi për të bartur flamurin në ceremoninë e hapjes u është besuar boksieres Donjeta Sadiku dhe taekwondistit Bleron Ademi.

Sadiku dhe Ademi e pranuan flamurin shtetëror nga kryeministri në detyrë, Albin Kurti, gjatë ceremonisë së prezantimit të ekipit kosovar që do të marrë pjesë në këtë aktivitet të rëndësishëm sportiv.

Edicioni i ardhshëm i Lojërave Mesdhetare do të mbahet në Taranto të Italisë nga 21 gushti deri më 3 shtator. Një pjesë e konsiderueshme e përfaqësueses së Kosovës u mblodh të dielën pasdite në Sallën e Kuqe të Pallatit të Rinisë në Prishtinë.

Pjesëmarrja në “Taranto 2026” ka peshë të veçantë për Kosovën, pasi Prishtina do të organizojë Lojërat Mesdhetare në vitin 2030. Për këtë arsye, Komiteti Olimpik i Kosovës ka synuar që në Taranto të dërgojë një delegacion sa më të gjerë.

Gjatë aktivitetit, kryeministri në detyrë Albin Kurti u përcolli sportistëve mbështetjen e tij dhe vlerësoi angazhimin, punën dhe sakrificat e tyre në përfaqësimin e Kosovës në arenën ndërkombëtare.

“Jemi këtu për t’iu thënë sportistëve tanë një gjë të thjeshtë dhe të rëndësishme – Kosova është me ju. Pas secilës medalje, fitoreje dhe çdo flamuri të Kosovës të ngritur në arenat ndërkombëtare qëndrojnë vjet pune, sakrifice, discipline dhe besimi. Këto janë vlerat që sporti i kultivon më së miri dhe të cilat i duhen shoqërisë sonë”, ka deklaruar Kurti.

Kurti rikujtoi edhe sukseset e sportistëve kosovarë në kompeticionet ndërkombëtare, duke theksuar rolin e tyre në afirmimin e shtetit.

“Sportistët tanë kanë dëshmuar se pavarësisht madhësisë së vendit mund të kemi rezultate të mëdha. Në garat më të rëndësishme ndërkombëtare, sportistët kanë bërë që emri i Kosovës të dëgjohet, flamuri të valëvitet dhe himni të intonohet me krenari”, ka shtuar ai.

Ky edicion do të shënojë një tjetër moment historik për Kosovën, pasi për herë të parë ajo do të marrë pjesë edhe në sportet ekipore: futboll, hendboll, volejboll dhe basketboll 3×3. Në dy edicionet e kaluara, përfaqësimi kosovar ishte kufizuar vetëm te disiplinat individuale.

Megjithatë, shpresat kryesore për medalje mbeten të lidhura me sportet individuale, me xhudon në veçanti.

Driton Kuka, kryemjeshtri i xhudos, është i vetëdijshëm se ekipi i tij do të jetë nën vëmendje të madhe dhe se nga xhudistët kosovarë priten rezultate të rëndësishme.

“E veçanta e Tarantos është që flamurin e organizimit në fund do ta marrim dhe do ta bartim në shtetin e Kosovës”, ka thënë Kuka.

Sportistët kosovarë në ceremoni i përfaqësoi Laura Fazliu. Fituesja e medaljes olimpike konsiderohet ndër emrat me potencial të madh për të fituar medalje në këtë edicion.

Lojërat Mesdhetare “Taranto 2026” do të mbledhin më shumë se 3 mijë e 800 sportistë nga 26 vende. Me 163 pjesëmarrës, Kosova do të ketë një nga delegacionet më të mëdha të këtij edicioni.

The post Delegacioni i Kosovës me 163 sportistë në “Taranto 2026”, Sadiku dhe Ademi flamurtarë në ceremoninë hapëse appeared first on Albeu.com.